អាជ្ញាធរអាមេរិកស្នើឲ្យផ្អាកការចាក់វ៉ាក់សាំង Johnson&Johnson ដោយបារម្ភពីបញ្ហាកំណកឈាម
ចុះផ្សាយនៅថ្ងៃ៖
ស្តាប់ - ០៤:៥៦
អាជ្ញាធរសុខាភិបាលអាមេរិកបានណែនាំឲ្យផ្អាកការប្រើប្រាស់វ៉ាក់សាំង Johnson & Johnson ដែលជាវ៉ាក់សាំងចាក់តែមួយដូស។ សេចក្តីប្រកាសនេះ ធ្លាក់មកក្រោយមានសេចក្តីរាយការណ៍ថា វ៉ាក់សាំង Johnson & Johnson មានពាក់ព័ន្ធនឹងបញ្ហាកំណកឈាមដ៏កម្រ ដូចវ៉ាក់សាំងរបស់អង់គ្លេស AstraZeneca ដែរ។ បញ្ហាកំណកឈាមគឺជាករណីកម្រខ្លាំងទេ ចុះហេតុអ្វីអាជ្ញាធរសុខាភិបាលអាមេរិកប្រកាសឲ្យផ្អាកការចាក់វ៉ាក់សាំង Johnson & Johnson? តើមន្ទីរពិសោធន៍ Johnson & Johnson និយាយអ្វីខ្លះជុំវិញបញ្ហានេះ?
នៅក្នុងសេចក្តីថ្លែងការណ៍មួយ អាជ្ញាធរសុខាភិបាលអាមេរិកបាននិយាយថា ពួកគេកំពុងធ្វើការស៊ើបអង្កេតអំពីបញ្ហាកំណកឈាមចំនួន ៦ ករណីដែលបានកើតឡើងលើស្ត្រីដែលមានអាយុចន្លោះពី ១៨ ទៅ ៤៨ ឆ្នាំ ហើយរោគសញ្ញាបានលេចចេញក្នុងរយៈពេលពី ៦ ទៅ ១៣ ថ្ងៃបន្ទាប់ពីទទួលបានការចាក់វ៉ាក់សាំងរួច។
ភាគច្រើននៃអ្នកទទួលថ្នាំបង្ការកូវីដរបស់មន្ទីរពិសោធន៍ Johnson & Johnson មិនមានរងផលប៉ះពាល់រំខានអ្វីឡើយ ឬមានផលប៉ះពាល់ខ្លះដែរតែក្នុងកម្រិតមួយស្រាល។ ចំណែកជំងឺកំណកឈាម ៦ ករណី ដែលត្រូវបានរកឃើញក្នុងចំណោមអ្នកចាក់វ៉ាក់សាំងសរុបទាំងអស់ប្រមាណ ៦ លាន ៨សែននាក់នៅក្នុងសហរដ្ឋអាមេរិកគឺជាករណីកម្របំផុត។ ក្នុងចំណោម ៦ករណីមានម្នាក់ស្លាប់ ហើយអ្នកជំងឺម្នាក់ទៀតស្ថិតក្នុងស្ថានភាពធ្ងន់ធ្ងរ។
តែទោះបីវាជាករណីកម្រខ្លាំងក្តី អាជ្ញាធរសុខាភិបាលអាមេរិក កំពុងដាក់ការប្រុងប្រយ័ត្នខ្ពស់ចំពោះរឿងនេះ និងបានណែនាំឲ្យផ្អាកការប្រើប្រាស់វ៉ាក់សាំង Johnson & Johnson នេះជាបណ្តោះអាសន្ន។ ការណែនាំរបស់អាជ្ញាធរអាមេរិកខាងលើ ធ្វើឡើងក្រោយករណីកំណកឈាមកម្រស្រដៀងគ្នានេះ កើតឡើងដែរចំពោះវ៉ាក់សាំងអង់គ្លេស AstraZeneca រហូតជំរុញឲ្យប្រទេសខ្លះសម្រេចផ្អាកចាក់វ៉ាក់សាំងនេះឲ្យប្រជាជនខ្លួនទៀតផង។
មជ្ឈមណ្ឌលគ្រប់គ្រងនិងបង្ការជំងឺ ព្រមទាំងទីភ្នាក់ងារឱសថអាមេរិក បានចេញសេចក្តីថ្លែងការណ៍រួមមួយដោយបញ្ជាក់ថាបញ្ហាឈាមកកគឺជាជំងឺឈាមកកនៅក្នុងសរសៃវែន ហើយជំងឺកំណកឈាមប្រភេទនេះត្រូវការការព្យាបាលខុសពីធម្មតា។
មជ្ឈមណ្ឌលគ្រប់គ្រងនិងបង្ការជំងឺរបស់អាមេរិក នឹងកោះប្រជុំគណៈកម្មាធិការប្រឹក្សាស្តីពីការអនុវត្តការចាក់ថ្នាំបង្ការ (ACIP) នៅថ្ងៃពុធ ១៤ មេសានេះ ដើម្បីពិនិត្យមើលករណីកំណកឈាមកើតឡើងថ្មីៗនេះបន្ថែមទៀត និងវាយតម្លៃពីសក្តានុពលរបស់វា។ ចំណែកទីភ្នាក់ងារឱសថអាមេរិកវិញថានឹងវិភាគលើបញ្ហា ហើយក៏ស៊ើបអង្កេតលើករណីទាំងនេះផងដែរ។
អាជ្ញាធរសុខាភិបាលអាមេរិក បានស្នើឲ្យផ្អាកការប្រើប្រាស់វ៉ាក់សាំង Johnson & Johnson រហូតដល់ដំណើរការស៊ើបអង្កេតត្រូវបិទបញ្ចប់។ ការប្រកាសឲ្យផ្អាកចាំបាច់ត្រូវធ្វើឡើងដោយសារ បញ្ហាកំណកឈាមនេះ មិនត្រូវបានចុះក្នុងបញ្ជីនៃផលប៉ះពាល់ដែលអាចកើតមាន ក្រោយការចាក់វ៉ាក់សាំងឡើយ។ ទោះបីនេះជាករណីកម្រខ្លាំងមែនទែន ១ ក្នុង ១លានក្តី អាជ្ញាធរសុខាភិបាលអាមេរិក ចង់ឲ្យក្រុមអ្នកផ្តល់សេវាថែទាំសុខភាព មានពេលវេលាដើម្បីសិក្សាស្វែងយល់ពីផលប៉ះពាល់នានា ដែលអាចកើតមានក្រោយការចាក់វ៉ាក់សាំង និងស្វែងរកវិធីព្យាបាលជំងឺដែលកើតឡើងដ៏កម្រនេះឲ្យបានល្អជាទីបំផុត។
តើមន្ទីរពិសោធន៍ Johnson & Johnson បាននិយាយអ្វីខ្លះជុំវិញបញ្ហាកំណកឈាមនេះ?
មន្ទីរពិសោធន៍អាមេរិក Johnson & Johnsonបានផ្តល់អនុសាសន៍ឲ្យអ្នកដែលបានចាក់វ៉ាក់សាំងរបស់ខ្លួនហើយ បែរមានអាការៈដូចជា ឈឺក្បាល ឈឺពោះ ឈឺជើង ឬដកដង្ហើមមិនស្រួលខុសពីធម្មតា ក្នុងរយៈពេលបីសប្តាហ៍បន្ទាប់ពីចាក់វ៉ាក់សាំងរួច គួរតែទាក់ទងទៅអ្នកផ្តល់សេវាថែទាំសុខភាពរបស់ពួកគេ។
ក្រោយមានករណីកំណកឈាម Johnson & Johnson ដែលជាក្រុមហ៊ុនថែទាំសុខភាពអាមេរិក បានចេញសេចក្តីថ្លែងការណ៍មួយភ្លាមដោយនិយាយថា សុវត្ថិភាពគឺជាអាទិភាពចំបងទី១ របស់ខ្លួន ហើយថា ក្រុមហ៊ុនបានចែករំលែករាល់របាយការណ៍ទាក់ទងបញ្ហាដែលកើតមានឡើងជាមួយអាជ្ញាធរសុខាភិបាល។
ជាមួយគ្នានេះ ក្រុមហ៊ុនថាខ្លួនបានដឹងអំពីបញ្ហាកកឈាមក្នុងសរសៃឈាម ដែលត្រូបានរាយការណ៍ថាជាផលប៉ះពាល់មួយបង្កឡើងដោយវ៉ាក់សាំង Johnson & Johnson។ តែនៅពេលនេះ គេនៅមិនទាន់ដឹងច្បាស់នោះទេថាអ្វីទៅជាមូលហេតុនាំឲ្យមានប្រតិកម្មកកឈាមនោះឡើង។ យ៉ាងណាក៏ដោយ ក្រុមហ៊ុន Johnson & Johnson នឹងបន្តធ្វើការយ៉ាងជិតស្និទ្ធជាមួយអាជ្ញាធរសុខាភិបាលអាមេរិក។
គួរជ្រាបថា បច្ចុប្បន្ននេះ បញ្ហាកំណកឈាមកើតឡើងដោយមានទំនាក់ទំនងជាមួយវ៉ាក់សាំងចំនួនពីរ គឺវ៉ាក់សាំង AstraZeneca របស់អង់គ្លេស និងវ៉ាក់សាំងអាមេរិក Johnson & Johnson។ វ៉ាក់សាំងទាំងពីរនេះ ត្រូវគេមើលឃើញថា ផលិតឡើងដោយប្រើបច្ចេកវិទ្យាដូចគ្នា។
គួរជ្រាបដែរថា ទោះបីបញ្ហាកំណកឈាមខាងលើល គឺជាករណីកម្រខ្លាំងក្តី តែរដ្ឋាភិបាលនានានៅជុំវិញពិភពលោក បានចាប់ផ្តើមប្រុងប្រយ័ត្នចំពោះករណីនេះ។ ប្រទេសមួយចំនួនបានបញ្ឈប់ការប្រើប្រាស់វ៉ាក់សាំង AstraZeneca ប៉ុន្តែភាគច្រើននៃប្រទេសទាំងនោះ បានបន្តការប្រើប្រាស់ឡើងវិញ ដោយបានណែនាំឲ្យចាក់សម្រាប់មនុស្សអាយុចាប់ពី ៦០ ឆ្នាំឡើងទៅ ដូចជានៅប្រទេសអាល្លឺម៉ង់ អេស្ប៉ាញ និងអ៊ីតាលីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ