គ្រឿងញៀន៖តុលាការខេត្តព្រះសីហនុដាក់ទោសចិន៦នាក់ និងខ្មែរ១នាក់ឲ្យជាប់គុកម្នាក់ៗ២០ឆ្នាំ
ជនជាតិចិន៦នាក់ និងខ្មែរ១នាក់ ត្រូវបានតុលាការខេត្តព្រះសីហនុផ្តន្ទាទោសកាលពីថ្ងៃទី៣១ ខែមករា ឆ្នាំ២០២៤ ដាក់ពន្ធនាគារម្នាក់ៗចំនួន ២០ឆ្នាំ និងពិន័យជាប្រាក់ម្នាក់ៗ ៤០លានរៀល(១ម៉ឺនដុល្លារ)ពីបទជួញដូរគ្រឿងញៀនជិត១តោន និងសម្អាតប្រាក់។ ការផ្តន្ទាទោសនេះ គឺយោងទៅលើច្បាប់ស្តីពីការត្រួតពិនិត្យគ្រឿងញៀន និងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
ចុះផ្សាយនៅថ្ងៃ៖
ស្តាប់ - ០២:១៧
បុរសជនជាតិចិនដីគោក ៦នាក់ ដែលមានអាយុចាប់ពីជាង៣០ឆ្នាំ ដល់ជាង៥០ឆ្នាំ រួមនឹងបុរសជនជាតិខ្មែរម្នាក់ ត្រូវសាលាដំបូងខេត្តព្រះសីហនុប្រកាសផ្តន្ទាទោសឲ្យជាប់ពន្ធនាគារម្នាក់ៗ ២០ឆ្នាំ និងត្រូវពិន័យជាប្រាក់ម្នាក់ៗ ៤០លានរៀល។ ពួកគេបានជាប់ចោទពីបទបានរក្សាទុក និងដឹកជញ្ជូនសារធាតុញៀនដោយខុសច្បាប់ និងបទលាងសម្អាតប្រាក់។ នេះបើតាមសេចក្តីប្រកាសព័ត៌មានរបស់សាលាដំបូងខេត្តព្រះសីហនុ។
សូមបញ្ជាក់ថាតុលាការបានបើកសវនាការកាលពីថ្ងៃទី០៩ ខែមករា ឆ្នាំ២០២៤ ក្រោយសមត្ថកិច្ចខេត្តព្រះសីហនុបង្ក្រាបបានករណីនេះកាលពីឆ្នាំ២០២១ ដោយរឹបអូសបានសារធាតុញៀនប្រភេទកេតាមីនចំនួនជាង ៨៧០គីឡូក្រាម និងពាក់ព័ន្ធការប្រព្រឹត្តបទល្មើសសម្អាតប្រាក់ផងដែរ។
តុលាការក៏បានសម្រេចរឹបអូសវត្ថុតាងរួមមានកប៉ាល់១គ្រឿង អូប័រ៥គ្រឿង ទូក រថយន្ត ម៉ូតូ និងប្រាក់ជាង ៩៥ ០០០ដុល្លារ និងបំផ្លាញគ្រឿងញៀនទាំងអស់ដែលរឹបអូសបាន។ ដោយឡែក ជនជាប់ចោទជាជនជាតិចិនទាំង៦នាក់ នឹងត្រូវបណ្តេញចេញពីប្រទេសកម្ពុជាបន្ទាប់ពីអនុវត្តទោសចប់។
លោក យង់ គិមអេង នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពមើលឃើញថាការដាក់ទោសរបស់តុលាការកម្ពុជាទៅលើឧក្រិដ្ឋជនគ្រឿងញៀននេះ មិនទាន់ធ្ងន់ធ្ងរនៅឡើយទេ បើប្រៀបធៀបទៅនឹងប្រទេសជិតខាង ដែលបទល្មើលកំរិតដូចគ្នានេះអាចជាប់ទោសអស់មួយជីវិត ឬប្រហារជីវិត។ ទោះយ៉ាងណាលោកថា ការដាក់ទោស២០ឆ្នាំ ក៏ជាការប្រសើរដែរ ជាជាងការបណ្តោយឲ្យជនល្មើសរួចទោស ឬនៅក្រៅសំណាញ់ច្បាប់។
សូមបញ្ជាក់ថារយៈពេលជាង៥ខែ នៃការចេញដំណើររបស់រដ្ឋាភិបាលថ្មីដែលដឹកនាំដោយលោកនាយករដ្ឋមន្ត្រី ហ៊ុន ម៉ាណែត គេនៅមិនទាន់មានតួលេខជាក់លាក់ស្តីពីការប្រយុទ្ធប្រឆាំងគ្រឿងញៀននៅឡើយ។ តែគេបានកត់សម្គាល់ថា ចរាចរណ៍គ្រឿងញៀនទ្រង់ទ្រាយធំចាប់ពីកំរិតច្រើនជាង១តោនក្នុង១ករណីហាក់បានកើតឡើងបន្តបន្ទាប់នារយៈពេលចុងក្រោយនេះ។
យោងតាមរបាយការណ៍របស់សមត្ថកិច្ចគ្រឿងញៀន សារធាតុញៀនគ្រប់ប្រភេទជាង ២៧តោន និងសារធាតុគីមីផ្សំប្រមាណ ៥២០តោន ត្រូវបានរឹបអូសចាប់តាំងពីឆ្នាំ២០១៧ រហូតដល់ ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ