បារាំងផ្តល់ប្រាក់កំចីជាង១០០លានដុល្លារ សម្រាប់សង់រោងចក្រទឹកស្អាតបាក់ខែងដំណាក់កាលទី៣
រដ្ឋាករទឹកស្វយ័តក្រុងភ្នំពេញ និងក្រុមហ៊ុន Vinci Construction Grands Projects(VCGP) បានចុះហត្ថលេខាលើកិច្ចសន្យាតម្លៃ ១០៣,៣ លានដុល្លារ សម្រាប់រចនា និងសាងសង់រោងចក្រទឹកស្អាតទី៣ នៅបាក់ខែង រាជធានីភ្នំពេញ។ គម្រោងនេះ ឆ្លើយតបទៅនឹងផែនការមេទី៣ ដែលរដ្ឋាករទឹកស្វយ័តក្រុងភ្នំពេញ(២០២២-២០៣០) បានកែសម្រួលថ្មី ក្រោយពីមានការប៉ាន់ស្មានទុកជាមុនថា នៅភ្នំពេញ នឹងមានតម្រូវការទឹកស្អាត ១,៤លានម៉ែត្រគូបក្នុង១ថ្ងៃ នៅឆ្នាំ២០៣០។
ចុះផ្សាយនៅថ្ងៃ៖
ស្តាប់ - ០២:០២
ពិធីចុះហត្ថលេខាលើកិច្ចសន្យាផ្តល់ប្រាក់កំចីរបស់បារាំងជាង១០០លានដុល្លារ នៅថ្ងៃទី១០ ខែមេសា ឆ្នាំ២០២៤ ធ្វើឡើងក្នុងក្របខ័ណ្ឌនៃគម្រោង “បាក់ខែងដំណាក់កាលទី៣” ដែលទីភ្នាក់ងារបារាំងសម្រាប់ការអភិវឌ្ឍ(AFD) និងក្រសួងសេដ្ឋកិច្ច ដែលតំណាងឲ្យរដ្ឋាភិបាលកម្ពុជាបានចុះហត្ថលេខាកាលពីខែមករា ឆ្នាំ២០២៤កន្លងទៅ។
សូមរំលឹកថាគម្រោងសាងសង់រោងចក្រទឹកស្អាតបាក់ខែងជំហានទី៣នេះ គឺជាគម្រោងសហហិរញ្ញប្បទានរវាងរាជរដ្ឋាភិបាលកម្ពុជា រដ្ឋាភិបាលបារាំង និងរដ្ឋាករទឹកស្វយ័តក្រុងភ្នំពេញ ដែលមានទំហំទឹកប្រាក់សរុប ២៤៧លានដុល្លារ ក្នុងនោះកម្ចីសម្បទានពីរដ្ឋាភិបាលបារាំង តាមរយៈទីភ្នាក់ងារបារាំងសម្រាប់ការអភិវឌ្ឍន៍ (AFD) មានចំនួន ២០៥លានដុល្លារ និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញ ចំនួន៤២លានដុល្លារ។
ថវិកាសរុបជាង២៤០ដុល្លារនេះ នឹងត្រូវប្រើសម្រាប់ការសាងសង់រោងចក្រ និងការពង្រីកបណ្តាញមេនាំទឹកស្អាត បណ្តាញចែកចាយទឹកស្អាត ព្រមទាំងគម្រោងជួសជុល និងស្តារគ្រឿងបរិក្ខារផ្សេងៗរបស់រោងចក្រផលិតទឹកស្អាតជ្រោយចង្វារ។
លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំនៅកម្ពុជា បានថ្លែងថាគម្រោងនេះបង្ហាញពីកិច្ចសហប្រតិបត្តិការប្រកបដោយទំនុកចិត្តយូរអង្វែងរវាងប្រទេសបារាំង និងកម្ពុជា ដោយរួមបញ្ចូលគ្នានូវជំនាញរបស់ក្រុមហ៊ុនបារាំង និងការប្តេជ្ញាចិត្តរបស់ទីភ្នាក់ងារ AFD។ លោកឯកអគ្គរដ្ឋទូតបារាំងបន្ថែមថា វាក៏បង្ហាញពីការប្តេជ្ញាចិត្តរបស់ក្រុមហ៊ុនអ៊ឺរ៉ុបនៅក្នុងប្រទេសកម្ពុជា នៅក្នុងក្របខ័ណ្ឌនៃយុទ្ធសាស្ត្រច្រកទ្វារសកល(Global Gateway)។
សូមបញ្ជាក់ថា ការសាងសង់រោងចក្រទាំង៣ដំណាក់កាលរួមបញ្ចូលគ្នា នឹងធ្វើឱ្យស្ថានីយ៍ប្រព្រឹត្តិកម្មទឹកស្អាតបាក់ខែងក្លាយទៅជារោងចក្រផលិតទឹកស្អាតធំជាងគេរបស់រដ្ឋាករទឹកស្វយ័តក្រុងភ្នំពេញ និងជារោងចក្រធំបំផុតមួយនៅក្នុងតំបន់ ដែលអាចផលិតទឹកស្អាតបាន ៦ ០០០ ០០០ ម៉ែត្រគូបក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ