តើបារាំងបានផលចំណេញអ្វីពីការបញ្ចូលនុយក្លេអ៊ែរជាថាមពលបៃតង?
ចុះផ្សាយនៅថ្ងៃ៖
ស្តាប់ - ០៤:០៨
ចាប់តាំងពីថ្ងៃទី៣១ធ្នូមក ប្រទេសសមាជិកសហភាពអឺរ៉ុបកំពុងពិចារណាលើគម្រោង ដាក់បញ្ចូលនុយក្លេអ៊ែរទៅក្នុងចំណោមប្រភេទថាមពលបៃតង។ គម្រោងដែលស្ថិតក្នុងភាពចម្រូងចម្រាសខ្លាំង ដោយប្រទេសសមាជិកខ្លះមិនយល់ស្រប រីឯប្រទេសខ្លះទៀត នាំមុខដោយបារាំង ទាមទារយ៉ាងទទូចឲ្យទទួលស្គាល់នុយក្លេអ៊ែរជាថាមពលបៃតង។ តើបារាំងអាចទទួលបានផលចំណេញអ្វីពីការណ៍ដែលសហភាពអឺរ៉ុបបញ្ចូលនុយក្លេអ៊ែរថាមពលបៃតង?
យើងដឹងថាបារាំង គឺជាប្រទេសមហាអំណាចនុយក្លេអ៊ែរដ៏សំខាន់មួយ ជាមហាអំណាចខាងសព្វាវុធនុយក្លេអ៊ែរផង ហើយក៏ជាមហាអំណាចដ៏ចម្បងមួយផងដែរខាងវិស័យនុយក្លេអ៊ែរស៊ីវិល។ និយាយឲ្យចំ គឺការផលិតអគ្គិសនីដោយថាមពលនុយក្លេអ៊ែរ។
បើគិតពីចំនួនរ៉េអាក់ទ័រនុយក្លេអ៊ែរ បារាំងឈរនៅលំដាប់ទី២ បន្ទាប់ពីសហរដ្ឋអាមេរិក ជាមួយនឹងរ៉េអាក់ទ័រសរុបចំនួន ៥៦ ហើយបើគិតជាភាគរយវិញ បារាំងគឺជាប្រទេសដែលមានចំណែកអគ្គិសនីផលិតចេញពីថាមពលនុយក្លេអ៊ែរច្រើនជាងគេបំផុតលំដាប់ទីមួយ នៅលើពិភពលោក ដោយក្នុងចំណោមថាមពលអគ្គិសនីសរុបដែលផលិតនៅបារាំង មានរហូតដល់ទៅ ៧០% មានប្រភពចេញពីនុយក្លេអ៊ែរ។
ដូច្នេះ សម្រាប់បារាំង ការទទួលស្គាល់នុយក្លេអ៊ែរជាថាមពលបៃតង គឺអាចផ្តល់នូវផលប្រយោជន៍ចម្បងៗចំនួនពីរ។
ទីមួយ វាផ្តល់នូវតម្លៃនយោបាយ និងជានិមិត្តរូប សម្រាប់ឲ្យគេទទួលស្គាល់ពីវិភាគទានដ៏ធំរបស់បារាំង នៅក្នុងការកាត់បន្ថយការបញ្ចេញឧស្ម័ន ដើម្បីទប់ស្កាត់ការឡើងកម្តៅផែនដី។
ជាទូទៅ គេទទួលស្គាល់ថា នុយក្លេអ៊ែរជាប្រភេទថាមពល ដែលមិនបញ្ចេញឧស្ម័នកាបូនិច ក៏ប៉ុន្តែ ក្នុងពេលជាមួយគ្នា វានៅតែជាប្រភេទថាមពលមួយដ៏ចម្រូងចម្រាសនៅឡើយ ដោយសារតែនុយក្លេអ៊ែរអាចបង្កនូវផលប៉ះពាល់ផ្សេងដល់បរិស្ថាន និងដល់សុខភាពរបស់មនុស្ស ជាពិសេស តាមរយៈការបំពុលដោយវិទ្យុសកម្ម។ ហេតុដូច្នេះហើយបានជាសកម្មជនបរិស្ថាន ក៏ដូចជា រដ្ឋាភិបាលនៃបណ្តាប្រទេសមួយចំនួនមិនទទួលស្គាល់នុយក្លេអ៊ែរជាថាមពលបៃតង ហើយក៏មិនគាំទ្រនោះដែរឲ្យយកនុយក្លេអ៊ែរមិនមែនជាដំណោះស្រាយល្អសម្រាប់ទប់ស្កាត់ការឡើងកម្តៅផែនដី។
សម្រាប់បារាំង នេះជាចំណុចអវិជ្ជមានដ៏ចម្បងមួយ ពីព្រោះថា ៧០% នៃថាមពលអគ្គិសនីដែលមានប្រភពពីនុយក្លេអ៊ែរ ហើយដែលមិនបញ្ចេញឧស្ម័នកាបូនិច ក៏ប៉ុន្តែ មិនត្រូវបានគេរាប់ថាជាថាមពលបៃតងទៅវិញ។ ដូច្នេះ ប្រសិនបើគេចាត់បញ្ចូលនុយក្លេអ៊ែរជាថាមពលបៃតង បារាំង ដែលការផលិតអគ្គិសនីដោយថាមពលខ្យល់ ថាមពលព្រះអាទិត្យ និងវារីអគ្គិសនីមានរហូតដល់ទៅជាង ២០% ស្រាប់ នឹងអាចនិយាយបានថា ថាមពលអគ្គិសនីរហូតដល់ទៅជាង ៩០% ដែលផលិតនៅបារាំង មានប្រភពចេញពីថាមពលបៃតង ដែលជាអត្រាដ៏ខ្ពស់បំផុតមួយ នៅលើពិភពលោក។
ផលប្រយោជន៍ទីពីរ ដែលរឹតតែមានសារៈសំខាន់ជាងតម្លៃជានិមិត្តរូបនេះទៅទៀត គឺខាងផ្នែកហិរញ្ញវត្ថុ។
នៅក្នុងពេលបច្ចុប្បន្ននេះ នៅក្នុងគោលដៅកាត់បន្ថយការបញ្ចេញឧស្ម័នកាបូនិចឲ្យបាន ៥៥% នៅត្រឹមឆ្នាំ២០៣០ ហើយកាត់បន្ថយឲ្យដល់កម្រិតហ្សេរ៉ូកាបូន នៅត្រឹមឆ្នាំ២០៥០ខាងមុខ សហភាពអឺរ៉ុបដាក់ចេញនូវគោលនយោបាយជាច្រើន ដើម្បីលើកទឹកចិត្តឲ្យប្រទេសជាសមាជិកងាកចេញពីថាមពលផូស៊ីលទៅប្រើថាមពលបៃតង ក្នុងនោះក៏មានដែរ គម្រោងកញ្ចប់ថវិការហូតដល់ទៅ ១ទ្រីលានអឺរ៉ូ ដើម្បីជួយដល់ការវិនិយោគទៅលើថាមពលបៃតង។
គោលនយោបាយនេះ កំពុងតែធ្វើឲ្យការវិនិយោគទៅលើថាមពលបៃតងត្រូវក្លាយជាវិស័យវិនិយោគដ៏ទាក់ទាញមួយ ដូច្នេះ ប្រសិនបើនុយក្លេអ៊ែរត្រូវគេចាត់បញ្ចូលជាថាមពលបៃតង មានន័យថា វិស័យឧស្សាហកម្មនុយក្លេអ៊ែរស៊ីវិលរបស់បារាំងអាចនឹងទាក់ទាញវិនិយោគបានច្រើន ហើយអាចទទួលបានកម្ចីធនាគារបានច្រើន និងនៅក្នុងអត្រាការប្រាក់ទាប ដើម្បីយកទៅសាងសង់រ៉េអាក់ទ័រនុយក្លេអ៊ែរថ្មីៗបន្ថែម ក៏ដូចជា កែលម្អរ៉េអាក់ទ័រនុយក្លេអ៊ែរដែលមានស្រាប់ឲ្យកាន់តែមានប្រសិទ្ធភាព និងសុវត្ថិភាព ព្រមទាំងអាចមានដំណើរការបានយូរជាងមុន។
គេដឹងថា ការវិនិយោគនៅក្នុងវិស័យនុយក្លេអ៊ែរ គឺជាគម្រោង ដែលទាមទារនូវដើមទុនច្រើន ហើយត្រូវការពេលយូរ ទើបអាចរំលោះវិនិយោគនេះមកវិញបាន។ ដូច្នេះ ការណ៍ដែលអាចទាក់ទាញទុនវិនិយោគក្នុងទំហំទឹកប្រាក់ច្រើន និងដែលមានអត្រាការប្រាក់ទាប វាគឺជារឿងដ៏សំខាន់មួយ សម្រាប់បារាំង សំខាន់សម្រាប់ក្រុមហ៊ុននុយក្លេអ៊ែរ សំខាន់សម្រាប់វិស័យថាមពល ហើយសំខាន់សម្រាប់វិស័យឧស្សាហកម្ម និងសេដ្ឋកិច្ច នៅក្នុងបរិបទនៃយុទ្ធនាការទប់ស្កាត់ការឡើងកម្តៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ