គុយបាបិទទំព័រសករាជដឹកនាំត្រកូល“កាស្ត្រូ”និងចង់បង្កើតទំនាក់ទំនងថ្មីជាមួយអាមេរិក
ចុះផ្សាយនៅថ្ងៃ៖
ស្តាប់ - ០៤:៤៨
អតីតប្រធានាធិបតីគុយបាលោក រ៉ាអ៊ូល កាស្ត្រូ ដែលជាប្អូនប្រុសរបស់បិតាបដិវត្តគុយបាលោក ហ្វីដែល កាស្ត្រូ បានប្រកាសលាលែងចេញពីតំណែងជាអគ្គលេខាទីមួយបក្សកុម្មុយនិស្ត។ សេចក្តីប្រកាសនេះ ជាសញ្ញាបញ្ចប់ទំព័រសករាជដឹកនាំរបស់បងប្អូនប្រុសត្រកូលកាស្ត្រូ ដែលបានគ្រប់គ្រងកោះគុយបាយ៉ាងតឹងរ៉ឹងរយៈពេល ៦ទសវត្សរ៍មកហើយ។ តើអ្នកណានឹងអាចឡើងមកស្នងតំណែងអគ្គលេខាបក្សកុម្មុយនិស្តគុយបាពីលោក រ៉ាអ៊ូល កាស្ត្រូ? ហើយថាតើការបិទទំព័រសករាជដឹកនាំរបស់ត្រកូលកាស្ត្រូ អាចធ្វើឲ្យគុយបាមានទំនាក់ទំនងល្អប្រសើរជាមួយអាមេរិកដែរឬទេ?
ថ្ងៃចន្ទ ទី១៩ មេសាគឺជាថ្ងៃចុងក្រោយរបស់លោក រ៉ាអ៊ូល កាស្ត្រូ ក្នុងនាមជាប្រមុខបក្សកុម្មុយនិស្តគុយបាដែលជាមុខតំណែងមានអំណាចកំពូលនៅក្នុងប្រទេស។ លោកកាស្ត្រូ បានប្រកាសលាចេញពីអំណាចនៅក្នុងសុន្ទរកថាមួយនៅឯពិធីបើកសមាជលើកទី៨ របស់បក្សកាន់អំណាចដែលជាគណបក្សតែមួយគត់នៅក្នុងប្រទេសកោះមួយនេះ។
ការប្រកាសខាងលើបានបើកទ្វារ អនុញ្ញាតឲ្យអ្នកជំនាន់ថ្មីដែលមិនជាប់ខ្សែស្រឡាយបងប្អូនត្រកូលកាស្ត្រូឲ្យអាចចូលមកទទួលតំណែងដ៏ធំផុតលេខនៅគុយបាបាន។
ចុះតើថាអ្នកណាដែលមានវាសនាអាចនឹងឈោងតោងចាប់តំណែងដ៏កំពូលនេះ?
វេលានេះគឺជាពេលវេលាប្រវត្តិសាស្ត្រមួយសម្រាប់ប្រទេសគុយបា បន្ទាប់ពីទំព័រសករាជដឹកនាំប្រទេសតឹងតែងរយៈពេល៦០ ឆ្នាំរបស់ត្រកូលកាស្ត្រូត្រូវបិទបញ្ចប់ជាស្ថាពរ។
អ្នកជំនាន់ថ្មីដែលលោកកាស្ត្រូ ជ្រើសរើសឲ្យស្នងតំណែងជាអគ្គលេខាបក្សគឺគ្មានអ្នកណាក្រៅពីលោក មីហ្គែល ឌីយ៉ាហ្ស កានែល (Miguel Diaz-Canel) ប្រធានាធិបតីបច្ចុប្បន្នរបស់គុយបា និងជាមនុស្សជំនិតរបស់លោកឡើយ។
នៅថ្ងៃចន្ទ ទី១៩ មេសា ២០២១ លោកប្រធានាធិបតីឌីយ៉ាហ្ស កានែល វ័យ ៦០ ឆ្នាំ បានឡើងស្នងតំណែងពីលោក រ៉ាអ៊ូល កាស្ត្រូ ក្លាយជាមេដឹកនាំបក្សកុម្មុយនិស្តដ៏មានអំណាចតែមួយគត់របស់គុយបា។
លោកឌីយ៉ាហ្ស កានែល បានក្លាយជាប្រធានាធិបតីគុយបារួចហើយចាប់តាំងពីឆ្នាំ ២០១៨ ក៏ប៉ុន្តែទើបតែឥឡូវនេះលោកទទួលបានតំណែងដ៏មានឥទ្ធិពលបំផុត ក្រោយលោកកាស្ត្រូ លេខាធិការទីមួយចាស់ចូលនិវត្តន៍ក្នុងវ័យ ៨៩ ឆ្នាំ។
បើទោះបីជាគុយបា បានបើកទ្វារផ្លាស់ប្តូរអ្នកដឹកនាំថ្មីក្តី តែបន្ទាត់នយោបាយរបស់គុយបា មិនផ្លាស់ប្តូរនោះទេ។ យ៉ាងណាក៏ដោយ ថ្នាក់ដឹកនាំកោះគុយបា បាននិងកំពុងបើកទ្វារ ធ្វើកំណែទម្រង់ជាច្រើនដូចជាលើសិទ្ធិរបស់ប្រជាជន និងកំណែទម្រង់លើវិស័យសេដ្ឋកិច្ចដើម្បីសង្គ្រោះគុយបាឲ្យងើបចេញពីវិបត្តិក្ស័យធន់ និងឈានទៅលើកកម្ពស់កម្រិតជីវភាពរបស់ប្រជាជន។
គុយបាចង់បង្កើតទំនាក់ទំនងថ្មីជាមួយសហរដ្ឋអាមេរិក
រឿងដ៏គួរឲ្យកត់សម្គាល់ដែរនោះគឺគុយបា កំពុងស្វះស្វែងចង់ឲ្យមានកិច្ចពិភាក្សាជាមួយអាមេរិកដែលជាប្រទេសមានទំនាក់ទំនងមិនល្អនឹងគ្នាជាច្រើនឆ្នាំ ជាពិសេសក្រោយពីបិតាបដិវត្តគុយបាលោក ហ្វីដែល កាស្រ្តូ ឡើងកាន់តំណែងជាប្រមុខរដ្ឋនៅឆ្នាំ ១៩៥៩ និងបានតាំងខ្លួនជាសត្រូវរបស់អាមេរិករហូតដល់ទទួលមរណភាព។
នៅក្នុងពេលថ្លែងសុន្ទរកថាជាចុងក្រោយទៅកាន់គណបក្សកាលពីថ្ងៃសុក្រសប្តាហ៍មុន លោក រ៉ាអ៊ូល កាស្ត្រូ បានបញ្ជាក់ពីឆន្ទៈរបស់លោកក្នុងការដឹកនាំកិច្ចពិភាក្សាប្រកបដោយក្តីគោរព និងការកសាងទំនាក់ទំនងថ្មីជាមួយប្រទេសអាមេរិក។ អាមេរិក ដែលបានដាក់ទណ្ឌកម្មប្រឆាំងនឹងកោះគុយបាតាំងពីឆ្នាំ ១៩៦២មក។
យ៉ាងណាក៏ដោយ លោករ៉ាហ៊ូល កាស្ត្រូ បានសង្កត់ធ្ងន់ថា ប្រទេសគុយបានឹងមិនបោះបង់ចោលគោលការណ៍បដិវត្តឡើយ និងនៅតែរក្សាឲ្យតម្លៃចំពោះរបបសង្គមនិយម។
ពាក់ព័ន្ធនឹងរឿងនេះ អ្នកនាំពាក្យសេតវិមានលោកស្រី Jen Psaki បាននិយាយថា សហរដ្ឋអាមេរិកគ្មានផែនការផ្លាស់ប្តូរឆាប់ៗណាមួយនោះទេ ទាក់ទងគោលនយោបាយរបស់ខ្លួនចំពោះកោះគុយបា។ សម្រាប់អាមេរិក ការគាំទ្រចំពោះលទ្ធិប្រជាធិបតេយ្យ និងសិទ្ធិមនុស្ស គឺជាចំណុចស្នូលនៃកិច្ចខិតំប្រឹងប្រែងរបស់អាមេរិក។
គួរបញ្ជាក់ជូនថា ទំនាក់ទំនងអាមេរិក-គុយបា ហាក់មានភាពល្អប្រសើរខ្លះកាលក្នុងសម័យគ្រប់គ្រងរបស់អតីតប្រធានាធិបតីអាមេរិកលោកបារ៉ាក់ អូបាម៉ា។ ក៏ប៉ុន្តែទំនាក់ទំនងរវាងប្រទេសទាំងពីរ បានវិលមករកភាពតានតឹងខ្លាំងនឹងគ្នាឡើងវិញ បន្ទាប់ពីលោកដូណាល់ ត្រាំឡើងកាន់តំណែងជាប្រធានាធិបតីនាឆ្នាំ ២០១៧ មក។
កាលពីខែមេសា ឆ្នាំ២០១៩ លោកត្រាំ បានសម្រេចបន្ថែមទណ្ឌកម្មសេដ្ឋកិច្ច លើគុយបា ដោយបានរឹតបន្តឹងការធ្វើដំណើរចេញចូលជាមួយគុយបា និងការផ្ទេរសាច់ប្រាក់ដុល្លារដោយផ្ទាល់ទៅគុយបាទៀតផង។
សរុបមក ការផ្លាស់អ្នកដឹកនាំថ្មីរបស់គុយបា មិនមែនជាការផ្លាស់ប្តូរគោលការណ៍បដិវត្តនិងរបបសង្គមនិយមទេ ព្រោះថាអ្នកដឹកនាំជំនាន់ថ្មីកើតចេញមកពីបក្សកុម្មុយនិស្តគុយចាស់តែមួយ។
អ្វីជាការគួរឲ្យកត់សម្គាល់គឺនៅត្រង់ថាគុយបា ផ្លាស់ប្តូរអគ្គលេខាបក្សថ្មីនៅពេលដែលប្រទេសនេះ កំពុងប្រយុទ្ធប្រឆាំងនឹងវិបត្តិសេដ្ឋកិច្ចដ៏អាក្រក់បំផុតរបស់ខ្លួនក្នុងរយៈពេល ៣០ឆ្នាំ។ មួយវិញទៀត នៅថ្ងៃប្រកាសលាចេញពីអំណាច លោករ៉ាអ៊ូល កាស្ត្រូ បានបង្ហើបពីចេតនាចង់ជួបពិភាក្សាជាមួយសហរដ្ឋអាមេរិកដែលជាអតីតគូសត្រូវដើម្បីបើកទំព័រទំនាក់ទំនងថ្មីនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ