រយៈពេល៥០ឆ្នាំនៃបេសកកម្មមនុស្សធម៌របស់អង្គការគ្រូពេទ្យគ្មានព្រំដែន
ចុះផ្សាយនៅថ្ងៃ៖
ស្តាប់ - ០៤:២៤
ថ្ងៃទី២២ ធ្នូ ឆ្នាំ ២០២១ គឺជាខួបគម្រប់៥០ ឆ្នាំនៃការកកើតឡើងរបស់អង្គការគ្រូពេទ្យគ្មានព្រំដែន។ គ្រូពេទ្យគ្មានព្រំដែនដែលជាអង្គការក្រៅរដ្ឋាភិបាលបារាំងបាននិងកំពុងផ្តល់ជំនួយផ្នែកវេជ្ជសាស្រ្តនៅក្នុងតំបន់រងគ្រោះជាច្រើនរយៈពេលកន្លះសតវត្សរ៍មកហើយ។ ពីគ្រូពេទ្យមួយក្រុមតូចក្លាយទៅជាអង្គការជំនួយដ៏ធំមួយក្នុងពិភពលោក បច្ចុប្បន្ននេះ អង្គការកំពុងប្រតិបត្តិការនៅក្នុងប្រទេសជាង ៧០។ តើអង្គការគ្រូពេទ្យគ្មានព្រំដែនមានប្រវត្តិយ៉ាងណា? ហើយថាតើហេតុអ្វីអង្គការបារាំងមួយនេះអាចរីកលូតលាស់បានធំបែបនេះ?
អង្គការគ្រូពេទ្យគ្មានព្រំដែន (MSF) បង្កើតឡើងជាផ្លូវការក្នុងទីក្រុងប៉ារីសប្រទេសបារាំងនាថ្ងៃទី២២ ខែធ្នូ ឆ្នាំ១៩៧១។ នៅពេលនោះ ក្រុមអ្នកស្ម័គ្រចិត្តប្រមាណ ៣០០នាក់មានគ្រូពេទ្យ គិលានុបដ្ឋាយិកា និងបុគ្គលិកជំនាញផ្សេងទៀតបានពួតដៃគ្នាជាមួយវេជ្ជបណ្ឌិតនិងអ្នកកាសែតដែលជាស្ថាបនិកចំនួន១៣រូប បង្កើតអង្គការមនុស្សធម៌នេះឡើងក្នុងគោលដៅជួយក្រុមមនុស្សដែលកំពុងត្រូវការជំនួយជាបន្ទាន់។
ដំបូងឡើយ គ្រូពេទ្យគ្មានព្រំដែនគ្រាន់តែជាស្ថាប័នមួយមានការចូលរួមសហការគ្នាពីមិត្តភក្តិមួយក្រុមតូចដែលធ្វើការទាំងគ្មានធនធាន និងគ្មានរចនាម្ព័ន្ធអ្វីច្បាស់លាស់ឡើយ។ ក៏ប៉ុន្តែបន្តិចម្តងៗ អង្គការបានវិវត្តខ្លួនក្លាយទៅជាបណ្តាញមួយដែលត្រូវបានទទួលស្គាល់ជាសកលចំពោះបេសកកម្មផ្តល់ជំនួយផ្នែកវេជ្ជសាស្រ្តដល់ក្រុមមនុស្សដែលរងផលប៉ះពាល់ដោយគ្រោះធម្មជាតិ គ្រោះទុរ្ភិក្ស ជម្លោះ ឬជំងឺរាតត្បាតនៅជុំវិញពិភពលោកក្នុងជាង ៧០ប្រទេស ក្នុងនោះមានទាំងប្រទេសកម្ពុជាផងដែរ។
បេសកកម្មដំបូងរបស់អង្គការគ្រូពេទ្យគ្មានព្រំដែន
បេសកកម្មដំបូងរបស់គ្រូពេទ្យគ្មានព្រំដែនគឺនៅនីការ៉ាហ្គាក្នុងឆ្នាំ១៩៧២ បន្ទាប់ពីគ្រោះរញ្ជួយដីដ៏ធំដែលបានវាយប្រហារតំបន់ជាច្រើនក្នុងរដ្ឋធានីម៉ាណាហ្គានិងបានបណ្តាលឲ្យមនុស្សរាប់ម៉ឺននាក់ស្លាប់។
ក្រោយមកទៀត នៅក្នុងឆ្នាំ ១៩៧៤ អង្គការគ្រូពេទ្យគ្មានព្រំដែនបានបង្កើតបេសកកម្មផ្តល់ជំនួយផ្នែកវេជ្ជសាស្រ្តរយៈពេលវែងជាលើកដំបូងរបស់ខ្លួននៅក្នុងប្រទេសហុងឌូរ៉ាស ក្រោយព្យុះហារីខេន Fifi បោកបក់បណ្តាលឲ្យមានទឹកជំនន់ដ៏ធំនិងបានសម្លាប់មនុស្សរាប់ពាន់នាក់។
ជាច្រើនឆ្នាំមកនេះ អង្គការគ្រូពេទ្យគ្មានព្រំដែនមិនដែលនៅស្ងៀមឡើយនិងបានពង្រីកបេសកកម្មទៅកាន់ប្រទេសកាន់តែច្រើន។ ពីមួយឆ្នាំទៅមួយឆ្នាំ អង្គការកាន់តែរីកចម្រើនលូតលាស់ ហើយប្រភពថវិការបស់អង្គការគឺបានមកពីការរៃអង្គាសប្រាក់ពីសប្បុរសជនជាង ៧ លាននាក់នៅទូទាំងពិភពលោក។ ជាង ៩៧% នៃមូលនិធិរបស់គ្រូពេទ្យគ្មានព្រំដែនបានមកពីការបរិច្ចាគរបស់ឯកជនដែលអនុញ្ញាតឲ្យអង្គការអាចធ្វើសកម្មភាពរបស់ខ្លួនយ៉ាងឆាប់រហ័សដើម្បីជួយសង្គ្រោះជីវិតមនុស្ស។
សព្វថ្ងៃនេះថវិកាប្រចាំឆ្នាំរបស់អង្គការគ្រូពេទ្យគ្មានព្រំដែនមានចំនួនជិត ១,៦ ពាន់លានអឺរ៉ូ និងមានបុគ្គលិកជិត ៦៥ ០០០ នាក់ ហើយពីរភាគបីនៃពួកគេទាំងនោះបំពេញបេសកកម្មដោយផ្ទាល់នៅក្នុងប្រទេសគោលដៅ។
មកទល់នឹងពេលនេះ អង្គការបានពង្រីកបេសកកម្មទៅក្នុងប្រទេសកាន់តែច្រើនរហូតដល់ទៅជាង ៧០ប្រទេស ដោយហេតុការត្រូវការជំនួយមានឥតឈប់ ហើយអង្គការនៅតែទទួលបានការគាំទ្រពីសប្បុរសជននានាជាពិសេសនៅអឺរ៉ុបដើម្បីបន្តបេសកកម្មរបស់ខ្លួន។
ទស្សនវិស័យរបស់អង្គការ
អង្គការគ្រូពេទ្យគ្មានព្រំដែនបំពេញបេសកកម្មដោយការសម្របខ្លួន និងដើរឆ្ពោះទៅមុខជានិច្ច។ ក្នុងរយៈពេល ៥០ ឆ្នាំកន្លងមកនេះ បុគ្គលិករបស់អង្គការបានប្រឈមមុខនឹងឧបសគ្គជាច្រើន ហើយចាំបាច់ត្រូវធ្វើការដោយសម្របខ្លួនទៅនឹងស្ថានភាពផ្សេងៗគ្នា ហើយព្យាយាមឆ្លើយតបបន្ទាន់នឹងគ្រោះថ្នាក់ឬគ្រោះមហន្តរាយជាមួយនឹងធនធានដែលមានកំណត់។
ដោយឡែកបើក្រឡេកមើលទៅអនាគតវិញ ប្រទេសនានាកាន់តែមានលទ្ធភាពរៀបចំការឆ្លើយតបបន្ទាន់ចំពោះគ្រោះមហន្តរាយធម្មជាតិ ដូច្នេះបញ្ហាប្រឈមផ្នែកមនុស្សធម៌ធំបំផុតសម្រាប់អង្គការដូចជាគ្រូពេទ្យគ្មានព្រំដែន គឺជាបញ្ហាពាក់ព័ន្ធអំពើភេរវកម្ម ការធ្វើចំណាកស្រុក និងភាពក្រីក្រ។
សរុបមក កាលពី៥០ ឆ្នាំមុន អង្គការគ្រូពេទ្យគ្មានព្រំដែនគឺជាក្រុមតូចមួយនៃវេជ្ជបណ្ឌិតបារាំងដែលចូលទៅជួយជនរងគ្រោះក្នុងតំបន់ជម្លោះនៅបរទេស។ ចំណែកសព្វថ្ងៃនេះវិញ គ្រូពេទ្យគ្មានព្រំដែនគឺជាអង្គការជំនួយដ៏ធំមួយក្នុងពិភពលោក។ ពាក់កណ្តាលនៃបុគ្គលិកដែលធ្វើការឲ្យគ្រូពេទ្យគ្មានព្រំដែននៅក្នុងប្រទេសគោលដៅទាំងជាង៧០ គឺជាប្រជាជនក្នុងស្រុក ហើយមានជាតិសាសន៍ចម្រុះគ្នារាប់សិបនាក់កំពុងបម្រើការនៅទីស្នាក់ការកណ្តាលក្នុងទីក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ