ក្នុងមួយខែមករា កម្ពុជាចំណាយទិញជីកសិកម្មពីបរទេសក្នុងទឹកប្រាក់ប្រមាណ ២៦លានដុល្លារ
កម្ពុជាបានចំណាយលើការនាំចូលជីកសិកម្មពីបរទេសក្នុងទំហំទឹកប្រាក់ប្រមាណ ២៦លានដុល្លារអាមេរិកក្នុងរយៈពេល ១ខែមករា ឆ្នាំ២០២៤។ នេះជាតួលេខនៅក្នុងរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។ ជាការកត់សម្គាល់ ការនាំចូលជីកសិកម្មពីបរទេសរបស់កម្ពុជាដើម្បីផ្គត់ផ្គង់ដល់តម្រូវការរបស់ប្រជាកសិករក្នុងស្រុកនៅតែបន្តកើនឡើងដដែល ទោះបីជាវិស័យកសិកម្មរបស់កម្ពុជាបន្តរងផលប៉ះពាល់ពីវិបត្តិសកលក៏ដោយ។
ចុះផ្សាយនៅថ្ងៃ៖
ស្តាប់ - ០២:១៥
ផ្អែកតាមស្ថិតិពាណិជ្ជកម្មនាំចូលរបស់គយ ការនាំចូលជីកសិកម្មពីបរទេសក្នុងខែមករាមានទឹកប្រាក់ប្រមាណ ២៦លានដុល្លារ ពោលកើនឡើងចំនួន៤០% បើធៀបនឹងរយៈពេលដូចគ្នាកាលពីឆ្នាំ២០២៣ដែលមានទឹកប្រាក់ប្រមាណ១៨លានដុល្លារអាមេរិក។
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជាបានថ្លែងបញ្ជាក់ថា តម្លៃជីកសិកម្មបច្ចុប្បន្នកំពុងឡើងថ្លៃខ្លាំងដែលជាហេតុធ្វើឱ្យការចំណាយលើថ្លៃជីមានកម្រិតខ្ពស់ខ្លាំងជាងសព្វមួយដង។ អ្វីដែលលោកថេង សាវឿនបារម្ភខ្លាំងនោះគឺថា ការចំណាយច្រើនលើការទិញជីកសិកម្មរបស់ប្រជាកសិករបានធ្វើឲ្យថ្លៃដើមរបស់ទំនិញកសិកម្មមានតម្លៃខ្ពស់ ខណៈដែលការលក់ចេញទទួលបានផលចំណេញតិចតួច។
នៅចំពោះមុខបញ្ហាជីថ្លៃនេះ លោក ថេង សាវឿនស្នើឱ្យរដ្ឋាភិបាលក៏ដូចជាសហគ្រាសធុនតូច និងមធ្យមនៅកម្ពុជារួមគ្នាពិនិត្យលទ្ធភាពបង្កើតរោងចក្រផលិតនិងកែឆ្នៃជីកសិកម្មធម្មជាតិឲ្យបានច្រើនដើម្បីលក់ក្នុងតម្លៃថោកឲ្យប្រជាកសិករក្នុងស្រុក រួមនឹងការលក់ចេញទៅបរទេសដើម្បីអាចទាញបានចំណូលបន្ថែម។
គួរកត់សម្គាល់ថាកន្លងមក ប្រជាពលរដ្ឋខ្មែររស់នៅតាមបណ្តោយព្រំដែនវៀតណាមដូចជាខេត្តស្វាយរៀង ឬកំពតបាននាំគ្នាប្រមូលលាមកគោក្របីស្ងួតលក់ឱ្យឈ្មួញខ្មែរ និងវៀតណាមដើម្បីដឹកចេញទៅវៀតណាមសម្រាប់កែឆ្នៃជាជីកសិកម្ម។ បន្ទាប់មក លាមកគោក្របីដែលកែឆ្នៃចេញជាជីធម្មជាតិរួចទាំងនោះត្រូវបាននាំចូលលក់ឲ្យកម្ពុជាវិញក្នុងតម្លៃមួយខ្ពស់ខ្លាំងជាងតម្លៃវត្ថុធាតុដើម។
សូមបញ្ជាក់ថាកាលពីឆ្នាំ២០២៣ កម្ពុជាបាននាំចូលជីកសិកម្មពីបរទេស ពិសេសពីប្រទេសជិតខាងក្នុងទំហំទឹកប្រាក់ជាង៣២៥លានដុល្លារអាមេរិក ពោលកើនជាង ១៧% បើធៀបនឹងឆ្នាំ២០២២ដែលមានប្រមាណ២៧៦លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ