ការលក់នាវាមុជទឹកនុយក្លេអ៊ែរអាមេរិកទៅឲ្យអូស្រ្តាលីមានហានិភ័យអ្វីខ្លះដល់ការរីកសាយភាយនុយក្លេអ៊ែរ?
ចុះផ្សាយនៅថ្ងៃ៖
ស្តាប់ - ០៤:១៦
កិច្ចព្រមព្រៀងលក់នាវាមុជទឹកនុយក្លេអ៊ែរអាមេរិកទៅឲ្យអូស្រ្តាលី ក្រៅពីធ្វើឲ្យបារាំងផ្ទុះកំហឹង ក៏កំពុងតែធ្វើឲ្យមានការបារម្ភជាទូទៅផងដែរ ជុំវិញការប្រជែងសព្វាវុធ និងការរីកសាយភាយអាវុធនុយក្លេអ៊ែរ។ ហេតុអ្វីគេត្រូវបារម្ភអំពីរឿងនេះ? តើការលក់នាវាមុជទឹកនុយក្លេអ៊ែរទៅឲ្យអូស្រ្តាលីនេះអាចបង្កហានិភ័យអ្វីខ្លះដល់ការរីកសាយភាយអាវុធនុយក្លេអ៊ែរ?
ជាដំបូង កាលណានិយាយអំពីនាវាមុជទឹកនុយក្លេអ៊ែរ គេត្រូវបែងចែកឲ្យដាច់ស្រឡះ រវាងនាវាមុជទឹកដើរដោយថាមពលនុយក្លេអ៊ែរ និងនាវាមុជទឹកបំពាក់អាវុធនុយក្លេអ៊ែរ។ នាវាមុជទឹកដែលអូស្រ្តាលីចុះកិច្ចសន្យាទិញពីអាមេរិកនៅពេលនេះ មិនមែនជានាវាមុជទឹកបំពាក់ដោយអាវុធនុយក្លេអ៊ែរនោះទេ តែជាប្រភេទនាវាមុជទឹកដើរដោយថាមពលនុយក្លេអ៊ែរ ពោលគឺ ប្រើនុយក្លេអ៊ែរសម្រាប់តែដំណើរការនាវាមុជទឹក ដើម្បីជំនួសឲ្យម៉ូទ័រប្រើប្រេងតែប៉ុណ្ណោះ។
ក៏ប៉ុន្តែ ទោះជាត្រឹមជាការលក់នាវាមុជទឹកដើរដោយថាមពលនុយក្លេអ៊ែរនេះក៏ដោយ កិច្ចសន្យា រវាងអាមេរិក និងអូស្រ្តាលី នៅតែអាចបង្កហានិភ័យខ្ពស់គួរឲ្យបារម្ភដែរ ទាក់ទងនឹងការរីកសាយភាយបច្ចេកវិទ្យានុយក្លេអ៊ែរ ដែលអាចនាំទៅដល់ការរីកសាយភាយអាវុធនុយក្លេអ៊ែរ។
ទីមួយ កិច្ចសន្យាអាមេរិក-អូស្រ្តាលីនេះ វាអាចជាគំរូអាក្រក់ទៅដល់ប្រទេសផ្សេង ហើយបន្តិចម្តងៗ ធ្វើឲ្យការផ្ទេរបច្ចេកវិទ្យានុយក្លេអ៊ែរយោធាដូចជានាវាមុជទឹកនុយក្លេអ៊ែរនេះ ត្រូវក្លាយទៅជារឿងធម្មតាមួយទៅវិញ។
គួរបញ្ជាក់ថា គិតមកទល់នឹងពេលនេះ មានប្រទេសតែ ៦ប៉ុណ្ណោះ ដែលមាននាវាមុជទឹកដើរដោយថាមពលនុយក្លេអ៊ែរ គឺ អាមេរិក ចិន បារាំង អង់គ្លេស រុស្ស៊ី និងឥណ្ឌា។ ជាទូទៅ ប្រទេសអស់ទាំងនេះតែងតែមានការប្រយ័ត្នប្រយែង ក្នុងការផ្ទេរបច្ចេកវិទ្យា និងសារធាតុនុយក្លេអ៊ែរទៅឲ្យប្រទេសផ្សេង។
ការព្រមព្រៀងលក់នាវាមុជទឹកអាមេរិកទៅឲ្យអូស្រ្តាលីនៅពេលនេះ វាអាចនឹងធ្វើឲ្យភាពប្រយ័ត្នប្រយែងនេះលែងមានតទៅទៀត ហើយប្រទេសផ្សេងទៀត ដែលចាប់អារម្មណ៍លើបច្ចេកវិទ្យានុយក្លេអ៊ែរយោធានេះដែរ ដូចជា កូរ៉េខាងត្បូង ប្រេស៊ីល កាណាដា ឬអាហ្សង់ទីន ជាដើម អាចនឹងលើកយកគំរូអាមេរិក-អូស្រ្តាលីនេះ ដើម្បីស្វះស្វែងរកទិញនាវាមុជទឹកនុយក្លេអ៊ែរយកមកប្រើដូចគ្នា។
ជាការពិតថា លោកចូ បៃដិន ក៏ដូចជាអ្នកនាំពាក្យសេតវិមាន បានបញ្ជាក់ថា កិច្ចសន្យាជាមួយអូស្រ្តាលីនេះ គឺជាករណីលើកលែងដ៏ពិសេសមួយ ដែលនឹងមិនអាចអនុវត្តទៅលើប្រទេសណាផ្សេង ក៏ប៉ុន្តែ អ្នកណាទៅដឹងថា បើថ្ងៃនេះមានករណីលើកលែងពិសេសមួយ ថ្ងៃស្អែកមិនអាចមានករណីលើកលែងពិសេសទី២ ហើយខានស្អែកមិនអាចករណីលើកលែងពិសេសទី៣? បើអូស្រ្តាលីអាចមានសិទ្ធិទិញនាវាមុជទឹកនុយក្លេអ៊ែរពីអាមេរិកមកប្រើបាន ចុះកូរ៉េខាងត្បូងដែលជាសម្ព័ន្ធមិត្តអាមេរិកដែរ ហេតុអ្វីទិញមិនបាន? ដូចគ្នាដែរ ចំពោះប្រទេសដែលមានបច្ចេកវិទ្យានុយក្លេអ៊ែរយោធា គេអាចនឹងលើកហេតុផលថា បើអាមេរិកអាចផ្ទេរបច្ចេកវិទ្យានុយក្លេអ៊ែរទៅឲ្យអូស្រ្តាលីបាន ហេតុអ្វីគេមិនអាចធ្វើបានដូចគ្នា? រុស្ស៊ីអាចនឹងបង្កើនការផ្ទេរបច្ចេកវិទ្យានុយក្លេអ៊ែរទៅឲ្យឥណ្ឌា ចិនវិញអាចនឹងផ្ទេរបច្ចេកវិទ្យាស្រដៀងគ្នាទៅឲ្យប៉ាគីស្ថាន ឬទៅឲ្យប្រទេសផ្សេងទៀត... និយាយជារួម គឺការរីកសាយភាយបច្ចេកវិទ្យានុយក្លេអ៊ែរយោធា។
ហានិភ័យគួរឲ្យគេបារម្ភមួយទៀត គឺទាក់ទងនឹងសារធាតុនុយក្លេអ៊ែរ ដែលប្រើនៅក្នុងនាវាមុជទឹក។
ខុសពីនាវាមុជទឹកនុយក្លេអ៊ែររបស់ប្រទេសផ្សេង ដូចជា របស់បារាំង និងចិន ជាដើម ដែលប្រើសារធាតុអ៊ុយរ៉ាញ៉ូមបន្សុទ្ធក្រោម ២០% ដូចគ្នាទៅនឹងប្រភេទអ៊ុយរ៉ាញ៉ូមប្រើក្នុងរ៉េអាក់ទ័រនុយក្លេអ៊ែរស៊ីវិល នាវាមុជទឹករបស់អាមេរិក និងអង់គ្លេសវិញ ដែលជាបច្ចេកវិទ្យាត្រូវលក់ទៅឲ្យអូស្រ្តាលី គឺប្រើសារធាតុអ៊ុយរ៉ាញ៉ូមបន្សុទ្ធរហូតដល់ទៅ ៩៣% ទៅ ៩៧% ឯណោះ ពោលគឺ ស្មើនឹងប្រភេទអ៊ុយរ៉ាញ៉ូម ដែលគេប្រើ នៅក្នុងអាវុធនុយក្លេអ៊ែរ។
ជាការពិតថា ការប្រើសារធាតុអ៊ុយរ៉ាញ៉ូមបន្សុទ្ធក្នុងកម្រិតខ្ពស់បែបនេះ ធ្វើឲ្យនាវាមុជទឹកអាមេរិកមានដំណើរការបានយូរ រហូតដល់ទៅជាង ៣០ឆ្នាំ ទើបត្រូវការផ្លាស់អ៊ុយរ៉ាញ៉ូមចេញម្តង គឺយូរជាងនាវាមុជទឹកនុយក្លេអ៊ែររបស់បារាំង ដែលត្រូវផ្លាស់ប្តូរអ៊ុយរ៉ាញ៉ូមថ្មី នៅរៀងរាល់ប្រមាណជា ១០ឆ្នាំម្តង។
ក៏ប៉ុន្តែ បញ្ហាចោទ គឺនៅត្រង់ថា កាលណាប្រទេសដែលប្រើនាវាមុជទឹកនុយក្លេអ៊ែរមានកាន់តែច្រើន ការផ្ទេរសារធាតុអ៊ុយរ៉ាញ៉ូមពីដៃមួយទៅដៃមួយកើតមានកាន់តែច្រើន ហានិភ័យក៏មានកាន់តែខ្ពស់ ដែលសារធាតុអ៊ុយរ៉ាញ៉ូមនេះអាចត្រូវធ្លាក់ក្នុងដៃប្រទេស ឬក្រុមណាមួយ ដែលបង្វែរសារធាតុអ៊ុយរ៉ាញ៉ូមនេះទៅប្រើបង្កើតជាអាវុធនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ