តើវាល្មមដល់ពេលដែលពិភពលោកគួរផ្តោតការយកចិត្តទុកដាក់លើកសិកម្មសរីរាង្គហើយ ឬ?
ចុះផ្សាយនៅថ្ងៃ៖
ស្តាប់ - ០៥:២៩
សមាជពិភពលោកលើកទី២០ ស្តីពីកសិកម្មសរីរាង្គ បានបើកធ្វើពីថ្ងៃចន្ទ ទី៦ ដល់ថ្ងៃសុក្រ ទី១០ កញ្ញាក្នុងប្រទេសបារាំង។ សមាជដែលធ្វើឡើងតាមអនឡាញ និងមានវត្តមានអ្នកចូលរួមនៅនឹងកន្លែងមួយនេះបានរៀបចំដោយសហព័ន្ធអន្តរជាតិស្តីពីចលនាកសិកម្មសរីរាង្គ។ នេះជាលើកទី១ ដែលបារាំងបានធ្វើជាម្ចាស់ផ្ទះរៀបចំសមាជដែលមានមនុស្សចូលរួមប្រមាណជា ២ ០០០នាក់មកពីប្រមាណ ៥០ប្រទេស។ តើការរៀបចំឲ្យមានសមាជមួយនេះឡើងក្នុងគោលដៅអ្វីដែរ?
សមាជពិភពលោកស្តីពីកសិកម្មសរីរាង្គត្រូវរៀបចំធ្វើនៅរៀងរាល់ ៣ឆ្នាំម្តង។ បន្ទាប់ពីបានរៀបចំកាលពីឆ្នាំ ២០១៧ នៅក្នុងប្រទេសឥណ្ឌា សមាជមួយនេះត្រូវរៀបចំធ្វើក្នុងឆ្នាំ ២០២០។ តែដោយសារវិបត្តិកូវីដ១៩ សមាជលើកទី២០ ត្រូវបានអាក់ខាន និងលើកមកធ្វើក្នុងឆ្នាំ ២០២១ នេះវិញ។ « កសិកម្មសរីរាង្គ ពិតជាទៅរួច និងជាអនាគត » នេះជាប្រធានបទរបស់សមាជលើកនេះ។ នៅក្នុងរយៈពេល ៥ថ្ងៃពីថ្ងៃទី៦ ដល់ថ្ងៃទី១០ កញ្ញា អ្នកចូលរួមនៅក្នុងសមាជនឹងធ្វើការផ្តោះប្តូរបទពិសោធន៍ និងដំណោះស្រាយស្តីពីកសិកម្មសរីរាង្គ។ នៅពេលដែលគេនិយាយពីកសិកម្មសរីរាង្គ គឺគេចង់ផ្តោតលើការធ្វើកសិកម្មតាមបែបធម្មជាតិសុទ្ធសាធ។
កសិកម្មតាមបែបធម្មជាតិជាកសិកម្មដែលផ្អែកលើការមិនប្រើផលិតផលគីមី ការកែច្នៃវត្ថុធាតុដើមឡើងវិញដើម្បីធ្វើជាជីធម្មជាតិ ឬមួយក៏ការដាំដំណាំឆ្លាស់គ្នា មានន័យថា មិនត្រូវដាំដំណាំដដែលៗនៅលើទីតាំងដីដដែលៗនោះទេ។ តាមពិតទៅ ចំណាប់អារម្មណ៍លើកសិកម្មសរីរាង្គ និយាយជារួម និងដំណាំកសិកម្មសរីរាង្គ និយាយដោយឡែកមិនមែនទើបកើតមាននៅពេលនេះឯណា។ គ្រាន់តែថាឥឡូវនេះ មានហេតុផលមួយចំនួនដែលបានជំរុញមនុស្សលោកឲ្យចាប់អារម្មណ៍ និងគិតគូរកាន់តែខ្លាំងឡើងប៉ុណ្ណោះ ពិសេសក្នុងពេលដែលពិភពលោកកំពុងបន្តញាំញីដោយជំងឺកូវីដ១៩ និងចំពេលដែលពិភពលោកកំពុងបន្តរងគ្រោះដោយគ្រោះធម្មជាតិយ៉ាងញឹកញាប់។
លោកស្រី Peggy Miars ប្រធានសហព័ន្ធអន្តរជាតិស្តីពីចលនាកសិកម្មសរីរាង្គបានគូសបញ្ជាក់ថា ជំងឺកូវីដ១៩ បានអង្រួញ និងដាស់តឿនមនុស្សលោកឲ្យមានការយកចិត្តទុកដាក់ខ្លាំងលើសុខភាព ពិសេសប្រយ័ត្នប្រយែងជាងមុនលើចំណីអាហារ។ ចំណែកការប្រែប្រួលអាកាសធាតុដែលបានបង្កឲ្យមានគ្រោះរាំងស្ងួត គ្រោះទឹកជំនន់ ភ្លើងឆេះព្រៃ និងគ្រោះមហន្តរាយជាច្រើនផ្សេងទៀតបានធ្វើឲ្យមនុស្សលោកបារម្ភខ្លាំងពីអនាគតរបស់ផែនដី។ គួរបញ្ជាក់ថា ការផ្ទុះជំងឺឆ្លងផ្សេងៗ ពិសេសជំងឺកូវីដ១៩ និងការកើតមានគ្រោះធម្មជាតិញឹកញាប់ពេលនេះ គឺដោយសារតែទង្វើរបស់មនុស្សលោក។ ការធ្វើអាជីវកម្មលើដីកសិកម្មដោយគ្មានត្រាប្រណីតាមរយៈការប្រើផលិតផលគីមីដើម្បីបង្កើនទិន្នផល និងការកាប់បំផ្លាញព្រៃឈើយកដីធ្វើកសិកម្ម គឺមនុស្សលោកកំពុងបំផ្លាញផែនដីដែលជាជម្រករបស់ខ្លួន។
តាមលោកស្រី Peggy Miars មានតែការពង្រីកវិស័យកសិកម្មសរីរាង្គទេទើបគេអាចចូលរួមសម្រេចឲ្យបាននូវកម្មវត្ថុនៃការអភិវឌ្ឍន៍យូរអង្វែងដែលកំណត់ដោយអង្គការសហប្រជាជាតិសម្រាប់ឆ្នាំ ២០៣០។ មានតែការធ្វើអាជីវកម្មលើដីកសិកម្មដោយមិនប្រឆាំងនឹងអំណោយផលពីធម្មជាតិទេទើបគេអាចបីបាច់ថែរក្សាផែនដី និងចិញ្ចឹមជីវិតមនុស្សឲ្យបានប្រសើរជាងនេះ។ តែគួរឲ្យស្តាយ ការអភិវឌ្ឍន៍នៅលើកសិកម្មសរីរាង្គក្នុងលោកសព្វថ្ងៃនៅមានកម្រិតទាបខ្លាំងនៅឡើយ។ យោងតាមវិទ្យាស្ថានស្រាវជ្រាវកសិកម្មសរីរាង្គ ដីកសិកម្មសរីរាង្គមានត្រឹម ៧២,៣លានហិចតា ឬ ១,៥% នៃផ្ទៃដីកសិកម្មនៅទូទាំងពិភពលោកក្នុងឆ្នាំ ២០១៩។ ក្នុងចំនួនដីកសិកម្មសរីរាង្គទាំង ៧២,៣ហិចតានេះ មាន ៣៥,៦លានហិចតាស្ថិតក្នុងប្រទេសអូស្រា្តលី។ ចំណែកនៅក្នុង ១០ប្រទេសផ្សេងទៀត ផ្ទៃដីកសិកម្មសរីរាង្គមានជាង ១០% នៃផ្ទៃដីកសិកម្ម។
គិតត្រឹមឆ្នាំ ២០១៩ ពិភពលោកមានប្រជាកសិករចំនួន ៣,១លាននាក់ដែលកំពុងធ្វើកសិកម្មតាមបែបធម្មជាតិ។ ទាក់ទងនឹងទីផ្សារផលិតផលកសិកម្មតាមបែបធម្មជាតិវិញ គឺមានតម្លៃគិតជាទឹកប្រាក់ជាង ១០៦ ០០០លានអឺរ៉ូ។ អាមេរិក អាល្លឺម៉ង់ និងបារាំងជាប្រទេសលំដាប់ទី១ ទី២ និងទី៣ ដែលបានប្រើប្រាស់ផលិតផលសរីរាង្គច្រើនជាងគេ។ គឺដោយសំឡឹងឃើញពីអត្ថប្រយោជន៍របស់ដីកសិកម្មសរីរាង្គ គណៈកម្មការអឺរ៉ុបបានបង្ហាញផែនការមួយក្នុងខែមីនាដើម្បីឈានទៅបង្កើតផ្ទៃដីកសិកម្មសរីរាង្គឲ្យបាន ២៥% នៃផ្ទៃដីកសិកម្មសរុបរបស់អឺរ៉ុបនៅឆ្នាំ ២០៣០។ « ពិភពលោកបានឈានមកដល់ផ្លូវរបត់មួយ » នេះជាការយល់ឃើញរបស់លោក Michel Reynaud សហប្រធានរៀបចំសមាជពិភពលោកលើកទី២០ ស្តីពីកសិកម្មសរីរាង្គ។
តាមលោក Michel Reynaud ដើម្បីជំរុញឲ្យប្រជាកសិករប្តូរទៅធ្វើកសិកម្មតាមបែបធម្មជាតិ រដ្ឋត្រូវជួយគាំទ្រជាលុយកាក់ ព្រោះការធ្វើកសិកម្មតាមបែបធម្មជាតិមិនបានផ្តល់ទិន្នផលដូចការធ្វើកសិកម្មដោយប្រើប្រាស់ផលិផលគីមីទេ។ ដូច្នេះ ជម្រើសកសិកម្មសរីរាង្គជាជម្រើសតែមួយគត់ដើម្បីសុខភាពមនុស្សលោក និងដើម្បីចិញ្ចឹមបីបាច់ថែរក្សាផែនដីឲ្យបានប្រសើរជាងសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ