ហេតុអ្វីការបិទលោកដូណាល់ត្រាំលើបណ្តាញសង្គមជារឿងចម្រូងចម្រាស?
ចុះផ្សាយនៅថ្ងៃ៖
ស្តាប់ - ០៤:២១
អ៊ីនធ័រនែតគឺជាមធ្យោបាយដ៏ចម្បងមួយ ដែលលោកដូណាល់ ត្រាំ ប្រើជាប់ជាប្រចាំ ដើម្បីទាក់ទងជាមួយសាធារណជន រាប់ចាប់តាំងពីសារទៅកាន់អ្នកគាំទ្រ ការរិះគន់គូប្រជែង រហូតទៅដល់សេចក្តីសម្រេចតែងតាំង ឬដកតំណែងមន្រ្តីក្នុងជួរដ្ឋាភិបាល។ ក៏ប៉ុន្តែ ចាប់តាំងពីក្រោយពេលដែលបាតុករគាំទ្រលោកបានចូលលុកលុយវិមានកាពីតូល កាលពីថ្ងៃពុធ ៦មករា មធ្យោបាយទាក់ទងនេះត្រូវបានបិទខ្ទប់ម្តងមួយៗ ដែលជាវិធានការដ៏កម្រមិនធ្លាប់ឃើញមានចំពោះលោកដូណាល់ ត្រាំ ហើយវាក៏នាំឲ្យចោទជាសំណួរដ៏ចម្បងមួយដែរ អំពីសិទ្ធិសេរីភាពក្នុងការបញ្ចេញមតិ និងសិទ្ធិអំណាចរបស់ក្រុមហ៊ុនអ៊ីនធ័រនែត។
នៅថ្ងៃទី៨មករា ពីរថ្ងៃក្រោយពីក្រុមអ្នកគាំទ្ររបស់លោកដូណាល់ ត្រាំ វាយសម្រុកចូលលុកលុយវិមានកាពីតូល ហេតុការណ៍ដែលបណ្តាលឲ្យមនុស្ស ៥នាក់ ត្រូវស្លាប់ ធ្វីតធ័របានសម្រេចបិទជាអចិន្រ្តៃយ៍នូវគណនីផ្ទាល់ខ្លួនរបស់លោកដូណាល់ ត្រាំ ដោយលើកហេតុផលថា លោកដូណាល់ ត្រាំ បានប្រើប្រាស់បណ្តាញសង្គម ដើម្បីញុះញង់ឲ្យមានអំពើហិង្សា។
ក្នុងពេលជាមួយគ្នា ទំព័រហ្វេសប៊ុក និងអ៊ីនស្តាក្រាម (Instagram) របស់លោកដូណាល់ ត្រាំ ក៏ត្រូវបានក្រុមហ៊ុនហ្វេសប៊ុកប្រកាសព្យួរជាបណ្តោះអាសន្នផងដែរ គឺព្យួរយ៉ាងហោចណាស់ រហូតដល់ក្រោយថ្ងៃទី២០មករា ថ្ងៃដែលលោកដូណាល់ ត្រាំ ត្រូវផុតអាណត្តិ ហើយលោកចូ បៃដិនស្បថចូលកាន់តំណែង។
យូធូប និងបណ្តាញសង្គមផ្សេងទៀត ខ្លះក៏បានព្យួរគណនីរបស់លោកដូណាល់ ត្រាំ ចំណែកខ្លះទៀត ទុកគណនីយឲ្យនៅដំណើរការ តែបានលុបសារ ឬវីដេអូរបស់លោកដូណាល់ ត្រាំ ដែលគេចាត់ទុកថាជាសារមានអត្ថន័យញុះញង់ឲ្យមានអំពើហិង្សា។
វិធានការរបស់ក្រុមហ៊ុនអ៊ីនធ័រនែតទៅលើលោកដូណាល់ ត្រាំ បានបង្កឲ្យមានការជជែកដេញដោលគ្នាយ៉ាងខ្លាំង ដោយម្ខាង គឺក្រុមអ្នកគាំទ្ររបស់លោកដូណាល់ ត្រាំ បានលើកឡើង ពីការរំលោភលើសិទ្ធិក្នុងការបញ្ចេញមតិ ចំណែកម្ខាងទៀត គឺក្រុមអ្នកប្រឆាំងនឹងលោកដូណាល់ ត្រាំ បានលើកឡើងថា វិធានការនេះ គឺធ្វើឡើងយឺតពេលខ្លាំងពេក ក្នុងពេលដែលបណ្តាញសង្គមអស់ទាំងនេះបានទុកបណ្តោយឲ្យលោកដូណាល់ ត្រាំ ចុះផ្សាយតាមអំពើចិត្តអស់រយៈពេល ៤ឆ្នាំមកហើយ។
ជាការពិត យើងសង្កេតឃើញថា នៅក្នុងរយៈពេលជាច្រើនឆ្នាំមកហើយ ដែលចំណាត់ការរបស់បណ្តាញសង្គមទៅលើលោកដូណាល់ ត្រាំ តែងតែជាបញ្ហាចម្រូងចម្រាស ដោយអ្នកខ្លះបានកត់សម្គាល់ថា សារជាច្រើនដែលលោកដូណាល់ ត្រាំ សរសេរនៅលើបណ្តាញសង្គម គឺរំលោភទៅលើលក្ខខណ្ឌនៃការប្រើប្រាស់របស់បណ្តាញសង្គម ហើយថា ប្រសិនបើសារនោះចេញពីអ្នកប្រើប្រាស់ធម្មតាវិញ គណនីរបស់អ្នកនោះប្រាកដជានឹងត្រូវគេបិទចោលតាំងពីយូរណាស់មកហើយ។
ក៏ប៉ុន្តែ កាលពីពេលកន្លងមក បណ្តាញសង្គម ទាំងធ្វីតធ័រ និងទាំងហ្វេសប៊ុក បានបដិសេធមិនចាត់វិធានការលើគណនីរបស់លោកដូណាល់ ត្រាំ ដោយលើកហេតុផលថា សារដែលចេញពីអ្នកនយោបាយ ឬឥស្សរជនសំខាន់ៗដូចជាលោកដូណាល់ ត្រាំ គឺមានសារៈសំខាន់ សម្រាប់សាធារណជន ដូច្នេះហើយបានជាគេបន្ធូរបន្ថយមិនប្រកាន់រឿងរំលោភលើលក្ខខណ្ឌនៃការប្រើប្រាស់ដូចអ្នកប្រើប្រាស់ធម្មតាផ្សេងទៀត។ រហូតទាល់តែនៅពេលនេះ ក្រោយពីមានអំពើហិង្សានៅវិមានកាពីតូល ទើបគេសម្រេចបិទ ឬព្យួរគណនីរបស់លោកដូណាល់ ត្រាំ។
ក៏ប៉ុន្តែ សំណួរត្រូវចោទឡើងថា តើក្រុមហ៊ុនអ៊ីនធ័រនែតអស់ទាំងនេះនាំគ្នាសម្រេចបិទលោកដូណាល់ ត្រាំ ដោយសារតែមានអំពើហិង្សានៅវិមានកាពីតូលពិតមែន ឬក៏ដោយសារតែមើលឃើញថា លោកដូណាល់ ត្រាំជិតអស់អំណាចពីដៃ? តើធ្វើក្នុងគោលការណ៍ ប្រជាធិបតេយ្យ ដើម្បីទប់ស្កាត់អំពើហិង្សា ឬក៏ធ្វើដើម្បីផលប្រយោជន៍ជាក្រុមហ៊ុនឯកជន? តើបណ្តាញសង្គមទាំងនេះ ដែលតាមពិតទៅ គឺជាក្រុមហ៊ុនឯកជន ដែលរកស៊ីស្វែងរកប្រាក់ចំណេញ បានទទួលសិទ្ធិអំណាច និងអាណត្តិមកពីណា ដែលអាចសម្រេចឲ្យ ឬមិនឲ្យអ្នកណាម្នាក់អាចបញ្ចេញមតិបានបែបនេះ?
តាមការពិតទៅ យើងអាចសង្កេតឃើញថា ទាក់ទងនឹងចំណុចនេះ ទាំងអ្នកគាំទ្រ និងអ្នកប្រឆាំងនឹងលោកដូណាល់ ត្រាំ ហាក់ដូចជាមានជំហររួមគ្នា គឺការចោទសួរពីសិទ្ធិអំណាច ការទទួលខុសត្រូវ និងគណនេយ្យភាពរបស់ក្រុមហ៊ុនអ៊ីនធ័រនែត។
អ្នកខ្លះ ដូចជាលោកស្រីប្រមុខរដ្ឋាភិបាលអាល្លឺម៉ង់ អង់ហ្គេឡា មែរកិល ជាដើម ដែលបានរិះគន់លោកដូណាល់ ត្រាំថា មានចំណែកទទួលខុសត្រូវក្នុងអំពើហិង្សានៅវិមានកាពីតូល ក៏ប៉ុន្តែ ក្នុងពេលជាមួយគ្នា ក៏បានរិះគន់ផងដែរចំណាត់ការរបស់បណ្តាញសង្គម ដែលបិទ ឬព្យួរគណនីរបស់លោកដូណាល់ ត្រាំ។
ជាការពិត ដូចដែលលោកស្រីអង់ហ្គេឡា មែរកិល បានលើកឡើងតាមរយៈអ្នកនាំពាក្យ ថា សិទ្ធិសេរីភាពក្នុងការបញ្ចេញមតិ ថ្វីដ្បិតតែវាជាសិទ្ធិជាមូលដ្ឋាន ក៏ប៉ុន្តែ វាក៏មិនមែនគ្មានដែនកំណត់នោះដែរ។ នៅពេលណាដែលការបញ្ចេញមតិ មានពេញទៅដោយការបំភ្លៃនិងបំផ្លើស ការញុះញង់ឲ្យមានសម្អប់ ការរើសអើង ឬអំពើហិង្សា គេចាំបាច់ត្រូវធ្វើអន្តរាគមន៍ ក៏ប៉ុន្តែ អន្តរាគមន៍នេះចាំបាច់ត្រូវតែធ្វើឡើងនៅក្នុងក្របខណ្ឌមួយ ដែលមានកំណត់ច្បាស់លាស់ និងទៅតាមវិធានដែលកំណត់ដោយច្បាប់ អនុម័តដោយតំណាងកើតចេញពីការបោះឆ្នោតរបស់ពលរដ្ឋ មិនមែនធ្វើឡើងតាមតែចិត្តនឹកឃើញរបស់ថ្នាក់ដឹកនាំបណ្តាញសង្គម ដែលជាក្រុមហ៊ុនឯកជន មានគោលដៅរកស៊ីរកប្រាក់ចំណេញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ