បក្សកាន់អំណាចរំពឹងកើនអាសនៈព្រឹទ្ធសភាលើសពី៥០ ដោយសារបក្សប្រឆាំងឈ្លោះគ្នា
គណបក្សប្រជាជនកម្ពុជា ដែលកំពុងកាន់អំណាចសង្ឃឹមថាអាសនៈព្រឹទ្ធសភារបស់ខ្លួននឹងកើនឡើងលើសពីការគ្រោងទុក។ ក្តីរំពឹងជាវិជ្ជមានរបស់គណបក្សប្រជាជនដូច្នេះ គឺបន្ទាប់ពីផ្ទៃក្នុងគណបក្សប្រឆាំងត្រូវគេមើលឃើញថាកំពុងតែមានការប្រទាញប្រទង់សម្លេងគ្នា។ ការប្រទាញប្រទង់ ដែលជាហេតុធ្វើឲ្យគណបក្សប្រឆាំងខាតបង់ និងហុចផលចំណេញបន្ថែមទៀតឲ្យគណបក្សកាន់អំណាច។
ចុះផ្សាយនៅថ្ងៃ៖
ស្តាប់ - ០១:៤១
អ្នកនាំពាក្យគណបក្សប្រជាជនកម្ពុជាលោក សុខ ឥសាន សង្ឃឹមថាចំនួនអាសនៈព្រឹទ្ធសភាអាណត្តិទី៥ របស់គណបក្សប្រជាជននឹងមានការវិវត្តន៍ជាវិជ្ជមានដោយសារតែគណបក្សប្រកួតប្រជែងនឹងគណបក្សប្រជាជនមានការប្រទាញប្រទង់គ្នាផ្ទៃក្នុង។
តាមបទពិសោធន៍ និងភាពច្បាស់លាស់ខ្លាំងក្នុងការគិតគូរទុកជាមុននូវការគណនាចំនួនអាសនៈ គណបក្សប្រជាជនកម្ពុជានឹងឈ្នះបានអាសនៈព្រឹទ្ធសភាចំនួន ៤៩អាសនៈ។ នេះបើយោងតាមចំនួនអង្គបោះឆ្នោតរបស់ខ្លួន ដែលមានសរុបជាង១ម៉ឺននាក់បន្តិចបន្តួច។
លោក សុខ ឥសាន បានបញ្ជាក់ថា នៅក្នុងព្រឹទ្ធសភាកម្ពុជា ដែលមានអាសនៈសរុបចំនួន៦២ គណបក្សប្រជាជនអាចទទួលបាន៤៩អាសនៈ គណបក្សប្រឆាំងដែលមានអង្គបោះឆ្នោតជាង២ពាន់នាក់ អាចទទួលបានពី៨ ទៅ៩អាសនៈ រួមនឹង២អាសនៈជាកូតាជ្រើសតាំងដោយរដ្ឋសភា និង២អាសនៈទៀតជាកូតាជ្រើសតាំងដោយព្រះមហាក្សត្រ។
ទោះយ៉ាងណា គណបក្សប្រជាជនរំពឹងថា ចំនួនអាសនៈរបស់ខ្លួននឹងមានការប្រែប្រួលជាវិជ្ជមាន ពោលលើសពី៥០អាសនៈ ដោយសំអាងទៅលើគណបក្សជាដៃគូប្រកួតប្រជែងកំពុងមានជម្លោះផ្ទៃក្នុង។
សូមបញ្ជាក់ថានៅថ្ងៃអាទិត្យ ទី២៥ ខែកុម្ភៈខាងមុខនេះ ប្រទេសកម្ពុជានឹងរៀបចំបោះឆ្នោតជ្រើសតាំងព្រឹទ្ធសភានីតិកាលទី៥។ គណបក្សចំនួន៤ បានដាក់ពាក្យចូលប្រកួត ក្នុងនោះមានគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច។
ប៉ុន្តែគណបក្សឆន្ទៈខ្មែរ និងគណបក្សកម្លាំងជាតិ ដែលមានប្រភពចេញពីគណបក្សភ្លើងទៀនតែមួយ កំពុងប្រទាញប្រទង់គ្នាលើអង្គបោះឆ្នោត។ ជម្លោះផ្ទៃក្នុងបក្សប្រឆាំងនេះត្រូវគេមើលឃើញថានឹងធ្លាក់ផលចំណេញទៅលើគណបក្សកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ