លោក ហ៊ុន សែន និងលោកប្រាក់ សុខុន ជាបេក្ខជនប្រធាន និងអនុប្រធានព្រឹទ្ធសភា
លោក ហ៊ុន សែន អតីតនាយករដ្ឋមន្ត្រី លោក ប្រាក់ សុខុន អតីតរដ្ឋមន្ត្រីការបរទេស និងលោក អ៊ុច បូររិទ្ធ ទេសរដ្ឋមន្រ្តី គឺជាបេក្ខជនប្រធាន និងអនុប្រធានព្រឹទ្ធសភាអាណត្តិទី៥។ នេះបើតាមការឲ្យដឹងពីអ្នកនាំពាក្យគណបក្សប្រជាជនកម្ពុជា។ តាមគម្រោង ព្រឹទ្ធសភាថ្មីនឹងបើកកិច្ចប្រជុំដំបូងក្រោមព្រះរាជាធិបតីភាពរបស់ព្រះមហាក្សត្រកម្ពុជា ព្រះបាទសម្តេចព្រះ នរោត្តម សីហមុនី នៅថ្ងៃទី០៣ ខែមេសា ឆ្នាំ២០២៤។
ចុះផ្សាយនៅថ្ងៃ៖
ស្តាប់ - ០១:៤៨
អតីតនាយករដ្ឋមន្ត្រី លោក ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រជាបេក្ខភាពដែលត្រូវបានស្នើឡើងដោយគណបក្សប្រជាជនកម្ពុជាសម្រាប់តំណែងប្រធានព្រឹទ្ធសភានីតិកាលទី៥។ ចំណែកលោក ប្រាក់ សុខុន អតីតរដ្ឋមន្ត្រីការបរទេស និងលោក អ៊ុច បូររិទ្ធ ទេសរដ្ឋមន្រ្តីត្រូវបានគណបក្សកាន់អំណាចស្នើឡើងជាបេក្ខជនអនុប្រធានទី១ និងទី២ នៃព្រឹទ្ធសភាអាណត្តិថ្មី។ នេះបើតាមការឲ្យដឹងពីលោក សុខ ឥសាន អ្នកនាំពាក្យគណបក្សប្រជាជនកម្ពុជា។
ដោយឡែកគណបក្សប្រឆាំង គឺគណបក្សឆន្ទៈខ្មែរ ព្រះបរមរាជវាំង និងរដ្ឋសភា មិនបានស្នើបេក្ខភាពជាប្រធាន និងអនុប្រធាន ព្រឹទ្ធសភាទេ។ សូមបញ្ជាក់ថា បន្ទាប់ពីការបោះឆ្នោតកាលពីថ្ងៃទី២៥ ខែកុម្ភៈ ឆ្នាំ២០២៤ ព្រឹទ្ធសភាថ្មីគ្រោងនឹងបើកកិច្ចប្រជុំដំបូងក្រោមព្រះរាជវត្តមានព្រះមហាក្សត្រនៅថ្ងៃទី០៣ ខែមេសាខាងមុខ។ តាមនីតិវិធី ព្រឹទ្ធសភាក៏នឹងបើកកិច្ចប្រជុំដំបូងរបស់ខ្លួនក្នុងថ្ងៃដដែល ដែលនឹងដឹកនាំដោយព្រឹទ្ធសមាជិកមួយរូបដែលមានវ័យចំណាស់ជាងគេ គឺលោក សុខ ឥសាន ដែលបច្ចុប្បន្នមានវ័យ ៧៨ឆ្នាំ។
ក្រោយការបោះឆ្នោតជ្រើសរើសប្រធាន អនុប្រធានទី១ និងអនុប្រធានទី២នៃព្រឹទ្ធសភានៅពេលព្រឹកក្នុងថ្ងៃទី៣ ខែមេសា សមាជិកព្រឹទ្ធសភាថ្មីនឹងជួបជុំគ្នានៅក្នុងព្រះបរមរាជវាំងនៅពេលរសៀលក្នុងថ្ងៃដដែលដើម្បីធ្វើពិធីស្បថចូលកាន់តំណែង។ នេះបើតាមការបញ្ជាក់របស់លោក សុខ ឥសាន។
ដោយឡែក ប្រធានព្រឹទ្ធសភាលោក សាយ ឈុំ ហើយអនុប្រធានទី១ លោក ស៊ីម កា និងអនុប្រធានទី២ លោក ទេព ងន ក្នុងអាណត្តិចាស់ត្រូវបានតែងតាំងជាឧត្តមទីប្រឹក្សាផ្ទាល់ព្រះមហាក្សត្រ មានឋានៈស្មើនាយករដ្ឋមន្ត្រី និងឧបនាយករដ្ឋមន្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ