ពលរដ្ឋកូរ៉េខាងត្បូង ពិចារណាចង់មានអាវុធនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៥:៤០
ប្រឈមមុខនឹងការបាញ់សាកល្បងអាវុធជាច្រើនសន្ធឹក និង ជាញឹកញយពីសំណាក់កូរ៉េខាងជើង គឺនៅទីបំផុត បានធ្វើឲ្យ កូរ៉េខាងត្បូង ពិចារណាងាកទៅរកអាវុធនុយក្លេអ៊ែរ ដើម្បី«ការពារខ្លួន»។ តើហេតុអ្វី ប្រទេសដែលមានសេដ្ឋកិច្ចជឿនលឿនលំដាប់លេខ១១ដូចកូរ៉េខាងត្បូង និងដែលទទួលការធានាការពារពីសំណាក់មហាអំណាចអាមេរិកទៅហើយ បែរជាចង់បានអាវុធនុយក្លេអ៊ែរ ទៅទៀត?
ការចង់ឲ្យកូរ៉េខាងត្បូងមានអាវុធបរមាណូ គឺមិនមែនឋិតលើក្រដាស ឬឋិតលើតុពិគ្រោះគ្នារបស់មន្ត្រីជាន់ខ្ពស់ទៀតនោះទេ។ ពេលនេះ មានការជជែកពិភាក្សានិងពិចារណាព្រោងព្រាតពីសំណាក់ប្រជាជនកូរ៉េខាងត្បូងខ្លួនឯងផង។ តាមការសិក្សាស្ទង់មតិរបស់សហរដ្ឋអាមេរិក គឺពលរដ្ឋកូរ៉េខាងត្បូង ប្រមាណជា៧១ភាគរយ បានសម្តែងមតិយល់ស្របឲ្យប្រទេសខ្លួនមានអាវុធបរមាណូ។ នេះបើតាមមូលនិធិស្រាវជ្រាវ Carnegie Endowment និង Chicago Council on Global Affairs ដែលទីភ្នាក់ងារព័ត៌មានបារាំង AFPផ្សាយឲ្យដឹង។
ចំពោះអ្នកវិភាគ គឺគេមើលឃើញថា មានហេតុផលយ៉ាងហោចបីយ៉ាងសំខាន់ដែលជំរុញឲ្យពលរដ្ឋកូរ៉េខាងត្បូង គិតថាចង់ឲ្យមានអាវុធនុយក្លេអ៊ែរ ក្នុងប្រទេសរបស់ខ្លួន។ ទី១ ការគំរាមកាន់តែខ្លាំងទៅៗពីសំណាក់កូរ៉េខាងជើង។ ទី២ សង្គ្រាមឈ្លានរុស្ស៊ីទៅលើអ៊ុយក្រែនថ្មីៗនេះ ហើយទី៣ ការសង្ស័យថាខែលការពាររបស់អាមេរិក គឺមិនអាចជួយខ្លួនបានសុវត្ថិភាពទាំងស្រុង។
-កូរ៉េខាងជើងជាគ្រោះថ្នាក់
ដើមឆ្នាំ២០២២ កូរ៉េខាងជើង បានធ្វើតេស្តបាញ់បង្ហោះអាវុធកាន់តែញឹក ហើយពេលថ្មីៗនេះ កូរ៉េខាងជើងបានបាញ់សាកល្បងគ្រាប់មីស៊ីលបាលីស្ទិកអន្តរទ្វីប ដែលមានកម្លាំងខ្លាំងមិនធ្លាប់មានគិតតាំងពីឆ្នាំ ២០១៧។ ចំណែក ការសាកល្បងអាវុធនុយក្លេអ៊ែរ កូរ៉េខាងជើងធ្វើចំនួន ៧ដងគិតតាំងពីឆ្នាំ ២០០៦។ លើកទី៧គឺនៅពេលថ្មីៗនេះ។
កូរ៉េខាងជើង បានធ្វើតេស្តបាញ់អាវុធ តាំងតែពីឆ្នាំ២០០៦មក រហូតដល់ឆ្នាំ២០១៧ មុននឹងផ្អាក ដើម្បីបើកផ្លូវចរចាជាមួយរដ្ឋាភិបាលអាមេរិកលោក ដូណាល់ ត្រាំ។ គិតចាប់ពីលោក ចូ បៃដិន បានចូលកាន់អំណាច, កូរ៉េខាងជើង បានសាកល្បងមីស៊ីល ចំនួនជាង១០លើក (១៣-១៤) ក្នុងនោះមានគឺមានអាវុធមីស៊ីលបាលីស្ទីក ដែលអាចបំពាក់ក្បាលគ្រាប់នុយក្លេអ៊ែរថែមទៀតផង។ កូរ៉េខាងជើង ព្យាយាមផលិតក្បាលនុយក្លេអ៊ែរខ្នាតតូច ដើម្បីបំពាក់លើគ្រាប់មីស៊ីលបាលីស្ទិកអន្តរទ្វីប ICBM។
ថ្ងៃទី២៦ មេសា កូរ៉េខាងជើង ប្រារព្ធខួបគម្រប់ ៩០ឆ្នាំនៃការបង្កើតកងទ័ពប្រជាមានិតកូរ៉េ មានការដង្ហែរក្បួនព្យុះហយាត្រាកងទ័ពយ៉ាងសម្បើម ក្នុងក្រុងព្យុងយ៉ាង។ នាឱកាសដ៏មហាឡារឹកនោះ លោក គីម ជុងអ៊ុន ប្រធានាធិបតីបុរសខ្លាំងកូរ៉េខាងជើង បានបញ្ជាក់ពីការចង់ពង្រឹងសមត្ថភាពអាវុធនុយក្លេអ៊ែរដែលលោកយល់ថា ជានិមិត្តរូបនៃកម្លាំងជាតិ និងជាបេះដូងនៃកម្លាំងទ័ពដ៏ខ្លាំងរបស់កូរ៉េខាងជើង។
ទាំងបងប្រុសលោក គីម ជុងអ៊ុន និងប្អូនស្រី គីម យ៉ូជុង សុទ្ធតែបានព្រមានពីការអាចប្រើអាវុធនុយក្លេអ៊ែរនៅពេលដែលផលប្រយោជន៍របស់ប្រទេសទទួលរងការគំរាមកំហែង។
-ការឈ្លានពានរុស្ស៊ីទៅលើអ៊ុយក្រែន
អំលុងទសវត្សរ៍១៩៧០ កូរ៉េខាងត្បូង បានមានគម្រោងកម្មវិធីផលិតអាវុធនុយក្លេអ៊ែរដោយខ្លួនឯងដែរ តែក៏បោះបង់គម្រោងនេះចោលទៅវិញ ជាថ្នូរនឹងការធានាអះអាងជួយរក្សាសន្តិសុខសុវត្ថិភាពពីសំណាក់សហរដ្ឋអាមេរិក។ កងទាហានអាមេរិក ប្រមាណជាជិត៣ម៉ឺននាក់ បានឈរជើងជាប្រចាំនៅកូរ៉េខាងត្បូង ដើម្បីត្រៀមប្រឆាំងទប់ទល់នឹងបងប្អូនគូសត្រូវកូរ៉េខាងជើង។
ចំពោះសង្គ្រាមដែលផ្ទុះឡើងនៅអ៊ុយក្រែន គឺបានជំរុញសាធារណៈមតិកូរ៉េខាងត្បូងកាន់តែខ្លាំង។ ពីព្រោះថា ពីដើមឡើយ នៅជំនាន់សហភាពសូវៀត ទីក្រុងកៀវរបស់អ៊ុយក្រែនសព្វថ្ងៃ មិនបានទទួលខ្លួនធ្វើជាកន្លែងស្តុកបញ្ជាប្រតិបត្តិការនុយក្លេអ៊ែរទេ តែសុទ្ធចិត្តទទួលការធានាជួយការពារពីប្រទេសដទៃ។ រហូតមកពលនេះ អ៊ុយក្រែន ត្រូវរងគ្រោះ ព្រោះតែសង្គ្រាមដែលគេស្មានមិនដល់។ លោក Park Won-gon សាស្ត្រាចារ្យជំនាញឧបទ្វីបកូរ៉េ នៅសកលវិទ្យាល័យ Ewha ក្នុងក្រុងស៊េអ៊ូល មានប្រសាសន៍ថា សង្គ្រាមមួយដែលគេស្មានមិនដល់ផង ក៏វាអាចកើនឡើងបានដែរ ហេតុនេះការមានពង្រឹងមធ្យោបាយការពារខ្លួន គឺកិច្ចការសំខាន់ចាំបាច់បំផុត។
-ប្រព័ន្ធខែលការពាររបស់អាមេរិក
ប្រធានាធិបតីកូរ៉េខាងត្បូងជាប់ឆ្នោតថ្មីថ្មោង លោក យូន ស៊ុកយោល ដែលត្រូវចូលកាន់តំណែងជាផ្លូវការនៅថ្ងៃទី១០ ឧសភាខាងមុខ គឺមិនទាន់សម្រេចពង្រឹងវិស័យការពារខ្លួនដោយអាងលើបរមាណូទេ។ លោកយូន ស៊ុកយោលធ្លាប់បានចាត់ទុកកូរ៉េខាងជើងជាសត្រូវទី១ របស់កូរ៉េខាងត្បូង ប៉ុន្តែក្នុងយុទ្ធនាការបោះឆ្នោត លោកពុំបានជំរុញឲ្យមានអាវុធនុយក្លេអ៊ែរនៅក្នុងប្រទេសទេ ហើយលោកឲ្យតម្លៃខ្លាំងទៅលើប្រព័ន្ធខែលការពាររបស់អាមេរិក។ អ្នកវិភាគស្ថានការណ៍ ក៏មើលឃើញថា ប្រធានាធិបតីអាមេរិក លោក ចូ បៃឌិន ក៏ទំនងជាយល់ថា មិនទាន់មានការចាំបាច់ខ្លាំង ដែលតម្រូវឲ្យកូរ៉េខាងត្បូងបំពាក់អាវុធបរមាណូនោះដែរ។ ផ្ទុយទៅវិញ ពលរដ្ឋកូរ៉េខាងត្បូងប្រមាណជា៥៦ភាគរយ ដែលត្រូវវិទ្យាស្ថានអាមេរិកបានស្ទង់មតិ គឺបានសម្តែងការសង្ស័យថាប្រព័ន្ធខែលការពាររបស់អាមេរិក គឺមិនអាចជួយខ្លួនបានសុវត្ថិភាពទាំងស្រុងឡើយ។
ទោះជាដូចម្តេចក្តី អ្នកជំនាញសង្កេតការណ៍ អះអាងថា ការរក្សាស្ថានភាពណ៍ការពារខ្លួនរបស់កូរ៉េខាងត្បូង ប៉ុនបច្ចុប្បន្ននេះ គឺបានហើយ ព្រោះវាមិនខាតបង់ធ្ងន់លើផ្នែកនយោបាយ មិនចំណាយច្រើនលើផ្នែកសេដ្ឋកិច្ច ហើយក៏មិនបង្កបញ្ហាស្មុគស្មាញក្នុងតំបន់កាន់តែធ្ងន់ ជាងនេះទៀត ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ