បក្សភ្លើងទៀនស្នើឲ្យអាជ្ញាធរដោះលែងសកម្មជនខ្លួន៤រូប ដើម្បីចូលរួមបោះឆ្នោតអសកល
គណបក្សភ្លើងទៀន កាលពីថ្ងៃទី៩ ខែមេសា ឆ្នាំ២០២៤ បានអំពាវនាវដល់អាជ្ញាធរឲ្យដោះលែងសកម្មជនរបស់ខ្លួនចំនួន៤រូប ដើម្បីឲ្យពួកគេចូលរួមធ្វើសកម្មភាពនយោបាយអំឡុងពេលនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ខាងមុខ។ ការស្នើសុំរបស់គណបក្សប្រឆាំងដូច្នេះ បានធ្វើឡើងក្រោយសកម្មជនទាំង៤រូប ត្រូវអាជ្ញាធរចាប់ខ្លួនជាបន្តបន្ទាប់កាលពីចុងសប្តាហ៍មុនរហូតដល់ដើមសប្តាហ៍នេះ ក្រោមបទចោទក្លែងបន្លំឯកសារសាធារណៈ។
ចុះផ្សាយនៅថ្ងៃ៖
ស្តាប់ - ០២:០៩
ជាថ្មីម្តងទៀតគណបក្សភ្លើងទៀន ដែលជាគណបក្សប្រឆាំងដ៏ធំនៅក្នុងប្រទេសកម្ពុជាបានចាត់ទុកការចាប់ខ្លួនសកម្មជនទាំង៤រូប គឺលោក សាន សឿង លោក ដាង ប៊ុនហាក់ លោក គឹម ថាយមុនី និងលោក គឹម ហុង ថាជាការគំរាមកំហែងថ្មីមួយទៀតមកលើគណបក្សភ្លើងទៀន ស្របពេលការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ នឹងឈានចូលមកដល់ក្នុងពេលឆាប់ៗនេះ។
នៅក្នុងសេចក្តីថ្លែងការណ៍របស់ខ្លួន គណបក្សភ្លើងទៀនបានអំពាវនាវដល់អាជ្ញាធរមានសមត្ថកិច្ចឲ្យដោះលែងសកម្មជនទាំង៤រូប ឲ្យមានសេរីភាពឡើងវិញ ដើម្បីពួកគេអាចចូលរួមសកម្មភាពនយោបាយជាមួយគណបក្សភ្លើងទៀនស្របតាមរដ្ឋធម្មនុញ្ញ និងបង្កបរិយាកាសល្អប្រសើរដល់ដំណើរការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៤។
សូមរំលឹកថាលោក ដាង ប៊ុនហាក់ អតីតអនុប្រធានគណៈកម្មាធិការប្រតិបត្តិគណបក្សភ្លើងទៀនភ្នំពេញ លោក គឹម ថាយមុនី ចៅសង្កាត់រងទី២សង្កាត់ស្ទឹងមានជ័យទី២ និងលោក គឹម ហុង ចៅសង្កាត់រងទី២ សង្កាត់ផ្សារអូឫស្សីទី៤ រាជធានីភ្នំពេញ ត្រូវបានអាជ្ញាធរចាប់ខ្លួនជាបន្តបន្ទាប់កាលពីថ្ងៃទី៥ និងទី៦ ខែមេសានេះ។ ដោយឡែក លោក សាន សឿន អតីតសមាជិកគណៈកម្មាធិការនាយកគណបក្សភ្លើងទៀន និងបច្ចុប្បន្នជាបេក្ខជនលេខរៀងទី៥ នៃគណបក្សឆន្ទៈខ្មែរសម្រាប់ការបោះឆ្នោតជ្រើសរើសសមាជិកក្រុមប្រឹក្សាខេត្តកំពង់ចាមត្រូវបានអាជ្ញាធរចាប់ខ្លួនកាលពីថ្ងៃទី៩ ខែមេសាម្សិលមិញ។
អាជ្ញាធរមានសមត្ថកិច្ចមិនបានឆ្លើយតបទៅនឹងសំណើរបស់គណបក្សភ្លើងទៀនទេនៅថ្ងៃនេះ។ ក៏ប៉ុន្តែអ្នកនាំពាក្យស្នងការប៉ូលីសរាជធានីភ្នំពេញ លោក សំ វិច្ឆិកា បានប្រាប់ប្រព័ន្ធផ្សព្វផ្សាយក្នុងស្រុកមួយចំនួនថា ការចាប់ខ្លួនមន្ត្រីបក្សប្រឆាំង គ្មានពាក់ព័ន្ធនឹងរឿងនយោបាយទេ ពោលជាករណីព្រហ្មទណ្ឌក្រោមបទចោទក្លែងបន្លំឯកសារសាធារណៈ។ តាមការឲ្យដឹងពីគណបក្សភ្លើងទៀន សកម្មជនគណបក្សប្រឆាំងសរុបជិត២០នាក់ ត្រូវបានអាជ្ញាធរចាប់ខ្លួនក្រោមបទចោទប្រកាន់ផ្សេងៗគ្នា ចាប់តាំងពីឆ្នាំ២០២៣មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ