ចិនកំពុងតែក្លាយជាកម្មវត្ថុ នៃការជះកំហឹងក្រេវក្រោធ របស់បាតុករភូមា
ចុះផ្សាយនៅថ្ងៃ៖
ស្តាប់ - ០៦:០៨
សកម្មភាពបាតុកម្មនៅប្រទេសភូមា កាន់តែមានភាពហិង្សាខ្លាំងឡើងៗ ដោយការប្រឈមមុខដាក់គ្នា រវាងបាតុករភូមាដែលតាំងចិត្តមុតមាំ និងកងសមត្ថកិច្ចដែលទទួលបញ្ជាឲ្យបង្រ្កាប យ៉ាងចាស់ដៃ។ កាលពីថ្ងៃអាទិត្យទី១៤មីនា មានបាតុករយ៉ាងហោច ៧៤នាក់បានស្លាប់ ហើយកាលពីថ្ងៃចន្ទទី១៥មីនា មាន២០នាក់ បានស្លាប់បន្ថែមទៀត។ រោងចក្រចិន ក្បែរក្រុងរ៉ង់ហ្គូន ជាច្រើនកន្លែង ត្រូវបានដុតបំផ្លាញ នឹងរកការវាយបំផ្លាញ ដោយក្រុមបាតុករ។ គេសង្កេតឃើញថា ទឹកចិត្តក្រេវក្រោធរបស់ក្រុមបាតុករភូមា មានសន្ទុះកាន់តែខ្លាំង ហើយពួកគេបានជះកំហឹងនេះ ទៅលើជនជាតិចិន ក៏ដូចជារោងចក្រ សហគ្រាសចិននៅភូមា ដោយសារតែបាតុករភូមាជឿថា គឺរដ្ឋាភិបាលចិន ដែលជាអ្នកនៅពីក្រោយ ចាំគាំទ្រកងទ័ពភូមា ឲ្យប្លន់អំណាចពីប្រជាជន។
រោងចក្រចិនចំនួន៣២ទីតាំង រងការវាយបំផ្លាញ និងដុតកំទេច
កាលពីថ្ងៃអាទិត្យ ទី១៤មីនា យ៉ាងហោចណាស់ មានរោងចក្រចិនចំនួន ៣២ទីតាំង នៅសង្កាត់ Hlaing Tharyar ជាយទីក្រុងរ៉ង់ហ្គូន ត្រូវបានបាតុករភូមា ចូលទៅវាយកំទេច និងដុតបំផ្លាញ។ សមត្ថកិច្ចភូមាបានបាញ់រះ បណ្តេញក្រុមបាតុករ បណ្តាលឲ្យស្លាប់ យ៉ាងហោច២២នាក់ នៅក្នុងសង្កាត់នេះ។ ជាសរុប នៅថ្ងៃអាទិត្យ ទី១៤កុម្ភៈ មានបាតុករភូមា ស្លាប់ចំនួន ៧៤នាក់ ទូទាំងប្រទេស ដែលនេះគឺជាចំនួនស្លាប់ច្រើនបំផុត។ គិតពីថ្ងៃផ្ទុះបាតុកម្មនៅដើមខែកុម្ភៈមក គឺមានប្រជាជនភូមា ប្រមាណ១៨០នាក់ហើយ ដែលបានស្លាប់ ដោយការបង្រ្កាបរបស់សមត្ថកិច្ច។
ខណៈដែលកំហឹងក្រេវក្រោធរបស់បាតុករភូមា កាន់តែផុសផុលឡើង គេសង្កេតឃើញថា ប្រជាជនចិន ឬក៏មុខជំនួញរបស់ចិននៅភូមា បានក្លាយជាកម្មវត្ថុនៃការជះកំហឹង របស់បាតុករភូមា។ កាលពីថ្ងៃចន្ទ ទី១៥មីនា លោក Zhao Lijian អ្នកនាំពាក្យក្រសួងការបរទេសចិន បានលើកឡើងថា រដ្ឋាភិបាលចិន កំពុងតាមដានស្ថានការណ៍នេះ ដោយយកចិត្តទុកដាក់បំផុត។ ក្រសួងការបរទេសចិន បានអំពាវនាវ ឲ្យប្រជាជនចិនរស់នៅក្នុងប្រទេសភូមា ត្រូវមានការប្រុងប្រយ័ត្ន។ តែយ៉ាងណា សម្រាប់ពេលនេះ រដ្ឋចិន មិនទាន់មានគំរោងណាមួយ ជន្លៀសប្រជាជនខ្លួន ចេញពីប្រទេសភូមាទេ។
ទន្ទឹមនឹងនេះ ក្រសួងការបរទេសចិន បានអំពាវនាវ ឲ្យរដ្ឋអំណាចភូមា ត្រូវការពារសុខសុវត្ថិភាពរបស់ក្រុមហ៊ុន ក៏ដូចជាសន្តិសុខរបស់ប្រជាជនចិន ហើយនឹងត្រូវវែកមុខ ចាប់ខ្លួនអ្នកទទួលខុសត្រូវ ក្នុងការដុតបំផ្លាញរោងចក្ររបស់ចិន។ បើតាមប្រភពចុះផ្សាយដោយ កាសែតចិន ជាភាសាអង់គ្លេស Global Times ការខូតខាតរបស់រោងចក្រចិន កាលពីថ្ងៃអាទិត្យ គឺមានតម្លៃគិតជាទឹកប្រាក់ ប្រមាណ៣២លានដុល្លារ។
តៃវ៉ាន់ភ័យ ខ្លាចបាតុករច្រឡំថាជាចិន
ដោយឡែក ក្រសួងការបរទេសកោះតៃវ៉ាន់ ក៏បានជូនដំណឹង ឲ្យទៅប្រជាជនខ្លួន ដែលមានហាងទំនិញ ឬរោងចក្រ នៅភូមា ត្រូវដាក់ទង់ជាតិតៃវ៉ាន់ និងសរសេរផ្លាកអក្សរនៅខាងមុខ ដើម្បីបញ្ជាក់ថាខ្លួន គឺជាតៃវ៉ាន់ មិនមែនជាចិនទេ។ ធ្វើបែបនេះ ដើម្បីបញ្ចៀសកុំឲ្យមានការប្រើអំពើហិង្សាដោយយល់ច្រឡំ។ ក្រសួងការបរទេសតៃវ៉ាន់អះអាងថា កាលថ្ងៃអាទិត្យទី ១៤មីនា មានជនជាតិតៃវ៉ាន់យ៉ាងហោច១០នាក់ ដែលត្រូវរារាំង ព័ទ្ធស្ទាក់ ដោយការប្រើអំពើហិង្សារបស់បាតុករភូមា ទៅលើទីតាំងរោងចក្រ និងសហគ្រាសពួកគេ។
យ៉ាងហោចណាស់ មានក្រុមហ៊ុនតៃវ៉ាន់ ជាង២៧០ក្រុមហ៊ុន ដែលធ្វើជំនួញនៅភូមា ក្នុងវិស័យវាយនភណ្ឌ ដេរខោអាវ ស្បែកជើង និង វិស័យធនាគារផងដែរ។ គួរកត់សំគាល់ថា តាំងតែពីក្រុមយោធាភូមា បានធ្វើរដ្ឋប្រហារភ្លាមនៅថ្ងៃទី១កុម្ភៈ រដ្ឋាភិបាលតៃវ៉ាន់ បានចេញសេចក្តីប្រកាសថ្កោលទោសភ្លាម ដែលគោលជំហរនេះ វាខុសគ្នាស្រលះពីរដ្ឋាភិបាលចិនប៉េកាំង។ ចិនបានបដិសេធ មិនឲ្យក្រុមប្រឹក្សាសន្តិសុខ ប្រើពាក្យថា ថ្កោលទោសរដ្ឋប្រហារទេ។
ប្រជាជនភូមាជឿថាចិន គាំទ្ររបបសិក
មានប្រជាជនភូមា កាន់តែច្រើន ដែលជឿថា ចិនមានគោលជំហរមិនច្បាស់លាស់ ដៃមួយ ចង់ចាប់ត្រីម្តង២។ អ្នកខ្លះទៀតជឿថា គឺក្រុមកងទ័ពភូមា អាងថាមានចិន ជាបង្អែកនៅពីក្រោយ បានជាហ៊ានធ្វើរដ្ឋប្រហារ មិនខ្លាចទណ្ឌកម្ម និងការថ្កោលទោស ពីសំណាក់ប្រទេសលោកខាងលិច។ អំពើហិង្សា ធ្វើទៅលើរោងចក្រ និងក្រុមហ៊ុនចិន នាប៉ុន្មានថ្ងៃចុងក្រោយនេះ បានបង្ហាញឲ្យឃើញច្បាស់ អំពីទំនោរនៃការជះកំហឹង របស់ប្រជាជនភូមា ទៅលើផលប្រយោជន៍ចិន។
មានប្រភពខ្លះ អះអាងថា បើសិនជាស្ថានការណ៍កាន់តែដុនដាប ចិនអាចនឹងបញ្ជូនកម្លាំង ដើម្បីចូលមកការពារផលប្រយោជន៍របស់ចិននៅភូមា។ ជាក់ស្តែង កំពង់ផែ និងបំពង់បង្ហូរឧស្ម័នចិន ដែលស្ថិតនៅ ក្នុងរដ្ឋរ៉ាឃីន។ ដំណឹងបំផុលបំផុល ពិតខ្លះមិនពិតខ្លះ នៅតាមបណ្តាញសង្គម បានចូលរួមធ្វើឲ្យប្រជាជនភូមា មានកំហឹងស្អប់ចិនកាន់តែខ្លាំង។ សកម្មជនប្រឆាំងម្នាក់ ឈ្មោះ Maung Zarni បានសរសេរលើទំព័រ Twitter ដោយប្រៀបធៀបស្ថានការណ៍នៅភូមា ថាដូចទៅនឹងស៊ីរី។ នៅស៊ីរីមានរុស្ស៊ី ចាំជួយរបបផ្តាច់ការបាស្ហារ អាល់អាសាដ រីឯនៅភូមាវិញ គឺមានចិន ជាអ្នកចាំជួយរបបសិករបស់ឧត្តមសេនីយ៍ មីន អ៊ុងឡាំង។
ជាការកត់សំគាល់ ចលនាបាតុកម្មរបស់ប្រជាជនភូមា ដែលបានផ្តើមឡើងដោយការដង្ហែរក្បួនដោយសន្តិវិធី តែពេលនេះ ហាក់កំពុងតែហក់ចូល ទៅក្នុងសកម្មភាពហិង្សាអាណាធិបតេយ្យ បន្ទាប់ពីរងការវាយបង្រ្កាប យ៉ាងចាស់ដៃពីសំណាក់កងទ័ពភូមា។
បាតុកម្មសន្តិវិធី ក្លាយជាសង្រ្គាមស៊ីវីល?
ដោយសង្កេតឃើញថា បាតុកម្មដោយសន្តិវិធី មិនបានលទ្ធផល ហើយបែរជារងការវាយបង្រ្កាប ស្លាប់មនុស្សជាច្រើននាក់បែបនេះ បាតុករភូមា ហាក់កំពុងតែផ្លាស់ប្តូរយុទ្ធសាស្ត្រ ជ្រើសយកការតស៊ូប្រយុទ្ធ ដោយប្រើកម្លាំង មិនខ្លាចស្លាប់។ សកម្មជនប្រឆាំងម្នាក់ ដែលជាអនុប្រធាននៃគណកម្មាធិការតំណាងសភាសម្ព័ន្ធភូមា ដែលត្រូវបានបង្កើតឡើងក្រៅផ្លូវការ ដោយប្រជាជន បានអំពាវនាវ ឲ្យប្រជាជនភូមាទាំងអស់ នាំគ្នាធ្វើបដិវត្តតស៊ូ ដើម្បីផ្តួលរំលំរបបផ្តាច់ការយោធា។ សារអំពាវនាវ ដែលមានខ្លឹមសារ ហាក់ហៅឲ្យប្រជាជនភូមាកាន់អាវុធប្រយុទ្ធនេះ បានលើកឡើងផងដែរថា ប្រជាជនជនជាតិភាគតិត មានជនជាតិកេរ៉េន ជនជាតិហ្សាន ជនជាតិកាឈីនជាដើម នឹងបញ្ជូនអាវុធ មកជួយបាតុករភូមា។
ជាការពិត មានការបារម្ភ កាន់តែខ្លាំងឡើង អំពីស្ថានការណ៍ចលាចល ក្លាយជាសង្រ្គាមស៊ីវីល ភូមា។ ស្ថានការណ៍ចលាចលនេះ អាចនឹងធ្វើឲ្យប៉ះពាល់ជាខ្លាំង ដល់ជំនួញ និងផលប្រយោជន៍របស់ចិន នៅភូមា។ សង្រ្គាមនឹងចលាចលនៅភូមា ក៏អាចធ្វើឲ្យច្រួលច្របស់ផងដែរ ដល់តំបន់អាស៊ាន។ សម្រាប់ពេលនេះ នៅចំពោះមុខមហាជន ចិនតែងតែបានអំពាវនាវ ឲ្យគ្រប់ភាគីនយោបាយភូមា ត្រូវចរចាគ្នាដោយសន្តិវិធី។ តែការពិតនៅពីក្រោយខ្នងយ៉ាងណា គឺគ្មាននរណាដឹងច្បាស់ ពីគោលជំហររបស់ចិននោះទេ។ មិនយូរមិនឆាប់ ចិនប្រាកដជាត្រូវសម្រេចចិត្ត ថាត្រូវជ្រើសរើសយកភាគីមួយហើយ ដើម្បីការពារផលប្រយោជន៍របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ