ក្រសួងសុខាភិបាលណែនាំឲ្យពលរដ្ឋប្រយ័ត្នរឿងសុខភាពពេលអាកាសធាតុក្តៅ
ក្រសួងសុខាភិបាល កាលពីថ្ងៃទី០៧ ខែមេសា ឆ្នាំ២០២៤ បានចេញសេចក្តីប្រកាសព័ត៌មានមួយឲ្យពលរដ្ឋខ្មែរទូទាំងប្រទេសមានការប្រុងប្រយ័ត្នការពារសុខភាពអំឡុងពេលអាកាសធាតុកំពុងឡើងកំដៅ។ ជាមួយគ្នានេះ ក្រសួងសុខាភិបាលក៏បានប្រាប់ពីរោគសញ្ញាជំងឺផ្សេងៗ ដែលអាចកើតមានឡើង ព្រមទាំងណែនាំប្រជាជនពីវិធីសាស្ត្រការពារខ្លួនជាង១០ចំណុច នៅពេលមានហានិភ័យសុខភាពកើតឡើង។
ចុះផ្សាយនៅថ្ងៃ៖
ស្តាប់ - ០២:២៦
ក្រសួងសុខាភិបាលបានប្រកាសថា បុគ្គលគ្រប់រូបអាចធ្លាក់ខ្លួនឈឺដោយសារកម្តៅ ជាពិសេសអ្នកដែលមានហានិភ័យខ្ពស់ គឺមនុស្សចាស់ ទារក កុមារ ស្ត្រីមានផ្ទៃពោះ អ្នកធ្វើការនៅលម្ហខាងក្រៅ អត្តពលិក អ្នកដែលមានប្រព័ន្ធការពាររាងកាយខ្សោយ និងអ្នកមានជំងឺរ៉ាំរ៉ៃ។ សេចក្តីប្រកាសរបស់ក្រសួងសុខាភិបាលបញ្ជាក់ថា អាកាសធាតុក្តៅខ្លាំងអាចបណ្តាលឲ្យមានរោគសញ្ញាមួយចំនួន ដូចជាបែកញើសខ្លាំងខុសពីធម្មតា អស់កម្លាំង រមួលក្រពើ ឈឺក្បាល ចង្អោរ ក្អួត វិលមុខ ដួលសន្លប់ ជីពចរដើរលឿនហើយខ្សោយ និងជំងឺដាច់សរសៃឈាមខួរក្បាលជាដើម។
ជាមួយគ្នានេះ ក្រសួងក៏បានអំពាវនាវ និងរំលឹកដល់ប្រជាពលរដ្ឋទាំងអស់ឲ្យប្រុងប្រយ័ត្នចំពោះសុខភាព និងអនុវត្តនូវវិធីសាស្ត្រមួយចំនួនដូចជាត្រូវហូបទឹកឲ្យបានញឹកញាប់ លើសពី២លីត្រ ក្នុង១ថ្ងៃ បង្ការជំងឺរាគរូស ត្រូវមានអនាម័យជាប្រចាំ ចៀសវាងការពិសាជាតិអាល់កុល កាហ្វេ តែ ភេសជ្ជៈដែលមានជាតិកាហ្វេអ៊ីន ជាតិស្ករ និងជាតិអំបិលច្រើន ជាហេតុធ្វើឲ្យជាតិទឹកក្នុងរាងកាយមានការថយចុះ។
បន្ថែមពីនេះ សេចក្តីណែនាំក៏បានហាមប្រាមដល់ពលរដ្ឋកុំឲ្យស្ថិតនៅក្រោមកំដៅថ្ងៃដោយផ្ទាល់រយៈពេលយូរ ត្រូវស្លៀកសម្លៀកបំពាក់រលុង កាត់បន្ថយកំដៅដោយបិទបង្អួច និងទ្វារ នៅពេលថ្ងៃ និងបើកបង្អួចនៅពេលយប់។ លើសពីនេះ ក្រសួងសុខាភិបាលក៏បានប្រាប់ពីវិធីជួយបឋមដល់បុគ្គល ដែលងាយរងគ្រោះ ពីការឡើងកម្តៅ និងណែនាំឲ្យទៅកាន់មណ្ឌលសុខភាព ឬមន្ទីរពេទ្យ ដែលនៅជិតបំផុត ប្រសិនបើមានបញ្ហាប្រឈមខ្លាំង។
សូមបញ្ជាក់ថា ចាប់ពីថ្ងៃទី៨ ដល់ថ្ងៃទី១០ ខែមេសា ឆ្នាំ២០២៤ សីតុណ្ហភាពអតិបរមានៅតាមតំបន់មួយចំនួននៃប្រទេសកម្ពុជាកើនឡើងរហូតដល់ ៣៩អង្សារសេ។ នេះបើតាមក្រសួងធនធានទឹក និងឧត្តុនិយម។ ក៏ប៉ុន្តែតាមស្ថានភាពជាក់ស្តែង តំបន់ខ្លះត្រូវបានវាស់ក្រៅផ្លូវការថា សីតុណ្ហភាពបានកើនដល់៤០ ឬ៤១អង្សារសេ រយៈពេលប៉ុន្មានថ្ងៃកន្លងទៅនេះ។
ទោះយ៉ាងណា លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់វិទ្យុបារាំង RFI នៅថ្ងៃចន្ទទី៨ ខែមេសានេះថា នៅមិនមានពលរដ្ឋណាម្នាក់បានរងគ្រោះដោយសារសីតុណ្ហភាពក្តៅខ្លាំងនៅឡើយ។ លោកថាអង្គភាពគ្រប់គ្រងគ្រោះមហន្តរាយកំពុងតាមដានយ៉ាងយកចិត្តទុកដាក់ចំពោះបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ