AirShow China៖ ចិនបង្អួត គ្រឿងសព្វាវុធផ្លូវអាកាសបច្ចេកវិទ្យាទំនើប ក្នុងបរិបទជម្លោះជាមួយអាមេរិក និងតៃវ៉ាន់
ចុះផ្សាយនៅថ្ងៃ៖
ស្តាប់ - ០៥:១២
ពិធីតាំងពិពណ៌ « AirShow China » បានបើកសម្ភោធនៅទីក្រុងជូហៃ ភាគខាងត្បូងប្រទេសចិន កាលពីថ្ងៃអង្គារ ទី២៨កញ្ញា។ នៅក្នុងឱកាសនេះ ចិនបានតាំងបង្ហាញ គ្រឿងសព្វាវុធផ្លូវអាកាស បំពាក់ដោយបច្ចេកវិទ្យាទំនើប ជាច្រើនគ្រឿង មានដូចជាយានដ្រូន និងយន្តហោះប្រដេញជាដើម។ វាគឺជាការតាំងបង្ហាញ អំពីការពង្រឹងសមត្ថភាព របស់កងទ័ពចិន ខណៈដែលភាពតានតឹង ជាមួយសហរដ្ឋអាមេរិក និងកោះតៃវ៉ាន់ កាន់តែមានសំពាធខ្លាំងឡើង។ ចិនបានប្រឹងប្រែង ធ្វើទំនើបកម្មគ្រឿងសព្វាវុធ យ៉ាងលឿនរហ័ស នាប៉ុន្មានឆ្នាំចុងក្រោយនេះ ដែលធ្វើឲ្យសហរដ្ឋអាមេរិក ដឹងខ្លួនថាអាចជាគ្រោះថ្នាក់។
« AirShow China » បានបើកទ្វារ ទទួលភ្ញៀវទស្សនា យ៉ាងអធិកអធម នៅក្រុងជូហៃ ភាគខាងត្បូងបង្អស់នៃប្រទេសចិន មិនឆ្ងាយប៉ុន្មានពីម៉ាកាវ និងហុងកុង។ ជាវេទិកាតាំងពិពណ៌ ដែលចិនបានដាក់តាំងបង្ហាញ នូវបច្ចេកវិទ្យាទំនើបថ្មីៗរបស់ខ្លួន នៅក្នុងវិស័យកងទ័ពអាកាស។ ក្នុងចំណោម គ្រឿងសព្វាវុធថ្មីៗ សម្រាប់លើកនេះ គឺចិនមាន យានដ្រូន WZ-7 ដែលជាដ្រូនទំហំធំ មានប្រវែង១៤ម៉ែត្រ។ យានដ្រូននេះ មានសមត្ថភាពពិសេស ក្នុងការឈ្លប តាមដាននៅលើលំហសមុទ្រ។
ចំណែកផ្នែកយន្តហោះវិញ នៅក្នុងពិធីតាំងពិពណ៌ក្រុងជូហៃ ឆ្នាំនេះ ចិនបានបង្ហាញ យន្តហោះប្រដេញរបស់ខ្លួន ឈ្មោះ J-16D ដែលមានជំនាញពិសេសសម្រាប់ធ្វើសង្គ្រាមអេឡិចត្រូនិក។ យន្តហោះនេះ អាចបំផ្លាញរលកសញ្ញាវិទ្យុ និងប្រព័ន្ធទូរគមនាគមន៍ ទំនាក់ទំនងរបស់សត្រូវបាន។ យោងតាមការចុះផ្សាយ របស់កាសែតក្នុងស្រុកចិន ដែលស្រង់សម្តីរបស់អ្នកជំនាញ គឺយន្តហោះប្រដេញនេះ អាចកម្ទេចប្រព័ន្ធរ៉ាដា ឬក៏ប្រព័ន្ធចាប់រលកសញ្ញា របស់ទីបញ្ជាការរដ្ឋានផ្លូវអាកាស របស់សត្រូវ។
លោក Song Zhongping អ្នកវិភាគវិស័យកងទ័ពចិន បានបញ្ជាក់ប្រាប់អ្នកយកព័ត៌មានបារាំងថា ទាំងយានដ្រូន និងយន្តហោះប្រដេញនេះ គឺកងទ័ពចិនបានចាប់ផ្តើមប្រើហើយ។ វាបានចូលរួមយ៉ាងសកម្ម នៅក្នុងប្រតិបត្តិការការពារសន្តិសុខ នៅច្រកសមុទ្រតៃវ៉ាន់ និងតំបន់សមុទ្រចិនខាងត្បូង។ ពោលគឺជាតំបន់ ដែលកងទ័ពចិន តែងតែពើបប្រទះជារឿយ ជាមួយនឹងការឆ្លងកាត់ របស់នាវាចម្បាំងអាមេរិក។
ក្រៅពីគ្រឿងសព្វាវុធ២មុខនេះ ចិនបានបង្ហាញយានដ្រូនមួយទៀត ឈ្មោះ CH-6 ដែលជាប្រភេទយានដ្រូនវាយប្រហារ។ មានប្រវែង១៥ម៉ែត្រ និងទទឹងស្លាប ២០ម៉ែត្រ យានដ្រូននេះអាចហោះ នៅកំពស់ខ្ពស់ខ្លាំង ខ្ទង់១ម៉ឺនម៉ែត្រពីដី និងក្នុងល្បឿនលឿន ចន្លោះពី ៥០០ ទៅ ៧០០ គីឡូម៉ែត្រ ក្នុងមួយម៉ោង ក្នុងរយៈពេល២០ម៉ោង។ ហោះសាកល្បង នៅរវាងឆ្នាំ២០២៣ យានដ្រូន CH-6 មានបំពាក់ដោយប្រព័ន្ធចាប់រលកសញ្ញា ប្រព័ន្ធរ៉ាដា មីស៊ីល និងគ្រាប់រ៉ូកែត បាញ់ពីអាកាសទៅដី។ យានដែលគ្មានមនុស្សបើកទាំងនេះ នឹងអនុញ្ញាតឲ្យកងទ័ពចិន អាចធ្វើប្រតិបត្តិការតាមដាន និងវាយប្រហារ នៅទីកន្លែងដែលខ្លួនមិនធ្លាប់បាន ឬមិនមានសមត្ថភាពទៅដល់ កាលពីពេលមុន។
លោក Kelvin Wong អ្នកជំនាញផ្នែកបច្ចេកវិទ្យាការពារជាតិ នៅការិយាល័យ Janes បានបញ្ជាក់ថា ចិនមិនមែនត្រឹមតែប្រឹង ធ្វើទំនើបកម្មលើគ្រឿងសព្វាវុធ សម្រាប់កងទ័ពខ្លួនទេ។ តែចិនកំពុងតែប្រឹង ប្រជែងនាំចេញគ្រឿងសព្វាវុធបច្ចេកវិទ្យាទំនើបទាំងនេះ ទៅក្រៅប្រទេសទៀតផង ។ បណ្តាប្រទេសលោកខាងលិខ ប្រហែលមិនទាន់សូវទុកចិត្ត ពីគុណភាពរបស់គ្រឿងសព្វាវុធចិនមែន តែប្រទេសតូចតាចផ្សេងទៀតដែលចិនមានឥទ្ធិពលលើ អាចពិចារណា ព្រោះថាគ្រឿងសព្វាវុធបច្ចេកវិទ្យាចិន មានតម្លៃថោកសមរម្យ។ យ៉ាងណាមិញ អ្នកជំនាញនេះអះអាងថា នៅក្នុងឱកាសពិពណ៌ « AirShow China » លើកនេះ គឺចិនបានតាំងបង្ហាញ យានដ្រូនច្រើនប្រភេទណាស់ ដែលនេះវាបង្ហាញអំពីទំនុកចិត្តរបស់ចិន នៅលើវិស័យនេះ។ យ៉ាងណាមិញ កងទ័ពអារ៉ាប៊ីសាអូឌីត និង អេមៀរ៉ាត់អារ៉ាប់រួម បានទិញយានដ្រូនចិន ទៅប្រើរួចហើយ។
សម្រាប់លោក James Char សាស្ត្រាចារ្យជំនាញបច្ចេកវិទ្យា នៃសកលវិទ្យាល័យ Nanyang សឹង្ហបុរី ជាមួយនឹងយន្តហោះប្រដេញ J-16D ថ្មីនេះ គឺចិនបានបោះជំហានឡើងខ្ពស់ គួរឲ្យកត់សម្គាល់។ វានឹងពង្រឹងសមត្ថភាពប្រយុទ្ធ របស់កងទ័ពចិន ដោយផ្អែកលើរបៀបធ្វើសង្គ្រាមបែបថ្មី ដោយប្រើបច្ចេកវិទ្យាអេឡិចត្រូនិក ផ្លូវអាកាស។
ទោះជាយ៉ាងនេះក្តី អ្នកជំនាញភាគច្រើន ទទួលស្គាល់ថា បើនិយាយពី ម៉ាស៊ីនយន្តហោះចម្បាំង និង ចំនួនផ្កាយរណបយោធា ដែលចាំបាច់សម្រាប់ធ្វើប្រតិបត្តិការ គឺចិន នៅដើរក្រោយអាមេរិកច្រើន។ ក៏ប៉ុន្តែ ថ្វីបើការចំណាយរបស់ចិន និង សមត្ថភាពកងទ័ពចិន នៅមិនទាន់អាចវ៉ាដាច់អាមេរិកក្តី ក៏អ្នកជំនាញស្ទើគ្រប់គ្នា បានអះអាងថា ចិនកំពុងដើរលឿនខ្លាំងណាស់។ យ៉ាងណាមិញ របាយការណ៍មួយរបស់ទីភ្នាក់ងារចារកិច្ចអាមេរិក បានទទួលស្គាល់ថា បច្ចុប្បន្ននេះ ចិនគឺជាការគំរាមមួយដ៏ធំ មិនអាចប្រហែសបាន សម្រាប់អាមេរិក។
លោក Justin Bronk អ្នកវិភាគ នៅការិយាល័យអង់គ្លេស Royal United Services Institute បានលើកឡើងថា ចិនអាចប្រហែលជាមិនទាន់មានសមត្ថភាព ពង្រីកកម្លាំងទ័ព ទៅឆ្ងាយពីដែនដីចិនខ្លួនឯងមែន តែអំណេះតទៅ ចិនមានប្រព័ន្ធការពារខ្លួន ដែលរឹងមាំ និងច្បាស់លាស់ ទាំងផ្នែកផ្លូវសមុទ្រ និងផ្លូវអាកាស ហើយអាចប្រឈមតទល់ ជាមួយអាមេរិកបាន។ អ្នកជំនាញម្នាក់នេះ អះអាងថា សម្រាប់សមរភូមិប្រយុទ្ធ ដែលស្ថិតនៅក្បែរមូលដ្ឋានរបស់ចិន គឺចិនអាចមានប្រៀបជាងអាមេរិក ដែលមានមូលដ្ឋាននៅឆ្ងាយ។ ក្នុងបរិបទនេះ ចិនកំពុងតែដើរដល់ដំណាក់កាលមួយ ដែលអាចធ្វើឲ្យអាមេរិកជួបការលំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ