ហេតុអ្វីកាតាក្លាយជាចំណុចស្នូលនៃការទូតរវាងលោកខាងលិចនិងតាលីបង់?
ចុះផ្សាយនៅថ្ងៃ៖
ស្តាប់ - ០៤:២៩
នៅក្នុងមួយរយៈកាលចុងក្រោយនេះ គេសង្កេតឃើញមន្រ្តីរដ្ឋាភិបាលប្រទេសលោកខាងលិចជាច្រើន ក្នុងនោះ រួមមានទាំងសហរដ្ឋអាមេរិក និងប្រទេសផ្សេងទៀត ក្នុងបក្សសម្ព័ន្ធអូតង់ បានបណ្តាក់គ្នាធ្វើដំណើរទៅកាន់ប្រទេសកាតា ដើម្បីជជែកអំពីវិបត្តិអាហ្វហ្កានីស្ថាន។ កាតាក៏បានដើរតួយ៉ាងសំខាន់ផងដែរ នៅក្នុងប្រតិបត្តិការជម្លៀសមនុស្សចេញពីកាប៊ុល ក្រោយពួកតាលីបង់ឡើងកាន់អំណាច។ ហេតុអ្វីប្រទេសដ៏តូចមួយនេះ ត្រូវក្លាយជាតួអង្គដ៏សំខាន់ នៅក្នុងវិបត្តិអាហ្វហ្កានីស្ថានពេលនេះ?
កាតា គឺជាប្រទេសដ៏តូចមានប្រជាជនមិនដល់ ៣លាននាក់ផង ហើយក៏ជាប្រទេសដែលនៅយ៉ាងឆ្ងាយពីអាហ្វហ្កានីស្ថាន ក៏ប៉ុន្តែ បានក្លាយជាអន្តរការីដ៏សំខាន់ នៅក្នុងការទូតលោកខាងលិចជាមួយតាលីបង់។ នេះក៏ដោយសារតែចំណុចពិសេសមួយ គឺកាតាជាប្រទេសដែលមានទំនាក់ទំនងទាំងសងខាង គឺមានទំនាក់ទំនងល្អជាមួយប្រទេសលោកខាងលិចផង ជាពិសេស ជាមួយសហរដ្ឋអាមេរិក ដោយកាតាទទួលឲ្យអាមេរិកដាក់មូលដ្ឋានទ័ពដ៏ធំបំផុតប្រចាំតំបន់មជ្ឈិមបូព៌ា ហើយក្នុងពេលជាមួយគ្នា កាតាក៏ជាប្រទេសដ៏កម្រ ដែលមានទំនាក់ទំនងល្អជាមួយក្រុមតាលីបង់។
មែនទែនទៅ កាតាចាប់ផ្តើមដើរតួនាទីជាអន្តរការី រវាងអាមេរិក និងតាលីបង់ តាំងពីជិតមួយទសវត្សរ៍មកហើយ ដោយនៅឆ្នាំ២០១៣ កាតាបានអនុញ្ញាតឲ្យក្រុមតាលីបង់ ដែលនៅជាក្រុមឧទ្ទាមអាហ្វហ្កានីស្ថាននៅឡើយ បើកការិយាល័យនយោបាយមួយ នៅក្នុងទីក្រុងដូហា។
ការអនុញ្ញាតឲ្យតាលីបង់បើកការិយាល័យនេះ គឺទទួលបានការគាំទ្រពីសំណាក់រដ្ឋាភិបាលរបស់លោកអូបាម៉ា ដោយនៅពេលនោះ អាមេរិកត្រូវការកាតា ដើម្បីយកធ្វើជាទីកន្លែងអព្យាក្រឹតមួយ ដើម្បីចរចាជាមួយនឹងក្រុមតាលីបង់ ក្នុងគោលដៅឈានទៅដកកងទ័ពចេញពីអាហ្វហ្កានីស្ថាន។
ក្នុងពេលជាមួយគ្នា កាតាក៏សំឡឹងឃើញផលប្រយោជន៍ដ៏ចម្បងមួយផងដែរ គឺឱកាសក្លាយជាប្រទេសដែលមានសារៈសំខាន់មួយនៅក្នុងតំបន់។
គេមិនត្រូវភ្លេចទេថា កាតា មិនត្រឹមតែជាប្រទេសដ៏តូចមួយនោះទេ ក៏ប៉ុន្តែ ក៏ត្រូវប្រឈមផងដែរ នឹងបណ្តាប្រទេសធំៗ ដែលនៅជុំវិញ ជាពិសេស គឺប្រឈមជាមួយនឹងអារ៉ាប៊ីសាអ៊ូឌីត។ ដូច្នេះ ការធ្វើខ្លួនជាប្រទេសដែលអាមេរិកត្រូវការ គឺអាចជួយពង្រឹងជំហររបស់កាតា ក្នុងការទប់ទល់នឹងការឡោមព័ទ្ធពីសំណាក់ប្រទេសដែលនៅជុំវិញ ហើយកាន់តែពិសេសជាងនេះទៅទៀត នៅពេលដែលប្រទេសជុំវិញនោះ សុទ្ធសឹងជាសម្ព័ន្ធមិត្តរបស់អាមេរិក ជាប្រទេសដែលត្រូវការទំនាក់ទំនងល្អជាមួយអាមេរិក។
ជាការពិត គេសង្កេតឃើញថា ចាប់តាំងពីឆ្នាំ២០១៣មក ក្រោយពីបានអនុញ្ញាតឲ្យតាលីបង់បើកការិយាល័យនយោបាយ កាតាបានជួយសម្របសម្រួល និងធ្វើជាម្ចាស់ផ្ទះ ទទួលការចរចា រវាងអាមេរិក និងតាលីបង់ រហូតបានចេញជាកិច្ចព្រមព្រៀង នៅឆ្នាំ២០២០ គឺកិច្ចព្រមព្រៀងដកទ័ពអាមេរិក ចុះដោយរដ្ឋាភិបាលរបស់លោកដូណាល់ ត្រាំ និងក្រុមតាលីបង់។
នៅឆ្នាំ២០១៤ តាមរយៈទំនាក់ទំនងជាមួយនឹងតាលីបង់ កាតាក៏បានជួយសម្របសម្រួលផងដែរ ក្នុងការចរចាដោះលែងទាហានអាមេរិក ដែលត្រូវក្រុមតាលីបង់ចាប់ជាចំណាប់ខ្មាំង តាំងពី៥ឆ្នាំមុន។ ការចរចា ដែលបានជោគជ័យ ឈានទៅដល់ការដោះលែងទាហានអាមេរិក ជាថ្នូរនឹងការដោះលែងអ្នកទោសតាលីបង់ ៥រូប ពីហ្គ័នតាណាម៉ូ ដោយនៅពេលនោះ អ្នកទោសតាលីបង់ទាំង ៥រូប ក្រោយពីដោះលែង ត្រូវបានអាមេរិកបញ្ជូនទៅកាន់ប្រទេសកាតា។
នៅក្នុងពេលបច្ចុប្បន្ននេះ ក្រោយពីតាលីបង់បានឡើងកាន់អំណាចនៅអាហ្វហ្កានីស្ថាន កាតាកាន់តែមានសារៈសំខាន់ជាងមុនទៅទៀត គឺជាស្ពានចម្លងទំនាក់ទំនង រវាងតាលីបង់ និងប្រទេសផ្សេង។
ជាក់ស្តែង គេឃើញថា កាតាបានដើរតួនាទីយ៉ាងសំខាន់ នៅក្នុងប្រតិបត្តិការជម្លៀសប្រជាជនចេញពីក្រុងកាប៊ុល ដោយមន្រ្តីទូតកាតាប្រចាំក្រុងកាប៊ុលបានចេញមុខជួយសម្របសម្រួលឲ្យពលរដ្ឋបរទេសអាចឆ្លងកាត់ប៉ុស្តិ៍ត្រួតពិនិត្យរបស់តាលីបង់ ដើម្បីធ្វើដំណើរចូលទៅក្នុងព្រលានយន្តហោះ ហើយក្នុងចំណោមមនុស្សដែលត្រូវជម្លៀសចេញពីអាហ្វហ្កានីស្ថាន មានរហូតដល់ជិតពាក់កណ្តាល ត្រូវជម្លៀសឆ្លងកាត់តាមប្រទេសកាតា។
ជាងនេះទៅទៀត នៅក្រោយពេលដែលសហរដ្ឋអាមេរិក ក៏ដូចជាប្រទេសលោកខាងលិចមួយចំនួនផ្សេងទៀតបានសម្រេចបិទស្ថានទូតនៅក្នុងទីក្រុងកាប៊ុល គឺស្ថានទូត ប្រចាំប្រទេសកាតា ដែលជាអ្នកទទួលរ៉ាប់រងកិច្ចការទូត និងកុងស៊ុល ដែលមានជាប់ពាក់ព័ន្ធនឹងអាហ្វហ្កានីស្ថាន។
គិតមកត្រឹមចំណុចនេះ គេអាចនិយាយបានថា យុទ្ធសាស្រ្តរបស់កាតា ដែលចង់ក្លាយជាតួអង្គដ៏សំខាន់ ជាអ្នកសម្របសម្រួលជម្លោះក្នុងតំបន់ កំពុងតែទទួលបានជោគជ័យមួយជំហាន ក៏ប៉ុន្តែ សម្រាប់ថ្ងៃអនាគត អ្វីៗ វាស្ថិតនៅត្រង់ថា តើកាតានឹងមានឥទ្ធិពលប៉ុណ្ណាលើពួកតាលីបង់ ហើយក្រោយពីក្តាប់អំណាចនៅអាហ្វហ្កានីស្ថាន ហើយអាមេរិកក៏ដកទ័ពចេញអស់ហើយ តើក្រុមតាលីបង់នៅបន្តត្រូវការប្រទេសកាតាត្រឹមកម្រិតណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ