ថាមពលនុយក្លេអ៊ែរ ១០ឆ្នាំក្រោយគ្រោះមហន្តរាយហ្វូគូស្ហ៊ីម៉ា
ចុះផ្សាយនៅថ្ងៃ៖
ស្តាប់ - ០៥:៣៨
កាលពី១០ឆ្នាំមុន នៅថ្ងៃទី១១មីនា ឆ្នាំ២០១១ គ្រោះរញ្ជួយដី និងរលកយក្សស៊ូណាមី បានបង្កឲ្យមានគ្រោះថ្នាក់នុយក្លេអ៊ែរដ៏ធំមួយ នៅហ្វូគូស្ហ៊ីម៉ា ក្នុងប្រទេសជាប៉ុន ហើយបានធ្វើឲ្យគេចោទជាសំណួរ ជុំវិញសុវត្ថិភាពនៃថាមពលនុយក្លេអ៊ែរ។ ១០ឆ្នាំក្រោយគ្រោះមហន្តរាយនេះ តើវិស័យថាមពលនុយក្លេអ៊ែរទូទៅនៅទូទាំងពិភពលោក បានវិវឌ្ឍដល់កម្រិតណា?
ការផ្ទុះម៉ាស៊ីនប្រតិករនុយក្លេអ៊ែរ និងការលេចធ្លាយវិទ្យុសកម្ម នៅហ្វូគូស្ហ៊ីម៉ា កាលពី១០ឆ្នាំមុន ត្រូវបានគេចាត់ទុកថាជាគ្រោះថ្នាក់នុយក្លេអ៊ែរដ៏ធំបំផុត រាប់ចាប់តាំងពីគ្រោះថ្នាក់នុយក្លេអ៊ែរនៅឈែណូប៊ីល កាលពីឆ្នាំ១៩៨៦។ ក៏ប៉ុន្តែ ក្នុងពេលជាមួយគ្នា គ្រោះថ្នាក់នុយក្លេអ៊ែរនេះ ក៏កើតឡើងផងដែរ នៅក្នុងអំឡុងពេលដែលពិភពលោក កំពុងដើរមកដល់របត់ថ្មីដ៏សំខាន់មួយ គឺការប្រយុទ្ធប្រឆាំងនឹងការឡើងកម្តៅផែនដី។
គេដឹងថា ដើម្បីទប់ស្កាត់ការឡើងកម្តៅផែនដីនេះ គេចាំបាច់ត្រូវតែកាត់បន្ថយការបញ្ចេញឧស្ម័នកាបូនិច ហើយប្រភពដ៏ចម្បងមួយនៃការបញ្ចេញឧស្ម័នកាបូនិច គឺវិស័យថាមពល ដែលបច្ចុប្បន្ននេះពឹងផ្អែកខ្លាំងលើថាមពលផូស៊ីល ជាពិសេស គឺប្រេង និងធ្យូងថ្ម។
នៅក្នុងពេលដែលតម្រូវការថាមពលនៅទូទាំងពិភពលោកកំពុងតែកើនឡើងជាប់ជាប្រចាំដូចជាសព្វថ្ងៃនេះ ដើម្បីអាចកាត់បន្ថយការបញ្ចេញឧស្ម័នកាបូនិចបាន ដោយនៅរក្សាកម្រិតផ្គត់ផ្គង់ថាមពលទៅតាមតម្រូវការបាន គេត្រូវការជាចាំបាច់ ជំនួសថាមពលផូស៊ីល ដោយថាមពលផ្សេង ដែលមិនបញ្ចេញឧស្ម័នកាបូនិច ហើយក្នុងចំណោមប្រភេទថាមពលដែលមិនបញ្ចេញឧស្ម័នកាបូនិចក្នុងនោះ គឺមាននុយក្លេអ៊ែរ ដែលជាប្រភពចម្បង រួមជាមួយនឹងវារីអគ្គិសនី។
ហេតុដូច្នេះហើយបានជាអ្នកជំនាញជាច្រើនតែងតែបានលើកឡើងថា នៅក្នុងបរិបទនៃកំណើនតម្រូវការថាមពលបច្ចុប្បន្ននេះ ប្រសិនបើគេចង់ទប់ស្កាត់កុំឲ្យផែនដីឡើងកម្តៅលើសពី ២អង្សា ទៅតាមគោលដៅ ដែលបានកំណត់នៅក្នុងកិច្ចព្រមព្រៀងអាកាសធាតុក្រុងប៉ារីស ថាមពលនុយក្លេអ៊ែរ គឺជាជម្រើសមួយ ដែលគេពិបាកនឹងចៀសរួច ឬយ៉ាងហោចណាស់ ពិបាកនឹងចៀសរួច ក្នុងពេលបច្ចុប្បន្ន និងក្នុងរយៈពេលខ្លីខាងមុខ។
ជាក់ស្តែង យើងឃើញថា បើទោះបីជាមានការបារម្ភ អំពីបញ្ហាសុវត្ថិភាពនុយក្លេអ៊ែរ ហើយភ្លាមៗក្រោយពីមានគ្រោះមហន្តរាយនៅហ្វូគូស្ហ៊ីម៉ា ប្រទេសជាច្រើនបានសន្យាកាត់បន្ថយការពឹងផ្អែកលើថាមពលនុយក្លេអ៊ែរ ក៏ប៉ុន្តែ ១០ឆ្នាំក្រោយមក យើងឃើញថា ថាមពលនុយក្លេអ៊ែរមិនត្រឹមតែមិនថយចុះនោះទេ តែមានតែកើនឡើងទៅវិញ។
យោងតាមរបាយការណ៍របស់ទីភ្នាក់ងារថាមពលអន្តរជាតិ នៅក្នុងរយៈពេល១០ឆ្នាំកន្លងទៅនេះ ចាប់តាំងពីក្រោយគ្រោះមហន្តរាយហ្វូគូស្ហ៊ីម៉ា រហូតមកទល់នឹងពេលបច្ចុប្បន្ន ថាមពលអគ្គិសនីដែលមានប្រភពចេញពីនុយក្លេអ៊ែរ បានកើនឡើងរហូតដល់ទៅជាង ១០% ឯណោះ បើគិតជាសរុបនៅទូទាំងពិភពលោកទាំងមូល។
បច្ចុប្បន្ន ចំនួនរ៉េអាក់ទ័រនុយក្លេអ៊ែរ ដែលកំពុងដំណើរការនៅទូទាំងពិភពលោក មានរហូតដល់ទៅ ៤១៣ ស្ថិតនៅក្នុងប្រទេសចំនួន ៣២ ហើយក្នុងចំណោមប្រភពថាមពលអគ្គិសនីសរុបនៅទូទាំងពិភពលោក មានរហូតដល់ទៅប្រមាណជា ១០% មាន ប្រភពចេញពីនុយក្លេអ៊ែរ។
ជាការពិតណាស់ថា កំណើននេះ គឺមានប្រភពចម្បងចេញពីប្រទេសដែលទើបនឹងរីកលូតលាស់ថ្មី ជាពិសេស ចិន ដែលជាប់ឈ្មោះជាប្រទេសសាងសង់រ៉េអាក់ទ័រនុយក្លេអ៊ែរថ្មីច្រើនជាងគេ ដោយចិនបានសាងសង់ និងដាក់ឲ្យដំណើរការរ៉េអាក់ទ័រនុយក្លេអ៊ែរ រហូតដល់ទៅ ៣៧រ៉េអាក់ទ័រ គ្រាន់តែក្នុងរយៈពេល ១០ឆ្នាំកន្លងទៅនេះ។
ក៏ប៉ុន្តែ ក្នុងពេលជាមួយគ្នា គេសង្កេតឃើញថា បណ្តាប្រទេសជឿនលឿន ក៏នៅតែបន្តពឹងផ្អែកខ្លាំងដែរ លើថាមពលនុយក្លេអ៊ែរ ដោយសហរដ្ឋអាមេរិក នៅតែជាប្រទេសនាំមុខគេ ដោយមានរ៉េអាក់ទ័រនុយក្លេអ៊ែរសរុបរហូតដល់ទៅ ៩៤ ចំណែកបារាំងវិញ ស្ថិតនៅលំដាប់ទី២ បើរាប់ចំនួនរ៉េអាក់ទ័រ (ដែលមានសរុបចំនួន ៥៦) ក៏ប៉ុន្តែ ជាប់ចំណាត់ថ្នាក់លេខ១ បើគិតជាចំណែកថាមពលនុយក្លេអ៊ែរ ដែលមានរហូតដល់ទៅជាង ៧០% នៃតម្រូវការអគ្គិសនីសរុបក្នុងស្រុក។
ចំណុចដែលកាន់តែគួរឲ្យចាប់អារម្មណ៍ជាងនេះទៅទៀត គឺជប៉ុន។ ជប៉ុន ដែលជាប្រទេសរងគ្រោះដោយផ្ទាល់ ក្នុងគ្រោះមហន្តរាយនុយក្លេអ៊ែរហ្វូគូស្ហ៊ីម៉ា បានផ្អាកដំណើរការរ៉េអាក់ទ័រនុយក្លេអ៊ែរស្ទើរតែទាំងអស់របស់ខ្លួន ដោយក្នុងចំណោមរ៉េអាក់ទ័រសរុបទាំង ៥៤ ដែលមាននៅមុនគ្រោះថ្នាក់នៅហ្វូគូស្ហ៊ីម៉ា មានតែ ៩ប៉ុណ្ណោះ ដែលកំពុងមានដំណើរការបច្ចុប្បន្ន។ ក៏ប៉ុន្តែ ១០ឆ្នាំក្រោយគ្រោះមហន្តរាយ រដ្ឋាភិបាលជប៉ុនកំពុងតែពិចារណា ចង់បង្កើនថាមពលនុយក្លេអ៊ែរឡើងវិញ ដោយបង្កើនពី ៦% បច្ចុប្បន្ននេះ ឲ្យឡើងដល់ ២០% ទៅ ២២% នៅក្នុងឆ្នាំ២០៣០ខាងមុខ។
និយាយសរុបជារួមមកវិញ គ្រោះមហន្តរាយហ្វូគូស្ហ៊ីម៉ាបានបង្កឲ្យមានក្តីបារម្ភជាទូទៅ ជុំវិញសុវត្ថិភាពនៃថាមពលនុយក្លេអ៊ែរ ហើយកាន់តែគួរឲ្យបារម្ភទៅទៀត ដែលគ្រោះថ្នាក់នុយក្លេអ៊ែរបែបនេះអាចកើតឡើង នៅក្នុងប្រទេសដែលមានបច្ចេកវិទ្យាជឿនលឿនដូចជាប្រទេសជប៉ុន។ ក៏ប៉ុន្តែ ក្នុងពេលជាមួយគ្នា តម្រូវការថាមពល បូករួមជាមួយនឹងភាពចាំបាច់ក្នុងការកាត់បន្ថយការបញ្ចេញឧស្ម័នកាបូនិច ធ្វើឲ្យគេនៅតែពឹងផ្អែកខ្លាំងលើថាមពលនុយក្លេអ៊ែរ ដោយពិបាកនឹងចៀសរួច។ សូម្បីតែសកម្មជនបរិស្ថាន បូករួមទាំងអ្នកជំនាញអន្តរជាតិផង ជាពិសេស អ្នកជំនាញនៅក្នុងគណៈកម្មការអន្តររដ្ឋាភិបាលទទួលបន្ទុកការប្រែប្រួលអាកាសធាតុ ធ្លាប់បានលើកឡើងផងដែរ នៅក្នុងរបាយការណ៍របស់ខ្លួន កាលពីឆ្នាំ២០១៨ អំពីតួនាទីរបស់ថាមពលនុយក្លេអ៊ែរ នៅក្នុងការទប់ស្កាត់ការឡើងកម្តៅផែនដី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ