សង្គមស៊ីវិល៖ ការចាប់ខ្លួនលោក កើត សារ៉ាយ ជាការបន្តបិទសម្លេង និងសេរីភាពបញ្ចេញមតិ
នៅថ្ងៃទី០៨ ខែមេសា ឆ្នាំ២០២៤នេះ ក្រុមអង្គការសង្គមស៊ីវិលចំនួនជាង៥០ បានចេញសេចក្តីថ្លែងការណ៍រួមមួយ ដោយបានសម្តែងការសោកស្តាយចំពោះការចាប់ឃុំខ្លួនលោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវន្តខ្មែរ។ ជាមួយគ្នានេះ អង្គការសង្គមស៊ីវិល ក៏បានស្នើទៅតុលាការក្រុងភ្នំពេញឲ្យទំលាក់ចោលបទចោទ និងដោះលែង លោក កើត សារ៉ាយ ដោយឥតលក្ខខណ្ឌ។
ចុះផ្សាយនៅថ្ងៃ៖
ស្តាប់ - ០១:៥៤
ក្រុមអង្គការសង្គមស៊ីវិល ដែលរួមមានយុវជន សហគមន៍ សហជីព សមាគម និងអង្គការសង្គមស៊ីវិលជាតិសរុបចំនួន៥៤ បានអំពាវនាវដល់សាលាដំបូងរាជធានីភ្នំពេញឲ្យទំលាក់ចោលបទចោទ និងដោះលែងសកម្មជនសិទ្ធិមនុស្ស និងបរិស្ថាន លោក កើត សារ៉ាយ ជាបន្ទាន់ និងដោយឥតលក្ខខណ្ឌ ព្រមទាំងស្នើសុំឲ្យបើកចំហសេរីភាពក្នុងការបញ្ចេញមតិឲ្យបានពេញលេញដល់ពលរដ្ឋដែលខ្វល់ខ្វាយពីបញ្ហាសង្គម។
ការស្នើសុំរួមគ្នារបស់ក្រុមសង្គមស៊ិវិលទាំងនេះ ធ្វើឡើងក្រោយលោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាអ្នកការពារសិទ្ធិមនុស្សដ៏សកម្មមួយរូប ត្រូវបានប៉ូលីសក្រុងភ្នំពេញចាប់ខ្លួនកាលពីថ្ងៃទី០៥ ខែមេសា ឆ្នាំ២០២៤ ក្រោយលោកបញ្ចេញមតិការពារពលរដ្ឋរឿងវិវាទដីធ្លីនៅខេត្តព្រះវិហារកាលពីពេលថ្មីៗកន្លងទៅនេះ។ អាជ្ញាធរបានចាប់ខ្លួនលោក កើត សារ៉ាយ ពីបទពាក់ព័ន្ធនឹងករណីញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទមិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម។
ក្រុមអង្គការសង្គមស៊ីវិលបានហៅការចាប់ខ្លួនលោក កើត សារ៉ាយ ថាជាការបន្តបិទសម្លេង និងសិទ្ធិសេរីភាពក្នុងការបញ្ចេញមតិ និងជាការបង្ក្រាបទៅលើសកម្មជនសិទ្ធិមនុស្ស បរិស្ថាន ដែលនេះជាការរំលោភបំពានទៅលើសិទ្ធិសេរីភាពជាមូលដ្ឋាន ដែលធានាដោយរដ្ឋធម្មនុញ្ញកម្ពុជា។ ម្យ៉ាងទៀតការចាប់ខ្លួនលោកកើត សារ៉ាយ នៅកៀកបុណ្យចូលឆ្នាំខ្មែរអាចប៉ះពាល់ដល់សិទ្ធិជួបជុំគ្រួសាររបស់លោកផងដែរ។ នេះបើតាមសង្គមស៊ីវិល។
ក៏ប៉ុន្តែអាជ្ញាធរប៉ូលីសថា លោក កើត សារ៉ាយ បានទៅជួបសម្ភាសន៍ពលរដ្ឋ ដែលមានវិវាទដីធ្លី ហើយបញ្ជូនរូបភាព និងវីដេអូទៅឲ្យប្រព័ន្ធផ្សព្វផ្សាយនៅក្រៅប្រទេសផ្សាយបន្ត ដែលទាំងអស់នេះសមត្ថកិច្ចចាត់ទុកថាជាសកម្មភាពញុះញង់នាំឲ្យពលរដ្ឋខឹងសម្បារនឹងរដ្ឋាភិបាល។
សាលាដំបូងរាជធានីភ្នំពេញ មិនមានការធ្វើអត្ថាធិប្បាយយ៉ាងណានៅឡើយនៅថ្ងៃចន្ទនេះ ទាក់ទងទៅនឹងសេចក្តីថ្លែងការណ៍របស់អង្គការសង្គមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ