គណៈកម្មាធិការសន្តិសុខឌីជីថលត្រូវបានបង្កើតឡើងដោយលោក ហ៊ុន ម៉ាណែត ជាប្រធាន
លោកនាយករដ្ឋមន្ត្រី ហ៊ុន ម៉ាណែត បានបង្កើតគណៈកម្មាធិការសន្តិសុខឌីជីថលដែលមានរូបលោកធ្វើជាប្រធាន និងមានឧបនាយករដ្ឋមន្ត្រី១រូបជាអនុប្រធានប្រចាំការ រួមទាំងមានរដ្ឋមន្ត្រីមហាផ្ទៃ និងរដ្ឋមន្ត្រីការពារជាតិគឺជាអនុប្រធាន។ ការបង្កើតគណៈកម្មាធិការនេះឡើង ត្រូវបានប្រមុខរដ្ឋាភិបាល ពន្យល់ថា ក្នុងបំណងធានាប្រសិទ្ធភាព នៃការបំពេញមុខងារ និងជំរុញការគ្រប់គ្រងសន្តិសុខឌីជីថល ដើម្បីការពារប្រយោជន៍តួអង្គសង្គម ទប់ទល់នឹងការវាយប្រហារគ្រប់រូបភាព។
ចុះផ្សាយនៅថ្ងៃ៖
ស្តាប់ - ០២:១៤
នៅក្នុងអនុក្រឹត្យចុះថ្ងៃទី១មីនាឆ្នាំ២០២៤ ប្រមុខរដ្ឋាភិបាលកម្ពុជា បានគូសបញ្ជាក់បន្ថែមថា គណៈកម្មាធិការនេះត្រូវកោះប្រជុំ៦ខែម្តងតាមការអញ្ជើញរបស់ប្រធាន។ គណៈកម្មាធិការនេះ មានអគ្គលេខាធិការដ្ឋានមួយ ដែលចំណុះដោយអង្គភាពសាយប័រកម្ពុជា អង្គភាពប្រឆាំងឧក្រិដ្ឋកម្មសាយប័រ អង្គភាពការពារជាតិក្នុងលំហសាយប័រ និងអង្គភាពការទូតសាប័រ។
អគ្គលេខាធិការនៃគណៈកម្មាធិការសន្តិសុខឌីជីថលនេះ គឺដឹកនាំដោយរដ្ឋមន្ត្រីក្រសួងប្រៃណីយ៍ និងមានអគ្គលេខាធិការរងទទួលបន្ទុកអង្គភាពនីមួយៗនៅក្រោមឱវាទ។
បើតាមអនុក្រឹត្យដដែលនេះ គណៈកម្មាធិការសន្តិសុខឌីជីថល គឺត្រូវប្រើប្រាស់កញ្ចប់ថវិកាជាតិដោយឡែក នៅក្នុងក្របខណ្ឌថវិការជាតិប្រចាំឆ្នាំ។ ប៉ុន្តែសម្រាប់អង្គភាពប្រឆាំងឧក្រិដ្ឋកម្មសាយប័រ គឺត្រូវផ្គត់ផ្គង់ថវិកាដោយឡែកក្នុងក្របខណ្ឌថវិកាប្រចាំឆ្នាំរបស់ក្រសួងមហាផ្ទៃ ខណៈអង្គភាពការពារជាតិក្នុងលំហសាយប័រ ត្រូវផ្គត់ផ្គង់ថវិកាដោយឡែកក្នុងក្របខណ្ឌថវិកាប្រចាំឆ្នាំរបស់ក្រសួងការពារជាតិ។
ជុំវិញការបង្កើតគណៈកម្មាធិការនេះដែលជាការបង្កើនការចំណាយថវិកាជាតិបន្ថែមទៀតនោះ លោក យង់ គឺមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព បែងចែកជាពីរ រវាងគុណសម្បត្តិ និងក្តីបារម្ភចំពោះគណៈកម្មាធិការនេះ។
ប្រសិនបើគណៈកម្មាធិការនេះបង្កើតឡើងដើម្បីទប់ស្កាត់ការវាយប្រហារណាមួយក្នុងបំណងបំផ្លាញសន្តិសុខជាតិ និងបំផ្លាញព័ត៌មានសាធារណៈ រួមទាំងចូលរួមទប់ស្កាត់ល្បែងអនឡាញខុសច្បាប់ផងនោះ លោក យង់ គឺមអេង ចាត់ទុកថានេះជាគុណសម្បត្តិ។
ផ្ទុយទៅវិញ ប្រសិនបើគណៈកម្មាធិការនេះ បង្កើតឡើងក្នុងបំណងដើម្បីតាមដានសកម្មភាពបញ្ចេញតមិរបស់ពលរដ្ឋ នោះលោកយល់ថា ជារឿងគួរឲ្យព្រួយបារម្ភអំពីលំហនៃសេរីភាពបញ្ចេញមតិនៅកម្ពុជាបន្ទាប់ពីគណៈកម្មាធិការនេះត្រូវបានដំណើរការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ