ដំណើរវិវឌ្ឍចម្បងៗនៃវិស័យអវកាសនៅក្នុងឆ្នាំ២០២១
ចុះផ្សាយនៅថ្ងៃ៖
ស្តាប់ - ០៤:៤២
កាលពីថ្ងៃសៅរ៍ ទី២៥ធ្នូកន្លងទៅនេះ តេឡេស្កុបអវកាសជេមស៍វេប ដែលជាតេឡេស្កុបអវកាសដ៏ទំនើប ត្រូវបានទីភ្នាក់ងារអវកាសណាសា និងអេសាបាញ់បង្ហោះប្រកបដោយជោគជ័យ។ ជាហេតុការណ៍ដ៏សំខាន់មួយ ដែលគេទន្ទឹងរង់ចាំអស់រយៈពេលរាប់សិបឆ្នាំ ហើយក៏ជាការឈានទៅបិទបញ្ចប់ឆ្នាំ២០២១ ដែលជាឆ្នាំដ៏សំខាន់មួយ នៅក្នុងវិស័យអវកាស។
ឆ្នាំ២០២១នេះ ថ្វីដ្បិតតែពិភពលោកទាំងមូលនៅតែត្រូវស្ថិតក្នុងវិបត្តិកូវីដចេញមិនទាន់រួច ក៏ប៉ុន្តែ គឺជាឆ្នាំដ៏ពិសេសមួយ ដែលពោរពេញទៅដោយហេតុការណ៍សំខាន់ៗ និងដំណើរវិវឌ្ឍដ៏ចម្បងៗ នៅក្នុងវិស័យអវកាស រាប់ចាប់តាំងពីហេតុការណ៍ជាប្រវត្តិសាស្រ្តខាងផ្នែកទេសចរណ៍អវកាស បេសកកម្មទៅកាន់ភពអង្គារ និងទៅកាន់អាចម៍ផ្កាយ រហូតទៅដល់ការបាញ់បង្ហោះតេឡេស្កុបដ៏ទំនើប ដែលមានសមត្ថភាពអាចឆ្លុះមើលទៅដល់ចម្ងាយជាង ១៣ពាន់លានឆ្នាំពន្លឺពីភពផែនដីរបស់យើង។
ជោគជ័យចម្បងទីមួយនៃវិស័យអវកាស នៅក្នុងឆ្នាំ២០២១នេះ បានកើតមានឡើងតាំងពីដើមឆ្នាំ គឺនៅខែកុម្ភៈ នៅពេលដែលបេសកកម្ម Perserverance របស់ទីភ្នាក់ងារណាសា បានធ្វើដំណើរទៅដល់ និងចុះចតនៅលើដីភពអង្គារ។ ជោគជ័យដែលក្រោយមកបាននាំទៅដល់សមិទ្ធិផលដ៏សំខាន់ៗ ដែលមិនធ្លាប់មានពីមុន រួមមាន ការសាកល្បងដោយជោគជ័យនូវបច្ចេកវិទ្យាទាញយកឧស្ម័នកាបូនិចពីបរិយាកាសភពអង្គារមកផលិតអុកស៊ីសែន ការខួងដីភពអង្គារប្រមូលសំណាកទុកបញ្ជូនត្រឡប់មកផែនដីវិញ និងការហោះសាកល្បងដោយជោគជ័យនូវកូនឧទ្ធម្ភាគចក្រលើភពអង្គារ ដែលជារឿងមិនធ្លាប់មាន នៅក្នុងប្រវត្តិសាស្រ្ត។
ក្នុងពេលជាមួយគ្នា ប្រទេសផ្សេងទៀតក្រៅពីសហរដ្ឋអាមេរិក ក៏បានទទួលជោគជ័យជាបន្តបន្ទាប់គ្នាផងដែរ នៅក្នុងបេសកកម្មទៅកាន់ភពអង្គារ ក្នុងនោះ បេសកកម្ម ExoMars ដែលជាគម្រោងរួមគ្នា រវាងទីភ្នាក់ងារអវកាសអឺរ៉ុប និងទីភ្នាក់ងារអវកាសរុស្ស៊ី ហើយដែលស្ថិតនៅក្នុងគន្លងតារាវិថីជុំវិញភពអង្គារ តាំងពីឆ្នាំ២០១៦មកនោះ បានរកឃើញភស្តុតាងបញ្ជាក់យ៉ាងច្បាស់លាស់ អំពីវត្តមានទឹកនៅក្នុងបរិមាណដ៏ច្រើន នៅក្រោមដីភពអង្គារ។ ចំណែកប្រទេសចំណូលថ្មីពីរទៀតក៏បានបញ្ជូនបេសកកម្មទៅកាន់ភពអង្គារដែរ នៅក្នុងឆ្នាំ២០២១នេះ គឺអារ៉ាប់រួមបញ្ជូនយានប្រភេទ Orbiter ឲ្យទៅហោះក្នុងគន្លងតារាវិថីជុំវិញភពអង្គារ រីឯចិនវិញ បញ្ជូនយានពីរប្រភេទក្នុងបេសកកម្មតែមួយ គឺមួយ ប្រភេទ Orbiter និងមួយទៀត ប្រភេទរ៉ូវ័រ ដែលចុះចតដោយជោគជ័យលើដីភពអង្គារ ហើយធ្វើឲ្យចិនក្លាយជាប្រទេសទី៣ ក្នងប្រវត្តិសាស្រ្ត បន្ទាប់ពីរុស្ស៊ី និងអាមេរិក ដែលបានចុះចតយានដោយជោគជ័យលើដីភពអង្គារ។
ក្រៅពីជោគជ័យនៅភពអង្គារ វិស័យអវកាសចិនក៏បានបោះជំហានទៅមុខគួរឲ្យកត់សម្គាល់មួយទៀតផងដែរ នៅក្នុងឆ្នាំ២០២១នេះ គឺការបាញ់បង្ហោះផ្នែកដំបូងនៃស្ថានីយ៍អវកាសផ្ទាល់ខ្លួនឯង ទៅកាន់គន្លងតារាវិថីជុំវិញផែនដី ព្រមទាំងបានបញ្ជូនអវកាសយានិកពីរក្រុមឲ្យទៅរស់នៅ និងធ្វើការ រយៈពេលជាច្រើនខែ នៅក្នុងស្ថានីយ៍អវកាស ដែលទើបនឹងដំឡើងថ្មីនេះ។
បេសកកម្មអវកាសដ៏ចម្បងមួយទៀត នៅក្នុងឆ្នាំ២០២១នេះ គឺការសិក្សាលម្អិតទៅលើអាចម៍ផ្កាយ តាមរយៈការបញ្ជូនយានឈ្មោះ « លូស៊ី » របស់ទីភ្នាក់ងារណាសា ឲ្យទៅហោះកាត់អាចម៍ផ្កាយចំនួន ៨ និងការបញ្ជូនយានឈ្មោះ DART ឲ្យទៅហោះបុកអាចម៍ផ្កាយ « ឌីម៉រហ្វូស » នៅក្នុងគម្រោងសាកល្បងបច្ចេកវិទ្យា ដើម្បីការពារភពផែនដីពីការបុកទង្គិចដោយអាចម៍ផ្កាយ។
បន្ថែមពីលើនេះទៅទៀត នៅប៉ែកខាងក្រៅប្រព័ន្ធព្រះអាទិត្យ យាន « ជូណូ » (Juno) របស់ណាសាបានហោះកាត់ និងថតបានសំឡេងចេញពីដែនម៉ាញេទិចនៃព្រះចន្ទមួយរបស់ភពព្រហស្បតិ៍ គឺ ហ្កានីម៉ែដ។ ចំណែកនៅប៉ែកខាងក្នុងប្រព័ន្ធព្រះអាទិត្យឯណោះវិញ យានគ្មានមនុស្សបើក ឈ្មោះ Parker Solar Probe ដែលត្រូវបានបាញ់បង្ហោះដោយទីភ្នាក់ងារណាសា កាលពីឆ្នាំ២០១៨កន្លងទៅ បានហោះទៅដល់ក្បែរព្រះអាទិត្យបំផុតមិនធ្លាប់មាន គឺហោះរហូតចូលទៅដល់ក្នុងស្រទាប់បរិយាកាសរបស់ព្រះអាទិត្យជាលើកទីមួយ នៅក្នុងប្រវត្តិសាស្រ្ត។
ឆ្នាំ២០២១នេះក៏ជាឆ្នាំពិសេសមួយផងដែរ សម្រាប់វិស័យទេសចរណ៍អវកាស ដោយក្រុមហ៊ុនអវកាសឯកជនចំនួនពីរ គឺ Blue Origin និង Virgin Galactic សុទ្ធតែបានសាកល្បងដោយជោគជ័យនូវបេសកកម្មបញ្ជូនទេសចរទៅកាន់ទីអវកាស ដែលជាការចាប់ផ្តើមបើកទំព័រសករាជថ្មីមួយ នៃវិស័យទេសចរណ៍អវកាសឯកជន។
ហេតុការណ៍រឹតតែសំខាន់ជាប្រវត្តិសាស្រ្តមួយទៀតនៃវិស័យអវកាស នៅក្នុងឆ្នាំ២០២១នេះ គឺការបាញ់បង្ហោះតេឡេស្កុបអវកាសជេមស៍វេប ក៏ប៉ុន្តែ ជោគជ័យក្នុងការបាញ់បង្ហោះនេះ គ្រាន់តែជាដំណាក់កាលទីមួយតែប៉ុណ្ណោះ។ នៅក្រោយការបាញ់បង្ហោះ និងផ្តាច់ខ្លួនចេញពីរ៉ុកកែតអារីយ៉ាន ជេមស៍វេបត្រូវឆ្លងកាត់នូវដំណាក់កាលដ៏ស្មុគស្មាញជាច្រើនផ្សេងទៀត ហើយគេត្រូវរង់ចាំរហូតដល់ចុងខែមករាដើមឆ្នាំ២០២២ខាងមុខ ក្រោយពីជេមស៍វេបត្រូវពន្លាតខ្លួនចេញដោយពេញលេញ ហើយធ្វើដំណើរទៅដល់គោលដៅ នៅចម្ងាយ ១លាន៥សែនគីឡូម៉ែត្រពីផែនដី ទើបគេអាចដឹងច្បាស់ថា តើតេឡេស្កុបអវកាសតម្លៃ ១០ពាន់លានដុល្លារនេះ ពិតជាអាចប្រើការបានដូចការរំពឹងទុកដែរឬក៏យ៉ាងណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ