បោះឆ្នោតព្រឹទ្ធសភា៖បក្សប្រឆាំងជំរុញក្រសួងមហាផ្ទៃដោះស្រាយសំណើខ្លួនដើម្បីធានាការស្មើភាព
មន្ត្រីជាន់ខ្ពស់គណបក្សភ្លើងទៀននៅថ្ងៃចន្ទ ទី១២ ខែកុម្ភៈនេះ បានអះអាងពីការបន្តទាមទារឲ្យក្រសួងមហាផ្ទៃប្រញាប់ផ្លាស់ប្តូរសមាសភាពក្រុមប្រឹក្សាឃុំសង្កាត់គណបក្សភ្លើងទៀន ដែលត្រូវបានបញ្ចប់សមាជិកភាព និងទៅចូលរួមជាមួយគណបក្សថ្មី។ ការទាមទារនេះ ត្រូវបានមន្ត្រីជាន់ខ្ពស់ក្រសួងមហាផ្ទៃឆ្លើយតបថា ក្រសួងនឹងមានដំណោះស្រាយ ប្រសិនបើលិខិតស្នើសុំរបស់បក្សប្រឆាំងបានមកដល់ដៃក្រសួងមហាផ្ទៃ។
ចុះផ្សាយនៅថ្ងៃ៖
ស្តាប់ - ០២:៣៧
ជាថ្មីម្តងទៀត លោក លី សុធារ៉ាយុត្តិ អគ្គលេខាធិការគណបក្សភ្លើងទៀន បានប្រាប់វិទ្យុបារាំង RFI ថា គណបក្សនៅតែជំរុញឲ្យក្រសួងមហាផ្ទៃប្រញាប់ផ្លាស់ប្តូរសមាសភាពក្រុមប្រឹក្សាឃុំសង្កាត់ថ្មីតាមការស្នើសុំផ្លូវការរបស់គណបក្សដើម្បីធានានូវការបោះឆ្នោតមួយ ប្រកបដោយភាពត្រឹមត្រូវ សេរី និងស្មើភាពគ្នា ហើយមិនប៉ះពាល់ដល់អង្គបោះឆ្នោត និងលទ្ធផលនៃការបោះឆ្នោតអសកលខាងមុខ។
ក៏ប៉ុន្តែលោក ខៀវ សុភ័ក អ្នកនាំពាក្យក្រសួងមហាផ្ទៃបានបញ្ជាក់ថាក្រសួងមហាផ្ទៃមិនទាន់ទទួលបានសំណើសុំផ្លាស់ប្តូររបស់គណបក្សភ្លើងទៀនទេ។ អ្នកនាំពាក្យរូបនេះប្រាប់ឲ្យអ្នកស្នើសុំបញ្ជាក់ឲ្យបានច្បាស់លាស់ពីសំណើរបស់ខ្លួនថាមូលហេតុអ្វីបានជាមានការរាំងស្ទះ?
ជាមួយគ្នានេះ លោក គីមសួរ ភីរិទ្ធ បេក្ខជនឈរឈ្មោះគណបក្សឆន្ទៈខ្មែរសម្រាប់ការបោះឆ្នោតព្រឹទ្ធសភាឆ្នាំ២០២៤ បានហៅការខកខានផ្លាស់ប្តូរសមាសភាពក្រុមប្រឹក្សាឃុំសង្កាត់ របស់គណបក្សភ្លើងទៀនថាមានភាពមិនប្រក្រតី និងមានការឃុបឃិតគ្នា។ តាមលោក គីមសួរ ភីរិទ្ធ លិខិតសុំផ្លាស់ប្តូរត្រូវបានរាំងស្ទះនៅតាមឃុំ ដោយមេឃុំមួយចំនួនធំមិនព្រមចុះហត្ថលេខាលើសំណើរបស់គណបក្សភ្លើងទៀន និងថានេះគឺជាការបំពានច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់។ លោកថា សកម្មភាពដូចនេះ មានហេតុផលនយោបាយ ដែលលោកពិបាកនឹងទទួលយក។
សូមបញ្ជាក់ថា គណបក្សភ្លើងទៀនបានដាក់សំណើជាបន្តបន្ទាប់ទៅក្រសួងមហាផ្ទៃ តាមរយៈអាជ្ញាធរឃុំសង្កាត់ដើម្បីសុំផ្លាស់ប្តូរសមាសភាពក្រុមប្រឹក្សាឃុំសង្កាត់របស់ខ្លួនជាង៣០នាក់ ដែលបានទៅចូលរួមជាមួយគណបក្សដទៃ។
យោងតាមមាត្រា១៦នៃច្បាប់ស្តីពីការគ្រប់គ្រងរដ្ឋបាលឃុំសង្កាត់ សាម៉ីខ្លួនបាត់សមាជិកភាពពីគណបក្សនយោបាយរបស់ខ្លួន កាលបើសមាជិកក្រុមប្រឹក្សាឃុំ សង្កាត់មួយត្រូវបាត់បង់សមាជិកភាព ត្រូវជ្រើសរើសបេក្ខជនដែលមានឈ្មោះបន្ទាប់តាមលេខរៀងក្នុងបញ្ជីបេក្ខជនជាមួយមកជំនួសដោយមិនបាច់បោះឆ្នោតឡើងវិញឡើយ។
ទោះយ៉ាងណា ការទាមទាររបស់គណបក្សភ្លើងទៀនត្រូវគេមើលឃើញថាយឺតពេលទៅហើយ។ យឺតពេលដោយសារ បញ្ជីបោះឆ្នោតដែលត្រូវបានផ្តល់សុពលភាពហើយមិនអាចកែប្រែបានទេ លើកលែងតែមានអ្នកបោះឆ្នោតណាម្នាក់ ដែលមានឈ្មោះក្នុងបញ្ជីបោះឆ្នោតទទួលមរណភាព។ នេះបើយោងតាមមាត្រា១១ នៃច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។
សូមរំលឹកដែរថា កម្ពុជានឹងត្រូវបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នៅថ្ងៃទី២៥ ខែកុម្ភៈ ឆ្នាំ២០២៤។ បច្ចុប្បន្ន គណបក្សនយោបាយចំនួន៤ កំពុងបើកយុទ្ធនាការឃោសនាដែលថ្ងៃចន្ទ ទី១២ ខែកុម្ភៈនេះជាថ្ងៃឃោសនាទី៣ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ