ហេតុអ្វីបានជាប្រទេសស៊ូដង់យល់ព្រមភ្ជាប់ទំនាក់ទំនងប្រក្រតីជាមួយប្រទេសអ៊ីស្រាអែល?
ចុះផ្សាយនៅថ្ងៃ៖
ស្តាប់ - ០៤:៤៤
កាលពីថ្ងៃសុក្រ ទី២៣ តុលា ប្រធានាធិបតីអាមេរិកលោកដូណាល់ ត្រាំបានប្រកាសពីការភ្ជាប់ទំនាក់ទំនងប្រក្រតីរវាងប្រទេសស៊ូដង់ និងប្រទេសអ៊ីស្រាអែល។ នេះជាជោគជ័យការទូតថ្មីមួយទៀតរបស់លោកត្រាំ បន្ទាប់ពីអាមេរិកបានអូសទាញប្រទេសអេមីរ៉ាតអារ៉ាប់រួម និងបារ៉ែនឲ្យយល់ព្រមភ្ជាប់ការទូតជាមួយអ៊ីស្រាអែល។ នៅអេមីរ៉ាតអារ៉ាប់រួមក៏ដូចជានៅបារ៉ែន កិច្ចព្រមព្រៀងភ្ជាប់ទំនាក់ទំនងប្រក្រតីជាមួយអ៊ីស្រាអែលទទួលបានការគាំទ្រពីមជ្ឈដ្ឋានទូទៅ។ តែនៅស៊ូដង់ ដំណឹងស្តីពីការភ្ជាប់ទំនាក់ទំនងប្រក្រតីជាមួយអ៊ីស្រាអែលទទួលបានការស្វាគមន៍ផង និងមិនស្វាគមន៍ផង។ ហេតុអ្វីបានជាយ៉ាងដូច្នេះ និងថា ហេតុអ្វីបានជារដ្ឋអំណាចស៊ូដង់យល់ព្រមចាប់ដៃជាមួយប្រទេសអ៊ីស្រាអែលនៅពេលនេះ?
ក្នុងរយៈពេលតែប៉ុន្មានខែសោះ រដ្ឋបាលអាមេរិករបស់លោកដូណាល់ ត្រាំបាននិយាយបញ្ចុះបញ្ចូល ៣ប្រទេសអារ៉ាប់ គឺអេមីរ៉ាតអារ៉ាប់រួម បារ៉ែន និងស៊ូដង់ឲ្យភ្ជាប់ទំនាក់ទំនងប្រក្រតីជាមួយប្រទេសអ៊ីស្រាអែល។ បើតាមលោកត្រាំ ចរន្តនៃការភ្ជាប់ទំនាក់ទំនងប្រក្រតីរវាងប្រទេសអារ៉ាប់ជាមួយអ៊ីស្រាអែលនឹងមានជាបន្តបន្ទាប់ទៀតនាពេលខាងមុខ។ នេះពិតជាជោគជ័យការទូតមួយមិនអាចប្រកែកបានសម្រាប់លោកត្រាំ ខណៈដែលការបោះឆ្នោតប្រធានាធិបតីអាមេរិកខិតចូលកាន់តែជិត និងដែលលោកត្រាំបានឈរឈ្មោះមួយអាណត្តិទៀត។ តើម្ចាស់ថ្មីនៅសេតវិមាននឹងបន្តមានឈ្មោះដូណាល់ ត្រាំដដែល ឬមួយក៏អ្នកថ្មីមានឈ្មោះចូ បៃដិនមកពីគណបក្សប្រជាធិបតេយ្យ?។ យើងទុកចម្លើយចំពោះសំណួរនេះនៅក្រោយថ្ងៃទី៣ វិច្ឆិកាដោយងាកមកចាប់អារម្មណ៍ពីការចាប់ដៃរវាងស៊ូដង់ និងអ៊ីស្រាអែល។
បើធៀបនឹងអេមីរ៉ាតអារ៉ាប់រួម និងបារ៉ែន ការភ្ជាប់ទំនាក់ទំនងប្រក្រតីរវាងស៊ូដង់ និងអ៊ីស្រាអែលបានបំផុសឲ្យមានប្រតិកម្មពីរផ្ទុយគ្នានៅក្នុងមជ្ឈដ្ឋានមហាជនស៊ូដង់។ អ្នកខ្លះយល់ថា ការសម្រេចរបស់រដ្ឋាភិបាលពិតជារឿងត្រឹមត្រូវ ព្រោះវាអាចជួយឲ្យស៊ូដង់ងើបផុតពីវិបត្តិសេដ្ឋកិច្ច ពីភាពឯកោ និងអនុញ្ញាតឲ្យស៊ូដង់ទទួលបានកន្លែងរបស់ខ្លួនជាថ្មីនៅលើឆាកអន្តរជាតិ។ ចំណែកអ្នកខ្លះទៀតគិតថា ការសម្រេចរបស់រដ្ឋាភិបាលជាអំពើក្បត់នឹងបុព្វហេតុអារ៉ាប់ដែលការពារបុព្វហេតុប្រជាជនប៉ាឡេស្ទីន។ លទ្ធផលស្ទង់មតិធ្វើឡើងក្នុងខែតុលាដោយមជ្ឈមណ្ឌលអារ៉ាប់ដើម្បីស្រាវជ្រាវ និងនយោបាយឲ្យដឹងថា ក្នុងចំណោមប្រជាជនស៊ូដង់ដែលគេបានសួរ មានតែ ១៣% បានគាំទ្រលើការភ្ជាប់ទំនាក់ទំនងជាមួយអ៊ីស្រាអែល និងមានរហូតដល់ ៧៩% បានប្រឆាំង។
គួររម្លឹកថា តាំងពីទទួលបានឯករាជ្យ និងក្នុងនាមជាប្រទេសសមាជិកម្នាក់នៃសម្ព័ន្ធអារ៉ាប់ ស៊ូដង់តែងចេញមុខប្រឆាំងនឹងអ៊ីស្រាអែលរហូតមិនចង់ឃើញវត្តមានទឹកដីអ៊ីស្រាអែលនៅលើផែនទីពិភពលោកទៀតផង។ នៅក្នុងទំនាក់ទំនងជាមួយសហរដ្ឋអាមេរិកក៏ស៊ូដង់បានស្គាល់ភាពចម្រូងចម្រាស់ខ្លាំងក្នុងអំណាចរបស់លោកអូម៉ារ អ៊ែលបេឆៀររយៈពេល ៣០ឆ្នាំដែលស៊ូដង់បានទទួលក្រុមអ៊ីស្លាមនិយមជ្រុលឲ្យជ្រកកោណ ពិសេសមេអង្គការភេរវនិយមអាល់កៃដាអូសាម៉ា បិនឡាដិនពីឆ្នាំ ១៩៩៣ ដល់ឆ្នាំ ១៩៩៦ មុននឹងបិនឡាដិនទៅបោះទីតាំងក្នុងប្រទេសអាហ្វហ្កានីស្ថាន។ ទង្វើរបស់លោកអ៊ែលបេឆៀរត្រូវបានអាមេរិកដាក់ទណ្ឌកម្មចាប់ពីទសវត្ស ៩០ ដោយបញ្ចូលស៊ូដង់ទៅក្នុងបញ្ជីប្រទេសគាំទ្រភេរវនិយម។
គេត្រូវរង់ចាំដល់ការធ្លាក់ពីអំណាចផ្តាច់ការរបស់លោកអ៊ែលបេឆៀរក្នុងខែមេសា ឆ្នាំ ២០១៩នៅក្រោមបាតុកម្មមហាជនទើបអាមេរិក និងស៊ូដង់បានស្គាល់ទំនាក់ទំនងធូរស្រាលឡើងវិញ។ តែអ្វីដែលក្រុងកាទូមចង់បានលើសពីទំនាក់ទំនងធូរស្រាលនោះ គឺចង់ឃើញរដ្ឋបាលក្រុងវ៉ាស៊ីនតោនដកស៊ូដង់ចេញពីបញ្ជីប្រទេសគាំទ្រភេរវនិយម។ ទណ្ឌកម្មអាមេរិកមួយនេះបានខ្ទប់ដង្ហើមសេដ្ឋកិច្ចស៊ូដង់មកដល់សព្វថ្ងៃ។ អតិផរណាប្រចាំឆ្នាំកើនលើស ២០០% ហើយលុយស៊ូដង់កំពុងបន្តដាំក្បាលចុះធៀបនឹងលុយដុល្លារអាមេរិក។ មានការលើកឡើងថា គឺដោយសារគំនាបសេដ្ឋកិច្ចដែលស៊ូដង់បានបង្ខំចិត្តយល់ព្រមភ្ជាប់ទំនាក់ទំនងប្រក្រតីជាមួយអ៊ីស្រាអែលក្រោមគំនិតផ្តួចផ្តើមរបស់សហរដ្ឋអាមេរិក។
ការលើកឡើងនេះប្រហែលមិនខុសទេ ព្រោះទន្ទឹមនឹងការប្រកាសដំណឹងពីការភ្ជាប់ទំនាក់ទំនងប្រក្រតីរវាងស៊ូដង់ និងអ៊ីស្រាអែល លោកដូណាល់ ត្រាំក៏បានប្រកាសពីការដកស៊ូដង់ចេញពីបញ្ជីប្រទេសគាំទ្រភេរវនិយមនាពេលខាងមុខដែរ។ ចំណែកអ៊ីស្រាអែលវិញ នាយករដ្ឋមន្រ្តីលោកនេតាន់យ៉ាហ៊ូបានប្រកាសពីការបញ្ជូនស្រូវសាឡីក្នុងតម្លៃ ៥លានដុល្លារទៅឲ្យស៊ូដង់ និងបញ្ជាក់ថានៅសប្តាហ៍ខាងមុខ កិច្ចចរចារវាងប្រទេសទាំងពីរនឹងចាប់ផ្តើមនៅក្នុងវិស័យជាច្រើន ដូចជាកសិកម្ម ពាណិជ្ជកម្ម សេដ្ឋកិច្ច អាកាសចរណ៍ និងអន្តោប្រវេសន៍។ ពិតណាស់ ស៊ូដង់មិនភ្លេចពីបុព្វហេតុអារ៉ាប់ដើម្បីការពារបុព្វហេតុប្រជាជនប៉ាឡេស្ទីនទេ។ តែដើម្បីអាចបន្តការពារបុព្វហេតុមួយនេះបាន ស៊ូដង់មិនអាចបន្តរស់នៅក្នុងស្ថានភាពសេដ្ឋកិច្ចដូចសព្វថ្ងៃបានទៀតឡើយ។ ចំណែកក្រុមអ្នកជំនាញបានស្នើរដ្ឋាភិបាលអន្តរកាលស៊ូដង់ឲ្យស្វែងរកកុងសង់ស៊ុសរួមមួយ និងចៀសវាងកុំឲ្យមានការបែកបាក់ផ្ទៃក្នុងកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ