ហេតុអ្វីចិនមានជំហរប្រយ័ត្នប្រយែងខ្លាំងក្នុងសង្រ្គាមអ៊ុយក្រែន?
ចុះផ្សាយនៅថ្ងៃ៖
ស្តាប់ - ០៤:០៧
យើងដឹងថា ចិន និងរុស្ស៊ី មានគូប្រជែងរួមគ្នាដ៏ធំមួយ គឺសហរដ្ឋអាមេរិក ហើយនៅពេលដែលរុស្ស៊ីកំពុងតែប្រមូលទ័ពព័ទ្ធជុំវិញអ៊ុយក្រែន លោកស៊ី ជីនពីង បានទទួលជួបលោកវ៉្លាឌីមៀរ ពូទីន ក្នុងអំឡុងពេលបើកការប្រកួតកីឡាអូឡាំពិកនៅប៉េកាំង ដោយបានលើកឡើងថា មិត្តភាពរវាងចិន និងរុស្ស៊ី មិនមែនដែនកំណត់នោះទេ។ ក៏ប៉ុន្តែ នៅក្រោយពេលផ្ទុះសង្រ្គាមនៅអ៊ុយក្រែន ហើយរុស្ស៊ីត្រូវប្រឈមនឹងការថ្កោលទោស ក៏ដូចជាទទួល ទណ្ឌកម្មពីសហរដ្ឋអាមេរិក និងសម្ព័ន្ធមិត្ត ចិនបែរជាមិនគាំទ្ររុស្ស៊ី ដោយសូម្បីតែនៅក្នុងក្រុមប្រឹក្សាសន្តិសុខអង្គការសហប្រជាជាតិក៏ចិន បានត្រឹមបោះឆ្នោតអនុប្បវាទ ហើយទុកឲ្យរុស្ស៊ីឯកោតែម្នាក់ឯង។ តើហេតុអ្វីបានជាចិនត្រូវបង្ហាញនូវជំហរប្រយ័ត្នប្រយែងបែបនេះ ?
ចិន ថ្វីដ្បិតតែកំពុងព្យាយាមពង្រឹងទំនាក់ទំនងជាមួយរុស្ស៊ី ដោយសំឡឹងឃើញរុស្ស៊ី ជាដៃគូដ៏សំខាន់ ក្នុងការទប់ទល់ជាមួយនឹងសហរដ្ឋអាមេរិក ដែលជាគូប្រជែងរួម ហើយការប្រឈមមុខដាក់គ្នា រវាងរុស្ស៊ី និងអាមេរិក អាចជារឿងល្អមួយ សម្រាប់ចិន ក៏ប៉ុន្តែ សង្រ្គាមអ៊ុយក្រែនបច្ចុប្បន្ននេះ ក៏មានហានិភ័យច្រើនផងដែរ ដែលជាហេតុធ្វើឲ្យចិនត្រូវព្យាយាមបង្ហាញនូវជំហរប្រយ័ត្នប្រយែង មិនថ្កោលទោសរុស្ស៊ី តែក៏មិនគាំទ្រ។
សម្រាប់ចិន រុស្ស៊ីពិតណាស់គឺជាដៃគូសំខាន់ នៅក្នុងភូមិសាស្ត្រនយោបាយ ក៏ប៉ុន្តែ បើនិយាយខាងផ្នែកសេដ្ឋកិច្ចវិញ ផលប្រយោជន៍ចម្បងរបស់ចិន គឺនៅអាមេរិក និងអឺរ៉ុប ដែលសុទ្ធសឹងតែជាទីផ្សារដ៏សំខាន់មិនអាចខ្វះបានរបស់ចិន។ ការណ៍ដែលអាមេរិក និងអឺរ៉ុប បង្ហាញនូវការរួបរួមគ្នា ហើយដាក់ទណ្ឌកម្មយ៉ាងធ្ងន់ៗដ៏កម្រទៅលើរុស្ស៊ី នៅក្រោយពេលរុស្ស៊ីចូលឈ្លានពានអ៊ុយក្រែននោះ វារឹតតែធ្វើឲ្យចិនកាន់តែត្រូវប្រយ័ត្នប្រយែងថែមទៀត ពីព្រោះថា បើចិនឈរនៅខាងរុស្ស៊ី គឺមានន័យថា ត្រូវប្រឈមនឹងអាមេរិក និងអឺរ៉ុប ហើយអាចនឹងត្រូវរងគ្រោះ ដោយសារទណ្ឌកម្មសេដ្ឋកិច្ច។
ក្រៅពីផលប្រយោជន៍សេដ្ឋកិច្ច បញ្ហាចោទខាងផ្នែកការទូត និងគោលការណ៍ច្បាប់អន្តរជាតិ ក៏ជាកត្តាដ៏ចម្បងមួយផងដែរ ដែលធ្វើឲ្យចិនពិបាកនឹងបង្ហាញជំហរជាក់លាក់គាំទ្ររុស្ស៊ី នៅក្នុងការធ្វើសង្រ្គាមនៅអ៊ុយក្រែន។
ទាក់ទងនឹងរឿងនេះ ចិនក៏ប្រហែលជាតាមដានមើលផងដែរ ទៅលើទំនោរនៃសាធារណមតិអន្តរជាតិ និងជំហរការទូតរបស់ប្រទេសផ្សេងទៀត ហើយតាមការសង្កេត ជារួម ទាំងនៅក្នុងក្រុមប្រឹក្សាសន្តិសុខអង្គការសហប្រជាជាតិ មហាសន្និបាតអង្គការសហប្រជាជាតិ និងក្រុមប្រឹក្សាសិទ្ធិមនុស្សអង្គការសហប្រជាជាតិ ក៏ដូចជា អង្គការតំបន់ផ្សេងទៀត ប្រទេសភាគច្រើនលើសលុបសុទ្ធតែនាំគ្នាថ្កោលទោសរុស្ស៊ី ហើយគាំទ្រអ៊ុយក្រែន ដូច្នេះ ប្រសិនបើចិនគាំទ្ររុស្ស៊ី វាអាចនឹងធ្វើឲ្យប៉ះពាល់ទៅដល់មុខមាត់របស់ចិនខ្លួនឯងផ្ទាល់នៅលើឆាកអន្តរជាតិ។
ការណ៍ដែលរុស្ស៊ីបញ្ជូនទ័ពចូលឈ្លានពានអ៊ុយក្រែន នៅពេលនេះ ថ្វីដ្បិតតែចិនព្យាយាមមិនហៅថាជាការឈ្លានពាន ក៏ប៉ុន្តែ ទៅតាមសាធារណមតិអន្តរជាតិជាទូទៅ វាមិនមានអ្វីដែលគួរជាមន្ទិលសង្ស័យនោះទេថា នេះគឺជាការប្រើកម្លាំងទ័ពរបស់រដ្ឋមួយ រំលោភបំពានទៅលើឯករាជ្យ និងបូរណភាពទឹកដីរបស់រដ្ឋមួយទៀត។ ដូច្នេះ គាំទ្ររុស្ស៊ី គឺមានន័យថា គាំទ្រការរំលោភបំពានលើបូរណភាពទឹកដីរបស់អ៊ុយក្រែន ហើយគោលការណ៍មិនជ្រៀតជ្រែកកិច្ចការផ្ទៃក្នុងប្រទេសដទៃ និងការគោរពយ៉ាងខ្ជាប់ខ្ជួននូវបូរណភាពទឹកដីរបស់រដ្ឋ វាគឺជាគោលការណ៍ដ៏ចម្បងបំផុត ដែលចិនតែងតែប្រកាន់យកតាំងពីដើមរៀងមក។
ជាការពិតណាស់ថា នេះគឺជាគោលការណ៍ជាមូលដ្ឋាននៅក្នុងទំនាក់ទំនងអន្តរជាតិសម័យទំនើប ហើយជាគោលការណ៍ ដែលមានចែងនៅក្នុងធម្មនុញ្ញរបស់អង្គការសហប្រជាជាតិ ក៏ប៉ុន្តែ សម្រាប់ចិន វារឹតតែមានសារៈសំខាន់ ពីព្រោះថា វាគឺជារឿងដ៏រសើបសម្រាប់ចិនខ្លួនឯងផ្ទាល់។
បើសិនជាចិនប្រកាសគាំទ្ររុស្ស៊ី ដែលលើកទ័ពចូលឈ្លានពានអ៊ុយក្រែន ហើយដាក់លក្ខខណ្ឌទាមទារឲ្យអ៊ុយក្រែនទទួលស្គាល់ជាផ្លូវការនូវការកាត់យកតំបន់គ្រីមេជាទឹកដីរុស្ស៊ី ក៏ដូចជា ទទួលស្គាល់ការកាត់យកតំបន់ដុនបាស់នៅខាងកើតអ៊ុយក្រែនជារដ្ឋឯករាជ ដោយសំអាងថា ទឹកដីអស់ទាំងនេះជាអតីតទឹកដីរបស់រុស្ស៊ី ឬជាតំបន់ដែលមានប្រជាជនភាគច្រើនជាជនជាតិរុស្ស៊ី តើចិននឹងត្រូវឆ្លើយការពារខ្លួនយ៉ាងណា ចំពោះបញ្ហាតៃវ៉ាន់ ដែលចង់បានឯករាជ្យ ឬចំពោះហុងកុង ដែលទាមទារស្វ័យយ័តពេញលេញ ពីការគ្រប់គ្រងរបស់ប៉េកាំង? បើតំបន់ខាងកើតអ៊ុយក្រែនអាចផ្តាច់ខ្លួនជារដ្ឋឯករាជបាន ក្នុងហេតុផលថា ជាតំបន់ដែលមានប្រជាជនភាគច្រើនជាជនជាតិរុស្ស៊ី ចុះតំបន់ទីបេ ឬក៏តំបន់ស៊ីងជាំង ដែលមានប្រជាជនភាគច្រើនជាជនជាតិអ៊ុយហ្គួ ឬក៏តំបន់នៅប៉ែកខាងជើងប្រទេសចិន ដែលមានប្រជាជនភាគច្រើនជាជនជាតិម៉ុងហ្គោលនោះ តើវាយ៉ាងណាទៅវិញ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ