សភាថៃបន្តដាក់ញត្តិ ស្នើឲ្យបើកច្រកចូលប្រាសាទព្រះវិហារ
សមាជិកសភាមកពីបក្សភឿថៃចំនួន៧រូប បានដាក់ញត្តិទៅកាន់នាយករដ្ឋមន្រ្តីថៃ ដើម្បីស្នើឲ្យបើកការពិភាក្សាជាមួយរដ្ឋាភិបាលកម្ពុជា ជុំវិញការបើកច្រកផ្លូវចូលប្រាសាទព្រះវិហារនៅប៉ែកខាងថៃ។ នេះជាការស្នើសុំជាថ្មីទៀតមកកាន់ភាគីកម្ពុជា បន្ទាប់សំណើចាស់់ត្រូវបានច្រានចោលដោយអាណ្ណត្តិដឹកនាំដោយរដ្ឋាភិបាលចាស់។
ចុះផ្សាយនៅថ្ងៃ៖
ស្តាប់ - ០១:៤៥
សមាជិកសភាចំនួន៧រូបដែលមកពីគណបក្សភឿថៃ បានដាក់ញត្តិទៅកាន់លោក Srettha Thavisin នាយករដ្ឋមន្រ្តីថៃថ្មី ដោយស្នើឲ្យស្វែងរកការពិភាក្សាជាមួយរដ្ឋាភិបាលកម្ពុជា ក្នុងការបើកច្រកផ្លូវចូលប្រាសាទព្រះវិហារនៅប៉ែកខាងថៃ។ សមាជិកសភាថៃទាំងនេះ រួមមាន រដ្ឋមន្រ្តីការពារជាតិថៃ និងមេបញ្ជាការកងកម្លាំងការពារSuranareeរបស់ថៃដែលធ្លាប់ដឹកនាំកងទ័ពប្រឈមមុខជាមួយកងទ័ពកម្ពុជាក្នុងសំណុំរឿងប្រាសាទព្រះវិហារនេះកាលពីឆ្នាំ២០១០។ នេះយោងតាមការផ្សាយរបស់កាសែតបាងកកប៉ុស្តិ៍នៅថ្ងៃទី១៧ខែធ្នូនេះ។
តាមការផ្សាយរបស់កាសែតបាងកកប៉ុស្តិ៍របស់ថៃដដែលនេះ រដ្ឋមន្រ្តីការពារជាតិថៃ លោកSatin Klungsang គូសបញ្ជាក់ថា មូលហេតុដែលលោកចង់ឲ្យកម្ពុជាបើកច្រកផ្លូវចូលទៅប្រាសាទព្រះវិហារនៅប៉ែកខាងថៃនេះ គឺដើម្បីបង្កើនសកម្មភាពទេសចរណ៍តាមព្រំដែនថៃ ដែលជាគោលនយោបាយរបស់ប្រទេស។ រដ្ឋមន្រ្តីការពារជាតិថៃរូបនេះ ក៏បានបង្ហាញក្ដីសង្ឃឹមថា ទំនាក់ទំនងល្អរវាងអតីតនាយករដ្ឋមន្រ្តីថៃលោកថាក់ស៊ីន និងអតីតនាយករដ្ឋមន្ត្រីខ្មែរលោកហ៊ុន សែន ក៏អាចជួយឈូសឆាយផ្លូវទៅរកការព្រមព្រៀងគ្នានេះដែរ។
ចំណែកលោកឧត្តមសេនីយ៍ Nut Sri-In មេបញ្ជាការកងកម្លាំងការពារSuranareeរបស់ថៃ ធានាថាការបើកច្រកព្រំដែននេះ ក៏នឹងមិនប៉ះពាល់ដល់សន្តិសុខជាតិនៃប្រទេសទាំងពីរដែរ។
ប៉ុន្តែអ្នកនាំពាក្យរដ្ឋាភិបាលលោកប៉ែន បូណា បានគូសបញ្ជាក់ថា លទ្ធភាពទៅរួចឬអត់នោះគឺទាល់តែមានការស្នើសុំជាផ្លូវការពីនាយករដ្ឋមន្រ្តីថៃជាមុនសិន។
សំឡេង អ្នកនាំពាក្យរដ្ឋាភិបាលលោកប៉ែន បូណា
ជាការកត់សម្គាល់ គម្រោងរបស់សមាជិកថៃកើតឡើងស្របពេលដែលប្រទេសទាំងពីរប្ដូរមេដឹកនាំថ្មី និងក្រោយពេលដែលកម្ពុជាធ្លាប់បដិសេធសំណើនេះម្ដងរួចហើយ។
គួរបញ្ជាក់ដែរថា ព្រំដែនតំបន់ប្រាសាទវិហារត្រូវបានបិទ កាលពី១៥ឆ្នាំមុន ចាប់តាំងពីកងទ័ពនៃប្រទេសទាំងពីរ បានប៉ះទង្គិចគ្នាដោយប្រដាប់អាវុធអំឡុងឆ្នាំ២០០៨មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ