លោក ហ៊ុន ម៉ាណែត៖ អ្នកយកកម្ពុជាធ្វើអាជីវកម្មដើម្បីបាន Views នឹងត្រូវដាក់ក្នុងបញ្ជីខ្មៅ
នៅក្នុងពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ក្នុងរាជធានីភ្នំពេញនៅថ្ងៃចន្ទ ទី១៩ ខែកម្ភៈនេះ លោកនាយករដ្ឋមន្ត្រី ហ៊ុន ម៉ាណែត បានព្រមានចាត់វិធានការយ៉ាងម៉ឹងម៉ាត់ ដោយដាក់គុក ២ឆ្នាំ និងដាក់ក្នុងបញ្ជីខ្មៅមិនឲ្យចូលកម្ពុជាមួយជីវិតដល់បុគ្គលណា ដែលយកកម្ពុជាធ្វើជាកន្លែងអាជីវកម្ម ដើម្បីបាន Views នៅក្នុងបណ្តាញសង្គម។ ការថ្លែងរបស់លោកនាយករដ្ឋមន្ត្រីដូច្នេះ ធ្វើឡើងបន្ទាប់ពីមានបុរសចិនតៃវ៉ាន់ពីរនាក់បានប្រឌិតព័ត៌មាន រួចផ្សព្វផ្សាយតាមបណ្តាញសង្គមថា មានការចាប់ជំរិត និងមានខ្មោចលងនៅក្នុងខេត្តព្រះសីហនុ។
ចុះផ្សាយនៅថ្ងៃ៖
ស្តាប់ - ០២:០១
លោកនាយករដ្ឋមន្ត្រី ហ៊ុន ម៉ាណែត បានហៅទង្វើរបស់បុរសចិនតៃវ៉ាន់ទាំង២នាក់ ថាជាការបំផ្លាញប្រទេសកម្ពុជា និងដែលត្រូវដាក់ទោសឲ្យបានធ្ងន់ធ្ងរ ហើយបណ្តេញចេញពីកម្ពុជាជារៀងរហូត។
ប្រមុខរដ្ឋាភិបាលកម្ពុជាបានលើកឡើងពីការមកដល់កម្ពុជា របស់ជនជាតិចិនតៃវ៉ាន់ទាំងពីរនាក់ដោយមានផែនការច្បាស់លាស់។ ច្បាស់លាស់ដោយពួកគេគ្រោងថតនៅភ្នំពេញ កំពង់សោម សៀមរាប និងចុងក្រោយទៅកាន់ប្រទេសឡាវ ដោយពួកគេបានចាប់ផ្តើមថតមាតិការស្តីពីការចាប់ជំរិតនៅកំពង់សោម ហើយឲ្យប្រពន្ធរបស់ពួកគេនៅឯតៃវ៉ាន់បង្ហោះយក Views រាប់លាន។
សូមរំលឹកថា បុរសតៃវ៉ាន់ទាំងពីរនាក់ត្រូវបានអាជ្ញាធរខេត្តព្រះសីហនុចាប់ខ្លួន ហើយតុលាការបានផ្តន្ទាទោសឲ្យជាប់ពន្ធនាគារម្នាក់ៗចំនួន២ឆ្នាំ កាលពីសប្តាហ៍មុនពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ បុរសតៃវ៉ាន់ទាំងពីរនាក់បានឆ្លើយសារភាពទៅកាន់សមត្ថកិច្ចថា ពួកគេថតដើម្បីទាក់ទាញឲ្យមនុស្សចូលមើលច្រើន ហើយបន្ទាប់មកទើបដាក់លក់ផលិតផលជាក្រោយ។
ចំណុចនេះត្រូវលោក ហ៊ុន ម៉ាណែត បញ្ជាក់ថា ជារឿងអាត្មានិយមដែលជាការរារាំងទេសចរមកកម្ពុជា និងប៉ះពាល់ដល់ចំណូលពលរដ្ឋខ្មែរ។ ដោយស្រែករកយុត្តិធម៌លោកនាយករដ្ឋមន្ត្រីថានឹងពិនិត្យមើលច្បាប់បន្ថែមទៀតប្រសិនបើការដាក់ទោស២ឆ្នាំ នៅតែមិនមានការរាងចាល។
សូមរំលឹកថាកាលពីឆ្នាំកន្លងទៅ ប្រទេសកម្ពុជាបានរងនូវការវាយប្រហារដោយព័ត៌មានអវិជ្ជមានធំៗមួយចំនួន ដែលអាជ្ញាធរខ្មែរចាត់ទុកថាជាការប្រឌិតឡើងដោយជនបរទេស។ ក្នុងចំណោមព័ត៌មាន អវិជ្ជមាន ដែលលោកនាយករដ្ឋមន្រ្តីបានលើកឡើងមានរឿងទាសករឈាម និងរឿងចាប់ដូរក្រលៀនជាដើម។ លើសពីនេះ ភាពយន្តចិនរឿង No more Bet ស្តីពីអំពើឃោរឃៅ ចាប់ជំរិត ក៏បានធ្វើឲ្យប៉ះពាល់ដល់មុខមាត់ប្រទេសកម្ពុជាមិនតិចដែរ។
ជុំវិញបញ្ហាទាំងអស់នេះ អ្នកតាមដានសង្គមនានាក៏បានលើកឡើងជាចំងល់ពាក់ព័ន្ធនឹងការអនុវត្តន៍ច្បាប់ និងមន្ត្រីអនុវត្តច្បាប់របស់កម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ