ក្រុមឧទ្ទាមកំពុងស្វែងរកអាវុធនិងការរួបរួមកម្លាំងគ្នា ដើម្បីឈានទៅផ្តួលរបបសឹកភូមា ?
ចុះផ្សាយនៅថ្ងៃ៖
ស្តាប់ - ០៤:៤៤
ក្រោយរដ្ឋប្រហារទម្លាក់លោកស្រី អ៊ុងសាន ស៊ូជី និងដើម្បីតស៊ូប្រឆាំងនឹងរបបសឹក កងកម្លាំងឧទ្ទាមពលរដ្ឋបានចាប់រីកធំធាត់ និងមានសកម្មភាពកាន់តែខ្លាំងឡើងៗ តតាំងនឹងកងកម្លាំងយោធារបស់រដ្ឋាភិបាលកំពុងកាន់អំណាច។ កងយុទ្ធជនឧទ្ទាមប្រមូលគ្នាបានកាន់តែច្រើន និងមានឆន្ទៈមុះមុតមែន តែក្រុមឧទ្ទាមពលរដ្ឋនៅខ្វះអាវុធយុទ្ធភណ្ឌ និងការរួបរួមគ្នាជាធ្លុងមួយ។
ក្រោយរដ្ឋប្រហារទម្លាក់លោកស្រីអ៊ុងសានស៊ូជីថ្ងៃទី ១កុម្ភៈ២០២១ និងការបង្ក្រាបបាតុកម្មបង្ហូរឈាមពីសំណាក់មេដឹកនាំយោធា ដែលបើតាមសមាគមការពារអ្នកទោសនយោបាយ មានជនស៊ីវិលប្រមាណយ៉ាងហោចណាស់ ១៣០០នាក់បានស្លាប់បាត់បង់ជីវិត និងដែលត្រូវបានអង្គការសហប្រជាជាតិថាមានទម្រង់ជាបទឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាម កងកម្លាំងយុទ្ធជនការពារប្រជាជន ដែលជាកងស្វ័យត្រានភូមា បានរីកលូតលាស់និងបញ្ចេញសកម្មភាពតតាំងរដ្ឋាភិបាលសឹកវិញ។
សង្គ្រាមតួលេខ
កងយុទ្ធជនការពារប្រជាពលរដ្ឋ បានទាក់ទាញមិនត្រឹមតែអតីតនគរបាលឬយោធារាប់ពាន់នាក់ទេ និស្សិត បញ្ញាវន្ត មន្ត្រីរដ្ឋការ កសិករ យុវជនជាច្រើនម៉ឺននាក់ផ្សេងទៀត ក៏បានស្ម័គ្រចិត្តចូលមកជាបន្តបន្ទាប់ ក្នុងជំរំហាត់ហ្វឹកហ្វឺនរបស់កងកម្លាំងយុទ្ធជនការពារជាតិការ៉េនី (KNDF)។ បើតាមលោក Richard Horsey អ្នកវិភាគនៃអង្គការ International Crisis Group ដោយបានទទួលការបង្ហាត់ហ្វឹកហ្វឺនពីសំណាក់ក្រុមយោធាការ៉េនី ដែលជាពួកឧទ្ទាមជនជាតិភាគតិចប្រឆាំងនឹងរដ្ឋាភិបាលតាំងពីយូរឆ្នាំមកហើយនោះ កងយុទ្ធជនការពារប្រជាជនអាចប្រមូលផ្តុំកម្លាំងបានច្រើននិងយ៉ាងលឿនរហ័ស ហើយចាប់មានអាវុធ ចាប់អភិវឌ្ឍសមត្ថភាព តាកទិច និងបច្ចេកទេសប្រយុទ្ធចាំបាច់ក្នុងការវាយស្ទាក់ទាហានរដ្ឋាភិបាលសឹកភូមា បានយ៉ាងដំណំ។ ទាហានរដ្ឋាភិបាលតែងតែភ្ញាក់ផ្អើលនិងមិនអាចតបតវិញបានទេ នៅចំពោះមុខតាកទិកដ៏មានប្រសិទ្ធភាពរបស់កងឧទ្ទាមយុទ្ធជនទាំងនេះ។
តាំងពីខែកុម្ភៈមក បើតាមប្រព័ន្ធឃោសនារបស់រដ្ឋាភិបាល កងយុទ្ធជនការពារប្រជាជនបានដឹកនាំធ្វើប្រតិបត្តិការ ក្នុងទម្រង់ជាការបាញ់រះនិងបំផ្ទុះគ្រាប់បែកឆ្នៃប្រឆាំងរបបសឹក ដោយដៅលើទីតាំង ផ្លូវថ្នល់ ស្ពាន ជិត៤០០កន្លែង និងកម្ទេចទីស្នាក់ការរណបគ្រប់គ្រងដោយពួកយោធារដ្ឋាភិបាលសឹករាប់សិបកន្លែង។ ជាសរុបមានទាហានរដ្ឋាភិបាលសឹកប្រមាណជាងបីពាន់នាក់ត្រូវបានសម្លាប់នៅរវាងពីខែមិថុនាដល់ខែតុលា។ នេះបើតាមតួលេខផ្តល់ដោយរដ្ឋាភិបាលបង្រួបបង្រួមភូមា ឬរដ្ឋាភិបាលស្រមោលភូមា។ តែបើតាមរដ្ឋាភិបាលសឹក ការប្រយុទ្ធតតាំងជាមួយកងយុទ្ធជនការពារប្រជាជន បានបង្កឱ្យទាហាន ៧៥នាក់ ប៉ូលិស ៩៣នាក់ខាងរដ្ឋាភិបាលស្លាប់ នៅរវាងពីខែកុម្ភៈដល់ខែតុលា២០២១។
ចំណាយរាប់លានទិញអាវុធ
ប៉ុន្តែបេសកកម្មរបស់កងយុទ្ធជនការពារប្រជាជនភូមា ទំនងមិនអាចសម្រេចបានដូចបំណងទេ បើយោលទៅលើកម្លាំងរវាងក្រុមឧទ្ទាមនិងក្រុមយោធាភូមា ដែលគេចាត់ទុកជាក្រុមយោធាដ៏ខ្លាំងក្លាជាងគេបំផុតមួយប្រចាំ តំបន់អាស៊ីអាគ្នេយ៍។
ក្រុមឧត្តមសេនីយ៍យោធាដែលកំពុងដឹកនាំរដ្ឋាភិបាលភូមាបច្ចុប្បន្នបានចំណាយថវិកាយ៉ាងច្រើនសន្ធឹកសន្ធាប់ខ្លាំងណាស់ ដល់ទៅរាប់សិបលានដុល្លារ នារយៈពេលប៉ុន្មានឆ្នាំចុងក្រោយមកនេះ ដើម្បីទិញអាវុធយុទ្ធភ័ណ្ឌ និងសម្ភារៈបរិក្ខារយោធា មានអាទិ៍ឧទ្ធម្ភាគចក្រយោធា យន្តហោះចម្បាំង រថក្រោះ រថពាសដែក មីស៊ីល បាញ់ពីដីទៅអាកាស... ពីមហាមិត្តចិននិងរុស្ស៊ី។ ចំណែកក្រុមយុទ្ធជនការពារប្រជាជន KNDF រំពឹងលើតែជំនួយពីសកម្មជនរបស់ខ្លួន។ មិនខ្វះទេកងកម្លាំងទ័ព ៨០%នៃយុទ្ធជន សុទ្ធតែមានឆន្ទៈដាច់ខាតចង់ផ្តួលរំលំរដ្ឋាភិបាលសឹក ប៉ុន្តែកងយុទ្ធជនការពារប្រជាជន គ្មានអាវុធគ្រប់គ្រាន់ទេ។
មានដែនដីស្ថិតនៅប៉ែកខាងកើតប្រទេស ដែលឆ្ងាយពីព្រំដែនថៃ ពួកគេជួបការលំបាកខ្លាំងក្នុងការស្វែងរកទិញអាវុធពីទីផ្សារងងឹត។ ដោយមិនអាចរកទិញអាវុធដោយផ្ទាល់បាន ពួកគេចាំបាច់ត្រូវការប្រើឈ្មួញកណ្តាល ដូច្នេះចំណាយត្រូវឡើងខ្ពស់ខ្លាំង។ ម្យ៉ាងទៀត តម្លៃអាវុធបានឡើងថ្លៃខ្លាំង ដោយលុយភូមាធ្លាក់ថោកឥតឈប់។ កាលពីខែមីនាមេសា២០២១ កាំភ្លើងM-16 មួយដើមថ្លៃ ២២០០ដុល្លារ និង២៧០០ដុល្លារសម្រាប់អាកាAK-47មួយដើម តែឥលូវតម្លៃកាំភ្លើងប្រភេទនេះបានឡើងថ្លៃមួយគុណនឹងពីរ។ នេះជាបញ្ហាមួយ។
គ្មានលទ្ធភាពទិញអាវុធ យុទ្ធជនចូលថ្មីភាគច្រើនមានត្រឹមតែអាវុធកៃច្នៃ ឬប្រើដំបងជាអាវុធតែប៉ុណ្ណោះ។ គិតមកទល់ពេលនេះ ដោយសារមានពលនៅស្ទើរគ្រប់ទិសទី កងកម្លាំងយុទ្ធជនការពារប្រជាជន អាចដណ្តើមបានគ្រប់គ្រង់ទឹកដីក្នុងរដ្ឋកាយ៉ា ពីពួកយោធា បានស្ទើរទាំងស្រុងលើកលែងតែតំបន់ជុំវិញទីតាំងឈរជើងរបស់យោធារដ្ឋាភិបាលតែប៉ុណ្ណោះ។
បញ្ហាដ៏ចម្បងមួយទៀត ក្រុមយុទ្ធជនការពារប្រជាជននិងកងយុទ្ធជនស្វ័យត្រានជាច្រើនក្រុមផ្សេងទៀត ពុំទាន់មានទស្សនវិស័យរួម ក្នុងការផ្តុំកម្លាំងគ្នាទៅប្រយុទ្ធប្រឆាំងនឹងរដ្ឋាភិបាលកណ្តាលដឹកនាំដោយក្រុមយោធាភូមា។ រដ្ឋាភិបាលបង្រួបបង្រួមជាតិ បានសាកល្បងទាក់ទងកងស្វ័យត្រាននីមួយៗដែរ តែពុំទាន់ឃើញមានបង្ហាញយុទ្ធសាស្ត្ររួមសោះនៅឡើយទេ។ នេះបើតាម លោក David Mathieson អ្នកជំនាញពីប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ