សវនាការលើកទី៦៖លោកកឹម សុខាបន្តការពារភាពស្អាតស្អំ និងមិនបានឃុបឃិតជាមួយបរទេស
នៅព្រឹកថ្ងៃទី៤មេសា ឆ្នាំ២០២៤នេះ សាលាឧទ្ធរណ៍បានបើកសវនាការលើកទី៦ លើរឿងក្តីលោកកឹម សុខា ប្រធានអតីតគណបក្សសង្គ្រោះជាតិស្តីពីសំណុំរឿងសន្ទិដ្ឋិភាពជាមួយបរទេស។ ក៏ដូចជាសវនាការចំនួន ៥លើកចុងក្រោយ លោកកឹម សុខា នៅតែបន្តការពារភាពស្អាតស្អំរបស់ខ្លួនលើការចោទប្រកាន់របស់សាលាដំបូងរាជធានីភ្នំពេញដែលបានសម្រេចកាត់ទោសលោកឱ្យជាប់ពន្ធនាគារចំនួន២៧ឆ្នាំពីបទ «ក្បត់ជាតិ»។ នេះបើតាមការឱ្យដឹងពីលោកស្រីម៉េង សុភារី សហមេធាវីការពារក្តីលោក កឹម សុខា។
ចុះផ្សាយនៅថ្ងៃ៖
ស្តាប់ - ០៣:៤៣
ចំណែកលោកយី សុខសាន្ត មន្ត្រីសមាគមការពារសិទ្ធិមនុស្សអាដហុកដែលបានចូលរួមតាមដានសវនាការបានសម្គាល់ឃើញថា ដំណើរការអង្គសវនាការព្រឹកមិញបានជជែកដេញដោលលើអង្គហេតុចំនួន៣ គឺថ្ងៃចន្ទពណ៌ខ្មៅ ផ្កាឈូក និងកណ្តាប់ដៃ។
សូមរម្លឹកថាកាលពីថ្ងៃទី៣ មីនា ឆ្នាំ២០២៣ សាលាដំបូងរាជធានីភ្នំពេញបានប្រកាសសាលក្រមផ្តន្ទាទោសលោកកឹម សុខាឲ្យជាប់ពន្ធនាគារចំនួន ២៧ឆ្នាំនៅក្នុងផ្ទះ ហាមធ្វើនយោបាយអស់មួយជីវិត និងហាមទទួលភ្ញៀវណាមួយដោយលើកលែងតែសាច់ញាតិ។ តែលោកបានបន្តប្តឹងឧទ្ធរណ៍ ហើយសវនាការសាលាឧទ្ធរណ៍បានចាប់ផ្តើមតាំងពីថ្ងៃទី៣០ ខែមករា ឆ្នាំ២០២៤ ដោយកំណត់ធ្វើឡើងនៅ ២សប្តាហ៍ម្តង។ សវនាការលើកទី៧ គ្រោងធ្វើនៅថ្ងៃទី២៥ មេសា ឆ្នាំ ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ