អាចទទួលយកបានទេ បើអាំងទែរប៉ូលជ្រើសរើសប្រធានថ្មី ជាមេនគរបាល ដែលជាប់ចោទពីបទរំលោភសិទ្ធិមនុស្ស?
ចុះផ្សាយនៅថ្ងៃ៖
ស្តាប់ - ០៦:២២
ស្ថានប័នប៉ូលីសអន្តរជាតិ Interpol បានបើកអង្គសន្និបាត ចាប់ពីថ្ងៃទី២៣វិច្ឆិកា ដល់ថ្ងៃទី២៥វិច្ឆិកា ដើម្បីបោះឆ្នោតជ្រើសរើសប្រធានថ្មី។ មានបេក្ខជនម្នាក់ ជាមេបញ្ជាការនគរបាលអេមីរ៉ាតអារ៉ាប់រួម ឈ្មោះ អាម៉េដ អាល់រ៉ៃស៊ី គឺជាបេក្ខជនដែលមានប្រៀបខ្លាំងជាងគេ និងសង្ឃឹមក្លាយជាប្រធានថ្មី របស់អាំងទែរប៉ូល។ ក៏ប៉ុន្តែ នាយនគរបាលអេមៀរ៉ាតអារ៉ាប់រួមរូបនះ ត្រូវបានមនុស្សមួយចំនួន ដាក់ពាក្យប្តឹង ពីបទចេញបញ្ជា ឲ្យមានការធ្វើទារុណកម្ម និងរំលោភសិទ្ធិមនុស្សធ្ងន់ធ្ងរ។ ក្នុងនាមជាស្ថាប័នប៉ូលីសអន្តរជាតិ Interpol តើអាចទទួលយកបានទេ នូវអនាគតប្រធានថ្មី ដែលជាប់ចោទ ថាជាអតីតមេបញ្ជាការនគរបាល ប្រើអំណាចរំលោភសិទ្ធិមនុស្ស?
អាំងទែរប៉ូល Interpol ដែលមានស្នាក់ការធំនៅទីក្រុងលីយ៉ុង ប្រទេសបារាំង គឺជាស្ថាប័ននគរបាលអន្តរជាតិ ដែលមានតួនាទីប្រយុទ្ធប្រឆាំង នឹងឧក្រិដ្ឋកម្មអន្តរជាតិ។ ចាប់ពីថ្ងៃទី២៣ វិច្ឆិកា ដល់ថ្ងៃ ២៥វិច្ឆិកា ស្ថាប័ននេះ បើកមហាសន្និបាទ ដើម្បីបោះឆ្នោតជ្រើសរើសប្រធានថ្មី។ មានបេក្ខជន២រូប ដែលឈរឈ្មោះ គឺលោកអាម៉េដ អាល់រ៉ៃស៊ី (Ahmed Nesser al-Raisi) ជនជាតិអេមីរ៉ាតអារ៉ាប់រួម និងលោកស្រី Sarka Havrankova ជនជាតិឆេក។
ទារុណកម្ម និងអំពើរំលោភសិទ្ធិមនុស្ស
ប្រភពជាច្រើនបានអះអាងថា គឺលោក Ahmed al-Raisi ដែលជាបេក្ខជនមានប្រៀប អាចត្រូវបានសមាជិកអាំងទែរប៉ូល ជ្រើសរើសឲ្យធ្វើជាប្រធានថ្មី នៃស្ថាប័ននេះ។ ក៏ប៉ុន្តែ បេក្ខភាពរបស់មេបញ្ជាការនគរបាលអេមីរ៉ាតអារ៉ាប់រួមរូបនេះ កំពុងតែចោទជាបញ្ហាចម្រូងចម្រាស ជាច្រើន បន្ទាប់ពីមានពាក្យបណ្តឹងមួយចំនួន ដាក់នៅតុលាការបារាំង អង់គ្លេស និងតួកគី ចោទថាលោកម្នាក់នេះ គឺជាអ្នកបញ្ជា ឲ្យសមត្ថកិច្ចអេមីរ៉ាតអារ៉ាប់រួម ចាប់បង្ឃាំងមនុស្ស ធ្វើទារុណកម្ម និងធ្វើសកម្មភាពរំលោភសិទ្ធិមនុស្សផ្សេងៗទៀត។
ជាក់ស្តែង អង្គការ Gulf Center For Human Rights បានដាក់ពាក្យប្តឹងនៅតុលាការបារាំង ដោយ ចោទលោក Ahmed al-Raisi ក្នុងនាមជាអគ្គបេបញ្ជាការនគរបាលអេមីរ៉ាតអារ៉ាប់រួម ថាបានធ្វើទុក្ខបុកម្នេញ ទៅលើសកម្មជននយោបាយប្រឆាំង និងសកម្មជនសិទ្ធិមនុស្ស។ តួយ៉ាង លោក Ahmed Mansour អ្នកសរសេរទំព័រ Blog រិះគន់ម្នាក់ នៅអេមីរ៉ាតអារ៉ាប់រួម ដែលត្រូវបានគេចាប់ដាក់ឃុំ និងធ្វ់ទារុណកម្ម ប្រមាណ៥ឆ្នាំមកហើយ។ នេះបើផ្អែកតាមលោក William Bourdon មេធាវីរបស់អង្គការដើមបណ្តឹង។
ចាប់ដាក់ឃុំ និងរងទារុណកម្ម ដោយសារតែពាក់អាវមានទង់ជាតិកាតា
លោក Ahmed al-Raisi ក៏មានពាក់ព័ន្ធនឹងពាក្យបណ្តឹង ពីមនុស្ស២នាក់ផ្សេងទៀត នៅប្រទេសអង់គ្លេស ពីបទធ្វើទារុណកម្ម លើជនជាតិអង់គ្លេស២នាក់។ អ្នកទី១ ឈ្មោះ Ali Issa Ahmad គឺជាអ្នកគាំទ្រកីឡាបាល់ទាត់ ហើយបានធ្វើដំណើរទៅតាមដានការប្រកួតពានរង្វាន់អាស៊ី កាលពីឆ្នាំ២០១៩ នៅប្រទេសអេមីរ៉ាតអារ៉ាប់រួម។ នៅក្នុងពេលទៅមើលការប្រកួត Ali Issa Ahmad បានពាក់អាវយឺតកីឡា មានទង់ជាតិប្រទេសកាតា ហើយត្រូវបានសមត្ថកិច្ចនគរបាល អេមីរ៉ាតអារ៉ាប់រួម ចាប់ឃុំខ្លួន និងបានធ្វើទារុណកម្ម រយៈពេល៣សប្តាហ៍។
ចំណែកដើមបណ្តឹងម្នាក់ទៀត ជាជនជាតិអង់គ្លេសដែរ ឈ្មោះ Matthew Hedges ជាសាស្ត្រាចារ្យ ហើយបានធ្វើការស្រាវជ្រាវ ស្តីពីស្ថាប័នសន្តិសុខនៅអេមីរ៉ាតអារ៉ាប់រួម។ ត្រូវគេដាក់ឃុំដោយអយុត្តិធម៌ ចំនួន៧ខែ ពីបទចារកិច្ច លោកMatthew Hedges បានរងនូវទារុណកម្ម ទាំងផ្លូវកាយ និងសតិអារម្មណ៍យ៉ាងធ្ងន់ធ្ងរបំផុត។
ជនជាតិអង់គ្លេសទាំង២នាក់ បានដាក់ពាក្យប្តឹង លោក Ahmed al-Raisi ដោយជឿថាគឺលោកម្នាក់នេះ ជាអ្នកបញ្ជាឲ្យមានការធ្វើអំពើព្រៃផ្សៃទាំងអស់នេះ។ ហើយកាលពីថ្ងៃទី ១៦វិច្ឆិកា លោក Hubert Julien-Laferrière សមាជិកសភាបារាំងប្រចាំតំបន់ Rhône បានអញ្ជើញជនរងគ្រោះទាំង២នាក់នេះ ឲ្យផ្តល់សក្ខីកម្មចំពោះមុខអង្គសភាបារាំង ដើម្បីពញ្ញាក់ស្មារតីអ្នកនយោបាយបារាំងទាំងអស់ ឲ្យក្រោកឡើងប្រឆាំងនឹងបេក្ខភាពលោក Ahmed al-Raisi ជាប្រធានអាំងទែរប៉ូល។ សមាជិកសភាបារាំង លោកHubert Julien-Laferrière បានលើកឡើងស្ថាប័ននគរបាលអន្តរជាតិ មិនអាចត្រូវបានដឹកនាំដោយមនុស្សម្នាក់ ដែលជាឧក្រិដ្ឋជននោះទេ។
លោក Khalid Ibrahim ប្រធានអង្គការ Gulf Center For Human Rights បានថ្លែងការត្រេកអរ ដែលមានពាក្យបណ្តឹងកាន់តែច្រើន ទាក់ទិននឹងលោក Ahmed al-Raisi នៅតាមប្រទេសផ្សេងៗ។ លោកសង្ឃឹមថា ពាក្យបណ្តឹងទាំងនេះនឹងអាចឈានទៅដល់ ការចាប់ឃាត់ខ្លួនជននេះ យកមកជំនំជំរះ ដោយឈរលើសមត្ថភាពអំណាចយុត្តាធិការជាលក្ខណៈសកល នៃប្រព័ន្ធយុត្តិធម៌។ លោកលើកឡើងថា បណ្តឹងបែបនេះ មិនអាចធ្វើទៅរួចទេ នៅក្នុងប្រទេសអេមីរ៉ាតអារ៉ាប់រួម ព្រោះគ្រប់យ៉ាង គឺគេសម្រេចពីថ្នាក់លើកំពូលមកទាំងអស់។
« រឿងអាស្រូវធំ បើInterpol មានប្រធានជាឧក្រិដ្ឋជន »
ដោយឡែក លោក Patrick Baudoin ប្រធានកិត្តិយស នៃសហភាពអន្តរជាតិដើម្បីសិទ្ធិមនុស្ស បានលើកឡើងថា នៅបារាំង គឺរដ្ឋអាជ្ញាមិនទាន់បានសម្រេច បើកការស៊ើបអង្កេតជាផ្លូវការទេ លើពាក្យបណ្តឹងទាំងនេះ។ លោកបានទាញសញ្ញាអាសន្នថា វានឹងជារឿងអាស្រូវធំ ប្រសិនបើ លោក Ahmed al-Raisi ក្លាយជាប្រធានរបស់អាំងទែរប៉ូលមែននោះ។ លោកបន្ថែមថា មនុស្សដែលមានចិត្តឃោរឃៅរូបនេះ នឹងបន្តធ្វើសកម្មភាពរំលោភបំពានរបស់ខ្លួន នៅទូទាំងពិភពលោកតែម្តង។
យ៉ាងណាក៏ដោយ បើទោះបីជាមានសមាជិកសភាប្រមាណជាង៥០នាក់ ខំប្រឹងឈ្មុសឈ្មុល ទាមទារឲ្យលោកប្រធានាធិបតីម៉ាក្រុង ធ្វើអន្តរាគមន៍ ក៏ប៉ុន្តែបញ្ហានេះ ហាក់មិនសូវត្រូវបានរដ្ឋាភិបាលបារាំង ចាប់អារម្មណ៍ប៉ុន្មានទេ។ រដ្ឋមន្ត្រីក្រសួងមហាផ្ទៃបារាំង បានត្រឹមតែឆ្លើយថា គិតមកទល់ពេលនេះ គេគ្មានអ្វីមកបញ្ជាក់បានទេ ថាការចោទប្រកាន់ទៅលើរូបលោក Ahmed al-Raisi ទាំងនោះ មានភស្តុតាង នឹងអំណះអំណាងផ្លូវច្បាប់គ្រប់គ្រាន់។
អេមីរ៉ាតអារ៉ាប់រួម ជាអតិថិជនអាវុធរបស់បារាំង
បើតាមការវិភាគ របស់លោក Hubert Julien-Lafferière រដ្ឋាភិបាលបារាំង មិនចង់ចេញមុខ រារាំងបេក្ខភាពរបស់ លោក Ahmed al-Raisi ពីព្រោះថា បារាំង មិនចង់មានបញ្ហាការទូតជាមួយអេមីរ៉ាតអារ៉ាប់រួម។ ប្រទេសនេះ ទិញអាវុធពីបារាំងច្រើនណាស់ ហើយបារាំងក៏មិនដែលទាមទារលក្ខខណ្ឌគោរពសិទ្ធិមនុស្សអ្វី ពីប្រទេសនេះដែរ។
អ្នកកាសែតរបស់វិទ្យុបារាំងអន្តរជាតិ RFI បានព្យាយាមទាក់ទង សុំការបំភ្លឺពីលោក Ahmed al-Raisi តែត្រូវបានលោកម្នាក់នេះ ប្រកែកមិនឆ្លើយ។ ចំណែកស្ថានទូតអេមីរ៉ាតអារ៉ាប់រួម ប្រចាំនៅក្រុងប៉ារីស បានឆ្លើយថា « លោក Ahmed al-Raisi គឺជាមេបញ្ជាការនគរបាលម្នាក់ ដែលមានសមត្ថភាព និងបទពិសោធន៍ការងារ៤០ឆ្នាំមកហើយ។ ប្រសិនបើលោកត្រូវជាប់ឆ្នោតជាប្រធានអាំងទែរប៉ូល នោះលោកនឹងបន្តធ្វើការងារនេះ ដើម្បីការពារសន្តិសុខ សុវត្ថិភាពជូនប្រជាពលរដ្ឋនៅទូទាំងពិភពលោក »។
គួរបញ្ជាក់ថា នៅថ្ងៃទៅ២៥វិច្ឆិកាខាងមុខនេះ គេនឹងដឹងថាអ្នកណានឹងក្លាយជាប្រធានថ្មី របស់អាំងទែរប៉ូលហើយ។ បើតាមប្រភពស្និទ្ធនឹងសំណុំរឿងនេះ លោក Ahmed al-Raisi បានប្រើយុទ្ធសាស្ត្រទិញទឹកចិត្ត អូសទាញដើម្បីអាចបានសម្លេងឆ្នោតច្រើនបំផុត។ បេក្ខជនម្នាក់ទៀត ដែលជាគូប្រជែងរបស់លោក គឺលោកស្រី Sarka Havrankova ប្រហែលជាមានសង្ឃឹមតិចណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ