ប៉ាគីស្ថាន៖តើលោកអ៊ីមរ៉ាន់ ខាន់អាចបន្តអង្គុយលើកៅអីនាយករដ្ឋមន្រ្តីរហូតដល់ពេលណា?
ចុះផ្សាយនៅថ្ងៃ៖
ស្តាប់ - ០៥:១៦
នៅក្នុងប្រទេសប៉ាគីស្ថាន នាយករដ្ឋមន្រ្តីលោកអ៊ីមរ៉ាន់ ខាន់បានរួចផុតពីការធ្លាក់ពីអំណាចនាថ្ងៃអាទិត្យ ទី៣ មីនា។ ញ្ញតិដកសេចក្តីទុកចិត្តដែលរៀបចំដោយក្រុមគណបក្សប្រឆាំងមិនត្រូវបានអនុប្រធានសភាដាក់ឲ្យសភាបោះឆ្នោតទេ។ បន្ទាប់មក និងតាមសំណើរបស់លោកអ៊ីមរ៉ាន់ ខាន់ ប្រធានាធិបតីលោកអាហ្វៀរ អាល់វីបានរំលាយសភា និងកោះឲ្យមានការរៀបចំបោះឆ្នោតសភាមុនអាណត្តិ។ តាមច្បាប់រដ្ឋធម្មនុញ្ញ ការបោះឆ្នោតមុនអាណត្តិនេះត្រូវរៀបចំក្នុងរយៈពេល ៩០ថ្ងៃខាងមុខ។ ហេតុអ្វីបានជាលោកអ៊ីមរ៉ាន់ ខាន់រងការប៉ុនប៉ងទម្លាក់ពីអំណាច និងថា តើលោកអ៊ីមរ៉ាន់ ខាន់អាចបន្តរក្សាកៅអីនាយករដ្ឋមន្រ្តីរបស់ខ្លួនរហូតដល់ពេលណាដែរ?
នៅទីបំផុត លោកអ៊ីមរ៉ាន់ ខាន់មិនបានខ្ទាតចេញពីកៅអីនាយករដ្ឋមន្រ្តីដូចដែលក្រុមគណបក្សប្រឆាំងចង់បាន និងរំពឹងទុកទេ។ តើនេះជាជោគជ័យរបស់លោកអ៊ីមរ៉ាន់ ខាន់ និងជាបរាជ័យរបស់ក្រុមគណបក្សប្រឆាំងឬ?។ ថាជាជោគជ័យរបស់លោកអ៊ីមរ៉ាន់ ខាន់ប្រហែលជាអាចថាបាន តែថាជាបរាជ័យរបស់ក្រុមគណបក្សប្រឆាំងប្រហែលជានៅមិនទាន់អាចថាបានទេ ឬនិយាយឲ្យស្រួលយល់ វាដូចជារហ័សពេក។ រហ័សពេក ព្រោះក្រុមប្រឆាំងដែលមានគ្នាកាន់តែច្រើនឡើងៗប្រហែលមិនបញ្ឈប់ការព្យាយាមទម្លាក់លោកអ៊ីមរ៉ាន់ ខាន់ពីអំណាចនៅត្រឹមនេះទេ។ ដើម្បីអាចយល់ពីរឿងរ៉ាវមួយនេះបាន គេត្រូវនិយាយពីហេតុផលដែលបានធ្វើឲ្យលោកអ៊ីមរ៉ាន់ ខាន់ក្លាយជានាយករដ្ឋមន្រ្តី និងពីមូលហេតុដែលបានធ្វើឲ្យលោករងការប៉ុនប៉ងទម្លាក់ពីអំណាចនៅពេលនេះ។
បច្ចុប្បន្នមានអាយុ ៦៩ឆ្នាំ លោកអ៊ីមរ៉ាន់ ខាន់បានចូលប្រឡូកក្នុងឆាកនយោបាយតាំងពីឆ្នាំ ២០០០។ តែមុននឹងចូលប្រឡូកក្នុងឆាកនយោបាយ លោកអ៊ីមរ៉ាន់ ខាន់ជាកីឡាករល្បីម្នាក់ផ្នែកកីឡាគ្រីកេពីឆ្នាំ ១៩៧១ ដល់ឆ្នាំ ១៩៩២។ កាន់តែល្បីល្បាញ និងមានប្រជាប្រិយភាពថែមទៀត នៅពេលដែលលោកអ៊ីមរ៉ាន់ ខាន់ក្នុងនាមជាគ្រូបង្វឹកនៃក្រុមកីឡាករគ្រីកេបាននាំពានរង្វាន់ពិភពលោកផ្នែកកីឡានេះឲ្យប្រទេសជាតិនាការប្រកួតក្នុងឆ្នាំ ១៩៩២។ គេអាចនិយាយបានថា គឺភាពល្បីល្បាញជាកីឡាករជើងឯកផ្នែកកីឡាគ្រីកេដែលជាកីឡាជាតិមួយនេះឯងដែលលោកអ៊ីមរ៉ាន់ ខាន់បានយកធ្វើជាដើមទុនសម្រាប់ជីវិតនយោបាយ។
លើសពីនេះ និងខុសពីអ្នកនយោបាយប្រពៃណីដែលធ្លាប់បានកាន់ និងចែកអំណាចជាច្រើនទសវត្សន៍ជាមួយកងទ័ព លោកអ៊ីមរ៉ាន់ ខាន់បានតាំងខ្លួនជាអ្នកនយោបាយសម័យថ្មីដែលប្តេជ្ញាកំចាត់អំពើពុយរលួយ និងធ្វើកំណែទម្រង់សង្គម។ រូបភាពទាំងអស់នេះបានធ្វើឲ្យលោកអ៊ីមរ៉ាន់ ខាន់ទទួលបានការកោតសរសើរខ្លាំងពីពលរដ្ឋប៉ាគីស្ថានទូទៅ។ ក្នុងសម័យកូវីដ១៩ នាយករដ្ឋមន្រ្តីរូបនេះបានជ្រើសយកវិធានការមិនបិទខ្ទប់ប្រទេសដោយយល់ឃើញថា វាអាចធ្វើឲ្យពលរដ្ឋស្លាប់ដោយអត់បាយ។ តែទោះជាយ៉ាងនេះក្តី បរិបទសេដ្ឋកិច្ច និងជម្រើសមិនត្រឹមត្រូវរបស់លោកបានធ្វើឲ្យលោកធ្លាក់កូតខ្លាំង និងបាត់បង់ប្រជាប្រិយភាពនារយៈពេលប៉ុន្មានខែចុងក្រោយនេះ។
កំណើនអត្រាអតិផរណាចំនួន ១០% ក្នុងឆ្នាំ ២០២១ កំណើនសេដ្ឋកិច្ចមានកម្រិតសូន្យក្នុងរយៈពេល ៣ឆ្នាំជាប់គ្នា តម្លៃប្រាក់រូពីបានដាំក្បាលចុះខ្លាំងតាំងពីខែកក្កដា ឆ្នាំ ២០២១ ប្រាក់បំណុលមានកាន់តែច្រើនឡើង កំណើនអសន្តិសុខ ពិសេសតាំងពីការឡើងកាន់អំណាចរបស់ពួកតាលីបង់នៅអាហ្វហ្កានីស្ថាន ទាំងនេះជាតុល្យការនៃការដឹកនាំរបស់លោកអ៊ីមរ៉ាន់ ខាន់ និងជាហេតុផលដែលគណបក្សដៃគូរបស់លោកបានចូលរួមជាមួយក្រុមគណបក្សប្រឆាំងដើម្បីបណ្តេញលោកចេញពីអំណាច។ នេះដោយនៅមិនទាន់រាប់បញ្ចូលពីភាពឆ្គាំឆ្គងនៅក្នុងនយោបាយការបរទេសដែលក្រុមប្រឆាំងបានចោទប្រកាន់លោកទេ។ បន្ទាប់មក និងបើតាមក្រុមអ្នកវិភាគ លោកអ៊ីមរ៉ាន់ ខាន់ក៏ប្រហែលបាត់បង់ការគាំទ្រពីកងទ័ពដែរ។
តែបញ្ហានៅត្រង់ថា លោកអ៊ីមរ៉ាន់ ខាន់មិនបានមើលឃើញ និងមិនយល់ស្របតាមការលើកឡើងខាងលើនេះទេ។ សម្រាប់នាយករដ្ឋមន្រ្តីប៉ាគីស្ថានរូបនេះ ការប៉ុនប៉ងទម្លាក់លោកពីអំណាចរបស់ក្រុមគណបក្សប្រឆាំងជារឿងខុសនឹងច្បាប់រដ្ឋធម្មនុញ្ញ និងថា ជាសេណារីយ៉ូផ្ចុងផ្តើមដោយមហាអំណាចបរទេស ពិសេសអាមេរិក។ ការហ៊ាននិយាយដូចនេះដោយលោកអ៊ីមរ៉ាន់ ខាន់សំអាងថា អាមេរិកមិនសប្បាយចិត្តដែលឃើញលោកគ្មានជំហរដូចអាមេរិកទាក់ទងនឹងចិន និងរុស្ស៊ី ពិសេសសង្រ្គាមឈ្លានពានរបស់រុស្ស៊ីលើអ៊ុយក្រែន។ មែនទែនទៅ ប៉ាគីស្ថានក្នុងជំនាន់លោកអ៊ីមរ៉ាន់ ខាន់បានរំកិលរកចិនកាន់តែខ្លាំង។ ចំណែកទស្សនកិច្ចផ្លូវការរបស់លោកអ៊ីមរ៉ាន់ ខាន់នៅរុស្ស៊ីក្នុងថ្ងៃដែលរុស្ស៊ីផ្តើមសង្រ្គាមនៅអ៊ុយក្រែន ជាសក្ខីកម្មដែលបញ្ជាក់ពីការដែលប៉ាគីស្ថានខិតចូលរុស្ស៊ីកាន់តែជិត។
ឥឡូវនេះ លោកអ៊ីមរ៉ាន់ ខាន់បានរួចខ្លួនពីការធ្លាក់ពីតំណែងដោយគេមិនដឹងថា តើអាចនឹងរួចខ្លួនដល់ពេលណាទេ។ មានការលើកឡើងថា បើកុំតែមានការជួយគាំទ្រពីកងទ័ព ប្រហែលលោកអ៊ីមរ៉ាន់ ខាន់បានខ្ទាតពីអំណាចក្នុងថ្ងៃអាទិត្យ ទី៣ មេសាបាត់ទៅហើយ។ ចូរកុំភ្លេចថានៅប៉ាគីស្ថាន កងទ័ពជាតួអង្គសំខាន់ខ្លាំងណាស់នៅក្នុងឆាកនយោបាយ។ តាំងពីទទួលបានឯករាជ្យក្នុងឆ្នាំ ១៩៤៧ ប្រទេសអាស៊ីខាងត្បូងមួយនេះបានស្គាល់រដ្ឋប្រហារយោធាជោគជ័យចំនួន ៤ដង និងបានស្គាល់រដ្ឋប្រហារយោធាមិនបានសម្រេចក្នុងចំនួនដូចគ្នានេះ។ ប៉ាគីស្ថានបានស្ថិតក្រោមការដឹកនាំរបស់របបសឹកជាង ៣ ទសវត្សន៍ និងមិនដែលមាននាយករដ្ឋមន្រ្តីណាម្នាក់បានកាន់តំណែងរហូតដល់ចប់អាណត្តិទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ