ក្រោយរឿងអាស្រូវ Suisse secrets កេរ្តិ៍ឈ្មោះនៃវិស័យធនាគារស្វ៊ីស កាន់តែចុះអាប់
ចុះផ្សាយនៅថ្ងៃ៖
ស្តាប់ - ០៦:៤៥
កាលពីថ្ងៃអាទិត្យកន្លងទៅ បណ្តុំសារព័ត៌មានអន្តរជាតិចំនួន៤៨ បានរួមគ្នាផ្សព្វផ្សាយរបាយការណ៍ស៊ើបអង្កេតមួយ ឈ្មោះ Suisse secrets ដែលពាក់ព័ន្ធនឹងរឿងរ៉ាវសម្ងាត់ នៃវិស័យធនាគារស្វ៊ីស។ របាយការណ៍ស៊ើបអង្កេតនេះ បានបង្ហាញថា ធនាគារដ៏ធំមួយរបស់ស្វ៊ីស ឈ្មោះ Credit Suisse បានបើកគណនីទុកប្រាក់ឲ្យអតិថិជន ដែលមានប្រភពមកពីបណ្តាញទុច្ចរិត និងអំពើពុករលួយ។ រឿងអាស្រូវដ៏ធំថ្មីមួយទៀតនេះ បានមកអន្រួន ធ្វើឲ្យវិស័យធនាគារស្វ៊ីស កាន់តែអាប់ឱនកិត្តិយស និងបានបង្កឲ្យមានការតវ៉ាផងដែរ ទាក់ទិននឹងសេរីភាពសារព័ត៌មាននៅស្វ៊ីស ក្នុងការផ្សព្វផ្សាយព័ត៌មានសម្ងាត់ធនាគារ។
ជាយូរយាណាស់មកហើយ ស្វ៊ីសគឺជាប្រទេសមួយ ដែលមានឈ្មោះល្បីរន្ទឺ ជាទីដែលអ្នកមានស្តុកស្តម្ភ យកប្រាក់ទាំងហឹប មកទុកនៅធនាគារធំៗ ក្នុងប្រទេសដ៏តូចមួយនេះ។ ច្បាប់ស្វ៊ីសធ្លាប់បានការពារកិច្ចការសម្ងាត់ធនាគារ ដោយគ្មាននរណាអាចដឹង ពីអត្តសញ្ញាណរបស់អតិថិជនម្ចាស់គណនី ឬក៏អាចដឹងពីប្រភពថាប្រាក់ទាំងនោះ បានមកពីណាទេ។
ធនាគារ Credit Suisse កន្លែងទុកប្រាក់ទុច្ចរិត ប្រាក់ពុករលួយ
រឿងអាស្រូវ ធ្លាប់បានបែកធ្លាយជារឿុយៗ នាប៉ុន្មានឆ្នាំចុងក្រោយនេះ ដែលធ្វើឲ្យមតិមហាជនដឹងថា ស្វ៊ីសគឺជាទីស្ថានសួគ៌គេចពន្ធ ជាទីកន្លែងលាក់ប្រាក់ ដែលបានមកពីប្រភពទុច្ចរិត ឬក៏បានមកពីអំពើពុករលួយជាដើម។ យ៉ាងណាមិញ កាលពីថ្ងៃអាទិត្យ ទី២០ កុម្ភៈ កន្លងទៅថ្មីៗនេះ បណ្តុំសារព័ត៌មានអន្តរជាតិ ឈ្មោះថា Organized Crime and Corruption Reporting Project (OCCRP) ដែលក្នុងនោះ មានបណ្តាញសារព័ត៌មានធំៗ ដូចជា Le Monde The Guardian និង New York Times ជាដើម បានចេញផ្សាយរបាយការណ៍ ដែលស្តែងឲ្យឃើញ អំពីស្រមោលខ្មៅងងិត ស្ថិតនៅពីក្រោយស្លាកយីហោភ្លឺចញ្ចែងចញ្ចាច នៃធនាគារស្វ៊ីស។
ជារបាយការណ៍ ដែលត្រូវក្រុមអ្នកសារព័ត៌មាន នៅតាមបណ្តាប្រទេសចំនួន១៥២ប្រទេស ពិនិត្យអង្កេតយ៉ាងល្អិតល្អន់ អស់រយៈពេលជាង១ឆ្នាំ។ ចំណុចចាប់ផ្តើមនៃការស៊ើបអង្កេតនេះ គឺស្ថិតនៅលើទិន្នន័យសម្ងាត់ ទម្លាយដោយប្រភពមិនបញ្ចេញឈ្មោះម្នាក់ ដែលបានផ្តល់ទៅឲ្យកាសែតអាល្លឺម៉ង់ Süddeutsche Zeitung។ ក្នុងទិន្នន័យនេះ គឺមានពាក់ព័ន្ធនឹងគណនីធនាគារ ចំនួន ១៨០០០គណនី ដែលគ្រប់គ្រងដោយធនាគារធំទី២របស់ស្វ៊ីស ឈ្មោះ Credit Suisse គិតចាប់ពីឆ្នាំ១៩៤០ រហូតដល់ចុងទសវត្សឆ្នាំ២០១០ប្លាយ។ យោងតាមការសន្និដ្ឋាន គឺធនាគារ Credit Suisse បានឃុបឃិត លាក់ប្រាក់របស់អតិថិជនជាច្រើននាក់ ដែលប្រាក់ទាំងនោះ មានប្រភពមកពីអំពើទុច្ចរិត អំពើពុករលួយ និងអំពើគេចពន្ធជាដើម។
"របាយការណ៍បង្កាច់បង្ខូចកិត្តិយស នៃវិស័យធនាគារស្វ៊ីស"
គ្មានអ្វីចម្លែក ក្រោយការចុះផ្សាយរបាយការណ៍ស៊ើបអង្កេតនេះ ធនាគារ Credit Suisse បានឆ្លើយបដិសេធ និងបានចោទរបាយការណ៍នេះ ថាត្រូវបានធ្វើឡើងដោយលំអៀង ប្រភពទិន្នន័យមិនគ្រប់គ្រាន់ និងស្ថិតនៅក្រៅបរិបទ។ Credit Suisse អះអាងថា ៩០% នៃគណនី ដែលគេលើកយកមកនិយាយក្នុងរបាយការណ៍នេះ គឺបច្ចុប្បន្នបានបិទចោលអស់ទៅហើយ។ Credit Suisse បានចាត់ទុកថា របាយការណ៍នេះគឺត្រូវបានធ្វើ ដោយមានចេតនារំខាន បង្កាច់បង្ខូចកិត្តិយសរបស់វិស័យធនាគារ និងទិផ្សារហិរញ្ញវត្ថុស្វ៊ីសទាំងមូលតែម្តង។
ទោះជាធនាគារ Credit Suisse ប្រឹងប្រកែកបដិសេធយ៉ាងនេះក្តី តែរឿងអាស្រូវថ្មីមួយទៀតនេះ បានអង្រួនធ្វើឲ្យវិស័យធនាគារស្វ៊ីស ត្រូវស្រអាប់ពន្លឺជាថ្មីទៀត បន្ទាប់ពីឆ្លងកាត់ រឿងអាស្រូវមុនៗ ក្នុងសំណុំរឿង ដូចជា "Panama Papers" ឬ "Paradise Papers » ជាដើម។ តំណាងក្រុមហ៊ុនគ្រប់គ្រងភាគហ៊ុនដ៏ធំមួយនៅស្វ៊ីស ឈ្មោះ Actares បានប្រាប់អ្នកយកព័ត៌មានបារាំងថា ទោះចង់មិនចង់ ក្រោយការផ្ទុះរឿងអាស្រូវថ្មីនេះ ធនាគារ Credit Suisse ត្រូវតែធ្វើអ្វីម្យ៉ាង ដើម្បីបង្ហាញពីតម្លាភាព ពីការប្រឹងប្រែងរបស់ខ្លួន ក្នុងការប្រយុទ្ធប្រឆាំងនឹងការលាងលុយក្រខ្វក់ នារយៈពេលកន្លងមកនេះ។
វិស័យធនាគារស្វ៊ីស បានកែខ្លួនច្រើន?
នៅក្នុងលិខិតផ្ញើមកកាន់ទៅភ្នាក់ងារព័ត៌មានបារាំង AFP សមាគមធនាគារស្វ៊ីស បានអះអាងថា នីតិវិធីច្បាប់ ដើម្បីប្រយុទ្ធប្រឆាំងនឹងការលាងលុយក្រខ្វក់ ត្រូវបានពង្រឹង នឹងកែលំអច្រើនណាស់ នាប៉ុន្មាន៤-៥ឆ្នាំ ចុងក្រោយនេះ។ វិស័យធនាគារ ក៏ដូចជាទីផ្សារហិរញ្ញវត្ថុស្វ៊ីស លែងចង់យកកិត្តិយស មុខមាត់ទៅប្រឡាក់ប្រឡូស ជាមួយប្រាក់ដែលមានប្រភពគួរឲ្យសង្ស័យ តទៅទៀតហើយ។
តើធនាគារស្វ៊ីស ពិតជាបានកែប្រែខ្លួន ចូលរួមយ៉ាងស្វិតស្វាញ ក្នុងការប្រយុទ្ធប្រឆាំងនឹងការលាងលុយក្រខ្វក់មែនឬ? យោងតាមការវិភាគរបស់លោក Ronen Palan សាស្ត្រាចារ្យសេដ្ឋកិច្ចនយោបាយអន្តរជាតិ នៅសកលវិទ្យាល័យទីក្រុងឡុងដ៍ គឺវាជារឿងពិបាកជឿណាស់។ សម្រាប់លោក ធនាគារស្វ៊ីសភាគច្រើន នៅតែបន្តបដិសេធមិនទទួលការពិត ធ្វើព្រងើយកន្តើយសម្បើមណាស់ ទាក់ទិននឹងកាតព្វកិច្ចត្រួតពិនិត្យប្រភពមូលធន ដែលគេយកមកដាក់ក្នុងទូរដែកខ្លួន។ អ្នកជំនាញរូបនេះ អះអាងថា ធនាគារស្វ៊ីសនៅតែប្រើប្រាស់របៀបធ្វើជំនួញ បែបចាស់គំរិល បន្តរកស៊ីជាមួយអតិថិជនគ្រប់ប្រភេទ ដោយមិនខ្វល់ថាប្រាក់នោះបានមកពីប្រភពអាក្រក់ ស្មោកគ្រោកយ៉ាងណាឡើយ។
ច្បាប់ដេរមាត់អ្នកកាសែតស្វ៊ីស មិនឲ្យចុះផ្សាយរឿងអាស្រូវធនាគារ
គួរកត់សំគាល់ដែរថា រឿងអាស្រូវទាក់ទិននឹងធនាគារ Credit Suisse នៅពេលនេះ បានរំលេចឲ្យឃើញផងដែរ នៅបញ្ហាមួយទៀត ទាក់ទិននឹងសេរីភាពសារព័ត៌មាននៅស្វ៊ីស ក្នុងវិស័យកិច្ចការសម្ងាត់ធនាគារ។ ក្នុងចំណោមបណ្តាញសារព័ត៌មានធំៗទាំង៤៨ ដែលចូលរួមក្នុងការផ្សព្វផ្សាយរបាយការណ៍ស៊ើបអង្កេតនេះ គឺគ្មានបណ្តាញសារព័ត៌មានស្វ៊ីសសូម្បីតែមួយ។
មាត្រា៤៧ នៃច្បាប់ធនាគារស្វ៊ីស បានហាមឃាត់ មិនឲ្យបណ្តាញសារព័ត៌មាន ចុះផ្សាយព័ត៌មានទាំងឡាយណា ដែលបានមកពីប្រភពទិន្នន័យធនាគារ ដែលគេលួចយកទៅទម្លាយ។ មាត្រានេះ បានចង និងរារាំងមិនឲ្យកាសែតស្វ៊ីស ចូលរួមផ្សព្វផ្សាយរឿងអាស្រូវ ទាក់ទិននឹងធនាគារស្វ៊ីសទេ។ បណ្តាញសារព័ត៌មានស្វ៊ីសបានទទួលស្គាល់ថា ខ្លួនពិតជាមិនហ៊ានចូលរួមផ្សព្វផ្សាយជាមួយបណ្តាញព័ត៌មានអន្តរជាតិផ្សេងទៀតពិតមែន ព្រោះមិនចង់មានបញ្ហាផ្នែកផ្លូវច្បាប់ ជាមួយធនាគារ ដែលមានអំណាច។
ក្រោយការចេញផ្សាយ របាយការណ៍របស់ Organized Crime and Corruption Reporting Project (OCCRP) ភ្លាម មតិរិះគន់ស្វ៊ីសបានផុសផុលឡើងជាបន្តបន្ទាប់ ទាក់ទិននឹងសេរីភាពសារព័ត៌មាននេះ។ អង្គការអ្នករាយការណ៍គ្មានព្រំដែន RSF បានបរិហារថា វាជារឿងដែលមិនអាចទទួលយកបានទេ ដែលប្រទេសប្រជាធិបតេយ្យដូចស្វ៊ីស មានច្បាប់មួយ ដែលដេរបំបិទមាត់អ្នកកាសែត មិនឲ្យអនុវត្តសិទ្ធិផ្សព្វផ្សាយព័ត៌មានបែបនេះ។ លោកស្រី Irene Khan មន្ត្រីអង្គការសហប្រជាជាតិ ទទួលបន្ទុកសេរីភាពបញ្ចេញមតិ បានអះអាងថា លោកស្រីនឹងយកបញ្ហានេះ ទៅជជែក ដើម្បីហៅឲ្យអាជ្ញាធរស្វ៊ីស ត្រូវតែធ្វើកំណែទម្រង់ច្បាប់ជាបន្ទាន់។ នៅសភាអឺរ៉ុប សមាជិកខ្លះបានរួមគ្នាអំពាវនាវ ឲ្យចាត់ស្វ៊ីសបញ្ចូលទៅក្នុងបញ្ជីខ្មៅ ទាក់ទិននឹងការលាងលុយក្រខ្វក់។
បញ្ហានេះ បានរីករាលដាលផងដែរ ដល់ផ្ទៃក្នុងនយោបាយស្វ៊ីស ដោយអ្នកនយោបាយ សមាជិកសភាមកពីបក្សឆ្វេងនិយមជាច្រើន បានហៅឲ្យសភាស្វ៊ីស ត្រូវតែធ្វើកំណែទម្រង់ជាបន្ទាន់ ដើម្បីការពារសិទ្ធិសេរីភាពសារព័ត៌មាន។ លោកស្រី Regula Rytz សមាជិកសភាបក្សបរិស្ថាន បានសរសេរលើទំព័រTwitter ថា បណ្តាញសារព័ត៌មានមានតួនាទី ដោយមិនអាចខ្វះបានចូលរួមក្នុងយុទ្ធនាការទប់ស្កាត់ ការលាងលុយក្រខ្វក់ លើទឹកដីស្វ៊ីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ