អនាគត៖ តើយានយន្តអគ្គិសនីអាចប្រឈមបញ្ហាអ្វីខ្លះ?
ចុះផ្សាយនៅថ្ងៃ៖
ស្តាប់ - ០៤:៥៧
ទៅថ្ងៃអនាគត តើពិភពលោកនឹងត្រូវពឹងផ្អែកលើយានយន្តអគ្គិសនី ឬគេស្គាល់ថា យានយន្តបៃតងឬយ៉ាងណា? យានយន្តបៃតងប្រើប្រាស់អគ្គិសនី និងបញ្ចេញឧស្ម័នកាបូនិចតិចជាងយានយន្តប្រើប្រេងសាំង និងម៉ាសូតធម្មតា។ ឧស្សាហកម្មយានយន្ត និងរដ្ឋាភិបាលនានានៅលើពិភពលោក មានគោលបំណងជំរុញការផ្លាស់ប្តូរជាសកលឱ្យប្រើប្រាស់យានយន្តបៃតងទាំងនេះ។ ក៏ប៉ុន្តែ តើយានយន្តអគ្គិសនីអាចប្រឈមបញ្ហាអ្វីខ្លះ?
ប្រវត្តិឧស្សហកម្មយានយន្ដ
អស់រយៈពេលជាច្រើនទសវត្សរ៍ សហរដ្ឋអាមេរិកជាប្រទេសឈានមុខគេ ក្នុងការផលិតរថយន្ត នៅទូទាំងពិភពលោក។ នៅឆ្នាំ១៩២៩ ពីមុនពេលមានវិបត្តិសេដ្ឋកិច្ច ពិភពលោកមានរថយន្តចំនួនប្រហែល ៣២លានគ្រឿង ហើយសហរដ្ឋអាមេរិកតែឯងផលិតជាង ៩០%នៃរថយន្តទាំងនោះ។ រហូតដល់ទសវត្សរ៍ឆ្នាំ១៩៥០ និងឆ្នាំ១៩៦០ ចក្រភពអង់គ្លេស អាល្លឺម៉ង់ និងបារាំងបានចាប់ផ្តើមផលិតកម្មរបស់ខ្លួនឡើងវិញ និងក្រោយមក ជប៉ុនបានចាប់ផ្តើមផលិតយានយន្តផងដែរ។ ពីរទសវត្សរ៍ក្រោយមក ពោលគឺនៅអំឡុងឆ្នាំ១៩៨០ ជប៉ុនបានវ៉ាដាច់សហរដ្ឋអាមេរិកក្លាយខ្លួនជាប្រទេសផលិតយានយន្ដឈានមុនគេ ប៉ុន្តែអាមេរិកបានត្រលប់មកកាន់តំណែងកំពូលវិញ ក្នុងឆ្នាំ១៩៩៤។ ក្នុងទសវត្សរ៍ឆ្នាំ១៩៩០ កូរ៉េខាងត្បូងបានក្លាយជាប្រទេសមួយក្នុងចំណោមប្រទេសផលិតយានយន្តច្រើនបំផុត។
នៅដើមសតវត្សរ៍ទី២១ ពោលគឺនៅឆ្នាំ២០០៦ ជប៉ុនបានយកឈ្នះសហរដ្ឋអាមេរិកម្ដងទៀត និងរក្សាចំណាត់ថ្នាក់កំពូលដល់ឆ្នាំ២០០៩។ ទោះជាយ៉ាងណា គិតត្រឹមឆ្នាំ២០១២ ចិនបានផលិតរថយន្តក្នុងចំនួនស្ទើរតែច្រើនជាងទ្វេដងនៃរថយន្តអាមេរិក ស្របពេលដែលប្រទេសជប៉ុនបានធ្លាក់មកលំដាប់ទីបី។
នាពេលបច្ចុប្បន្ន រថយន្តដឹកអ្នកដំណើរបានរួមចំណែកយ៉ាងចម្បងក្នុងការបំពុលបរិស្ថាន។ គិតត្រឹមឆ្នាំ២០១៣ វិស័យដឹកជញ្ជូនបានចូលរួមចំណែកច្រើនជាងពាក់កណ្តាលនៃការបញ្ចេញឧស្ម័នពុល ជាពិសេសឧស្ម័នកាបូនិច ហើយស្ទើរតែមួយភាគបួននៃឧស្ម័នទាំងនោះ បានបញ្ចេញទៅក្នុងបរិយាកាស។
ទៅថ្ងៃអនាគត តើពិភពលោកនឹងត្រូវពឹងផ្អែកលើយានយន្តអគ្គិសនី ឬគេស្គាល់ថា យានយន្តបៃតងឬយ៉ាងណា? រថយន្តអគ្គិសនីប្រើប្រាស់អគ្គិសនី និងបញ្ចេញឧស្ម័នកាបូនិចតិចជាងរថយន្តធម្មតា។ ឧស្សាហកម្មរថយន្ត និងរដ្ឋាភិបាលនានា នៅលើពិភពលោក មានគោលបំណងជំរុញការផ្លាស់ប្តូរជាសកលឱ្យប្រើប្រាស់រថយន្តបៃតងទាំងនេះ។
អនាគតនៃឧស្សហកម្មយានយន្ដ និងក្រុមហ៊ុន Tesla របស់ Elon Mask
ក្រុមហ៊ុនកំពុងឈានមុខគេបំផុតក្នុងបច្ចេកវិទ្យាបៃតង គឺ ក្រុមហ៊ុន Telsa របស់ Elon Mask។ ក្រុមហ៊ុន Tesla Inc គឺជាក្រុមហ៊ុនផលិតយានយន្តអគ្គិសនី ថាមពលស្អាត បន្ទះសូឡា និងប្រព័ន្ធផលិតថាមពលពន្លឺព្រះអាទិត្យ ដែលមានមូលដ្ឋាននៅតំបន់ Palo Alto រដ្ឋ California សហរដ្ឋអាមេរិក។ នៅឆ្នាំ២០២០ ក្រុមហ៊ុន Tesla ផលិត និងលក់រថយន្តអគ្គិសនីច្រើនជាងគេបំផុត នៅលើពិភពលោក។ Tesla ក៏ជាក្រុមហ៊ុនផ្គត់ផ្គង់ប្រព័ន្ធថាមពលថ្មធំជាងគេបំផុតលើពិភពលោកផងដែរ។
ក្រុមហ៊ុនថ្មីថ្មោងរបស់ចិន រួមមាន ក្រុមហ៊ុន Aiways ក្រុមហ៊ុន Li Auto ក្រុមហ៊ុន Nio ក្រុមហ៊ុន WM Motor និង Xpeng កំពុងផលិតរថយន្តអគ្គិសនីរាប់ពាន់គ្រឿង។ នៅអឺរ៉ុប ក្រុមហ៊ុនក្រូអាស៊ី Rimac និងក្រុមហ៊ុនអេស៉្បាញ Hispano Suiza កំពុងផលិតរថយន្តម៉ាក Hypercars។ ក្រុមហ៊ុនតៃវ៉ាន់ Foxconn ដែលល្បីឈ្មោះខាងផលិតគ្រឿងទូរស័ព្ទ iPhone ក៏កំពុងដំឡើងរថយន្តអគ្គិសនីឱ្យក្រុមហ៊ុនដទៃផងដែរ។ ចំណែក ក្រុមហ៊ុន Apple វិញ ទំនងផលិតរថយន្ត iCar។
បញ្ហាប្រឈមចម្បងរបស់យានយន្តអគ្គិសនី
យោងទៅសារព័ត៌មានអង់គ្លេស BBC ការលើកទឹកចិត្តឱ្យពិភពលោកប្រើប្រាស់យានយន្តអគ្គិសនីកាន់តែច្រើន គឺជា កត្តាគន្លឹះក្នុងការដោះស្រាយបញ្ហាប្រែប្រួលអាកាសធាតុ និងបញ្ហាបរិស្ថានសកល។ ទោះជាយ៉ាងណា ឧស្សាហកម្មរថយន្តអគ្គិសនីក៏ត្រូវប្រឈមបញ្ហាចម្បងមួយចំនួន៖
ទី១៖ ការផ្លាស់ប្តូរនឹងត្រូវការពេលវេលា។ ទោះបីជាយានយន្តអគ្គិសនីហាក់ដូចជាគំនិតល្អ ក៏ប៉ុន្តែយានយន្តប្រពៃណីប្រើប្រេងសាំង និងម៉ាសូត នៅតែមានប្រជាប្រិយភាព និងមានតម្លៃសមរម្យ។ សូម្បីតែនៅក្នុងប្រទេសជឿនលឿន ដូចជាប្រទេសន័រវែស និងដាណឺម៉ាក ក៏ការកំណត់ពេលវេលាដើម្បីឱ្យមានការប្រើប្រាស់រថយន្តបៃតងទាំងស្រុង គឺអាចធ្វើឡើងនៅរយៈពេល ១០ឬ ១៥ឆ្នាំខាងមុខ។
ទី២៖ បញ្ហាពាក់ព័ន្ធនឹងជម្រើសមានកំណត់។ នៅពេលដែលគេនិយាយដល់ជម្រើសនៃម៉ូឌែលរថយន្តផ្សេងៗគ្នា យានយន្តអគ្គិសនីមិនមានប្រភេទច្រើនទេដើម្បីឱ្យយើងជ្រើសរើស និងមានទិសដៅទៅរកទីផ្សារលំដាប់ខ្ពស់ និងមានតម្លៃថ្លៃ។ ក៏ប៉ុន្តែ នាពេលអនាគត តម្លៃទំនងជាបន្តធ្លាក់ចុះ។
ទី៣៖ បញ្ហាពាក់ព័ន្ធនឹងបច្ចេកវិទ្យាត្រឹមត្រូវ។ ជាក់ស្ដែង មានការរីកចម្រើនយ៉ាងឆាប់រហ័សនៃបច្ចេកវិទ្យាថ្ម និងការសាកថ្ម ប៉ុន្តែ វាក៏បណ្តាលឱ្យមានភាពមិនច្បាស់លាស់យ៉ាងខ្លាំងផងដែរ។ តើបច្ចេកវិទ្យាសាកថ្មប្រភេទណាដែលនឹងក្លាយជាបច្ចេកវិទ្យាស្តង់ដារ? តើគេគួររំពឹងថា ការសាកថ្មអាចមាននៅទីណា ឬនៅជិតបង្គោលភ្លើងតាមបណ្តោយផ្លូវ? បញ្ហានេះកាន់តែត្រូវប្រឈមសម្រាប់ប្រទេសកំពុងអភិវឌ្ឍ។
ទី៤៖ តើអ្នកណានឹងចំណាយលើហេដ្ឋារចនាសម្ព័ន្ធទាំងនោះ? សូម្បីតែស្ដង់ដារសាកថ្មអាចកើតមានឡើងក៏ដោយ ក៏ប៉ុន្តែ តើអ្នកណានឹងចំណាយដំឡើងវា? តើវាជាការទទួលខុសត្រូវរបស់វិស័យឯកជន ឬវិស័យសាធារណៈ? ប្រសិនបើវាជាការទទួលខុសត្រូវរបស់រដ្ឋ តើរដ្ឋត្រូវការចំណូលពន្ធដារមកពីណា?
ទី៥៖ វាពាក់ព័ន្ធនឹងក្តីស្រមៃទទួលបានរថយន្តគ្មានឧស្ម័នពុល។ ប៉ុន្តែ សូម្បីតែយានយន្តប្រើប្រាស់អគ្គិសនី១០០% ក៏មិនមានន័យថា យើងអាចលុបបំបាត់ឧស្ម័នពុលបាន១០០%នោះទេ។ ការជីកយកធនធានរ៉ែធម្មជាតិដើម្បីផលិតជាអាគុយ សាងសង់ និងការដឹកជញ្ជូនយានយន្តដល់អតិថិជន នៅទូទាំងពិភពលោក សុទ្ធសឹងតែពាក់ព័ន្ធនឹងការបំភាយឧស្ម័នពុលយ៉ាងច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ