ទីប្រឹក្សាលោកពូទីនមិនហ៊ានប្រាប់លោកពីបរាជ័យនៅសមរភូមិដូចអាមេរិកអះអាងឬ?
ចុះផ្សាយនៅថ្ងៃ៖
ស្តាប់ - ០៤:៣១
ប្រធានាធិបតីរុស្ស៊ីលោកវ្ល៉ាឌីមៀរ ពូទីន កំពុងទទួលបានព័ត៌មានមិនពិតអំពីការវិវឌ្ឍន៍ថ្មីៗនៅក្នុងសង្គ្រាមអ៊ុយក្រែន។ អាមេរិកនិងអង់គ្លេសនិយាយថាទីប្រឹក្សារបស់លោកពូទីន ខ្លាចខ្លាំងដល់ថ្នាក់មិនហ៊ានប្រាប់លោកពីការពិតទាក់ទិនការចុះខ្សោយរបស់កងទ័ពរុស្ស៊ីនៅសរមភូមិឡើយ។ ចំណែកមន្ត្រីបស្ចិមលោកខ្លះបានអះអាងដែរថាមិនត្រឹមតែបដិសេធមិនធ្វើតាមបទបញ្ជានោះទេ តែទាហានរុស្ស៊ីមួយចំនួនថែមទាំងបានបំផ្លាញគ្រឿងបរិក្ខារយោធារបស់ខ្លួនឯងទៀតផង។ តើការអះអាងរបស់បស្ចិមលោកនេះគឺជាការពិតមែនឬយ៉ាងណា?
សង្គ្រាមនៅអ៊ុយក្រែនដែលដំបូងឡើយរុស្ស៊ីសង្ឃឹមថាអាចយកឈ្នះក្នុងរយៈពេលដ៏ខ្លីនោះ ឥឡូវនេះអូសបន្លាយដល់ជាងមួយខែហើយ។ សង្គ្រាមអ៊ុយក្រែនបានក្លាយជាសង្គ្រាមដ៏ពិបាកមួយសម្រាប់លោកពូទីនពីព្រោះថាកងទ័ពរុស្ស៊ីនៅមិនទាន់អាចយកឈ្នះលើកងទ័ពអ៊ុយក្រែនដែលមានទឹកចិត្តអង់អាចក្លាហាន។
តែផ្ទុយទៅវិញ កងទ័ពអ៊ុយក្រែនបាននឹងកំពុងវាយដណ្តើមយកទឹកដីដែលធ្លាក់ក្នុងកណ្តាប់ដៃរុស្ស៊ីត្រលប់មកវិញក្នុងរយៈពេលប៉ុន្មានថ្ងៃថ្មីៗនេះ ក្នុងនោះមានតំបន់យុទ្ធសាស្ត្រ Irpin នៅជាយរដ្ឋធានីកៀវផង។
កាលពីថ្ងៃពុធ ទី៣០មីនា សេតវិមានអាមេរិកបានអះអាងថាដោយសារតែខ្លាចពេក ប្រមុខយោធារុស្ស៊ីនិងទីប្រឹក្សារបស់លោកពូទីន មិនហ៊ានហាមាត់ប្រាប់លោកពីស្ថានភាពយ៉ាប់យ៉ឺនរបស់កងទ័ពរុស្ស៊ីនៅឯសមរភូមិ និងពីផលប៉ះពាល់ជាក់ស្តែងនៃទណ្ឌកម្មទៅលើសេដ្ឋកិច្ចរុស្ស៊ីឡើយ។
ទីក្រុងវ៉ាស៊ីនតោនបានលាតត្រដាងអំពីព័ត៌មាននេះដើម្បីបង្ហាញថាសង្គ្រាមនៅអ៊ុយក្រែនគឺជាកំហុសយុទ្ធសាស្ត្រមួយរបស់លោកពូទីន។ ហើយទោះបីជាក្រុមទីប្រឹក្សារបស់លោកខ្លាចរអាខ្លាំងមិនហ៊ាននិយាយការពិតចេញក៏ដោយ ក៏ប៉ុន្តែអ្វីៗដែលកំពុងកើតឡើងឆ្លុះបញ្ចាំងឲ្យឃើញច្បាស់ថាមេដឹកនាំរុស្ស៊ីបានវាយតម្លៃខុសលើសមត្ថភាពយោធារបស់ខ្លួនក្នុងការវាយយកឈ្នះអ៊ុយក្រែនបានយ៉ាងឆាប់រហ័ស។
ប៉ុន្មានម៉ោងក្រោយសេតវិមានអាមេរិកចេញផ្សាយការវាយតម្លៃដែលបានមកពីទីភ្នាក់ងារស៊ើបការណ៍សម្ងាត់របស់ខ្លួន ប្រធានទីភ្នាក់ងារចារកម្ម (GCHQ) របស់អង់គ្លេសលោក Jeremy Fleming បានឲ្យដឹងដែរពីការរកឃើញថាទាហានរុស្ស៊ីដែលបាក់ទឹកចិត្ត ខ្វះខ្វាតសព្វាវុធបានបដិសេធមិនគោរពតាមបទបញ្ជា និងបានវាយបំផ្លាញគ្រឿងបរិក្ខារយោធារបស់ខ្លួនឯងទៀតផង។ មិនតែប៉ុណ្ណោះ មានពេលមួយពួកគេថែមទាំងបានទាំងបាញ់ទម្លាក់យន្តហោះគ្នាឯងដោយចៃដន្យទៅទៀត។
សម្រាប់ប្រធានទីភ្នាក់ងារចារកម្មអង់គ្លេស លោកពូទីនបានមើលស្រាលស្ថានការណ៍ មើលស្រាលភាពតស៊ូ-ភាពធន់របស់អ៊ុយក្រែន និងកម្លាំងនៃសម្ព័ន្ធអន្តរជាតិប្រឆាំងនឹងលោក ព្រមទាំងផលប៉ះពាល់នៃទណ្ឌកម្មទៅលើសេដ្ឋកិច្ចរបស់រុស្ស៊ី។
គួរបញ្ជាក់ជូនថា របាយការណ៍ទីភ្នាក់ងារចារកម្មអាមេរិកនិងអង់គ្លេសត្រូវបានបង្ហាញប្រាប់ ស្របពេលដែលមានសំណួរជាច្រើនចោទសួរអំពីទំនាក់ទំនងរបស់លោក ពូទីន ជាមួយរដ្ឋមន្ត្រីការពារជាតិរុស្ស៊ីលោក Sergei Shoigu ដែលបានបាត់មុខអស់ជាច្រើនសប្តាហ៍មុននឹងលេចវត្តមានជាថ្មីវិញកាលពីថ្ងៃទី២៦ ខែមីនានៅក្នុងការផ្សាយតាមទូរទស្សន៍។
ទាក់ទងរឿងនេះ មន្ត្រីជាន់ខ្ពស់អាមេរិកម្នាក់និយាយថាលោកពូទីននិងប្រមុខការពារជាតិរុស្ស៊ីកំពុងតែមានទំនាក់ទំនងតានតឹងនឹងគ្នា ដោយផ្តើមចេញមកពីការមិនទុកចិត្តរបស់ពូទីនលើមន្ត្រីក្រោមឱវាទរបស់ខ្លួន។
នៅប៉ុន្មានថ្ងៃចុងក្រោយនេះ មានសេចក្តីរាយការណ៍ដែរថាលោករដ្ឋមន្ត្រីការពារជាតិរុស្ស៊ី Shoigu ត្រូវបានបុរសខ្លាំងពូទីនបណ្តេញចេញពីតំណែង និងកំពុងជាប់ឃុំនៅក្នុងផ្ទះដោយស្ថិតនៅក្រោមការតាមឃ្លាំមើលយ៉ាងតឹងរ៉ឹង។ ប៉ុន្តែមកទល់នឹងពេលនេះ មិនមានសារព័ត៌មានឬស្ថាប័នឯករាជ្យណាបញ្ជាក់ថារបាយការណ៍ខាងលើគឺជាការពិតឬក៏យ៉ាងនោះទេ។
ដោយឡែកពីទីក្រុងមូស្គូវិញ វិមានក្រេមឡាំងនិយាយថាអាមេរិកយល់ប្រឡំធំហើយអំពីស្ថានការណ៍និងបានទាត់ចោលការអះអាងរបស់អាមេរិកនិងអង់គ្លេសដែលថាទីប្រឹក្សាលោកពូទីន ខ្លាចពេកមិនហ៊ានប្រាប់ការពិតអំពីការចុះខ្សោយនិងបរាជ័យរបស់កងទ័ពរុស្ស៊ីនៅឯសមរភូមិក្នុងសង្គ្រាមអ៊ុយក្រែន។
អ្នកនាំពាក្យវិមានក្រេមឡាំងលោក Dmitry Peskov បានរាយរាប់ថាអាមេរិកគ្មានដឹងព័ត៌មានច្បាស់ការណ៍ដែលកំពុងកើតឡើងនៅវិមានក្រេមឡាំងនោះទេ។ ហើយថាអាមេរិក ហើយនិងសម្ព័ន្ធមិត្តមិនយល់ទាល់តែសោះពីលោកពូទីន មិនដឹងអីពីយន្តការក្នុងការសម្រេចចិត្តក៏ដូចជារបៀបដែលទីក្រុងមូស្គូធ្វើការឡើយ។
នៅក្នុងសន្និសីទព័ត៌មានកាលពីថ្ងៃព្រហស្បតិ៍៣១មីនាម្សិលមិញ អ្នកនាំពាក្យវិមានក្រេមឡាំងថែមទាំងបានព្រមានទៀតថាការយល់ខុសស្រឡះទាំងស្រុងរបស់អាមេរិកបែបនេះអាចទាញឲ្យមានការសម្រេចចិត្តខុសដែលបណ្តាលឲ្យមានផលវិបាកយ៉ាងធ្ងន់ធ្ងរក្នុងពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ