ហ្វាំងឡង់ដែលជាប្រទេសមានសុភមង្គលបំផុតលើលោកប្រឹងប្រែងទាក់ទាញពលករបរទេស
ចុះផ្សាយនៅថ្ងៃ៖
ស្តាប់ - ០៤:៥៨
ប្រទេសហ្វាំងឡាំងជាប់ឈ្មោះថាជាកន្លែងដែលមានសុភមង្គលបំផុតលើពិភពលោក។ ជីវិតរស់នៅដ៏ល្អប្រសើរនៅក្នុងប្រទេសអឺរ៉ុបមួយនេះ គួរតែអាចទាក់ទាញជនបរទេសជាច្រើននាក់ឲ្យផ្លាស់ទីលំនៅ និងប្តូរទៅធ្វើការនៅទីនោះ។ ក៏ប៉ុន្តែ ប្រទេសដ៏មានភាពរីករាយបំផុតដូចជាហ្វាំងឡង់ កំពុងតែប្រឈមនឹងកង្វះកម្លាំងពលកម្មធ្ងន់ធ្ងរទៅវិញ។ហេតុអ្វីបានជាមិនសូវសម្បូរជនបរទេសទៅធ្វើការនៅប្រទេសហ្វាំងឡាំង?
ប្រទេសហ្វាំងឡង់ ខ្វះខាតកម្លាំងពលកម្មធ្ងន់ធ្ងរ
ហ្វាំងឡង់ត្រូវបានប្រទេសជាច្រើនកោតសរសើរជាយូរមកហើយចំពោះគុណភាពជីវិតរស់នៅរួមមានជាអាទិ៍ សេរីភាព សមភាពយេនឌ័រ និងកម្រិតដ៏ទាបនៃអំពើពុករលួយ ឧក្រិដ្ឋកម្ម ព្រមទាំងការបំពុលបរិស្ថាន។
ជាប់ចំណាត់ថ្នាក់កំពូលថាជា “ប្រទេសដែលមានសុភមង្គលបំផុតនៅលើផែនដី” តែហ្វាំងឡង់ ក៏មានប្រជាជនវ័យចំណាស់ច្រើន និងកង្វះខាតកម្លាំងពលកម្មខ្លាំងផងដែរ។ ចំនួនមនុស្សចាស់ដែលមានអាយុច្រើនជាង៦៥ឆ្នាំ មានចំនួនរហូតដល់ជាង ២៩% ឯណោះក្នុងចំណោមប្រជាជនហ្វាំងឡង់សរុបទាំងអស់ ៥លាន ៥សែននាក់។ អង្គការសហប្រជាជាតិបានព្យាករណ៍ថា ប្រជាជនហ្វាំងឡង់ដែលមានអាយុច្រើនជាង ៦៥ ឆ្នាំ នឹងកើនឡើងដល់ជាង ៤៧% នៅឆ្នាំ ២០៣០ខាងមុខ។
រដ្ឋាភិបាលហ្វាំងឡង់ទទួលស្គាល់បញ្ហាប្រជាសាស្ត្រ
រដ្ឋាភិបាលក្រុងហែលស៊ិនគីបានលើកឡើងថា ហ្វាំងឡាំង ត្រូវការស្រូបទាញកម្លាំងពលកម្មបរទេសទ្វេដងរហូតដល់ចំនួន ២ម៉ឺន ទៅ ៣ ម៉ឺននាក់ក្នុងមួយឆ្នាំ ដើម្បីទ្រទ្រង់សេវាសាធារណៈ និងដើម្បីបំពេញឱនភាពប្រាក់សោធននិវត្តន៍ដែលកំពុងកើនឡើង។
ចំណុចវិជ្ជមានដ៏ច្រើនរបស់ហ្វាំងឡង់ ធ្វើឲ្យគេគិតថា ហ្វាំងឡាំងគឺជាគោលដៅដ៏ទាក់ទាញ សម្រាប់ពលរដ្ឋប្រទេសផ្សេងឲ្យទៅធ្វើការនៅទីនោះ។ ក៏ប៉ុន្តែ ហ្វាំងឡាំងហាក់បីដូចជាគ្រាន់តែជាគោលដៅដ៏ទាក់ទាញមានពិន្ទុខ្ពស់តែនៅលើក្រដាសប៉ុណ្ណោះ។
តែថ្វីបើ ហ្វាំងឡាំង ទទួលបានពិន្ទខ្ពស់បំផុតផ្នែកសុភមង្គលនៃជីវិត ប្រៀបធៀបនឹងប្រទេសដទៃ ក៏ប៉ុន្តែប្រទេសអឺរ៉ុបខាងកើតមួយនេះ ត្រូវបានគេទទួលស្គាល់ដែរអំពី កម្រិតជីវភាពថ្លៃ បញ្ហាអាកាសធាតុត្រជាក់ខ្លាំង និងកត្តាភាសាស្មុគស្មាញ។
ដោយមើលឃើញពីបញ្ហានេះ រដ្ឋាភិបាលហ្វាំងឡាំងបានបង្កើតកម្មវិធី “បង្កើនទេពកោសល្យ” របស់ខ្លួនកាលពី ៤ ឆ្នាំមុន។ គោលបំណងនៃកម្មវិធីនេះ គឺដើម្បីទាក់ទាញអ្នកជំនាញមកពីខាងក្រៅឲ្យទៅធ្វើការនៅហ្វាំងឡង់ និងដើម្បីលើកកម្ពស់ការយល់ដឹង ក៏ដូចជាការទទួលស្គាល់ពីហ្វាំងឡង់ឲ្យបានទូលំទូលាញនៅទូទាំងពិភពលោក។
គោលដៅទាំងនោះរួមមាន បុគ្គលិកសុខាភិបាលមកពីអេស្បាញ ជាងដែកមកពីស្លូវ៉ាគី និងអ្នកជំនាញព័ត៌មានវិទ្យា និងអ្នកជំនាញខាងសមុទ្រមកពីប្រទេសរុស្ស៊ី ឥណ្ឌា និងអាស៊ីអាគ្នេយ៍ផងដែរ។
ក្នុងឆ្នាំ ២០១៣ គិលានុបដ្ឋាយិកាអេស្ប៉ាញចំនួន ៥ នាក់ក្នុងចំណោម ៨ នាក់ដែលត្រូវបានជ្រើសរើសឲ្យទៅធ្វើការនៅទីក្រុងវ៉ាអាសា (Vaasa) ភាគខាងលិចហ្វាំងឡង់ បានបានលាឈប់ពីការងារនៅពីរបីខែបន្ទាប់ ដោយប្រាប់ថា ថ្លៃជីវភាពរស់នៅទីនោះមានតម្លៃខ្ពស់ ហើយអាកាសធាតុត្រជាក់ខ្លាំង ចំណែកភាសាវិញក៏ស្មុគស្មាញទៅទៀត។
យ៉ាងណាក៏ដោយ នៅប៉ុន្មានឆ្នាំចុងក្រោយនេះ ប្រទេសហ្វាំងឡង់ អាចទាក់ទាញបានពលរដ្ឋបរទេសឲ្យទៅធ្វើការក្នុងប្រទេស ច្រើនជាងអ្នកដែលចាកចេញ។ ជាក់ស្តែងក្នុងឆ្នាំ២០១៩ មានជនបរទេសចំនួនប្រមាណ ១៥ ០០០ នាក់បានទៅដល់ហ្វាំងឡង់។ ក៏ប៉ុន្តែ ភាគច្រើននៃអ្នកដែលបានចាកចេញពីប្រទេសនេះ គឺជាក្រុមមនុស្សដែលមានការអប់រំខ្ពស់។ នេះបើតាមស្ថិតិផ្លូវការជាច្រើន។
បញ្ហាជាប្រព័ន្ធ
ថ្វីបើរដ្ឋាភិបាលហ្វាំងឡាំង បានបង្កើតកម្មវិធីដើម្បីទាក់ទាញកម្លាំងពលកម្មពីខាងក្រៅ ក៏ដោយ ក៏ជនបរទេសនិងក្រុមគ្រួសាររបស់ពួកគេ មិនត្រូវបានទទួលស្វាគមន៍ដោយដៃពីរឡើយ។
និន្នាការប្រឆាំងនឹងជនអន្តោប្រវេសន៍ ក៏ដូចជាការមិនចង់ជួលបុគ្គលិកបរទេស ក៏កំពុងរីករាលដាលផងដែរ នៅក្នុងសង្គមហ្វាំងឡង់ ដូចគ្នាទៅនឹងប្រទេសអឺរ៉ុបខាងលិចជាច្រើនទៀត។
ទោះបីជាកង្វះកម្លាំងពលកម្ម កំពុងជំរុញឲ្យក្រុមហ៊ុននៅហ្វាំងឡង់ជាច្រើនបន្ធូរបន្ថយលក្ខខណ្ឌជ្រើសរើសតែបុគ្គលិកជាជនជាតិហ្វាំងឡង់ក៏ដោយ ក៏ជនបរទេសជាច្រើន បានត្អូញត្អែរពីការស្ទាក់ស្ទើររបស់ក្រុមហ៊ុនទាំងនោះ ក្នុងការទទួលស្គាល់ពីសមត្ថភាពជនបរទេស និងការរើសអើងបេក្ខជនដែលមិនមែនជាជនជាតិហ្វាំងឡង់។
យ៉ាងណាក៏ដោយ កម្មវិធីបង្កើនទេពកោសល្យរបស់រដ្ឋាភិបាលហ្វាំងឡង់ នឹងជំរុញឲ្យមានការជជែកវែកញែកអំពីការបើកចំហទីផ្សារការងារហ្វាំងឡង់ ឥរិយាបថនៅកន្លែងធ្វើការ ការរើសអើង ដើម្បីទាក់ទាញជនបរទេស និងលើកកម្ពស់ឲ្យមានការទទួលស្វាគមន៍ពួកគេនៅពេលដែលទៅធ្វើការក្នុងប្រទេសហ្វាំងឡង់។
មន្ត្រីរដ្ឋាភិបាលហ្វាំងឡង់ មានសុទិដ្ឋិនិយមអំពីសមត្ថភាពរបស់ហ្វាំងឡង់ក្នុងការទាក់ទាញ ពលករជំនាញពីខាងក្រៅជាពិសេសពីអាស៊ីនាពេលអនាគត បន្ទាប់ពីវិបត្តិកូវីដត្រូវបានគ្រប់គ្រងបានជាស្ថាពរ។ អភិបាលក្រុង Vapaavuori លោក Helsinki បានមានប្រសាសន៍ ថាលក្ខខណ្ឌជីវិតរស់នៅល្អមានសុខសុវត្ថិភាព ជាកន្លែងដែលមានភាពសប្បាយរីករាយបំផុតគឺជាចំណុចខ្លាំងដែលហ្វាំងឡង់ នឹងអាចទាក់ទាញពលករបរទេសបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ