ថៃរំជើបរំជួលចង់ឲ្យបើកច្រកព្រះវិហារឡើងវិញ តែកម្ពុជាបន្តនៅស្ងៀមស្ងាត់
កាសែតបាងកកប៉ុស្តិ៍ និងកាសែត The Nation របស់ថៃជាភាសាអង់គ្លេស បានចុះផ្សាយជាប់ៗគ្នាប៉ុន្មានថ្ងៃកន្លងទៅថាប្រជាជន និងអាជ្ញាធរនៅក្នុងខេត្តស៊ីសាកេតរបស់ថៃ បានត្រៀមលក្ខណៈរួចរាល់ហើយសម្រាប់ការបើកឡើងវិញនូវច្រកព្រំដែនប្រាសាទព្រះវិហារ។ ក៏ប៉ុន្តែខាងភាគីកម្ពុជា ដែលមានជំហរបិទច្រកដ៏ចម្រូងចម្រាស់នេះអស់រយៈពេល ១៦ឆ្នាំមកហើយនោះ នៅស្ងប់ស្ងាត់នៅឡើយ។
ចុះផ្សាយនៅថ្ងៃ៖
ស្តាប់ - ០២:១៤
ការលើកឡើងរបស់ប្រព័ន្ធផ្សព្វផ្សាយថៃនានា បានធ្វើឡើងបន្ទាប់ពីមានដំណើរទស្សនកិច្ចមួយទៅកាន់ខេត្តស៊ីសាកេតរបស់រដ្ឋមន្ត្រីក្រសួងមហាផ្ទៃថៃលោក អានុទិន ចាន់វីរ៉ាគុល កាលពីថ្ងៃសុក្រសប្តាហ៍មុន។ តាមការចុះផ្សាយរបស់កាសែត The Nation ក៏ដូចជាកាសែតបាងកកប៉ុស្តិ៍ ការបើកច្រកព្រំដែនប្រាសាទព្រះវិហារមានអំណោយផលយ៉ាងខ្លាំងដល់ភាគីថៃ ក្នុងការធ្វើពាណិជ្ជកម្មតាមព្រំដែន ការស្រូបទាញទេសចរតាមរយៈការចេញចូលទៅកាន់ទឹកដីប្រទេសទាំងពីររវាងប្រជាជនកម្ពុជា និងប្រជាជនថៃ។
រដ្ឋាភិបាលកម្ពុជានៅមិនទាន់មានការបញ្ជាក់យ៉ាងណានៅឡើយជុំវិញភាពរំជើបរំជួលចង់បើកច្រកប្រាសាទព្រះវិហារឡើងវិញពីភាគីថៃ។ ក៏ប៉ុន្តែលោកបណ្ឌិត សុខ ទូច ប្រធានរាជបណ្ឌិតសភាកម្ពុជាធ្លាប់បានប្រាប់វិទ្យុបារាំង RFI កាលពីពេលថ្មីៗនេះថា កម្ពុជាមិនគួរបើកច្រកព្រះវិហារឡើងវិញជាដាច់ខាត។ តាមលោក សុខ ទូច ការបើកច្រកចូលប្រាសាទព្រះវិហារឡើងវិញពីខេត្តស៊ីសាកេតរបស់ថៃមិនចំណេញអ្វីសម្រាប់កម្ពុជាទេ។
សូមរំលឹកថា កាលពីចុងខែមករាកន្លងទៅ សមាជិកសភាថៃធ្លាប់បានស្នើទៅលោកនាយករដ្ឋមន្ត្រីថៃ សេដ្ឋា ថាវីស៊ីន ឲ្យលើករបៀបវារៈនៃការបើកច្រកព្រំដែនប្រាសាទព្រះវិហារឡើងវិញទៅជជែកជាមួយសមភាគីរបស់លោក គឺនាយករដ្ឋមន្ត្រីកម្ពុជាលោក ហ៊ុន ម៉ាណែត។ ក៏ប៉ុន្តែប្រធានបទនេះ មិនត្រូវបានលើកយកមកជជែកទេ អំឡុងពេលទស្សនកិច្ចរបស់លោក ហ៊ុន ម៉ាណែត នៅប្រទេសថៃកាលពីថ្ងៃទី០៧ ខែកុម្ភៈ ឆ្នាំ២០២៤។
សូមរំលឹកថាច្រកចូលប្រាសាទព្រះវិហារពីខាងខេត្តស៊ីសាកេតរបស់ថៃត្រូវបានបិទតាំងពីឆ្នាំ២០០៨ ពោលក្រោយពេលដែលកម្ពុជា និងថៃមានជម្លោះប្រដាប់អាវុធជុំវិញបញ្ហាប្រាសាទព្រះវិហារ។ កម្ពុជាបាន ប្តឹងរឿងនេះទៅកាន់តុលាការយុត្តិធម៌អន្តរជាតិ(ICJ) នៅទីក្រុងឡាអេក្នុងឆ្នាំ២០១១។ នៅ២ឆ្នាំក្រោយមក ពោលក្នុងឆ្នាំ២០១៣ ICJ បានចេញសេចក្តីសម្រេច ដោយទាមទារឲ្យភាគីទាំងពីរដកកងទ័ពដែលឈរជើងនៅមុខប្រាសាទព្រះវិហារចេញឲ្យអស់។ ទន្ទឹមនឹងទាមទារឲ្យដកទ័ព សេចក្តីសម្រេចដដែលក៏បានអនុញ្ញាតឲ្យថៃ និងកម្ពុជាដាក់ពង្រាយកម្លាំងល្បាតនៅតាមព្រំដែនខាងក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ