វៀតណាម ៖ វិធានការដ៏តឹងតែងប្រឆាំងកូវីដ១៩ កំពុងធ្វើឱ្យក្រុមហ៊ុនកាត់ដេរបរទេសចង់រត់ចេញ ?
ចុះផ្សាយនៅថ្ងៃ៖
ស្តាប់ - ០៤:២០
ស្បែកជើង ខោអាវ សម្លៀកបំពាក់កីឡា ... ក្រុមហ៊ុនអន្តរជាតិម៉ាកៗល្បីៗ ជាច្រើនកំពុងប្រឈមនឹងគ្រោះខ្វះផលិតផល ដោយហេតុតែវិធានការទប់ស្កាត់កូវីដ១៩ដ៏តឹងតែងនិងការពន្យារពេលបិទខ្ទប់ប្រទេសយូរពេកនៅក្នុងប្រទេសវៀតណាម។ តើវិធានការនេះប៉ះពាល់ដល់ឧស្សាហកម្មកាត់ដេរយ៉ាងណា ? ក្រុមហ៊ុនបរទេសដែលពឹងផ្អែកកាន់តែខ្លាំងលើប្រទេសអ្នកផលិតនៅអាស៊ីអាគ្នេយ៍ អាចនឹងរត់ចេញពីវៀតណាមទេ ?
សង្គ្រាមពាណិជ្ជកម្មរវាងសហរដ្ឋអាមេរិកនិងចិន បានជំរុញឱ្យក្រុមហ៊ុនសហគ្រាសកាត់ដេរជាច្រើនកាន់តែប្រញាប់រត់ចេញពីប្រទេសចិន ទៅបើករោងចក្រនៅកន្លែងថ្មីក្នុងតំបន់អាស៊ីអាគ្នេយ៍ និងពិសេសគឺវៀតណាមតែម្តង។
ប៉ុន្តែពេលនេះ វៀតណាមកំពុងប្រឈមនឹងរលករាតត្បាតនៃជំងឺកូវីដ១៩យ៉ាងខ្លាំងក្លា។ ក្នុងរលករាតត្បាតកាលពីខែមេសា សកម្មភាពផលិតកម្មរបស់ក្រុមហ៊ុនកាត់ដេរខ្លះ បានធ្លាក់ចុះអស់៥០% ព្រោះតែមានបញ្ហាផ្នែកសេវាផ្គត់ផ្គង់។ លើកនេះ ជាមួយនឹងចាត់វិធានការយ៉ាងតឹងតែងបំផុត និងការពន្យារពេលបិទខ្ទប់ រដ្ឋធានី និងក្រុងហូជីមិញ បន្តទៀត ក្រុមហ៊ុនរោងចក្រកាត់ដេររកស៊ីបន្តពីក្រុមហ៊ុនអន្តរជាតិជាច្រើន បាននិងកំពុងចោទសួរខ្លួនឯងជារៀងរាល់ថ្ងៃ ថាតើត្រូវបិទនិងបញ្ឈប់សកម្មភាពរោងចក្រថ្ងៃណា។
រោងចក្រអាចបន្តដំណើរការបានដរាបណាតែមានវត្ថុធាតុដើមក្នុងស្តុក។ តែបម្រាមហាមឃាត់ការធ្វើដំណើរបានធ្វើការដឹកជញ្ជូនឥវ៉ាន់ចេញ និងឥវ៉ាន់ចូល ជួបការយឺតយ៉ាវយ៉ាងខ្លាំង។ រោងចក្រក្រណាត់ Hung Yen Knitting & Dyeing ដែលធ្វើការឱ្យក្រុមហ៊ុនអន្តរជាតិដូចជា Nike Adidas និង Gap កំពុងជួបការលំបាក ដោយការដឹកជញ្ជូនអំបោះជាវត្ថុធាតុដើមសម្រាប់ផលិតអាវមុជទឹក និងអាវកីឡា រអាក់រអួលខ្លាំង។
បន្ថែមពីលើនេះទៀត វិធានការបិទខ្ទប់ក្រុង និងការត្រួតពិនិត្យយ៉ាងតឹងតែង បានធ្វើកម្មករវៀតណាមមួយភាគធំ ពិបាកមកកន្លែងធ្វើការ និងធ្វើបំលាស់ទី ក្នុងរយៈពេលវែង។ អ្នកបើកបររថយន្តដឹកជញ្ជូនសម្ភារៈភស្តុភារឱ្យរោងចក្រខ្លះ ត្រូវជាប់គាំងនៅកណ្តាលផ្លូវ អត់បាយអត់ទឹក ខ្លះដល់ទៅបីថ្ងៃបីយប់ ទម្រាំអាចចូលក្នុងទីរួមខេត្តកឹងថឺ នៅភាគខាងត្បូងប្រទេសបាន។ នេះបើតាមការរៀបរាប់របស់អ្នកទទួលខុសត្រូវផ្នែកដឹកជញ្ជូន នាឱកាសប្រជុំតុមូលនៅការិយាល័យពាណិជ្ជកម្មបារាំងប្រចាំទីក្រុងហាណូយ។
ជាសរុបវិធានការដ៏តឹងតែងរបស់រដ្ឋាភិបាលក្រុងហាណូយក្នុងការទប់ស្កាត់ជំងឺកូវីដ១៩ អាចនឹងធ្វើឱ្យក្រុមហ៊ុនសម្លៀកបំពាក់ពហុជាតិ ជួបហានិភ័យ ដាច់ស្តុក ខ្វះផលិតផល។ ក្រុមហ៊ុនស្បែកជើង Nike ដែលមានផលិតផលស្បែកជើងលក់លើទីផ្សារពិភពលោកចំនួនពាក់កណ្តាលដេរនៅក្នុងប្រទេសវៀតណាម បានអះអាង អំពីការខ្វះខាតទំនិញសម្រាប់លក់ និងអំពីសកម្មភាពលក់ដូរថយចុះ ដោយប្រកាសថា រោងចក្រកាត់ដេរស្បែកជើងរបស់ខ្លួន នៅភាគខាងត្បូងប្រទេសវៀតណាមចំនួន៨០% បានបិទទ្វារ។
លោក Fast Raitailing ថៅកែក្រុមហ៊ុនសម្លៀកបំពាក់ជប៉ុន Uniqlo វិញ ក៏បានទម្លាក់កំហុសទៅលើវិធានការទប់ស្កាត់កូវីដ១៩ ថាបានធ្វើឱ្យផលិតកម្មខោអាវរបស់ក្រុមហ៊ុនជួបការយឺតយ៉ាវខ្លាំងដែរ។ ចំណែក Adidas អាចនឹងត្រូវខាតបង់អស់ថវិកាដល់ទៅ ៥០០លានអឺរ៉ូពីពេលនេះរហូតដល់ដំណាច់ឆ្នាំ ព្រោះតែសកម្មភាពលក់ដូរត្រូវថយចុះ ដោយខ្វះទំនិញ។
ក្រុមហ៊ុនពហុជាតិម៉ាកៗល្បីជាច្រើន មានអាទិ៍Adidas និង Nike បានប្រកាសថាគ្រោងទៅបង្កើនផលិតកម្ម ជាបណ្តោះអាសន្ននៅប្រទេសផ្សេង ក្រៅពីវៀតណាមតែម្តងផង។ ហេតុដូច្នេះហើយបានជាសមាគមសហគ្រាសអាមេរិក អឺរ៉ុប កូរ៉េខាងត្បូង និងអាស៊ីអាគ្នេយ៍ បានផ្ញើលិខិតមួយជូននាយករដ្ឋមន្ត្រី ព្រមានថា រោងចក្រកាត់ដេរជាសមាជិកសមាគមចំនួន២០%ហើយបានចាកចេញពីវៀតណាម។ នៅពេលមានផលិតកម្មនៅកន្លែងផ្សេងហើយ គេពិតជាពិបាកត្រលប់មកវិញណាស់។
អតិថិជនបរទេសចាប់ផ្តើមលុបការបញ្ជាទិញរបស់ខ្លួន។ នេះជាការបញ្ជាក់បន្ថែមរបស់អគ្គនាយករងរោងចក្រកាត់ដេរ Maxport ដែលមានកម្មករធ្វើការចំនួន៦ពាន់នាក់ និងដែលកំពុងចាប់ព្រួយបារម្ភខ្លាចតែកម្មករកម្មការិនីបាត់បង់ការងារ នៅពេលលែងមានការបញ្ជាទិញពីបរទេស។ ក្រុមហ៊ុនបរទេសនឹងបន្តផ្តល់ទំនុកចិត្ត និងមិនចាកចេញពីវៀតណាមទេ ប្រសិនបើស្ថានភាពវិលត្រលប់មករកភាពធម្មតាវិញ ចាប់ពីខែតុលាទៅ។ នេះបើតាមគំនិតរបស់ប្រធានក្រុមហ៊ុនវាយយនភណ្ឌ Hung Yen Knitting & Dyeing។
សូមបញ្ជាក់ថា មិនមែនតែវិស័យកាត់ដេរទេ ដែលចាប់រងផលវិបាកពីវិធានការកូវីដ១៩នោះ កសិកម្មកាហ្វេ ដែលវៀតណាមជាប់លំដាប់លេខមួយពិភពលោកខាងផលិតផលកាហ្វេRobusta កំពុងរងការគំរាមកំហែងយ៉ាងខ្លាំង។ វិស័យឧស្សាហកម្មរថយន្តក៏ដូចគ្នា។ ក្រុមហ៊ុនតូយ៉ូតា បានបន្ថយផលិតកម្មរបស់ខ្លួន នៅខែកញ្ញានិងតុលា និងបានប្រកាសថាផលប៉ះពាល់ធ្ងន់ធ្ងរខ្លាំងនៅវៀតណាមដូចនៅម៉ាឡេស៊ីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ