សារជូនពរឆ្នាំថ្មី៖ អាមេរិក និងបារាំងបន្តធ្វើការជាមួយកម្ពុជាដើម្បីជំរុញលទ្ធិប្រជាធិបតេយ្យ
នៅក្នុងឱកាសពិធីបុណ្យចូលឆ្នាំថ្មីប្រពៃណីខ្មែរ រយៈពេល៤ថ្ងៃ ចាប់ពីថ្ងៃទី១៣ ដល់ទី១៦ ខែមេសា ឆ្នាំ២០២៤នេះ តំណាងរដ្ឋាភិបាលលោកខាងលិច និងគណបក្សនយោបាយនានារបស់កម្ពុជាបានចេញសារជូនពរផ្សេងៗគ្នាដល់ប្រជាជនកម្ពុជា។ ស្ថានទូតបរទេស និងគណបក្សនយោបាយខ្លះបានរំលេចសារនយោបាយតិចតួចលាយឡំនៅក្នុងសារជូនពរឆ្នាំថ្មី។
ចុះផ្សាយនៅថ្ងៃ៖
ស្តាប់ - ០២:៣៦
«តាងនាមឲ្យសហរដ្ឋអាមេរិក ខ្ញុំសូមជូនពរដល់ប្រជាជនកម្ពុជាទាំងអស់ សូមឲ្យជួបតែសុភមង្គល វិបុលភាព និងសំណាងល្អ នៅក្នុងឱកាសចូលឆ្នាំថ្មីប្រពៃណីខ្មែរ។ បុណ្យចូលឆ្នាំថ្មី គឺជាឱកាសពិសេសមួយ ដើម្បីធ្វើការអបអរភាពរស់រវើកនៃវប្បធម៌ខ្មែរ»។ នេះគឺជាសារជូនពររបស់ លោក អង់តូនី ប្លីងកិន រដ្ឋមន្ត្រីការបរទេសអាមេរិក នៅថ្ងៃទី១១ ខែមេសាម្សិលមិញ។
តាមលោក ប្លីងកិន តទៅអនាគត សហរដ្ឋអាមេរិកនឹងបន្តធ្វើការជាមួយប្រជាជនកម្ពុជា ដើម្បីកសាងប្រទេសកម្ពុជាមួយ ដែលមានឯករាជ្យ វិបុលភាព និងលទ្ធិប្រជាធិបតេយ្យច្រើនថែមទៀត។ សហរដ្ឋអាមេរិកមានការប្តេជ្ញាចិត្តក្នុងការពង្រឹងទំនាក់ទំនងរវាងប្រជាជន និងប្រជាជន ដែលជាគ្រឹះនៃទំនាក់ទំនងជាដៃគូយូរអង្វែងរវាងសហរដ្ឋអាមេរិក និងប្រទេសកម្ពុជា។
លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំនៅកម្ពុជា ក៏បានចេញមកជូនពរឆ្នាំថ្មីដល់ប្រទេស និងប្រជាជនកម្ពុជាផងដែរ។ តាមរយៈទំព័រហ្វេសប៊ុករបស់ស្ថានទូត លោក ហ្សាក់ ប៉ឺឡេ បានលើកឡើងថា ឆ្នាំចាស់ដែលកន្លងផុតទៅ ត្រូវបានកត់សំគាល់ដោយ ទំនាក់ទំនងពិសេស និងសំបូរបែបរវាងប្រទេសកម្ពុជា និងបារាំង។ ដំណើរទស្សនកិច្ចកំរិតខ្ពស់ កិច្ចសហប្រតិបត្តិការដែលកាន់តែរស់រវើក ក្នុងវិស័យបេតិកភណ្ឌ អប់រំ សុខាភិបាលជាដើម និងជាពិសេសហ្វ្រង់កូហ្វូនី បានពង្រឹងទំនាក់ទំនងប្រទេសទាំងពីរ។
ចំពោះបក្សប្រឆាំងនៅក្នុងប្រទេសកម្ពុជាវិញ គណបក្សភ្លើងទៀន ក៏បានឆ្លៀតឱកាសជូនពរឆ្នាំថ្មីនិងបួងសួងដល់ទេវតាឆ្នាំថ្មីព្រះនាងមហោទរាទេវី ជួយរក្សាប្រទេសកម្ពុជាឲ្យជួបប្រទះនូវសុខសន្តិភាព និងបញ្ចប់ជម្លោះនយោបាយនានា ឆ្ពោះទៅរកលទ្ធិប្រជាធិបតេយ្យ សេរីពហុបក្សពិតប្រាកដ។ ដូចគ្នានេះដែរ គណបក្សកម្លាំងជាតិ ក៏បង្ហាញបំណងប្រាថ្នាចង់ឃើញថ្នាក់ដឹកនាំរដ្ឋាភិបាលកម្ពុជាសម្របសម្រួល ដោះលែងអ្នកទោសនយោបាយ ដែលកំពុងជាប់ឃុំ ដូចជាលោក កឹម សុខា លោក ថាច់ សេដ្ឋា និងកញ្ញា ឈឹម ស៊ីថរ ជាដើម ឲ្យមានសេរីភាពឡើងវិញ។
ដោយឡែករដ្ឋាភិបាលកម្ពុជា នៅថ្ងៃសុក្រ ទី១២ ខែមេសានេះដែរ ក្រៅពីជូនពរទៅដល់ជនរួមជាតិ រដ្ឋាភិបាលបានរំលេចនូវសមិទ្ធផលជាច្រើន ដែលរដ្ឋាភិបាលអាណត្តិទី៧ បានសម្រេចកន្លងទៅ។ នៅក្នុងសារចំនួន៦ទំព័រ ប្រមុខរដ្ឋាភិបាលកម្ពុជាលោក ហ៊ុន ម៉ាណែត បានរៀបរាប់ពីលទ្ធផលជាវិជ្ជមាន និងគុណភាពការងាររបស់រដ្ឋាភិបាល ដោយមិនទាក់ទងទៅនឹងការលើកឡើងរបស់គណបក្សប្រឆាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ