ថៃ៖ ស្រ្តីនៅជួរមុខក្នុងចលនាទាមទារប្រជាធិបតេយ្យ
ចុះផ្សាយនៅថ្ងៃ៖
ស្តាប់ - ០៥:១២
នៅក្នុងឆ្នាំ២០២០នេះ គេសង្កេតឃើញថា ចលនាបាតុកម្មទាមទារប្រជាធិតេយ្យនៅថៃបានរីករាលដាលយ៉ាងខ្លាំង ទាំងចលនាបាតុកម្មប្រឆាំងរដ្ឋាភិបាល និងទាំងចលនាប្រឆាំងនឹងរបបរាជានិយម ដែលជារឿងមួយគួរឲ្យកត់សម្គាល់ នៅក្នុងប្រទេសដែលធ្លាប់តែគោរពបូជាស្តេចដូចជាព្រះ ហើយដែលការរិះគន់ព្រះមហាក្សត្រ គឺជាបទល្មើសព្រហ្មទណ្ឌ ប្រឈមនឹងការជាប់ពន្ធនាគាររាប់ឆ្នាំ។ ជារឿងដែលគួរឲ្យកត់សម្គាល់មួយទៀត គឺនៅត្រង់ថា នៅក្នុងប្រទេសដែលភាគច្រើនផ្តល់តម្លៃនិងតួនាទីខ្ពស់លើបុរស ទាំងក្នុងសង្គម និងឆាកនយោបាយនេះ ចលនាទាមទារប្រជាធិបតេយ្យភាគច្រើន គឺស្រ្តីជាអ្នកនាំមុខ។
ជាទូទៅ អ្នកជំនាញជាច្រើនបានកត់សម្គាល់ថា នៅក្នុងប្រទេសថៃ ការតស៊ូមតិភាគច្រើននាពេលថ្មីៗនេះ រាប់ចាប់តាំងពីការទាមទារសិទ្ធិស្មើគ្នា រវាងស្រ្តី និងបុរស ការតស៊ូប្រឆាំងនឹងអំពើហិង្សាផ្លូវភេទ ឬហិង្សាក្នុងគ្រួសារ រហូតទៅដល់ចលនាបាតុកម្មទាមទារប្រជាធិបតេយ្យ មានរហូតដល់ទៅប្រមាណជា ២ភាគ៣ គឺនាំមុខដោយស្រ្តី។ ក្នុងចំណោមនោះ ទីភ្នាក់ងារព័ត៌មានបារាំងអាអែហ្វប៉េបានជួបសម្ភាសន៍ជាមួយស្រ្តីចំនួន ៣រូប។
ឆុនធិឆាជែងរ៉េវហៅ « លូកកេត »
និស្សិតវ័យ ២៧ឆ្នាំ ឆុនធិឆា ជែងរ៉េវ គឺជាសកម្មជនសិទ្ធិមនុស្ស តាំងពីក្រោយរដ្ឋប្រហារឆ្នាំ២០១៤ ហើយជាមេដឹកនាំដ៏សំខាន់មួយរូប នៃចលនាបាតុកម្មនិស្សិតប្រឆាំងរដ្ឋាភិបាល ដែលផ្ទុះរាលដាលយ៉ាងខ្លាំង ចាប់តាំងពីខែកក្កដាឆ្នាំ២០២០កន្លងទៅ។
មានឪពុកជាកងទ័ព ហើយធំដឹងក្តី នៅក្នុងគ្រួសារ ដែលមានគំនិតអភិរក្សនិយម ប្រកាន់ទំនៀមទម្លាប់ចាស់ ឆុនធិឆាបានប្រកាន់យកនូវទស្សនៈផ្ទុយពីគ្រួសារ ដោយបានចេញមុខយ៉ាងសកម្មទាមទារឲ្យមានការលើកតម្កើងតួនាទីរបស់ស្រ្តី នៅក្នុងឆាកនយោបាយថៃ។ ស្រ្តី ដែលមានត្រឹមតែប្រមាណជា ១៤% នៅក្នុងសភា និងប្រមាណត្រឹម ១០% ប៉ុណ្ណោះ ក្នុងគណៈរដ្ឋមន្រ្តីថៃបច្ចុប្បន្ន។
នៅក្នុងចលនាបាតុកម្មប្រឆាំងរដ្ឋាភិបាល ក្នុងរយៈពេលប៉ុន្មានខែចុងក្រោយនេះ ឆុនធិឆា ក៏ដូចជាបាតុករផ្សេងទៀត បានទាមទារឲ្យលោកនាយករដ្ឋមន្រ្តី ប្រាយុទ្ធ ចាន់អូចា ចុះចេញពីតំណែង ទាមទារឲ្យធ្វើកំណែទម្រង់រាជានិយម និងតាក់តែងរដ្ឋធម្មនុញ្ញថ្មីឡើងវិញ ហើយនៅក្នុងបាតុកម្មទាំងនេះ នៅពេលដែលមានការប្រឈមមុខដាក់គ្នាជាមួយកម្លាំងប៉ូលិស គឺ ឆុនធិឆា ដែលជាអ្នកចេញមុខតំណាងបាតុករ ក្នុងការចរចា តស៊ូមតិជាមួយប៉ូលិស។
ការចេញមុខចេញមាត់បែបនេះធ្វើឲ្យឆុនធិឆាត្រូវក្លាយជាគោលដៅនៃការវាយប្រហារពីសំណាក់ក្រុមអ្នកគាំទ្ររាជានិយម ក៏ដូចជា ពីសំណាក់រដ្ឋាភិបាលថៃ ដោយគ្រាន់តែក្នុងរយៈពេលប្រមាណជា ៥ខែ ឆុនធិឆាត្រូវប្រឈមនឹងការចោទប្រកាន់ពីតុលាការរហូតដល់ទៅ ១៣លើក ដោយត្រូវប្រឈមនឹងការជាប់ពន្ធនាគាររាប់ឆ្នាំ ពីបទបះបោរប្រឆាំងរដ្ឋាភិបាល។
ក៏ប៉ុន្តែ បើទោះជាបែបនេះក៏ដោយ ឆុនធិឆាបានប្រាប់ទីភ្នាក់ងារព័ត៌មានអាអែហ្វប៉េថា នេះជាអ្វីដែលចាំបាច់ត្រូវតែធ្វើ ហើយថា បើសិនជាយើងចង់បានសិទ្ធិស្មើគ្នា ស្រ្តីចាំបាច់ត្រូវតែខិតខំប្រឹងប្រែងឲ្យបានដូចជាបុរស។
អ៊ីនធីរ៉ាចារើនពុរៈហៅ « សាយ »
តារាភាពយន្តវ័យ ៤០ឆ្នាំ អ៊ីនធីរ៉ា ចារើនពុរៈ គឺជាតារាដ៏កម្រមួយនៅថៃ ដែលចេញមុខជាសាធារណៈគាំទ្រចលនាបាតុកម្មប្រឆាំងរដ្ឋាភិបាល ជាពិសេស ចេញមុខរៃអង្គាសលុយ យកទៅទិញម្ហូបអាហារ មួកសុវត្ថិភាព ក៏ដូចជា ម៉ាស់ការពារឧស្ម័នបង្ហូរទឹកភ្នែក យកទៅចែកដល់ក្រុមបាតុករ។
ថ្លែងប្រាប់ទីភ្នាក់ងារព័ត៌មានអាអែហ្វប៉េ អ៊ីនធីរ៉ា ចារើនពុរៈ បានលើកឡើងថា ចាប់តាំងពីបានចេញមុខចូលរួមក្នុងចលនាបាតុកម្មប្រឆាំងរដ្ឋាភិបាលមក មានកិច្ចសន្យាមួយចំនួនក្នុងអាជីពជាតារាត្រូវបានគេលុបចោល ក៏ប៉ុន្តែសម្រាប់អ៊ីនធីរ៉ា ការតស៊ូដើម្បីសិទ្ធិសេរីភាព វាមានសារៈសំខាន់ជាងអាជីពជាតារា។
ការចូលរួមក្នុងចលនានយោបាយប្រឆាំងនេះមិនត្រឹមតែអាចធ្វើឲ្យប៉ះពាល់ដល់អាជីពតែប៉ុណ្ណោះទេ ក៏ប៉ុន្តែ បច្ចុប្បន្ននេះ អ៊ីនធីរ៉ា ក៏ត្រូវប្រឈមផងដែរនឹងការចោទប្រកាន់ពីបទ « ប្រមាថព្រះមហាក្សត្រ » ដែលជាបទល្មើសព្រហ្មទណ្ឌត្រូវជាប់ពន្ធនាគារពី ៣ឆ្នាំ ទៅ១៥ឆ្នាំ។
ឈុំម៉ាផនតែងក្លៀងហៅ « ដាវ »
វ័យ ៣៤ឆ្នាំ ឈុំម៉ាផន តែងក្លៀង គឺជាសហស្ថាបនិកចលនាស្រ្តីដើម្បីសេរីភាពនិងប្រជាធិបតេយ្យ និងជាសកម្មជនទាមទារសិទ្ធិស្រ្តី ក៏ដូចជា សិទ្ធិអ្នកស្រឡាញ់ភេទដូចគ្នា។
មានដើមកំណើតនៅភាគខាងត្បូងប្រទេសថៃ ក្នុងគ្រួសារអភិរក្សនិយម ដែលអំពើហិង្សាក្នុងគ្រួសារគឺជារឿងធម្មតា ឈុំម៉ាផនបានចេញមុខយ៉ាងសកម្ម នៅក្នុងរយៈពេលប៉ុន្មានឆ្នាំចុងក្រោយនេះ នៅក្នុងចលនាបាតុកម្មទាមទារការលុបចោលច្បាប់ ដែលកំណត់ដាក់ទោសព្រហ្មទណ្ឌលើស្ត្រីដែលរំលូតកូន ហើយក៏ហ៊ានចេញមុខផងដែររិះគន់ព្រះមហាក្សត្រថៃបច្ចុប្បន្ន ដែលមានមហេសីផង ហើយអាចមានស្នំស្របច្បាប់មួយថែមទៀត ដែលជារឿងមិនធ្លាប់មានចាប់តាំងពីក្រោយការលុបបំបាត់របបរាជានិយមផ្តាច់ការនៅថៃ កាលពីឆ្នាំ១៩៣២មក។
នៅក្នុងបទសម្ភាសន៍ជាមួយទីភ្នាក់ងារព័ត៌មានអាអែហ្វប៉េ ឈុំម៉ាផនបានលើកឡើងថា ចាប់ពីពេលនេះទៅ ស្រ្តីដូចជាឈុំម៉ាផននេះលែងចង់ស្ថិតនៅសមរភូមិក្រោយដូចកាលពីមុនទៀតហើយ ផ្ទុយទៅវិញ គឺស្រ្តីចង់ស្ថិតនៅជួរមុខវិញម្តង ដើម្បីអាចចេញមុខ បញ្ចេញសំឡេងឲ្យគ្រប់គ្នាបានឮច្រើនជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ