គណបក្សហ៊្វុនស៊ិនប៉ិច និងគណបក្សកម្លាំងជាតិសង្ឃឹមនឹងមានអាសនៈព្រឹទ្ធសភា
គណបក្សហ៊្វុនស៊ិនប៉ិច និងគណបក្សកម្លាំងជាតិដែលជាគណបក្សក្រៅរដ្ឋាភិបាលសុទ្ធតែមានជំនឿនឹងទទួលបានអាសនៈខ្លះពីការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ខាងមុខនេះ។ ការដាក់ក្តីរំពឹងរបស់គណបក្សទាំងពីរដោយសំអាងលើអង្គបោះឆ្នោតមកពីគណបក្សផ្សេងដែលគេជឿជាក់ថាជាក្រុមប្រឹក្សាឃុំសង្កាត់ដែលស្រលាញ់លទ្ធិប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:៥១
លោក ញឿន រ៉ាដែន សមាជិកសភា និងជាអ្នកនាំពាក្យគណបក្សហ៊្វុនស៊ីនប៉ិច បានបា្រប់វិទ្យុបារាំង RFI នៅថ្ងៃចន្ទ ទី១៩ ខែកុម្ភៈនេះថា គណបក្សហ៊្វុនស៊ីនប៉ិចរំពឹងថានឹងមានការគាំទ្រពីអង្គបោះឆ្នោតនៅក្នុងការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នៅថ្ងៃអាទិត្យ ទី២៥ ខែកុម្ភៈចុងសប្តាហ៍នេះ។
សូមបញ្ជាក់ថា គណបក្សហ៊្វុនស៊ីនប៉ិចមានអង្គបោះឆ្នោតសរុបចំនួន ២៤រូប ក្នុងនោះជាសមាជិកក្រុមប្រឹក្សាឃុំ សង្កាត់ចំនួន ១៩រូប និងជាសមាជិកសភាចំនួន ៥រូប។ បើមើលទៅលើចំនួនអង្គបោះឆ្នោត គណបក្សរាជានិយមមួយនេះទំនងមិនមានសម្លេងគ្រប់គ្រាន់ក្នុងការឈ្នះបានអាសនៈទេ។ តែគណបក្សហ៊្វុនស៊ីនប៉ិចរំពឹងថា អង្គបោះឆ្នោតគណបក្សផ្សេង ដែលជាអ្នកប្រជាធិបតេយ្យអាចនឹងគាំទ្រខ្លួនបន្ថែមទៀត។ នេះបើតាមលោក ញឿន រ៉ាដែន។
ដោយឡែក នៅក្នុងអំឡុងយុទ្ធនាការឃោសនារកសម្លេងគាំទ្រនេះដែរ លោក ជា មុនី ដែលជាអនុប្រធាន និងជាអ្នកនាំពាក្យគណបក្សកម្លាំងជាតិក៏សង្ឃឹមថានឹងមានការគាំទ្រពីសមាជិកក្រុមប្រឹក្សាឃុំសង្កាត់របស់គណបក្សភ្លើងទៀន។
គណបក្សកម្លាំងជាតិបានដាក់បេក្ខជនឈរឈ្មោះបោះឆ្នោតជ្រើសតាំងព្រឹទ្ធសភាទាំង ៨ភូមិភាគ។ ក៏ប៉ុន្តែ ការឃោសនារកសម្លេងឆ្នោត និងការដាក់ក្តីសង្ឃឹមបានផ្តោតទៅលើតែ២ភូមិភាគប៉ុណ្ណោះ គឺភូមិភាគ៧ និងភូមិភាគ៨។ ទោះជាយ៉ាងណា អ្នកនាំពាក្យគណបក្សកម្លាំងជាតិរូបនេះ បញ្ជាក់បន្ថែមថា ភូមិភាគផ្សេងៗទៀតក៏មានការគាំទ្រពីអង្គបោះឆ្នោតដែរ។
សូមរំលឹកថា មេដឹកនាំកំពូលរបស់គណបក្សកម្លាំងជាតិ និងគណបក្សឆន្ទៈខ្មែរមានប្រភពចេញមកពីគណបក្សភ្លើងទៀនតែមួយ។ តែគណបក្សភ្លើងទៀន ដែលមានអង្គបោះឆ្នោតចំនួន ២ ១៩៨រូប មិនត្រូវបានអនុញ្ញាតឲ្យចូលរួមបោះឆ្នោតអសកលនេះទេ។ ជាហេតុធ្វើឲ្យគណបក្សកម្លាំងជាតិ និងគណបក្សឆន្ទៈខ្មែរកំពុងហែកទាញអង្គបោះឆ្នោតគ្នា ដែលជាសមាជិកក្រុមប្រឹក្សាឃុំសង្កាត់របស់បក្សភ្លើងទៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ