វិបត្តិអាហ្វហ្កានីស្ថានអាចបង្កនូវផលប៉ះពាល់អ្វីខ្លះដល់ទំនាក់ទំនងអាមេរិក-អង់គ្លេស?
ចុះផ្សាយនៅថ្ងៃ៖
ស្តាប់ - ០៤:៥០
ការសម្រេចដកទ័ពអាមេរិកចេញពីអាហ្វហកានីស្ថាន ដែលនាំទៅដល់ការដួលរលំក្រុងកាប៊ុល តម្រូវឲ្យមានការជម្លៀសប្រជាជនយ៉ាងតក់ក្រហល់ បង្កើតឲ្យមានភាពចលាចលនៅព្រលានយន្តហោះក្រុងកាប៊ុល តាំងពីប៉ុន្មានថ្ងៃកន្លងទៅនេះ បានបង្កើតឲ្យមានជាបញ្ហាចោទចម្បងមួយ នៅក្នុងទំនាក់ទំនង រវាងអាមេរិក និងប្រទេសសម្ព័ន្ធមិត្ត។ ក៏ប៉ុន្តែ ផលប៉ះពាល់ចម្បងជាងគេ គឺទៅលើទំនាក់ទំនង រវាងអាមេរិក និងអង់គ្លេស។
គេនៅចាំបានថា កាលពី២០ឆ្នាំមុន ក្រោយពីហេតុការណ៍ភេរវកម្ម១១កញ្ញា លោកតូនី ប៊្លែរ កាលណោះជានាយករដ្ឋមន្រ្តីអង់គ្លេស បានសន្យាជាមួយនឹងលោកប៊ូសថា អង់គ្លេសនឹងឈរជាមួយអាមេរិកជានិច្ច ទោះជានៅក្នុងកាលៈទេសៈណាក៏ដោយ។
ជាការពិត គេឃើញថា អង់គ្លេសបានចូលរួមយ៉ាងសកម្មជាមួយអាមេរិក ទាំងនៅក្នុងសង្រ្គាមផ្តួលរំលំរបបតាលីបង់នៅអាហ្វហ្កានីស្ថាន នៅឆ្នាំ២០០១ ហើយក្រោយមកទៀត សូម្បីតែនៅពេលដែលអាមេរិកចូលឈ្លានពានអ៊ីរ៉ាក់ នៅឆ្នាំ២០០៣ ដោយគ្មានការគាំទ្រពីសហគមន៍អន្តរជាតិផងនោះ ក៏អង់គ្លេសនៅតែបន្តចូលរួមជាមួយអាមេរិក។
នេះមិនគួរជារឿងដែលគួរឲ្យភ្ញាក់ផ្អើលទេ បើសិនជាគេមើលទៅលើទំនាក់ទំនងយ៉ាងជិតស្និទ្ធ ដែលគេតែងតែហៅថា “Special relationship » រវាងអាមេរិក និងអង់គ្លេស តាំងពីក្រោយសង្រ្គាមលោកលើកទី២។ ទំនាក់ទំនងពិសេស ដែលនាំទៅដល់ការសហប្រតិបត្តិការទ្វេភាគីយ៉ាងជិតស្និទ្ធ ទាំងនៅក្នុងវិស័យនយោបាយការបរទេស ការពារជាតិ បច្ចកវិទ្យា និងរហូតទៅដល់វិស័យចារកិច្ច។
ក៏ប៉ុន្តែ ភាពចលាចលនៅអាហ្វហ្កានីស្ថានកើតឡើងក្រោយការដកទ័ពអាមេរិក ហើយដែលធ្វើឲ្យអង់គ្លេសត្រូវប្រឈមនឹងបញ្ហាឈឺក្បាល ក្នុងការជម្លៀសមនុស្សចេញយ៉ាងតក់ក្រហល់នៅពេលនេះ កំពុងតែធ្វើឲ្យអង់គ្លេសចាប់ផ្តើមចោទសួរ អំពីតម្លៃនៃទំនាក់ទំនងពិសេសជាមួយអាមេរិក។
លោកតូនី ប៊្លែរ អតីតនាយករដ្ឋមន្រ្តីអង់គ្លេស និងជាអ្នកដែលបាននាំអង់គ្លេសទៅចូលរួមជាមួយអាមេរិក ក្នុងសង្រ្គាមអាហ្វហ្កានីស្ថាន និងសង្រ្គាមអ៊ីរ៉ាក់ បានហៅការដកទ័ពអាមេរិកចេញពីអាហ្វហ្កានីស្ថានថាជា “យុទ្ធសាស្រ្តភ្លីភ្លើ”។ ចំណែករដ្ឋាភិបាលអង់គ្លេសបច្ចុប្បន្ននេះវិញ ថ្វីដ្បិតតែមិនបានចេញមុខនិយាយចំៗជាសាធារណៈ ក៏ប៉ុន្តែ មន្រ្តីជាន់ខ្ពស់ក្នុងរដ្ឋាភិបាលរបស់លោកបូរីស ចនសុន បានប្រាប់បណ្តាញព័ត៌មាន ក្នុងលក្ខខណ្ឌមិនបញ្ចេញឈ្មោះ ដោយបរិហាររិះគន់ធ្ងន់ៗចំពោះយុទ្ធសាស្រ្តរបស់លោកបៃដិន នៅអាហ្វហ្កានីស្ថាន។
សម្រាប់អង់គ្លេស ការណ៍ដែលលោកចូ បៃដិន សម្រេចដកទ័ពចេញពីអាហ្វហ្កានីស្ថានឲ្យអស់ត្រឹមចុងខែសីហា គឺរឿងដែលអង់គ្លេសមិនយល់ស្របមួយទៅហើយ។ បន្ថែមពីលើនេះទៅទៀត គឺគេរិះគន់ការសម្រេចដកទ័ពដោយឯកឯង ដោយមិនបានជជែកពិភាក្សាជាមួយប្រទេសសម្ព័ន្ធមិត្តដែលខំបញ្ជូនទ័ពទៅជួយធ្វើសង្រ្គាមតាំងពីពេលចាប់ផ្តើមដំបូង ហើយនៅទីបំផុត អង់គ្លេសត្រូវរងថ្មបាក់ ដោយត្រូវប្រឈមនឹងភាពចលាចល ក្នុងការជម្លៀសប្រជាជនដោយតក់ក្រហល់ចេញពីក្រុងកាប៊ុល។
លើសពីនេះទៅទៀត យោងតាមកាសែត The Sunday Times ចុះផ្សាយកាលពីថ្ងៃទី២២សីហា មន្រ្តីរដ្ឋាភិបាលអង់គ្លេសដែលសុំមិនបញ្ចេញឈ្មោះបានឲ្យដឹងថា ក្រោយពីក្រុមតាលីបង់ចូលដល់ក្រុងកាប៊ុល ហើយប្រឈមនឹងប្រតិបត្តិការជម្លៀសស្ថានទូតដោយតក់ក្រហល់ លោកបូរីស ចនសុន បានព្យាយាមទូរសព្ទទៅជជែកជាមួយលោកចូ បៃដិន ក៏ប៉ុន្តែ ត្រូវរង់ចាំរហូតដល់ ២៤ម៉ោងក្រោយ ទើបលោកប្រធានាធិបតីអាមេរិកឆ្លើយតបមកវិញ។
ចាប់តាំងពីថ្ងៃទី១៣សីហាមក កងទ័ពអង់គ្លេសបានជម្លៀសមនុស្សប្រមាណជា ៦ពាន់នាក់ ចេញតាមព្រលានយន្តហោះក្រុងកាប៊ុល ហើយនៅសល់មនុស្សច្រើនទៀតដែលត្រូវបន្តជម្លៀសចេញ ដែលអង់គ្លេសគិតថា វាជារឿងដែលមិនអាចធ្វើទៅរួច នៅមុនថ្ងៃទី៣១សីហា ដែលជាថ្ងៃកំណត់នៃការដកទ័ពអាមេរិក។
ហេតុដូច្នេះហើយបានជាអង់គ្លេសស្នើសុំដោយទទូច ឲ្យអាមេរិកបន្តរក្សាកងទ័ពដល់ក្រោយថ្ងៃទី៣១សីហា ដើម្បីរក្សាសុវត្ថិភាពនៅព្រលានយន្តហោះក្រុងកាប៊ុល រហូតដល់ប្រតិបត្តិការជម្លៀសប្រជាជនត្រូវធ្វើចប់សព្វគ្រប់។ សំណើ ដែលគិតមកទល់នឹងល្ងាចថ្ងៃអង្គារម្សិលមិញនេះ នៅមិនទាន់មានចម្លើយជាវិជ្ជមាននៅឡើយ ពីសំណាក់លោកប្រធានាធិបតីបៃដិន ដែលនៅតែទទូចចង់ដកទ័ពចេញពីអាហ្វហ្កានីស្ថាននៅត្រឹមថ្ងៃទី៣១សីហា ដូចការគ្រោងទុក។
ដោយមើលឃើញអំពីមេរៀននៅអាហ្វហ្កានីស្ថាននៅពេលនេះ នៅអង់គ្លេស មានអ្នកខ្លះបានទាមទារឲ្យរដ្ឋាភិបាលពិចារណាឡើងវិញទៅលើទំនាក់ទំនងពិសេសជាមួយអាមេរិក ដោយថ្លឹងថ្លែង រវាងម្ខាងផលប្រយោជន៍ និងម្ខាងទៀតហានិភ័យ នៃការដើរតាមបន្ទាត់នយោបាយការបរទេសរបស់អាមេរិក។
ក៏ប៉ុន្តែ នេះអាចមិនមែនជារឿងងាយស្រួលនោះទេ ពីព្រោះថា បញ្ហាដែលចោទ គឺនៅត្រង់ថា នៅក្រោយពេលចាកចេញពីសហភាពអឺរ៉ុប ដោយឆ្លងកាត់នូវដំណើរការចរចាដ៏វែងអន្លាយ និងដ៏ជូរចត់ជាមួយសម្ព័ន្ធមិត្តនៅអឺរ៉ុប គឺទំនាក់ទំនងពិសេសជាមួយអាមេរិកនេះហើយ ដែលលោកបូរីស ចនសុន តែងតែយកមកធ្វើជាក្តីរំពឹង ដើម្បីជាបង្អែកសម្រាប់អង់គ្លេសនៅលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ