ហេតុអ្វីបានជាប្រទេសមហាយក្សចិនកំពុងប្រឈមនឹងវិបត្តិប្រជាសាស្រ្ត?
ចុះផ្សាយនៅថ្ងៃ៖
ស្តាប់ - ០៥:២៦
នៅក្នុងប្រទេសចិន អត្រាកំណើតទារកក្នុងឆ្នាំ ២០២១ បានធ្លាក់ចុះយ៉ាងខ្លាំង។ តាមតួលេខផ្លូវការចុះផ្សាយក្នុងថ្ងៃចន្ទ ទី១៧ មករា អត្រាកំណើតទារកក្នុងឆ្នាំ ២០២១ មានចំនួន ៧,៥២ សម្រាប់មនុស្ស ១ ០០០នាក់។ នេះជាអត្រាមួយទាបខ្លាំង បើគិតតាំងពីឆ្នាំ ១៩៧៨ ដែលជាចិនបានចាប់ផ្តើមចេញផ្សាយស្ថិតិប្រចាំឆ្នាំ។ ទន្ទឹមនឹងអត្រាកំណើតទារកធ្លាក់ចុះ ចិនក៏កំពុងប្រឈមនឹងអត្រាកំណើនមនុស្សចាស់។ ក្នុងឆ្នាំ ២០១៦ ចិនបានអនុញ្ញាតឲ្យគ្រួសារចិនអាចយកកូនទី២ និងអាចយកបានទី៣ ចាប់ពីឆ្នាំ ២០២១។ តែនយោបាយមួយនេះហាក់មិនបានជំរុញឲ្យគ្រួសារចិនយកកូនបន្ថែមទេ។ ហេតុអ្វីបានជាដូច្នេះ និងថា តើប្រទេសមួយដែលកំពុងស្គាល់កំណើនមនុស្សចាស់អាចជួបផលវិបាកអ្វីខ្លះ?
ទោះបីបន្តស្ថិតជាប្រទេសដែលកំពុងមានប្រជាជនច្រើនជាងគេក្នុងលោកក៏ដោយក៏រដ្ឋាភិបាលចិនមិនអាចធ្វើព្រងើយកន្តើយបានដែរ។ មិនអាចធ្វើព្រងើយកន្តើយបានព្រោះអត្រាកំណើតទារកកំពុងបន្តធ្លាក់ចុះគួរឲ្យកត់សម្គាល់។ បន្ទាប់ពីបានធ្លាក់ចុះ ៨,៥២ សម្រាប់មនុស្ស ១ ០០០នាក់ក្នុងឆ្នាំ ២០២០ អត្រាកំណើតទារកបានធ្លាក់ចុះ ៧,៥២ សម្រាប់មនុស្ស ១ ០០០នាក់ក្នុងឆ្នាំ ២០២១។ ឃើញថា ២ឆ្នាំជាប់គ្នា ចិនបានស្គាល់អត្រាកំណើតទារកថយចុះ។ តាមពិតទៅ អត្រាកំណើតទារកបានធ្លាក់ចុះជាលំដាប់តាំងពីឆ្នាំ ២០១៧ មកម្ល៉េះ។ មួយវិញទៀត អត្រាកំណើនមនុស្សចាស់មិនមែនជារឿងថ្មី និងជារឿងដែលរដ្ឋាភិបាលបានរង់ចាំ។ តែអ្វីដែលរដ្ឋាភិបាលមិនបានរង់ចាំនោះ គឺល្បឿនលឿនជ្រុលហួសពីការស្មាននៃអត្រាកំណើនមនុស្សចាស់។
គួរបញ្ជាក់ថា ដើម្បីប៉ះប៉ូវកន្លែងមនុស្សចាស់ ឬមនុស្សចូលនិវត្តន៍ រដ្ឋាភិបាលបានធ្វើកំណែទម្រង់លើច្បាប់ស្តីពីគ្រួសារជាបន្តបន្ទាប់ដោយបានបិទបញ្ចប់នយោបាយកូនទោល។ ក្នុងឆ្នាំ ២០១៦ គ្រួសារចិនមួយអាចយកកូនទី២ បាន ហើយតាំងពីឆ្នាំ ២០២១ មក គឺអាចយកកូនទី៣បានម្នាក់ទៀត។ តែបញ្ហានៅត្រង់ថា នយោបាយមួយនេះហាក់មិនបានបង្ខំគ្រួសារចិនឲ្យរូតរះយកកូនថែមទេ។ ផ្ទុយទៅវិញ អត្រាកំណើតទារកបែរជាបានធ្លាក់ចុះតាំងពីការបិទបញ្ចប់នយោបាយកូនទោលទៀតផង។ ជាក់ស្តែង អត្រាកំណើតទារកបានធ្លាក់ចុះក្នុងរយៈពេល ៣ឆ្នាំជាប់គ្នា។ ក្នុងឆ្នាំ ២០១៩ ចំនួនកំណើតទារកមាន ១៤លាន ៦សែន ៥ម៉ឺននាក់ ឆ្នាំ ២០២០ មានចំនួន ១២លាននាក់ និងមានតែ ១០លាន ៦សែន ២ម៉ឺននាក់ប៉ុណ្ណោះក្នុងឆ្នាំ ២០២១។
ជាមួយនឹងអត្រាកំណើតទារកបន្តធ្លាក់ចុះពេលនេះ ចិនក៏កំពុងប្រឈមនឹងកំណើនអត្រាមនុស្សចាស់ និងការធ្លាក់ចុះនៃអត្រាមនុស្សសកម្ម។ កំណើនអត្រាមនុស្សចាស់បូកនឹងការធ្លាក់ចុះនៃអត្រាមនុស្សសកម្មនាំឲ្យកម្លាំងពលកម្មធ្លាក់ចុះ។ គួររម្លឹកថា ចិនបានធ្វើជំរឿនប្រជាជននៅរៀងរាល់ ១០ឆ្នាំម្តង។ ជំរឿនប្រជាជនធ្វើឡើងក្នុងឆ្នាំ ២០២០ សម្រាប់រយៈពេល ១០ឆ្នាំពីឆ្នាំ ២០១០ ដល់ឆ្នាំ ២០២០បានឲ្យដឹងថា ពលរដ្ឋចិនវ័យជាង ៦០ឆ្នាំឡើងទៅមានចំនួន ១៨,៧% នៃចំនួនពលរដ្ឋសរុប ពោលមានការកើនឡើងចំនួន ៥,៤៤% បើធៀបនឹងជំរឿនពលរដ្ឋធ្វើឡើងក្នុងឆ្នាំ ២០១០។ ទន្ទឹមគ្នានេះ ចំនួនពលរដ្ឋសកម្មក្នុងអាយុចន្លោះ ១៥ឆ្នាំ និង ៥៩ឆ្នាំដែលតំណាងឲ្យតែ ៦៣,៣៥% នៃចំនួនពលរដ្ឋសរុបបានធ្លាក់ចុះចំនួន ៦,៧៩%។
ហេតុអ្វីបានជានយោបាយអនុញ្ញាតឲ្យគ្រួសារមួយអាចយកកូនបានដល់ទៅ ៣នាក់ទទួលបានលទ្ធផលស្តួចស្តើងខ្លាំងម្ល៉េះ?។ មានចម្លើយច្រើនចំពោះសំណួរនេះ ទី១ ការមានទម្លាប់ជាមួយនឹងនយោបាយកូនទោលអស់ជាច្រើនទសវត្ស ទី២ ការចំណាយចិញ្ចឹមកូនមួយមិនដូចចិញ្ចឹមកូន ២ ឬ៣ ពិសេសការចំណាយលើការរៀនសូត្រ និងផ្នែកសុខភាព និងចម្លើយទី៣ គឺការវិវត្តន៍នៅក្នុងសង្គមដែលស្រ្តីចិនសម័យថ្មីចេញទៅធ្វើការដូចបុរស ពោលមិនមែនធ្វើតែការងារផ្ទះ និងមើលតែកូននោះទេ។ វាជារឿងបន្ទាន់បំផុតដែលរដ្ឋាភិបាលចិនត្រូវចាត់វិធានការទប់ស្កាត់នឹងវិបត្តិប្រជាសាស្រ្តពេលនេះ។
ចង់ ឬមិនចង់ ប្រទេសមួយដែលកំពុងប្រឈមនឹងកំណើនមនុស្សចាស់ និងការធ្លាក់ចុះមនុស្សសកម្មត្រូវប្រឈមនឹងផលវិបាកសំខាន់ចំនួនពីរ ទី១ ហានិភ័យនៃការធ្លាក់ចុះកំណើនសេដ្ឋកិច្ច និងទី២ កំណើនតម្រូវការថវិកាដើម្បីបន្តចិញ្ចឹមមនុស្សចាស់ដែលមានកាន់តែច្រើនឡើងៗ។ ចុះបើសេដ្ឋកិច្ចធ្លាក់ចុះ តើរដ្ឋមានប្រភពចំណូលពីណា?។ រដ្ឋាភិបាលចិនធ្លាប់បានលើកឡើងពីការដំឡើងរាអាយុចូលនិវត្តន៍។ តែដើម្បីអាចទប់នឹងការធ្លាក់ចុះចំនួនពលរដ្ឋដែលជាដើមចមនៃវិបត្តិប្រជាសាស្រ្ត ការបន្ធូរបន្ថយឲ្យគ្រួសារអាចយកកូនបាន ៣នាក់នៅមិនទាន់គ្រប់គ្រាន់ទេ។ អ្វីដែលរដ្ឋាភិបាលត្រូវយកចិត្តទុកដាក់បន្ថែមនោះ គឺជួយទំនុកបម្រុងដល់គ្រួសារនីមួយៗសម្រាប់លំនៅដ្ឋាន ការរៀនសូត្ររបស់កូនៗ រួមទាំងការចំណាយចាំបាច់មួយចំនួនទៀត។
បើពុំនោះសោតទេ កន្លែងចិនសព្វថ្ងៃដែលជាប្រទេសមានចំនួនពលរដ្ឋច្រើនជាងគេក្នុងលោកនឹងត្រូវឥណ្ឌាយកបាននាពេលខាងមុខ។ តាមតួលេខចុះផ្សាយដោយធនាគារពិភពលោកក្នុងឆ្នាំ ២០២០ ចិនមានពលរដ្ឋចំនួន ១ ៤០២លាននាក់ ហើយឥណ្ឌាមានចំនួន១ ៣៨០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ