នៅក្នុងរយៈពេលមួយរយៈកាលចុងក្រោយនេះ យើងសង្កេតឃើញមានសេចក្តីប្រកាសជាបន្តបន្ទាប់ ទាក់ទងនឹងការធ្វើដំណើរទៅទីអវកាសជាលក្ខណៈទេសចរឯកជន។ កាលពីដើមខែកុម្ភៈ មហាសេដ្ឋីអាមេរិកបានប្រកាសអំពីការបើកឲ្យសាធារណជនចុះឈ្មោះ ដើម្បីអាចក្លាយជាអ្នកដំណើរម្នាក់ក្នុងចំណោមអ្នកដំណើរ ៤នាក់ ទៅក្នុងគន្លងតារាវិថីជុំវិញផែនដី។ ចំណែកថ្ងៃទីពុធ ៣មីនានេះ មហាសេដ្ឋីជប៉ុនមួយរូបក៏បានប្រកាសផងដែរ ផ្តល់កៅអីចំនួន ៨ ឲ្យសាធារណជន ដើម្បីធ្វើដំណើរទៅកាន់ព្រះចន្ទជាមួយលោក នៅឆ្នាំ២០២៣ខាងមុខ។ ការធ្វើដំណើរទៅទីអវកាសជាលក្ខណៈទេសចរឯកជននេះ គឺជាក្តីស្រមៃអស់រយៈពេលជាយូរមកហើយ។ តើគិតមកទល់នឹងពេលនេះ ក្តីស្រមៃនេះបានវិវឌ្ឍឆ្ពោះទៅរកការពិតបានប៉ុណ្ណាហើយ?
តាមការពិតទៅ នៅក្នុងរយៈពេលប៉ុន្មានឆ្នាំចុងក្រោយនេះ ទេសចរណ៍អវកាសមិនមែនត្រឹមតែជាក្តីសុបិនតែប៉ុណ្ណោះទេ ក៏ប៉ុន្តែ មានក្រុមហ៊ុនឯកជនជាច្រើន ដែលបានបោះទុនរាប់ពាន់លានដុល្លាររកស៊ី នៅក្នុងវិស័យនេះ។ នៅក្នុងចំណោមនោះ គេឃើញមានក្រុមហ៊ុនចំនួន ៣ ដែលមានគម្រោងជឿនលឿនទៅមុខខ្លាំងជាងគេ គឺ SpaceX របស់លោក អេឡន មើស្ក៍ (Elon Musk), Blue Origin របស់លោក ជែហ្វ បេសូស៍ (Jeff Bezos) និង Virgin Galactic របស់មហាសេដ្ឋីអង់គ្លេស រីឆាដ ប្រែនសុន (Richard Branson)។
ក៏ប៉ុន្តែ ក្រុមហ៊ុនទាំងនេះមិនមានយុទ្ធសាស្រ្តផ្តោតទៅលើទីផ្សារតែមួយនោះទេ។
ក្រុមហ៊ុន SpaceX ផ្តោតចម្បងទៅលើទេសចរណ៍អវកាសគន្លងតារាវិថី ឬ « Orbital toursim » ដោយគ្រោងហោះដឹកអ្នកដំណើររហូតទៅដល់រយៈកម្ពស់ប្រមាណជា ៤០០គីឡូម៉ែត្រ ហើយអ្នកដំណើរត្រូវស្ថិតនៅក្នុងគន្លងតារាវិថីជុំវិញផែនដីជាច្រើនថ្ងៃ ឬរហូតដល់រាប់សប្តាហ៍ក៏មាន។
ចំណែកក្រុមហ៊ុន Blue Origin និង Virgin Galactic វិញផ្តោតទៅលើទេសចរណ៍អវកាសក្រោមគន្លងតារាវិថី ឬដែលហៅតាមភាសាអង់គ្លេសថា « Suborbital tourism » ពោលគឺយានអវកាសដឹកអ្នកទេសចរទៅដល់រយៈកម្ពស់មួយ ដែលគេចាត់ទុកថាជាអវកាសដែរ ក៏ប៉ុន្តែ មិនទៅដល់រហូតអាចហោះក្នុងគន្លងតារាវិថីជុំវិញផែនដីនោះទេ។
ក្រុមហ៊ុន Virgin Galactic ដែលមានយានអវកាសឈ្មោះថា SpaceShipTwo គ្រោងហោះទៅដល់រយៈកម្ពស់ប្រមាណជា ៩០គីឡូម៉ែត្រ ចំណែកក្រុមហ៊ុន Blue Origin គ្រោងហោះទៅដល់រយៈកម្ពស់ប្រមាណជា ១០០គីឡូម៉ែត្រ។ ក្នុងករណីទាំងពីរនេះ អ្នកដំណើរស្ថិតនៅក្នុងទីអវកាស និងក្នុងស្ថានភាពអណ្តែតគ្មានកម្លាំងទំនាញ តែប៉ុន្មាននាទីតែប៉ុណ្ណោះ មុននឹងត្រូវហោះចុះមកវិញ។
បើមើលពីជ្រុងបច្ចេកវិទ្យា ទេសចរណ៍អវកាសក្រោមគន្លងតារាវិថីនេះមិនសូវជាមានភាពអស្ចារ្យដូចការហោះចេញទៅដល់គន្លងតារាវិថីនោះទេ។ ក៏ប៉ុន្តែ បើនិយាយពីកិច្ចការជំនួញវិញ វាអាចជាទីផ្សារដែលមានសក្តានុពល ដោយសារតែសំបុត្រមានតម្លៃថោកជាង ហើយអតិថិជនដែលមានលទ្ធភាពទិញសំបុត្រក៏មានច្រើនជាង។
ការសិក្សាទីផ្សារចេញផ្សាយ កាលពីចុងខែមករាកន្លងទៅនេះ បង្ហាញថា ទីផ្សារទេសចរណ៍អវកាសទូទៅនៅទូទាំងពិភពលោកទាំងមូលនឹងមានកំណើនក្នុងចន្លោះពីជាង ១៣% ទៅ ជាង ១៥% ហើយអាចនឹងមានទំហំជាទឹកប្រាក់រហូតដល់ទៅប្រមាណជា ១ពាន់៧រយលានដុល្លារ នៅឆ្នាំ២០២៧ខាងមុខ ដោយនៅក្នុងនោះភាគច្រើនលើសលុប ពោលគឺ រហូតដល់ទៅ១ពាន់៥រយលានដុល្លារ ជាទីផ្សារទេសចរណ៍អវកាសក្រោមគន្លងតារាវិថី ឬ « Suborbital toursime »។
គិតរហូតមកទល់នឹងពេលនេះ នៅក្នុងចំណោមក្រុមហ៊ុនទាំង ៣នេះ នៅមិនទាន់មានក្រុមហ៊ុនណាមួយអាចចាប់ផ្តើមហោះហើរដឹកអ្នកទេសចរទៅកាន់ទីអវកាសបាននៅឡើយនោះទេ ក៏ប៉ុន្តែ ឆ្នាំ២០២១នេះ អាចជាចំណុចរបត់ដ៏សំខាន់មួយ នៃការបើកសករាជថ្មីក្នុងវិស័យនេះ។ ហើយប្រសិនបើអ្វីៗអាចដំណើរការទៅដូចការគ្រោងទុក គឺក្រុមហ៊ុន SpaceX ដែលនឹងត្រូវក្លាយជាអ្នកបើកទំព័រប្រវត្តិសាស្រ្តនេះ ជាមួយនឹងបេសកកម្ម ដែលគេឲ្យឈ្មោះថា « Inspiration4 »។
នៅក្នុងបេសកកម្មនេះ ក្រុមហ៊ុន SpaceX នឹងដឹកមហាសេដ្ឋីវ័យក្មេងអាមេរិកមួយរូប ឈ្មោះ Jared Isaacman ព្រមទាំងអ្នកដំណើរ ៣នាក់ផ្សេងទៀត ទៅកាន់គន្លងតារាវិថីជុំវិញផែនដី ហើយគ្រោងនឹងស្ថិតនៅក្នុងគន្លងតារាវិថីនោះ ក្នុងរយៈពេលជាច្រើនថ្ងៃ។ បេសកកម្មនេះនឹងត្រូវធ្វើ ដោយប្រើរ៉ុកកែតធុន Falcon9 និងយាន Crew Dragon ដែល SpaceX ធ្លាប់បានប្រើ ដើម្បីដឹកអវកាសយានិករបស់ណាសាទៅកាន់ស្ថានីយ៍អវកាសអន្តរជាតិដោយជោគជ័យចំនួនពីរលើករួចមកហើយ នាពេលកន្លងមក។
នៅឆ្នាំ២០២៣ គឺយានអវកាសប្រភេទថ្មី ឈ្មោះថា Starship ដែលក្រុមហ៊ុន SpaceX គ្រោងប្រើ ដើម្បីដឹកមហាសេដ្ឋីជប៉ុន គឺលោក យូសាគូ ម៉ាអេហ្សាវ៉ា (Yusaku Maezawa) និងអ្នកដំណើរ ៨នាក់ផ្សេងទៀត ដែលលោកទើបនឹងប្រកាសផ្តល់កៅអីឲ្យ កាលពីថ្ងៃពុធម្សិលមិញ ដោយដំណើរទេសចរណ៍ទៅកាន់ទីអវកាសនោះ នឹងមិនទៅត្រឹមក្នុងគន្លងតារាវិថីជុំវិញផែនដីនោះទេ គឺនឹងធ្វើដំណើររហូតទៅដល់ព្រះចន្ទ ហោះក្នុងគន្លងតារាវិថីជុំវិញព្រះចន្ទ រួចហើយទើបត្រឡប់មកកាន់ភពផែនដីវិញ។
មកទល់នឹងពេលនេះ យាន Starship ស្ថិតនៅក្នុងដំណាក់កាលសាកល្បងនៅឡើយ ដោយការសាកល្បងទាំង ៣លើកចុងក្រោយ ចាប់តាំងពីខែធ្នូឆ្នាំ២០២០មក សុទ្ធតែត្រូវបញ្ចប់ដោយការផ្ទុះយាន។ ទោះជាយ៉ាងណា លោក អេឡន មើស្ក៍ បានអះអាង កាលពីថ្ងៃពុធម្សិលមិញថា Starship នេះនឹងត្រូវធ្វើរួចរាល់ ហើយមានសុវត្ថិភាពគ្រប់គ្រាន់ សម្រាប់បេសកកម្មដឹកអ្នកដំណើរទៅកាន់អវកាស នៅឆ្នាំ២០២៣។
ចំពោះក្រុមហ៊ុន Virgin Galactic វិញ ដែលបានហោះដឹកអ្នកដំណើរចំនួន ៥នាក់ ក្នុងដំណាក់កាលសាកល្បង ប្រកបដោយជោគជ័យចំនួនពីរលើករួចមកហើយនោះ កាលពីដំបូង គ្រោងហោះសម្ពោធយានអវកាសរបស់ខ្លួនជាផ្លូវការ នៅក្នុងអំឡុងដើមឆ្នាំ២០២១នេះ ក៏ប៉ុន្តែ បានប្រកាសពន្យារពេលទៅធ្វើនៅឆ្នាំ២០២២វិញ។ ចំណែកក្រុមហ៊ុន Blue Origin ថ្វីដ្បិតតែបានហោះសាកល្បងរ៉ុកកែត និងយាន បានជោគជ័យជាច្រើនលើករួចមកហើយ ក៏ប៉ុន្តែ នៅមិនទាន់ហោះសាកល្បងដឹកអ្នកដំណើរនៅឡើយនោះទេ។ ទោះជាយ៉ាងណា គេនាំគ្នាដាក់ក្តីរំពឹងថា គម្រោងរបស់ Blue Origin នឹងមានដំណើរការទៅមុខលឿន ក្រោយពេលដែលលោក ជែហ្វ បេសូស៍ ប្រកាសលាឈប់ពីតំណែងអគ្គនាយកក្រុមហ៊ុន Amazon ដើម្បីយកពេលទៅផ្តោតលើកិច្ចការផ្សេង ក្នុងនោះក៏មានដែរ ការចំណាយពេលច្រើនជាងមុន ក្នុងការចាត់ចែងការងាររបស់ Bleu Origin៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ