ក្រសួងសាធារណៈការដាក់ចេញវិធានការ៣ចំណុច ក្រោយរថយន្ត បុកជាមួយរថភ្លើង
ក្រសួងសាធារណៈការ និងក្រុមហ៊ុន រ៉ូយ៉ាល់ រេលវែ បានប្រកាសដាក់ចេញនូវវិធានការបន្ទាន់ចំនួន៣ចំណុច តាមរយៈសន្និសិទសារព័ត៌មានមួយនៅថ្ងៃទី៥ខែមេសា។ វិធានការទាំង៣ចំណុចនោះ ទី១ការបង្កើនការបំពាក់ហេដ្ឋារចនាសម្ព័ន្ធការពារ សុវត្ថិភាពតាមផ្លូវដែលមានផ្លូវដែកឆ្លងកាត់ និងការដាក់ឆ្មាំការពាររបាំងផ្លូវដែក។ ទី២ ការបំពាក់ស្លាកសញ្ញាចរាចរណ៍ និងទី៣ វិធានការផ្សព្វផ្សាយអប់រំ។
ចុះផ្សាយនៅថ្ងៃ៖
ស្តាប់ - ០២:២០
ការចេញវិធានការចំពោះមុខនេះធ្វើឡើងបន្ទាប់ពីគ្រោះថ្នាក់ចរាចរណ៍មួយកើតឡើងនៅខេត្តពោធិ៍សាត់ កាលពីថ្ងៃទី២៩ខែមីនា រវាងរថយន្តក្រុង និងរថភ្លើង។
បើតាមរដ្ឋមន្ត្រីសាធារណៈការ មូលហេតុដែលនាំឲ្យមានគ្រោះថ្នាក់រវាងរថភ្លើង និងរថយន្តកើតឡើងដោយសារតែមានកំណើនប្រជាជន និងការរីកចម្រើនខាងផ្លូវថ្នល់ រួមទាំងការបិទបាំងដោយដើមឈើលើស្លាកសញ្ញាចរាចរណ៍។ នៅកម្ពុជាមានផ្លូវដែកពីរខ្សែ គឺភ្នំពេញទៅប៉ោយប៉ែតប្រវែង ៣៨៦ គីឡូម៉ែត្រ និងពីភ្នំពេញទៅក្រុងព្រះសីហនុ ដែលមានប្រវែង ២៦៦គីឡូម៉េត្រ ដោយមានផ្លូវឆ្លងកាត់ចំនួន៩៧៩កន្លែង។
នៅចំពោះមុខបញ្ហានេះ លោក ប៉េង ពោធិ៍នា បានដាក់ចេញវិធានការបន្ទាន់៣ គឺទី១ការបង្កើនការបំពាក់ហេដ្ឋារចនាសម្ព័ន្ធការពារ សុវត្ថិភាពតាមផ្លូវដែក និងការដាក់ឆ្មាំការពាររបាំងផ្លូវដែក។ ទី២ ការបំពាក់ស្លាកសញ្ញាចរាចរណ៍ និងទី៣ វិធាននការផ្សព្វផ្សាយអប់រំ។
សូមបញ្ជាក់ថា យ៉ាងហោចណាស់មនុស្សចំនួន៤៦នាក់ បានរងរបួសធ្ងន់ស្រាល ដោយសារតែរថភ្លើងដឹកអ្នកដំណើរមួយគ្រឿង បានបុកនឹងរថយន្តក្រុងដឹកអ្នកដំណើរដូចគ្នា កាលពីថ្ងៃទី២៩ ខែមីនា ឆ្នាំ២០២៤ នៅចំណុចផ្លូវចូលរមណីយដ្ឋានទឹកធ្លាក់ច្រកល្អៀង ស្ថិតក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់។
គួរកត់សំគាល់ថា ត្រឹមរយៈពេលតែ៣ខែដើមឆ្នាំ២០២៤នេះ គឺមានគ្រោះថ្នាក់រវាងរថភ្លើង បុករថយន្តកើតមានយ៉ាងតិច៣លើកហើយ គឺ២ករណីនៅខេត្តពោធិ៍សាត់ និង១ករណីនៅខេត្តបាត់ដំបង។
នៅខេត្តបាត់ដំបង កាលថ្ងៃទី០១ ខែកុម្ភ: ឆ្នាំ២០២៤ ក៏មានករណីគ្រោះថ្នាក់ចរាចរណ៍មួយកើតឡើងរវាងរថយន្តដឹកដី និងរថភ្លើង បណ្តាលអោយមនុស្សម្នាក់របួសធ្ងន់ ខណៈថ្ងៃទី១៩ ខែកុម្ភៈ ឆ្នាំ២០២៤ រថភ្លើងបានបុកជាមួយរថយន្តម៉ាកហ៊ីយ៉ាន់ដាយដឹកស្រូវ នៅស្រុកបាកាន ខេត្តពោធិ៍សាត់ មានអ្នករងរបួសធ្ងន់៤នាក់ និងរបួសស្រាល១នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ