តើរដ្ឋអ៊ីស្រាអែល ពិតជាបានធ្វើ « អំពើឧក្រិដ្ឋបែងចែងជាតិសាសន៍ » ទៅលើជនជាតិប៉ាឡេស្ទីនឬ?
ចុះផ្សាយនៅថ្ងៃ៖
ស្តាប់ - ០៦:០៣
អង្គការ Human Rights Watch ដែលជាអង្គការការពារសិទ្ធិមនុស្សអន្តរជាតិ ដ៏ធំមួយ បានចោទរដ្ឋាភិបាលអ៊ីស្រាអែល ថាបានប្រព្រឹត្តិ « អំពើឧក្រិដ្ឋ បែងចែកជាតិសាសន៍ » ធ្វើទៅលើជនជាតិប៉ាឡេស្ទីន ដែលរស់នៅតាមតំបន់ ដែលអ៊ីស្រាអែលដាក់អាណានិគម។ រដ្ឋាភិបាលអ៊ីស្រាអែល បានច្រានចោលការចោទប្រកាន់នេះ ដោយបានចាត់ទុកថា ជាការចោទ ដែលពោរពេញដោយគំនិតស្អប់ និងប្រឆាំងរដ្ឋអ៊ីស្រាអែល។ តើអ្វីទៅ ជាអំពើឧក្រិដ្ឋបែងចែងជាតិសាសាន៍? តើរដ្ឋអ៊ីស្រាអែល ពិតជាបានធ្វើអំពើឧក្រិដ្ឋបែងចែកជាតិសាសន៍ នេះមែនឬ?
កន្លងមកច្រើនខែហើយ ដែលអង្គការក្រៅរដ្ឋាភិបាលមួយចំនួន នៅអ៊ីស្រាអែល ដូចជាអង្គការ B’Tselem បានចាប់ផ្តើមប្រើពាក្យ « aparthied » ដើម្បីសំដៅដល់គោលនយោបាយ បែកចែកជាតិសាសន៍ របស់រដ្ឋាភិបាលអ៊ីស្រាអែល ដឹកនាំដោយលោក ប៊ីនយ៉ាមីន ណេតាន់យ៉ាហ៊ូ។ អង្គការសិទ្ធិមនុស្សនៅអ៊ីស្រាអែល បានលើកថា រដ្ឋអ៊ីស្រាអែល បានប្រើគោលនយោបាយ ធ្វើទុកបុកម្នេញ បំពាន បំបិទសិទ្ធិ និងរើសអើងប្រកាន់ជាតិសាសន៍ ទៅលើប្រជាជនប៉ាឡេស្ទីន រស់នៅតាមតំបន់ស៊ីសហ្សកដានី តំបន់ហ្កាហ្សា និង តំបន់ក្រុងហ្សេរុយសាឡឹមខាងកើត។ គោលនយោបាយបែងចែកជាតិសាសន៍នេះ ក៏ធ្វើផងដែរ ទៅលើប្រជាជនដើមកំណើតអារ៉ាប់ ដែលរស់នៅលើទឹកដីអ៊ីស្រាអែល រាប់ដំណមកហើយ។
នេះជាលើកដំបូងហើយ ដែលអង្គការអន្តរជាតិដ៏ធំ ឈ្មោះ Human Rights Watch បានចោទថា រដ្ឋអ៊ីស្រាអែល បានប្រព្រឹត្តិអំពើ « ឧក្រិដ្ឋបែងចែកជាតិសាសន៍ »។ អង្គការនេះ បានចេញរបាយការណ៍មួយ មានកម្រាស់២០០ទំព័រ ស្តីអំពីគោលនយោបាយ បែងចែងជាតិសាសន៍ របស់រដ្ឋាភិបាលអ៊ីស្រាអែល ធ្វើទៅលើប្រជាជនប៉ាឡេស្ទីននៅតាមតំបន់ដែលអ៊ីស្រាអែល បានដាក់អាណានិគម និងទៅលើជនជាតិអារ៉ាប់ ដែលរស់នៅលើទឹកដីអ៊ីស្រាអែល។
លោកOmar Shakir អ្នកសរសេររបាយការណ៍នេះ បានលើកឡើងថា របាយការណ៍របស់លោក គឺជាលទ្ធផលនៃការស្រាវជ្រាវ ស៊ើបអង្កេត ក្នុងរយៈពេល២០ឆ្នាំចុងក្រោយ។ ជាការសន្និដ្ឋានរួម គឺរដ្ឋាភិបាលអ៊ីស្រាអែល ពិតជាមានគោលនយោបាយ បែងចែកជាតិសាសន៍ តាមរយៈវិធានការជាស្វ័យប្រវត្តិផ្សេងៗ ដែលសំដៅ កៀបសង្កត់ ជិះជាន់ ទៅលើជនជាតិប៉ាឡេស្ទីន ធ្វើយ៉ាងណា ឲ្យប្រជាជនប៉ាឡេស្ទីន មិនអាចរីកចំរើន គ្មានសិទ្ធិទទួលបានការរស់រានសុខសាន្ត និងមានចំនួនថយទៅៗ ដើម្បីទុកកន្លែងឲ្យជនជាតិជ្វីហ្វអ៊ីស្រាអែលរស់នៅ។
លោក Omar Shakir អះអាងថា អំពើទាំងនេះ គឺជាអំពើអមនុស្ស គឺជាអំពើឧក្រិដ្ឋ « aparthied »។ លោកថា ការប្រើពាក្យ « aparthied » នេះ គឺមិនមែន ចង់ប្រៀបប្រដូចទៅនឹងករណី ហេតុការណ៍ ប្រវត្តិសាស្ត្រដែលធ្លាប់កើតមាននៅប្រទេសអាហ្វ្រិកខាងត្បូងទេ។ តែគឺរបាយការណ៍នេះ បានវិនិច្ឆ័យ ដោយផ្អែកលើនិយមន័យ ដែលមានកំណត់ ក្នុងសន្ធិសញ្ញា ឆ្នាំ១៩៧៣ ស្តីពីការលប់បំបាត់ អំពើឧក្រិដ្ឋ « aparthied »។
មាត្រា២ នៃសន្ធិសញ្ញាអន្តរជាតិនេះ បានចែងជាអាទិ៍ថា ពាក្យ « អំពើឧក្រិដ្ឋ aparthied » គឺសំដៅដល់គោលនយោបាយរួម របស់រដ្ឋអំណាច ឬរដ្ឋាភិបាលនៃក្រុមជាតិសាសន៍មួយ ដែលមានលក្ខណៈ បែកចែក រេើសអើងប្រកាន់ពូជសាសន៍ មើលងាយមើលថោកទៅលើក្រុមជនជាតិណាមួយ ក្នុងកម្មវត្ថុធ្វើទុក្ខបុកម្នេញ ជាលក្ខណៈស្វ័យប្រវត្តិ និងដោយឆន្ទៈ ដើម្បីឲ្យក្រុមជាតិសាសន៍ណាមួយ នោះ ត្រូវស្ថិតនៅក្រោមអំណាច កៀបសង្កត់ជិះជាន់ របស់ក្រុមជាតិសាសាន៍របស់ខ្លួន។ តួយ៉ាង ដូចជាបទឧក្រិដ្ឋ aparthied នៅប្រទេសអាហ្វ្រិកខាងត្បូង ដែលជនស្បែកស បានធ្វើទៅលើប្រជាជនស្បែកខ្មៅ រវាងពីឆ្នាំ១៩៥០ ដល់ចុងទសវត្សឆ្នាំ១៩៨០។
លោក Omar Shakir បានលើកឡើងថា ប៉ុន្មានឆ្នាំចុងក្រោយនេះ ស្ថានការណ៍កាន់តែអាក្រក់ទៅ សម្រាប់ប្រជាជនប៉ាឡេស្ទីន មួយចំនួន ដែលបានរងនូវការធ្វើទុក្ខបុកម្នេញពីសំណាក់ អាជ្ញាធររដ្ឋអ៊ីស្រាអែល។ ជាក់ស្តែង ការរីករាលដាលកាន់តែខ្លាំង នូងគោលនយោបាយដាក់អាណានិគម អនុញ្ញាត ឲ្យជនជាតិជ្វីហ្វអ៊ីស្រាអែល តាំងទីរស់នៅ ក្នុងដែនដីប៉ាឡេស្ទីន។ នឹងចុងក្រោយបង្អស់នេះ គឺការច្បាមយកទីក្រុងហ្សេរុយសាឡឹមខាងកើត មកគ្រប់គ្រងទាំងស្រុងតែម្តង ពីសំណាក់អ៊ីស្រាអែល។
សូមបញ្ជាក់ថា បច្ចុប្បនេះ នៅតំបន់ស៊ីសហ្សកដានីរបស់ប៉ាឡេស្ទីន គឺនិគមជនអ៊ីស្រាអែល ចំនួនប្រមាណ៧សែននាក់រស់នៅ។ ការតាំងទីអាណានិគម របស់ប្រជាជនជ្វីហ្វអ៊ីស្រាអែល ដែលដំបូងឡើយ មានលក្ខណៈជាបណ្តោះអាសន្ន តែយូរៗទៅ បានក្លាយជាស្ថានភាពអចិន្ត្រៃយ៍ ដោយមានការជំរុញលើកទឹកចិត្ត ពីសំណាក់រដ្ឋាភិបាលអ៊ីស្រាអែល។ ជាងនេះទៀត រហូតមកទល់ពេលនេះ គឺគ្មានពន្លឺសង្ឃឹម ស្តីអំពីកិច្ចព្រមព្រៀងសន្តិភាព ដើម្បីទទួលស្គាល់ប៉ាឡេស្ទីន ជាប្រទេសឯករាជ្យពេញសិទ្ធិទេ។
គួរកត់សំគាល់ដែរថា របាយការណ៍របស់អង្គការ Human Rights Watch នេះ បានចេញមកប៉ុន្មានសប្តាហ៍ បន្ទាប់ពីតុលាការព្រហ្មទណ្ឌអន្តរជាតិ បានសម្រេចបើកការស៊ើបអង្កេត ស្តីអំពីអំពើឧក្រិដ្ឋទាំងឡាយ ប្រព្រឹត្តិដោយអ៊ីស្រាអែល ធ្វើទៅលើប្រជាជនប៉ាឡេស្ទីន នៅតាមដែនដីដែលអ៊ីស្រាអែលដាក់អាណានិគម។
លោកណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានចាត់ទុកការសម្រេចរបស់តុលាការព្រហ្មទណ្ឌអន្តរជាតិនេះ ថាជាសេចក្តីសម្រេចដែលមានលក្ខណៈស្អប់ និងរើសអើងមកលើប្រជាជនជ្វីហ្វ។ លោកបានអះអាងថា រាល់ការសម្រេចទាំងអស់របស់រដ្ឋាភិបាលអ៊ីស្រាអែល គឺតែងតែចាត់ទុកការការពារអាយុជីវិតប្រជាជនស្លូតត្រង់ជាធំ មុននឹងមានវិធានការវាយប្រហារទៅលើក្រុមប្រដាប់អាវុធប៉ាឡេស្ទីន។
យ៉ាងណាក៏ដោយ អង្គការ Human Rights Watch បានអំពាវនាវ ឲ្យតុលាការព្រហ្មទណ្ឌអន្តរជាតិ ត្រូវតែពិនិត្យអង្គហេតុឲ្យបានច្បាស់ ដើម្បីឈានទៅបើកការស៊ើបអង្កេតដោយឯករាជ្យ និងដោយរាប់បញ្ជូលទាំង បទឧក្រិដ្ឋបែងចែកជាតិសាសន៍ រួមទាំងអំពើទុក្ខបុកម្នេញផង។ អង្គការអន្តរជាតិ ដែលមានទីតាំងនៅក្រុងញូយ៉កនេះ បានទាមទារ ឲ្យបង្កើតគណកម្មការស៊ើបអង្កេតអន្តរជាតិមួយ ស្តីពីការរំលោភសិទ្ធិមនុស្សនៅអ៊ីស្រាអែល និងនៅតំបន់ដែលអ៊ីស្រាអែលដាក់អាណានិគម។ អង្គការនេះ បានអំពាវនាវផងដែរ ថាប្រទេសផ្សេងៗទៀត មិនត្រូវឃុបឃិត ជាមួយអ៊ីស្រាអែលទេ។
នៅថ្ងៃអង្គារទី២៧មេសា ក្រោយដឹងដំណឹងរបាយការណ៍របស់អង្គការ Human Rights Watch អាជ្ញាធរជាតិប៉ាឡេស្ទីន បានថ្លែងថា សហគមអន្តរជាតិ ត្រូវតែចូលរួមអន្តរាគមន៍ ដើម្បីធ្វើយ៉ាងណា ចៀងវាងការសំងំស្ងៀម ដែលអាចចាត់ទុកបានថាជាការឃុបឃិត ជាមួយរដ្ឋអ៊ីស្រាអែល ដែលធ្វើបាបឥតស្រាកស្រាន្ត មកលើប្រជាជនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ