ស្រីលង្កា ទាមទារទម្លាក់ប្រធានាធិបតី ព្រោះតែវិបត្តិសេដ្ឋកិច្ចធ្ងន់ធ្ងរ
ចុះផ្សាយនៅថ្ងៃ៖
ស្តាប់ - ០៥:៣០
នៅស្រីលង្កា ជាច្រើនសប្តាហ៍មកហើយ ដែល ប្រជាពលរដ្ឋ រាប់ពាន់នាក់ ធ្វើបាតុកម្មទម្លាក់រដ្ឋាភិបាល និងទាមទារដេញប្រធានាធិបតីចេញពីតំណែង។ ដើមហេតុព្រោះតែវិបត្តិសេដ្ឋកិច្ចធ្ងន់ធ្ងរ ដែលហ្វូងបាតុករ បានចង្អុរមុខថ្នាក់ដឹកនាំប្រទេស ថាជាអ្នកទទួលខុសត្រូវ។ នៅក្រុងកូឡុំបូ (Colombo) ក្រុមអ្នកតវ៉ាមួយចំនួន អះអាងថាមិនបញ្ឈប់បាតុកម្មឡើយ បើគ្មានការផ្លាស់ប្តូររដ្ឋាភិបាលទេ។ តើមូលហេតុអ្វីបានជា ស្រីលង្កា ធ្លាក់ដល់ដំណាក់កាលនេះ?
-ប្រជាជាតិខ្វះសព្វខ្វះគ្រប់
មានប្រជាជន២២លាននាក់ ស្រីលង្កា កំពុងតែជួបវិបត្តិសេដ្ឋកិច្ចយ៉ាងធំ។ មានអតិផរណាទំនិញ ទំនិញឡើងថ្លៃ លុយធ្លាក់ថោក ហើយរដ្ឋជំពាក់បំណុលគេ ងើបកលែងរួច។ ប្រជាពលរដ្ឋភាគច្រើន ខ្វះសព្វខ្វះគ្រប់ ខ្វះស្បៀងអាហារ ខ្វះថ្នាំសង្កូវ មិនតែប៉ុណ្ណោះ គឺខ្វះប្រេងសាំង និង ដាច់ភ្លើងអគ្គិសនី។
ទូរទស្សន៍បារាំងលេខ២ -France 2- បានបញ្ចូនអ្នកកាសែតទៅសម្ភាសផ្ទាល់ និងបានជួបគ្រួសារស្រីលង្កាមួយដែលរៀបរាប់ថា ភ្លើងអគ្គិសនីដាច់ជាប្រចាំ ដាច់ម្តងៗ ៧-៨ម៉ោង។ ពួកគេខឹង ព្រោះកូនចៅគ្មានភ្លើងសម្រាប់រៀនសូត្រឬធ្វើលំហាត់កិច្ចការសាលា។ ពេលខ្លះ គេក៏ចាំបាច់បង្ខំចិត្តអុជភ្លើងទៀនបំភ្លឺ។ ចំណែក កាសែតក្នុងស្រុករាយការណ៍ថា ស្ថានីយប្រេងឥន្ទនៈ គ្មានសាំងសម្រាប់ចាក់យានយន្ត។ ម៉ូតូឡានខ្លះ ត្រូវចតបន្តកន្ទុយគ្នាជាច្រើនថ្ងៃមកហើយ។
ការកត់សម្គាល់មួយទៀត គឺឧស្ម័នហ្គាស ដែលប្រជាជនត្រូវការប្រើរាល់ថ្ងៃ ដូចជាសម្រាប់ចម្អិតម្ហូបអាហារ ក៏អស់ទៀត។ សល់ហ្គាសតិចតួចបំផុត និងតម្លៃថ្លៃកប់ពពក។ ថ្នាំពេទ្យវិញ ក៏ដាច់ស្តុក។ ចំពោះអ្នកជំងឺដែលត្រូវទទួលទានថ្នាំពេទ្យជាប្រចាំ គឺរងការលំបាកមែនទែន ព្រោះគ្មានថ្នាំពេទ្យនាំចូល។ រីឯសេវាកម្មរដ្ឋបាលជាច្រើនផ្នែកត្រូវជាប់គាំង។
«យើងរស់នៅលំបាកវេទនាណាស់។ រដ្ឋាភិបាលត្រូវតែចុះចេញពីតំណែង ហើយទុកកន្លែងឲ្យមនុស្សមានសមត្ថភាព ដឹកនាំស្រុកទេសម្តង។» នេះជាសំឡេងទុក្ខព្រួយរបស់ប្រុសចាស់ម្នាក់ ដែលស្រែកចេញពីហ្វូងបាតុករ និងដែលត្រូវអ្នកកាសែតទីភ្នាក់ងារបារាំង AFP ស្រង់សម្តីបាន។ ទន្ទឹមគ្នានឹងនេះ ក្រុមសហព័ន្ធសហជីពឧស្សាហកម្មធំៗចំនួន២៣ បញ្ជាក់ក្នុងសេចក្តីថ្លែងការណ៍មួយថា វិបត្តិសេដ្ឋកិច្ចក្នុងស្រុកនេះ នាំឲ្យផ្នែកឯកជនរងគ្រោះថ្នាក់ខាតបង់ធំ ហើយនិងនាំឲ្យមនុស្សរាប់លាននាក់ បាត់បង់ការងារធ្វើ ។ ប្រធានសមាគមកៅស៊ូ Rohan Masakorala និយាយថា ភាពអសកម្មខាងនយោបាយនិងខាងសេដ្ឋកិច្ច មិនអាចត្រូវអូសបន្លាយយូរតទៅទៀតទេ។ យើងត្រូវការរដ្ឋាភិបាលថ្មី ក្នុងពេលដ៏ឆាប់បំផុត។
-ការដឹកនាំប្រទេសគ្រួសារនិយម
បាតុកម្មនៅក្រុងកូឡុំបូ និងតាមតំបន់នាន មានការចូលរួមពីមនុស្សរាប់ពាន់នាក់ និងក្រុមហ៊ុនឯកជនជាច្រើន រួមទាំងខាងវិហារគ្រិស្តសាសនាផង ក៏បានចូលរួមបាតុកម្មដែរ។ ក្រុមអ្នកតវ៉ាស្រីលង្កា បានចោទប្រកាន់ពួកលោក រ៉ាចាប៉ាក់សេ -Rajapaksa- ទាំងបងទាំងប្អូន ម្នាក់ជាប្រធានាធិបតី ម្នាក់ជានាយករដ្ឋមន្ត្រី ថាអសត្ថភាព មិនចេះចាត់ចែងដោះស្រាយបញ្ហាសេដ្ឋកិច្ចជាតិ និងជាដើមហេតុនៃវិបត្តិសេដ្ឋីដ៏ធ្ងន់ធ្ងរ មិនធ្លាប់មាន គិតចាប់តាំងពីប្រទេសនេះបានឯករាជ្យពីអង់គ្លេសនៅឆ្នាំ ១៩៤៨មក។
-ជំពាក់បំណុលបរទេសធ្ងន់កទ្រាំទ្រលែងរួច
ចាប់តាំងពីឆ្នាំ២០១៧ សុខភាពសេដ្ឋកិច្ចស្រីលង្កាមិនល្អសោះ។ ពេលនោះ រដ្ឋាភិបាលទីក្រុងកូឡុំបូ (Colombo) បានប្រកាសថា អស់សមត្ថភាពសងបំណុលចិន ហើយសម្រេចជាថ្នូរឲ្យរដ្ឋបាលក្រុងប៉េកាំងយកកំពង់ផែមួយ និងកាន់កាប់រយៈពេល៩៩ឆ្នាំ។
នៅពាក់កណ្តាលខែមេសាឆ្នាំ២០២២ ប្រទេសស្រីលង្កាប្រកាសពីការជំពាក់បំណុលបរទេស ដ៏ធ្ងន់កទ្រាំទ្រលែងបាន គឺដល់ចំនួន៥១ពាន់លានដុល្លារ។ ប្រឈមមុខនឹងវិបត្តិសេដ្ឋកិច្ច រួមជាមួយវិបត្តិកូវីដ១៩ផង រដ្ឋាភិបាលក្រុងកូឡុំបូ បានស្នើសុំជំនួយពី មូលនិធិរូបិយវត្ថុអន្តរជាតិ FMI។ ថ្នាក់ដឹកនាំអង្គការនេះថាអាចនឹងឲ្យខ្ចី តែគេកំពុងតាមដាននយោបាយនិងសេដ្ឋកិច្ចប្រទេសនេះសិន។ ទោះយ៉ាងម្តេចក្តី ដំណើរការចរចាខ្ចីលុយនេះទំនងជាអាចស៊ីពេលយូរ រហូតដល់ចុងឆ្នាំឯណោះ។ នៅថ្ងៃពុធទី៤ឧសភា អ្នកដឹកនាំស្រីលង្ហា ឲ្យដឹងថាបានជជែកគ្នាជាមួយ ធនាគារពិភពលោក ដើម្បីសុំជំនួយពី៣០០ទៅ៧០០លានដុល្លារ។
តាមកាសែតក្នុងស្រុក គឺ រដ្ឋាភិបាលស្រីលង្ហា បានបាត់បង់សំឡេងភាគច្រើនក្នុងសភាជាតិ និងត្រូវគេដកទំនុកចិត្តពីរដ្ឋមន្ត្រីហិរញ្ញវត្ថុ។ ទន្ទឹមនឹងគ្នានេះ រដ្ឋាភិបាលស្រីលង្កា ក៏បានសម្រេចពីពេលថ្មីៗ ផ្លាស់ប្តូរតំណែងអគ្គទេសាភិបាលធនាគារជាតិ ដើម្បីឲ្យអ្នកថ្មីជួយធ្វើយ៉ាងម៉េច ដំឡើងតម្លៃលុយឡើងវិញ។ តុល្យការបឋម ថ្នាក់ដឹកនាំស្រីលង្ហា ថាប្រទេសជាតិខ្លួន អាចត្រូវការជំនួយទឹកប្រាក់ប្រមាណ ៣ពាន់លានដុល្លារ ដើម្បីដោះស្រាយបញ្ហាចំពោះមុខ។
-មិនអនុញ្ញាតការស៊ើបអង្កេតករណីបង្ក្រាបបាតុករ
កន្លងទៅ អង្គការសហប្រជាជាតិ បានតាមដានសង្កេតស្ថានការណ៍នៅស្រីលង្កាយ៉ាងជាប់លាប់ និងបានស្នើឱ្យរដ្ឋាភិបាលដោះស្រាយបញ្ហាអាសន្នជាតិ ជាបន្ទាន់។ ចំពោះបាតុកម្មនៅក្នុងស្រុកស្រីលង្កា ឧត្តមស្នងការសិទ្ធិមនុស្ស នៃអង្គការសហប្រជាជាតិ និងអង្គការអន្តរជាតិផ្សេងៗខាងសិទ្ធិមនុស្ស បានជំរុញឲ្យរដ្ឋអំណាចស្រីលង្កាចរចាជាមួយអ្នកទាមទារ ស្តាប់សំណូមពររាស្ត្រ និងរៀបចំឱ្យក្រុមបាតុករធ្វើបាតុកម្មដោយអហិង្សា។ ក៏ប៉ុន្តែ ការប៉ះទង្គិចគ្នាដោយអំពើហិង្សា នៅតែមាន ដែលបណ្តាលឲ្យមានស្លាប់និងរបួសរាប់ពាន់នាក់។ រដ្ឋអំណាចស្រីលង្កា ថែមទាំងមិនអនុញ្ញាតឱ្យមានការស៊ើបអង្កេតចំពោះការបង្ក្រាបបាតុករទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ