ហេតុអ្វីអឺរ៉ុបមិនមានយានដឹកអវកាសយានិកដោយខ្លួនឯង?
ចុះផ្សាយនៅថ្ងៃ៖
ស្តាប់ - ០៤:២១
នៅក្នុងមួយរយៈកាលចុងក្រោយនេះ យើងសង្កេតឃើញមានការទាមទារកាន់តែច្រើន ទាំងពីសំណាក់ថ្នាក់ដឹកនាំទីភ្នាក់ងារអវកាស និងពីសំណាក់អវកាសយានិក ឲ្យអឺរ៉ុបអភិវឌ្ឍកម្មវិធីផលិតយានអវកាស ដែលអាចដឹកអវកាសយានិកដោយខ្លួនឯង។ ជាការពិត មកទល់នឹងសព្វថ្ងៃនេះ អឺរ៉ុបមិនមានយានអវកាសដឹកអវកាសយានិកដោយខ្លួនឯងនោះទេ ហើយរាល់ការបញ្ជូនអវកាសយានិកទៅកាន់ទីអវកាសត្រូវពឹងផ្អែកលើអ្នកដទៃ ជាពិសេស ពឹងលើសហរដ្ឋអាមេរិក និងរុស្ស៊ី។ តើហេតុអ្វីបានជាអឺរ៉ុបដែលជាមហាអំណាចអវកាសមួយដែរ ក៏ប៉ុន្តែ បែរជាមិនមានសមត្ថភាពផលិតយានដឹកអវកាសយានិកដោយខ្លួនឯងបែបនេះទៅវិញ?
នៅក្នុងពេលបច្ចុប្បន្ននេះ ប្រទេសមហាអំណាចអវកាសធំៗ រួមមានដូចជា សហរដ្ឋអាមេរិក រុស្ស៊ី និងចិន សុទ្ធតែមានយានដឹកអវកាសយានិកដោយខ្លួនឯង ហើយសូម្បីតែឥណ្ឌាដែលជាប្រទេសចំណូលថ្មី នៅក្នុងវិស័យអវកាសនេះ ក៏កំពុងផលិតយានដឹកអវកាសយានិកផ្ទាល់ខ្លួនឯងមួយដែរ។ យានអវកាសដែលឥណ្ឌាគ្រោងដាក់ឲ្យដំណើរការ នៅឆ្នាំ២០២៣ខាងមុខ។
អឺរ៉ុបវិញ ដែលជាមហាអំណាចអវកាសដ៏ចម្បង និងដ៏ចំណាស់មួយនោះ បែរជាមិនមានយានអវកាសផ្ទាល់ខ្លួនឯង ហើយត្រូវពឹងលើអ្នកដទៃ ដើម្បីដឹកអវកាសយានិករបស់ខ្លួន។
បើយើងសង្កេតមើលជារួមទៅ អឺរ៉ុបស្ថិតក្នុងចំណោមប្រទេសដែលបច្ចេកវិទ្យាដ៏ជឿនលឿនបំផុតមួយ ក្នុងវិស័យអវកាស។
អឺរ៉ុបមានមជ្ឈមណ្ឌលអវកាសទំនើប និងទីតាំងប្រកបដោយអំណោយផល។ មានរ៉ុកកែតអវកាសធុនអារីយ៉ាន ដែលជារ៉ុកកែតដ៏ទំនើប អាចផ្ទុកទម្ងន់បានធ្ងន់ ហើយអាចបាញ់បង្ហោះទៅតាមគន្លងដ៏សុក្រឹត ដូចជា អ្វីដែលយើងអាចឃើញជាក់ស្តែងស្រាប់ នៅក្នុងបេសកកម្មបាញ់បង្ហោះតេឡេស្កុបអវកាសជេមស៍វេប កាលពីពេលថ្មីៗនេះ។ អឺរ៉ុបមានសមត្ថភាពអាចធ្វើដោយជោគជ័យនូវបេសកកម្មអវកាសដ៏ស្មុគស្មាញ រួមមានដូចជាការបញ្ជូនយាន រ៉ូហ្សេតា (Rosetta) ឲ្យទៅចុះចតលើផ្កាយដុះកន្ទុយ ជាដើម។ អឺរ៉ុបក៏មានដែរ ក្រុមហ៊ុនជំនាញខាងអវកាសដ៏ទំនើប ដូចជា ក្រុមហ៊ុនអ៊ែរប៊ូស ដែលទទួលបន្ទុកផលិតផ្នែកមួយ នៃយាន “អូរ៉ាយយ៉ុន” ដែលត្រូវដឹកអវកាសយានិករបស់ណាសា ទៅកាន់ព្រះចន្ទ នៅឆ្នាំ២០២៥ខាងមុខ។
ដូច្នេះ បញ្ហាចោទសម្រាប់អឺរ៉ុប គឺមិនទាក់ទងនឹងសមត្ថភាពខាងបច្ចេកវិទ្យានោះទេ។ បញ្ហាចោទ គឺរឿងលុយ ឆន្ទៈនយោបាយ និងចក្ខុវិស័យជាយុទ្ធសាស្រ្តរយៈពេលវែង នៅក្នុងវិស័យអវកាស។
និយាយពីរឿងលុយ យើងសង្កេតឃើញថា កញ្ចប់ថវិការបស់ទីភ្នាក់ងារអវកាសអឺរ៉ុប (អេសា) សម្រាប់ចំណាយទៅលើបេសកកម្មអវកាស កាលពីឆ្នាំ២០២១កន្លងទៅនេះ មានចំនួន៧៣៥លានអឺរ៉ូ ពោលគឺ តែប្រមាណជា ៧% ប៉ុណ្ណោះ នៃកញ្ចប់ថវិកាសម្រាប់បេសកកម្មអវកាសរបស់ណាសា។
សម្រាប់អគ្គនាយកទីភ្នាក់ងារអវកាសអេសា ការណ៍ដែលអឺរ៉ុបមិនបង្កើនកញ្ចប់ថវិកា វិនិយោគទៅលើកម្មវិធីផលិតយានដឹកអវកាសយានិក ក៏មិនមែនដោយសារតែកត្តាសេដ្ឋកិច្ចនោះដែរ ផ្ទុយទៅវិញ គឺវាទាក់ទងទៅនឹងឆន្ទៈនយោបាយច្រើនជាង។
ប្រភពចម្បងនៃថវិការបស់ទីភ្នាក់ងារអវកាសអឺរ៉ុប គឺបានមកពីប្រទេសជាសមាជិកទាំង ២២ប្រទេស ហើយនាយកទីភ្នាក់ងារអវកាសបារាំង ដែលជាប្រទេសសមាជិក ផ្តល់វិភាគទានច្រើនជាងគេបង្អស់ទៅក្នុងកញ្ចប់ថវិការបស់អេសា បានលើកឡើងថា ប្រសិនបើអឺរ៉ុបមានមហិច្ឆតាចង់ក្លាយជាមហាអំណាចអវកាសមួយ ដែលមានស្វ័យភាពពេញលេញ មិនពឹងលើអ្នកដទៃ វាទាមទារជាចាំបាច់នូវឆន្ទៈនយោបាយរួម របស់អឺរ៉ុបទាំងមូល។
ក៏ប៉ុន្តែ គេសង្កេតឃើញថា នៅរៀងរាល់សន្និសីទប្រចាំឆ្នាំ កាលពីពេលកន្លងមក បូករួមទាំងសន្និសីទអវកាសអឺរ៉ុបលើកចុងក្រោយ នៅទីក្រុងព្រុចសែល កាលពីសប្តាហ៍កន្លងទៅថ្មីៗនេះផង មិនមានប្រទេសណាមួយ ដែលលើកយកគម្រោងផលិតយានដឹកអវកាសយានិក មកដាក់ជាអាទិភាពនោះទេ ដោយអឺរ៉ុបនៅតែបន្តគោលនយោបាយអាទិភាពដូចមុនដដែល គឺផ្តោតលើការសិក្សាស្រាវជ្រាវផ្នែកអវកាស ទោះជានៅទីជិត ឬនៅទីឆ្ងាយ ក៏ប៉ុន្តែ ធ្វើឡើងដោយយានគ្មានមនុស្សបើក។
អ្នកធ្វើការក្នុងវិស័យអវកាសអឺរ៉ុបរំពឹងថា ចំណាប់អារម្មណ៍ទូទៅក្នុងពេលបច្ចុប្បន្ន ទៅលើបេសកកម្មបញ្ជូនមនុស្សឲ្យត្រឡប់ទៅកាន់ព្រះចន្ទ ក្នុងគោលដៅយកព្រះចន្ទជាមូលដ្ឋានអវកាសផង ដើម្បីបន្តបេសកកម្មទៅកាន់ភពអង្គារ ឬទៅទីកាន់តែឆ្ងាយ ក៏ដូចជា ចក្ខុវិស័យក្នុងការទាញយកធនធានរ៉ែពីព្រះចន្ទ អាចនឹងធ្វើឲ្យអឺរ៉ុបពិចារណាមើលឡើងវិញ ទៅលើគោលនយោបាយអវកាសជាអាទិភាពរបស់ខ្លួន។
សំណួរសួរថា តើអឺរ៉ុបចង់ធ្វើជាតួអង្គដែលចូលរួមយ៉ាងសកម្មនៅក្នុងបេសកកម្មទៅកាន់ព្រះចន្ទនេះ ឬក៏ចង់ឈរឱបដៃមើលគេធ្វើ? ដូចដែលនាយកទីភ្នាក់ងារអេសាបានលើកឡើង នៅក្នុងសន្និសីទអវកាសអឺរុប កាលពីសប្តាហ៍មុន បើសិនជាអឺរ៉ុបមានមហិច្ឆិតាចង់ធ្វើជាតួអង្គសំខាន់នៅក្នុងការរុករកលើព្រះចន្ទ ការផលិតយានដឹកអវកាសយានិក គឺជារឿងចាំបាច់ ពីព្រោះថា បើចង់ទៅរុករកនិងទាញយកធនធានលើព្រះចន្ទ តែគ្មានយានដឹកអវកាសយានិក គឺប្រៀបបានទៅនឹង គ្រីស្តូហ្វ កូឡុំ ដែលគ្មាននាវាយ៉ាងដូច្នោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ