តើនុយក្លេអ៊ែរជាដំណោះស្រាយល្អក្នុងការទប់ស្កាត់ការឡើងកម្តៅផែនដី?
ចុះផ្សាយនៅថ្ងៃ៖
ស្តាប់ - ០៥:១០
នៅក្នុងពេលបច្ចុប្បន្ននេះ នៅក្នុងពេលដែលការទប់ស្កាត់ការឡើងកម្តៅផែនដី កំពុងតែក្លាយជាបញ្ហាកាន់តែចាំបាច់ និងបន្ទាន់ សំណួរក៏កាន់តែចោទឡើងផងដែរ ជុំវិញតួនាទីថាមពលនុយក្លេអ៊ែរ ដោយអ្នកខ្លះជំរុញឲ្យបង្កើនការប្រើប្រាស់ថាមពលនុយក្លេអ៊ែរ ដើម្បីចូលរួមកាត់បន្ថយការបញ្ចេញឧស្ម័នកាបូនិច។ តើថាមពលនុយក្លេអ៊ែរនេះពិតជាដំណោះស្រាយល្អ ក្នុងការទប់ស្កាត់ការឡើងកម្តៅផែនដីមែនឬក៏យ៉ាងណា?
នៅក្នុងបទសម្ភាសន៍ជាមួយទីភ្នាក់ងារព័ត៌មានអាអែហ្វប៉េ កាលពីពេលថ្មីៗនេះ នាយកទីភ្នាក់ងារថាមពលអន្តរជាតិ (AIE) បានលើកឡើងថា នុយក្លេអ៊ែរគួរតែជាផ្នែកមួយនៃដំណោះស្រាយទប់ស្កាត់ការឡើងកម្តៅផែនដី។ ចំណែកនៅអឺរ៉ុបវិញ បណ្តាប្រទេសមួយចំនួន រួមមានជាអាទិ៍ ប្រទេសបារាំង ជាដើម កំពុងទាមទារឲ្យគណៈកម្មការអឺរ៉ុបបញ្ចូលការវិនិយោគលើថាមពលនុយក្លេអ៊ែរ ទៅក្នុងបញ្ជីនៃវិនិយោគថាមពលបៃតង ដែលមានអំណោយផលដល់អាកាសធាតុ និងបរិស្ថាន។
នៅក្នុងបរិបទនេះហើយ ដែលទីភ្នាក់ងារថាមពលបរមាណូអន្តរជាតិ (AIEA) ទើបនឹងបានបង្កើនការព្យាករថាមពលនុយក្លេអ៊ែរជាលើកទីមួយចាប់តាំងពីគ្រោះមហន្តរាយហ្វូគូស្ហ៊ីម៉ាមក ដោយព្យាករកំណើនរហូតដល់ទៅទ្វេដងនៃថាមពលនុយក្លេអ៊ែរនៅទូទាំងពិភពលោក ចាប់ពីពេលនេះ ទៅទល់នឹងឆ្នាំ២០៥០ខាងមុខ ដោយនៅក្នុងចំណោមនោះ រ៉េអាក់ទ័រនុយក្លេអ៊ែរដែលគេសង់ថ្មីច្រើនជាងគេ គឺនៅក្នុងប្រទេសចិន។ ចិនដែលជាប្រទេសបញ្ចេញឧស្ម័នកាបូនិចច្រើនជាងគេបំផុតនៅលើពិភពលោក ហើយកំពុងតែស្វះស្វែងរកច្រកចេញពីថាមពលផូស៊ីល ដើម្បីឈានទៅកាត់បន្ថយការបញ្ចេញឧស្ម័នកាបូនិច រហូតដល់កម្រិតហ្សេរ៉ូកាបូន នៅត្រឹមឆ្នាំ២០៦០ខាងមុខ។
មកទល់នឹងពេលនេះ យើងឃើញថា អ្នកដែលគាំទ្រឲ្យវិនិយោគលើថាមពលនុយក្លេអ៊ែរ ដើម្បីជាដំណោះស្រាយទប់ស្កាត់ការឡើងកម្តៅផែនដី ដោយសារតែគេសំឡឹងឃើញអំណោយផលចម្បងមួយ គឺរោងចក្រអគ្គិសនីដើរដោយថាមពលនុយក្លេអ៊ែរបញ្ចេញឧស្ម័នកាបូនិចយ៉ាងតិចបំផុត ដូច្នេះ ការប្រើថាមពលនុយក្លេអ៊ែរ គឺអាចកាត់បន្ថយការបញ្ចេញឧស្ម័នបានច្រើន។ ក៏ប៉ុន្តែ នៅក្នុងភាពពិតជាក់ស្តែង អ្វីៗគឺមានលក្ខណៈស្មុគស្មាញជាងនេះ។
ជាការពិតថា បើសិនជាគេមើលតែទៅលើការបញ្ចេញឧស្ម័នដោយផ្ទាល់ ក្នុងរង្វង់នៃប្រតិបត្តិការរ៉េអាក់ទ័រនុយក្លេអ៊ែរ ការផលិតអគ្គិសនីដោយនុយក្លេអ៊ែរពិតជាបញ្ចេញឧស្ម័នកាបូនិចតិចតួច ក៏ប៉ុន្តែ បើគិតទៅលើសង្វាក់ផលិតកម្មទាំងមូល រាប់ចាប់តាំងពីការធ្វើអាជីវកម្មរ៉ែអ៊ុយរ៉ាញ៉ូម សកម្មភាពបន្សុទ្ធអ៊ុយរ៉ាញ៉ូម ដំណើរការសាងសង់រ៉េអាក់ទ័រ រហូតទៅដល់ការស្តុក និងចាត់ចែងកាកសំណល់នុយក្លេអ៊ែរ ទាំងអស់នេះ គឺសុទ្ធតែជាសកម្មភាព ដែលនាំឲ្យបញ្ចេញឧស្ម័នកាបូនិច។
បើទោះជាការបញ្ចេញឧស្ម័នកាបូនិច នៅក្នុងសង្វាក់ផលិតកម្មនុយក្លេអ៊ែរទាំងមូលនេះ វានៅតែទាបជាងឆ្ងាយ បើធៀបទៅនឹងថាមពលផូស៊ីល រួមមានដូចជា ប្រេង ធ្យូងថ្ម និងឧស្ម័នធម្មជាតិ ក៏ប៉ុន្តែ គេក៏មិនអាចប្រៀបធៀបគ្នា តែរវាងនុយក្លេអ៊ែរ និងថាមពលផូស៊ីលនោះដែរ ពីព្រោះថា ក្រៅពីនុយក្លេអ៊ែរ គេនៅមានជម្រើសថាមពលផ្សេងទៀត ដែលជាថាមពលបៃតងអាចជំនួសថាមពលផូស៊ីលបាន រួមមានជាអាទិ៍ ថាមពលវារីអគ្គិសនី ថាមពលខ្យល់ និងថាមពលព្រះអាទិត្យ។
ដូច្នេះ ដើម្បីជាដំណោះស្រាយចេញពីថាមពលផូស៊ីល គេគួរតែប្រៀបធៀបមើលផងដែរ រវាងថាមពលនុយក្លេអ៊ែរ និងថាមពលបៃតងផ្សេងទៀត ហើយការប្រៀបធៀបនេះទៀតសោត គេក៏មិនគួរសំឡឹងមើលទៅលើការបញ្ចេញឧស្ម័នកាបូនិចតែមួយមុខនោះដែរ ផ្ទុយទៅវិញ ត្រូវមើលផងដែរ ទៅលើគុណសម្បត្តិ និងគុណវិបត្តិ ទាក់ទងទៅនឹងចំណុចផ្សេងទៀត។
ចំណោទដ៏ចម្បងមួយនៃថាមពលនុយក្លេអ៊ែរ ដូចដែលគេបានឃើញដោយផ្ទាល់ស្រាប់កាលពីពេលកន្លងមក នៅក្នុងគ្រោះមហន្តរាយនៅហ្វូគូស្ហ៊ីម៉ា ក៏ដូចជា គ្រោះមហន្តរាយនៅឈែរណូប៊ីល គឺបញ្ហាវិទ្យុសកម្ម ដែលបង្កនូវផលប៉ះពាល់ធ្ងន់ធ្ងរដល់សុខភាពមនុស្ស ក៏ដូចជាដល់បរិស្ថាន នៅក្នុងរយៈពេលវែង។ ផលប៉ះពាល់ដល់សុខភាពនេះ មិនមែនកើតមានឡើង តែនៅក្នុងករណីផ្ទុះ ឬលេចធ្លាយវិទ្យុសកម្មពីរ៉េអាក់ទ័រនុយក្លេអ៊ែរនោះទេ ក៏ប៉ុន្តែ វាក៏កើតមានផងដែរ នៅក្នុងសកម្មភាពអាជីវកម្មរ៉ែអ៊ុយរ៉ាញ៉ូម និងកាកសំណល់វិទ្យុសកម្មពីរ៉េអាក់ទ័រនុយក្លេអ៊ែរ។ នេះនៅមិនទាន់និយាយដល់ផង ដល់ហានិភ័យដ៏ធំមួយទៀត គឺការរីកសាយភាយនុយក្លេអ៊ែរ ចេញពីនុយក្លេអ៊ែរស៊ីវិល ទៅជាការអាវុធប្រល័យលោក។
ចំណោទចម្បងមួយទៀតនៃថាមពលនុយក្លេអ៊ែរ គឺទំហំនៃការវិនិយោគ។ គេដឹងថា ថាមពលនុយក្លេអ៊ែរ គឺជាបច្ចេកវិទ្យាមួយដ៏ស្មុគស្មាញ ហើយការសាងសង់រោងចក្រអគ្គិសនីដើរដោយថាមពលនុយក្លេអ៊ែរនីមួយៗ ទាមទារឲ្យមានការវិនិយោគច្រើន ព្រមទាំងត្រូវចំណាយពេលយូរ ដោយការសាងសង់រោងចក្រអគ្គិសនីនុយក្លេអ៊ែរនីមួយៗ រាប់ចាប់តាំងពីការរៀបផែនការ រហូតដល់ពេលរោងចក្រមានដំណើរការផលិតអគ្គិសនីបាន គេត្រូវចំណាយពេល ក្នុងចន្លោះពី ១០ឆ្នាំ ទៅ ២០ឆ្នាំឯណោះ។ នេះជារយៈពេលមួយវែងខ្លាំង បើធៀបនឹងការសាងសង់ស្ថានីយ៍ផលិតអគ្គិសនីដើរដោយថាមពលខ្យល់ ឬថាមពលព្រះអាទិត្យធុនធំមួយ ដែលត្រូវចំណាយពេលត្រឹមតែក្នុងចន្លោះ ពី ២ឆ្នាំ ទៅ ៥ឆ្នាំ ហើយវាក៏យូរខ្លាំងដែរ បើធៀបនឹងតម្រូវការចាំបាច់ក្នុងការកាត់បន្ថយការបញ្ចេញឧស្ម័ន ដែលគេត្រូវធ្វើជាបន្ទាន់ ចាប់ពីពេលនេះ ទៅត្រឹមឆ្នាំ២០៣០ ឬឆ្នាំ២០៥០ខាងមុខ ដើម្បីបញ្ចៀសកុំឲ្យផែនដីឡើងកម្តៅលើសពី ២អង្សា ស្របទៅតាមគោលដៅ ដែលបានកំណត់ នៅក្នុងកិច្ចព្រមព្រៀងអាកាសធាតុក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ