ទណ្ឌកម្មក្នុងវិស័យកីឡា អាចជាអាវុធដ៏មុតស្រួច ធ្វើឲ្យរុស្ស៊ីរងរបួស
ចុះផ្សាយនៅថ្ងៃ៖
ស្តាប់ - ០៨:៣១
ក្រោយការលើកទ័ពមកឈ្លានពានអ៊ុយក្រែន ពីសំណាក់រុស្ស៊ី ក្រុមប្រទេសលោកខាងលិច បានសម្រុកដាក់ទណ្ឌកម្មសេដ្ឋកិច្ចយ៉ាងធ្ងន់ ទៅលើរុស្ស៊ី។ ទន្ទឹមគ្នានេះ នៅក្នុងវិស័យកីឡា គេក៏បានចាប់ផ្តើមធ្វើពហិការ មិនឲ្យរុស្ស៊ីចូលរួម ឬក៏មិនទៅប្រកួតនៅក្នុងប្រទេសរុស្ស៊ីដែរ។ អ្នកជំនាញជាច្រើននាក់ បានលើកឡើងថា សូមកុំមើលស្រាលវិស័យកីឡាឲ្យសោះ។ ការដាក់ទណ្ឌកម្ម ទៅលើរុស្ស៊ីក្នុងវិស័យកីឡា តាមរយៈការធ្វើពហិការ ឬលុបចោលកិច្ចសន្យា ជាមួយក្រុមហ៊ុនរុស្ស៊ី គឺវាអាចជាអាវុធដ៏មានប្រសិទ្ធភាព ក្នុងការដាក់សំពាធ ទៅលើរបបដឹកនាំរបស់លោកពូទីន។
ការប្រកួតកីឡាអន្តរជាតិ ជាមុខមាត់ធំនៃរបបផ្តាច់ការ
ក្នុងសតវត្សទី២១នេះ វិស័យកីឡាបានដើរតួនាទីយ៉ាងសំខាន់ នៅក្នុងផ្នត់គំនិតនៃមតិសាធារណៈ ។ រដ្ឋាភិបាលប្រទេសខ្លះ ជាពិសេសប្រទេសដែលមានរបបដឹកនាំបែបផ្តាច់ការ ដឹងយ៉ាងច្បាស់អំពីផលប្រយោជន៍ នៃការរៀបចំកម្មវិធីប្រកួតកីឡាធំៗ លំដាប់អន្តរជាតិ ដើម្បីយកវាធ្វើជាឧបករណ៍ កសាងមុខមាត់ អួតបង្ហាញពីភាពរីកចម្រើនអស្ចារ្យ ទៅកាន់ប្រជាជនខ្លួន និងទៅកាន់ពិភពលោកទាំងមូល។
យ៉ាងណាមិញ រដ្ឋាភិបាលរុស្ស៊ី ដឹកនាំដោយលោកពូទីន បានទទួលកិត្តិយសមុខមាត់មិនតិចទេ នៅពេលបានសិទ្ធិរៀបចំកម្មវិធីប្រកួតកីឡាអូឡាំពិករដូវរងារ នៅទីក្រុងសូឈីល កាលពីឆ្នាំ២០១៤ ហើយបន្ទាប់មកទៀត បានរៀបចំកម្មវិធីប្រកួតបាល់ទាត់ពិភពលោក នៅឆ្នាំ២០១៨។ មិនត្រឹមជាឱកាស យកមុខមាត់លើឆាកអន្តរជាតិប៉ុណ្ណោះទេ កម្មវិធីប្រកួតកីឡាធំៗទាំងនេះ គឺជាឱកាសឲ្យក្រុមហ៊ុនធំៗរបស់រុស្ស៊ី ហក់ចូលជាអ្នកឧបត្ថម្ភកម្មវិធី ទិញសិទ្ធិផ្សាយពាណិជ្ជកម្ម ឲ្យគេបានស្គាល់ទូទាំងពិភពលោក។
វិស័យកីឡា ធ្វើពហិការប្រឆាំងរុស្ស៊ី
ប៉ុន្មានថ្ងៃចុងក្រោយនេះ បន្ទាប់ពីលោកពូទីន បានសម្រេចបញ្ជូនទ័ព ឲ្យវាយប្រហារឈ្លានពានអ៊ុយក្រែន រុស្ស៊ីមិនត្រឹមតែបានរងទណ្ឌកម្មផ្នែកសេដ្ឋកិច្ច ហិរញ្ញវត្ថុប៉ុណ្ណោះទេ តែរុស្ស៊ីកំពុងតែត្រូវបានគេធ្វើពហិការ ក្នុងវិស័យកីឡាផងដែរ។ កម្មវិធីប្រណាំងឡាន នៅក្រុងសុតឈីល ត្រូវបានលុបចោល។ ប្រទេសមួយចំនួនធំ ដូចជាអង់គ្លេស ន័រវែស ស៊ុយអែត ជាដើមបានសម្រេច ហាមកីឡាកររុស្ស៊ីមិនឲ្យជាន់ដីប្រទេសគេ។ ភ្លេងជាតិ និង ទង់ជាតិរបស់រុស្ស៊ី ត្រូវបានគណកម្មាធិការអន្តរជាតិកីឡាអូឡាំពិក ដកចេញ ឈប់ឲ្យប្រើជាបណ្តោះអាសន្ន។
ប៉ូឡូញ ស៊ុយអែត សាធារណរដ្ឋឆេក បានបដិសេធ មិនប្រកួតជាមួយក្រុមបាល់ទាត់ជម្រើសជាតិរុស្ស៊ី នៅក្នុងការប្រកួតជម្រុះ World Cup 2022 ជាដាច់ខាត។ នៅទីបំផុត សហព័ន្ធកីឡាបាល់ទាត់អន្តរជាតិ ហៅកាត់ថា FIFA ព្រមទាំងសហព័ន្ធបាល់ទាត់អឺរ៉ុប UEFA បានសម្រេចព្រមគ្នា នៅរសៀលថ្ងៃចន្ទទី២៨កុម្ភៈ ដករុស្ស៊ីមិនឲ្យចូលរួមប្រកួតចាប់ពីពេលនេះទៅ រហូតទាល់តែមានការសម្រេចថ្មីណាមួយផ្សេងទៀត។
អ្នកជំនាញផ្នែកកីឡាជាច្រើននាក់ បានឲ្យដឹងថា វិស័យកីឡាមានឥទ្ធិពលខ្លាំងណាស់ ទៅលើនយោបាយនិងសេដ្ឋកិច្ចរុស្ស៊ី។ ការដាក់ទណ្ឌកម្មលើរុស្ស៊ីក្នុងវិស័យនេះ អាចជាវិធានការមួយដ៏ប្រសើរ ដើម្បីឲ្យរបបដឹកនាំផ្តាច់ការរបស់លោកពូទីន ទទួលទោសកំហុស ចំពោះការឈ្លានពានអ៊ុយក្រែន។
ពញ្ញាក់ស្មារតីប្រជាជនរុស្ស៊ីឲ្យចោទសួរ អំពីទង្វើរបស់មេដឹកនាំខ្លួន
លោក Hugh Robertson ប្រធានគណកម្មាធិការអូឡាំពិក ប្រទេសអង់គ្លេស បានអះអាងថា ការរារាំងមិនឲ្យរុស្ស៊ីរៀបចំការប្រកួត ឬចូលរួមប្រកួតក្នុងកម្មវិធីកីឡាអន្តរជាតិធំៗ គឺវានឹងសំពងរុស្ស៊ីយ៉ាងដំណំ។ ប្រជាជនរុស្ស៊ី ជាជាតិសាសន៍មួយ ដែលស្រលាញ់កីឡាណាស់។ ប្រជាជនរុស្ស៊ីត្រេកអររំភើបណាស់ ពេលប្រទេសខ្លួនបានធ្វើជាម្ចាស់ផ្ទះ ទទួលរៀបចំកម្មវិធីប្រកួតកីឡាអន្តរជាតិម្តងៗ។ ដូច្នេះនៅពេលដែលគេផាត់រុស្ស៊ីចេញពីការប្រកួតនីមួយៗ គឺវានឹងដាស់ ពញ្ញាក់ស្មារតី របស់ប្រជាជនរុស្ស៊ី ឲ្យចោទសួរថា មានរឿងអ្វីកើតឡើង តើស្រុកខ្លួនបានធ្វើអ្វីខុស?
លោក Michael Payne ប្រធានផ្នែកទីផ្សារ នៃគណកម្មាធិការអូឡាំពិកអន្តរជាតិ បានលើកឡើងថា លោកពូទីន ប្រហែលជាមិនខ្វល់ ថាមនុស្សនៅតាមបណ្តាប្រទេសផ្សេងៗ ទូទាំងពិភពលោកនេះ មានយោបល់គិតយ៉ាងណាមកលើរូបលោកពិតមែន។ ក៏ប៉ុន្តែលោកពូទីន ត្រូវតែប្រយ័ត្ន ថាតើប្រជាជនរុស្ស៊ី គិតដូចម្តេចអំពីរូបលោក។ មតិសាធារណៈរុស្ស៊ី មានតម្លៃណាស់ សម្រាប់វាសនាអំណាចរបស់លោកពូទីន។
គ្រោះថ្នាក់មួយទៀតនោះ គឺក្នុងករណី កីឡាករល្បីៗខ្លះរបស់រុស្ស៊ី បានបង្ហាញជំហរដោយក្លាហាន ហ៊ានប្រឆាំងចំពោះការធ្វើសង្គ្រាមឈ្លានពានអ៊ុយក្រែន។ តួយ៉ាង ដូចជាកីឡាករតេនីស Andrey Rublev កីឡាករបាល់ទាត់ Fedor Smolov កីឡាករហុកគី Alex Ovechkin និងកីឡាករប្រណាំងកង់ Pavel Sivakov ដែលសុទ្ធតែបានប្រកាសជាសាធារណៈ ប្រឆាំងនឹងសង្គ្រាមដែលរុស្ស៊ី កំពុងតែធ្វើនៅអ៊ុយក្រែន។ យោងតាមលោក Michael Payne ការដែលកីឡាករល្បីៗរបស់រុស្ស៊ី ប្រកាសជំហរបែបនេះ គឺវាអាចនឹងជំរុញទឹកចិត្តប្រជាពលរដ្ឋរុស្ស៊ី ឲ្យចោទសួរ ចំពោះទង្វើរបស់ថ្នាក់ដឹកនាំខ្លួន ថាត្រឹមត្រូវ ឬមិនត្រឹមត្រូវ។ ប្រការនេះ គឺវាអាចប៉ះពាល់ដល់ចរន្តគាំទ្រ ការធ្វើសង្គ្រាមរបស់លោកពូទីន នៅក្នុងចំណោមមតិយល់ឃើញរបស់ប្រជាពលរដ្ឋរុស្ស៊ី។
ឈប់ឲ្យក្រុមហ៊ុនរុស្ស៊ី មានមុខផ្សាយពាណិជ្ជកម្ម
ដោយឡែក លោក Terrence Burns អតីតអ្នកទទួលខុសត្រូវម្នាក់ នៅគណកម្មាធិការអូឡាំពិកអន្តរជាតិ បានលើកឡើងថា រដ្ឋាភិបាលរុស្ស៊ីប្រាកដជានឹងឃោសនា ប្រាប់ទៅប្រជាពលរដ្ឋខ្លួន ថាប្រទេសរុស្ស៊ីគឺជាអ្នករងគ្រោះ ត្រូវបានពួកបស្ចឹមប្រទេស ព្រួតគ្នាធ្វើបាបដាក់ទណ្ឌកម្មក្នុងវិស័យកីឡា។ ក៏ប៉ុន្តែ អ្នកជំនាញរូបនេះ បានសង្កត់ធ្ងន់ពីភាពចាំបាច់ ដែលត្រូវតែផ្តន្ទាទោសរុស្ស៊ី ដោយរាប់បញ្ចូលទាំងវិស័យកីឡាផងដែរ ដើម្បីឲ្យសក្តិ៍សមទៅនឹងទង្វើរបស់រុស្ស៊ី ដែលឈ្លានពានអ៊ុយក្រែន។
ការផ្តន្ទាទោស ដែលត្រូវតែធ្វើតាមរយៈ ការផ្តាច់កិច្ចសន្យា ដកក្រុមហ៊ុនរុស្ស៊ី កុំឲ្យមានមុខនៅក្នុងការឧបត្ថម្ភកម្មវិធីប្រកួតនានា។ យ៉ាងណាមិញ ក្លឹបកីឡាបាល់ទាត់ Manchester United បានប្រកាស ផ្តាច់កិច្ចសន្យាជាមួយក្រុមហ៊ុនអាកាសចរណ៍ Aeroflot របស់រុស្ស៊ី។ យោងតាមប្រភពច្បាស់ការផ្សេងទៀត បានឲ្យដឹងថា សហព័ន្ធកីឡាបាល់ទាត់អឺរ៉ុប ក៏កំពុងតែពិចារណា ដកក្រុមហ៊ុន Gazprom របស់រុស្ស៊ី ចេញពីការផ្សព្វផ្សាយពាណិជ្ជកម្មដែរ។ កិច្ចសន្យាដែលចុះកាលពីឆ្នាំ២០១២ ហើយដែលមានតម្លៃប្រមាណ៤០លានអឺរ៉ូ ក្នុងមួយឆ្នាំ។ ចំណែក កម្មវិធីប្រណាំងឡានHass Formule 1 របស់អាមេរិក ក៏បានសម្រេចដកក្រុមហ៊ុនរុស្ស៊ី Uralkali ចេញពីការឧបត្ថម្ភផ្សាយពាណិជ្ជកម្មដែរ។
តែសួរថា នៅពេលណាដកក្រុមហ៊ុនរុស្ស៊ីចេញ ផ្តាច់កិច្ចសន្យា លែងឲ្យផ្សាយពាណិជ្ជកម្ម តើម្ចាស់កម្មវិធីរៀបចំការប្រកួតកីឡាអន្តរជាតិទាំងនេះ អាចនឹងខាតបង់ដែរឬទេ? យោងតាមលោក Terrence Burns ក្រុមហ៊ុនធំៗរបស់រុស្ស៊ី ទើបតែបានហក់ប្រឡូកផ្សព្វផ្សាយពាណិជ្ជកម្ម ក្នុងការប្រកួតកីឡាអន្តរជាតិធំៗ ប្រមាណជា១០ឆ្នាំចុងក្រោយនេះប៉ុណ្ណោះ។ កម្មវិធីប្រកួតកីឡាអន្តរជាតិ ធ្លាប់រស់បាន កាលពីមិនទាន់មានក្រុមហ៊ុនរុស្ស៊ីឧបត្ថម្ភ ដូច្នេះគ្មានរឿងអ្វី ដែលមិនអាចដំណើរការបន្តទៀត នៅពេលដកក្រុមហ៊ុនរុស្ស៊ីចេញនោះទេ!
ដូចគ្នាដែរ លោក Lukas Aubin អ្នកវិភាគភូមិសាស្ត្រនយោបាយជនជាតិបារាំងម្នាក់ បានអះអាង វាប្រាកដណាស់ ដែរថាសហព័ន្ធកីឡាបាល់ទាត់អឺរ៉ុប នឹងបាត់បង់ប្រាក់ចំណូល ក្រោយពេលដកក្រុមហ៊ុន Gazprom របស់រុស្ស៊ី ចេញពីការផ្សាយពាណិជ្ជកម្ម។ ក៏ប៉ុន្តែ វាមិនខ្វះទេ ក្រុមហ៊ុនផ្សេងទៀត ដែលរងចាំចុះកិច្ចសន្យា ដើម្បីអាចមានសិទ្ធិផ្សាយពាណិជ្ជកម្ម ព្រោះថាអ្នកណាក៏ចង់ចុះកិច្ចសន្យាក្លាយជាអ្នកឧបត្ថម្ភកម្មវិធីម្នាក់ របស់សហព័ន្ធកីឡាបាល់ទាត់អឺរ៉ុបដែរ។ កម្មវិធីប្រកួតបាល់ទាត់ Champion League ដែលរៀបចំដោយសហព័ន្ធកីឡានេះ គឺជាកម្មវិធីកីឡាមួយ ដែលគេតាមដានបំផុតនៅទូទាំងពិភពលោក។
លោក Lukas Aubin បន្ថែមថា កាលៈទេសៈពេលនេះវាធ្ងន់ធ្ងរណាស់ ដែលតម្រូវឲ្យស្ថាប័នរៀបចំការប្រកួតកីឡា ត្រូវតែទុករឿងខាតបង់ប្រាក់ចំណូលមួយឡែកសិន។ ដូចគ្នាដែរ លោក Hugh Robertson សង្កត់បន្ថែមថា ពិភពកីឡាត្រូវតែផ្តាច់ខ្លួន ឈប់រំពឹងនឹងប្រាក់ឈ្នួលផ្សាយពាណិជ្ជកម្ម របស់ក្រុមហ៊ុនរុស្ស៊ីតទៅទៀត។ សង្គ្រាមនៅអ៊ុយក្រែន ប្រាកដជាជះផលអាក្រក់ខ្លះហើយ ទៅលើវិស័យកីឡា។ ក៏ប៉ុន្តែបើវិស័យកីឡាមិនធ្វើអ្វីសោះ ដើម្បីដាក់ទណ្ឌកម្មលើរុស្ស៊ីទេនោះ នោះគឺវិស័យកីឡាខ្លួនឯង ដែលអាចខូចកិត្តិយសធ្ងន់ធ្ងរ ដោយសារតែភាពកំសាក ចាញ់ច្រាបលុយរុស្ស៊ី។
លោក Michael Payne បានលើកឡើងថា ការធ្វើពហិការ ការដាក់ទណ្ឌកម្មក្នុងវិស័យកីឡា អាចមានឥទ្ធិពលខ្លាំងណាស់ ទៅលើសង្គម។ លោកបានរំលឹក ពីករណីដែលវិស័យកីឡាពិភពលោក បាននាំគ្នាធ្វើពហិការ ប្រឆាំងនឹងរដ្ឋាភិបាលប្រទេសអាហ្វ្រិកខាងត្បូង ក្នុងទសវត្សឆ្នាំ ៦០-៧០។ ភាពសាមគ្គីរបស់វិស័យកីឡាពិភពលោក បានធ្វើឲ្យរដ្ឋាភិបាលប្រទេសនេះ បង្ខំចិត្តធ្វើកំណែទម្រង់ បោះបង់ចោលគោលនយោបាយរើសអើងប្រកាន់ពូជសាសន៍ បែងចែកសង្គមស្បែកស-ស្បែកខ្មៅ។ ទណ្ឌកម្មផ្នែកកីឡា ពេលខ្លះអាចមានប្រសិទ្ធភាព ជាងទណ្ឌកម្មសេដ្ឋកិច្ចផងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ