គ.ប.ម បញ្ជាក់ជំហរចងសម្ព័ន្ធភាពដដែលជាមួយបក្សប្រឆាំង៣ផ្សេងទៀត
គណបក្សប្រជាធិបតេយ្យមូលដ្ឋាន(គ.ប.ម) បានប្រកាសកាលពីថ្ងៃទី០៩ ខែមេសា ឆ្នាំ២០២៤ ថាគណបក្សនឹងបន្តចូលរួមជាមួយគណបក្សចំនួន៣ផ្សេងទៀតក្រោមផ្លាក«សម្ព័ន្ធភាពឆ្ពោះទៅអនាគត»។ ការប្រកាសរបស់គណបក្សប្រជាធិបតេយ្យមូលដ្ឋានបានធ្វើឡើង ក្រោយគណបក្សនេះបានរុះរើក្បាលម៉ាស៊ីនដឹកនាំ តាមរយៈសមាជមួយកាលពីថ្ងៃអាទិត្យទី០៧ ខែមេសាកន្លងទៅ។
ចុះផ្សាយនៅថ្ងៃ៖
ស្តាប់ - ០២:០៤
នៅក្នុងសេចក្តីប្រកាសព័ត៌មានរបស់ខ្លួនកាលពីថ្ងៃអង្គារ គណបក្សប្រជាធិបតេយ្យមូលដ្ឋានបានបញ្ជាក់ថា គណបក្សនេះ នៅតែរក្សាជំហរយ៉ាងរឹងមាំរបស់ខ្លួនក្នុងការបន្តរួមដំណើរកិច្ចសហការនៅក្នុងសម្ព័ន្ធភាពឆ្ពោះទៅអនាគត ដើម្បីចូលរួមកសាងសង្គមប្រជាធិបតេយ្យ យុត្តិធម៌សង្គម ការអភិវឌ្ឍន៍ប្រកបដោយសមធម៌ និងចីរភាព ព្រមទាំងសុខដុមរមនាសម្រាប់ប្រជាជាតិខ្មែរទាំងមូលនាពេលអនាគត។
សូមរំលឹកថាគណបក្សចំនួន៤ គឺគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជាបានប្រកាសបង្កើត«សម្ព័ន្ធភាពឆ្ពោះទៅអនាគត» កាលពីថ្ងទី១១ ខែតុលា ឆ្នាំ២០២៣។
គេនៅចាំបានថា គ.ប.ម ចងសម្ព័ន្ធភាពជាមួយគណបក្សប្រឆាំង៣ផ្សេងទៀត នៅបន្ទាប់ពីបុគ្គលសំខាន់ៗ ដែលមហាជនបានស្គាល់ដូចជាលោកបណ្ឌិត យង់ សាំងកុមារ លោកបណ្ឌិត សាម អ៊ីន ជាដើមបានចាកចេញពីគណបក្សនេះ ទៅចូលរួមជីវភាពនយោបាយជាមួយគណបក្សកាន់អំណាច និងបានទទួលតំណែងធំៗ នៅក្នុងរដ្ឋាភិបាល។
ក៏ប៉ុន្តែកាលពីថ្ងៃអាទិត្យកន្លងទៅ មេដឹកនាំដែលនៅសេសសល់មួយចំនួនដូចជាលោក យ៉េង វីរៈ លោកស្រី ប្រុក វ៉ាន្នី ដែលចប់អាណត្តិ បានដកខ្លួនពីការឈរឈ្មោះជាថ្នាក់ដឹកនាំកំពូលរបស់គណបក្ស ជាហេតុធ្វើឲ្យមេដឹកនាំគណបក្សប្រជាធិបតេយ្យមួយនេះ ត្រូវបានជំនួសដោយអ្នកបន្តវេនរបស់ខ្លួន។
តាមរយៈសមាជកាលពីថ្ងៃទី០៧ ខែមេសាកន្លងទៅ លោក សេក សុខា ត្រូវបានបោះឆ្នោតឲ្យក្លាយជាប្រធានគណបក្ស គ.ប.ម ជំនួសលោក យ៉េង វីរៈ ចំណែកលោក មាន អ៊ាង ជាប្រធានគណៈកម្មការនាយក និងលោក ធួក បូណា ជាប្រធានគណៈកម្មាធិការដោះស្រាយវិវាទ និងវិន័យ។ ទោះយ៉ាងណាលោក យ៉េង វីរៈ អតីតប្រធានគណបក្ស និងមេដឹកនាំមួយចំនួនទៀតមិនបានចាកចេញពី គ.ប.ម ទេ ដោយអ្នកទាំងនេះបន្តស្ថិតនៅជាចាស់ទុំជួយផ្តល់យោបល់ដល់អ្នកបន្តវេន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ